Read tyap Ma̱rkut 5 Bible Online

Ma̱rkut 5 - tyap bible

Ma̱rkut 5

¹Yesu ma̱ng mman ta̱m nggu na si̱ byia̱k a̱gba̱ndang jok Ga̱lili á̱ tyak. Ba̱ si̱ tat fam a̱byin Ga̱ra̱sinawa[30].

²Mi̱ di̱ chyok Yesu mi̱ kukwon a̱wak hu, a̱tyok a̱ghyang a̱ byia̱ á̱ka̱tuk ntswá a̱ni, si̱ kin ghwut a̱ neet mi̱ kuu nang á̱ nsaai nkwom a̱ni, a̱ si̱ bai a̱ ba̱ myim ma̱ng a̱nggu!

³A̱tyu a̱wa ku swan mi̱ kuu nang á̱ nsaai nkwom a̱ni. Á̱ mbyia̱ a̱tyu a̱ si̱ mi̱n da̱p gu a̱ni bah, ku ma̱ng a̱nyanyang wa.

⁴Jen ma̱ a̱di̱di̱t á̱ ka̱n mai vwuoi nggu a̱ti̱tak ma̱ng mbwak ma̱ng a̱nyanyang. A̱wot a̱ ni̱ chak a̱nyanyang wu ma̱ a̱ti̱tak ba ma̱ng mbwak na. Á̱ bu mbyia̱ a̱tyu a̱ byia̱ chet a̱ si̱ mi̱n da̱p gu a̱ni bah.

⁵A̱ta̱mam ma̱ng a̱tyetuk, a̱ ni̱ chong a̱ kat tsutsok ma̱ng kuu nang á̱ nsaai nkwom a̱ni. A̱ tyei nkun mi̱ chet a̱ bu khang vam nggu hu ma̱ng nfang.

⁶Nang gu ndi Yesu ni̱ shya̱ ti̱taa a̱ni, a̱ si̱ kin doot di̱n chung, a̱ si̱si̱ kpaat a̱khwukhwut a̱zaghyi nggu!

⁷A̱ si̱ kin tyia̱ kun mi̱ chet nyia̱, “Yesu, Nggwon A̱gwaza Tswazwa, a̱ swak mi̱ a̱kyenkyai shi a̱ni, yihwa nang a nda̱u nung a̱nia? Shyi da̱ a̱lyoot A̱gwaza, a na tyia̱ nung swuo a̱bung bah!”

⁸A̱ hyia̱ a̱nia mat Yesu ka̱n kam gu nyia̱ “Nwan a̱ka̱tuk ntswa, ghwut a ghwon a̱tyok wuni!”

⁹A̱jawa Yesu si̱ lyip gu, “Á̱ ngyei ang a̱nyan?” A̱ si̱ nyia̱, “Á̱ ngyei nung ‘A̱di̱di̱t’, mat zi̱ shi á̱kpa.”

¹⁰A̱wot a̱ si̱ ya a̱son mi̱ naai Yesu gu yok vwuong mba ba̱ swan ma̱ a̱byin a̱kya bah.

¹¹A̱gba̱ndang a̱sorong a̱yaakusuru ku ya a̱beam tsok ji̱ shya̱ kpa̱mkpaan a̱ja a̱ni.

¹²Á̱ka̱tuk ntswá ba si̱ naai Yesu nyia̱, “Ta̱m nzi̱t ma̱ sorong a̱yaakusuru ka! Yok zi̱t, zi̱ nwuo ma̱ a̱mba.”

¹³Yesu si̱ shim ba ndyo. A̱jawa á̱ka̱tuk ntswá ba si̱ ghwut da̱ a̱tyu a̱wa. Ba̱ si̱ nwuai ma̱ sorong a̱yaakusuru ka. A̱mgba̱m a̱sorong a̱yaakusuru ka ku yet chyikwop sweang ja; ba̱ si̱ kpa̱k á̱ neet da̱ a̱gut wu, ba̱ si̱si̱ kwa̱i mi̱ njok ji ba̱ si̱ kwi!

¹⁴Á̱niet chok a̱sorong a̱yaakusuru ba, si̱ tyong, ba̱ si̱si̱ shei nkhang na ma̱ a̱gba̱ndang a̱keang wu mbeang a̱bachyuang a̱ka̱keang na. Á̱niet ma̱ a̱di̱di̱t si̱ ghwut, ba̱ si̱ nat ba̱ li kyang hu ku bai a̱ni.

¹⁵Nang ba̱ mbai da̱ a̱vwuo Yesu a̱ni, ba̱ si̱ li a̱tyu a̱ ku byia̱ á̱ka̱tuk ntswá ba a̱ni; nang gu kup a̱yaatoot a̱ swan ma̱ng fwuo gu nyiung. A̱wot ba̱ si̱ fa̱k a̱wun ba̱t!

¹⁶Á̱niet ba̱ ku li kyang hu á̱ nyia̱ a̱ni, si̱ tak ma̱ng á̱kum á̱niet ka kyang ku shya̱ a̱tyu byia̱ á̱ka̱tuk ntswá ba a̱ni, ma̱ng a̱sorong a̱yaakusuru ka a̱ni.

¹⁷A̱jawa á̱niet ba si̱ nwuo naai Yesu, gu ghwon fam a̱byin mba hu.

¹⁸Nang Yesu ndoot a̱ na nwuo kukwon a̱wak hu a̱ni, a̱tyu a̱ ku byia̱ á̱ka̱tuk ntswá ba a̱ni, si̱ naai a̱ khwi Yesu.

¹⁹Yesu si̱ shim gu ndyo bah. A̱wot a̱ si̱ nyia̱ ma̱ng a̱nggu, “Nat a̱mali, a si̱ tak ma̱ng kyang bwak ang hu shok nang A̱gwaza wu nyia̱ ang ndyo a̱ni, ma̱ng si̱sak nang A̱gwaza nfa̱k kunak ang a̱ni.”

²⁰Huhwa a̱tyu a̱wa si̱ nkat, a̱ si̱ nwuo shei nkhang nkyang nang Yesu nyia̱ nggu ndyo a̱ni; a̱ kat a̱baka̱keang swak nang á̱ ngyei “Dikafolit” a̱ni. A̱mgba̱m á̱niet ba si̱ fa̱k a̱ga̱de.

²¹Jen nang Yesu bu ku mbyia̱k a̱gba̱ndang jok wu mi̱ kukwon a̱wak hu a̱ bwuok a̱ nat a̱ma̱nyi keniaau a̱ni; á̱kpa á̱niet ka si̱ tyong gu á̱ keang nang gu ni̱ shya̱ a̱beam a̱gba̱ndang jok ka.

²²Yayirut, a̱tyu a̱ ku yet a̱kwak a̱son mi̱ tutu a̱tung A̱yahudawa hu a̱ni, si̱ bai a̱ja. Nang gu ndi Yesu a̱ni, a̱ si̱ ta̱bwak a̱zaghyi nggu.

²³A̱ si̱ naai nggu a̱fat a̱sa̱kut nyia̱, “Ma̱ a̱da̱dei nggwon a̱nap nung wu fa̱k nyinyang bah, ka̱ chat a̱khwu! Bai a sak ka mbwak ang na, da̱nian ka̱ ka choot, ka̱ bu swuan!”

²⁴Huhwa Yesu si̱ nat ndung ma̱ng a̱nggu. Á̱kpa á̱niet ma̱ a̱di̱di̱t si̱ khwi á̱ fam guu.

²⁵A̱wot mami mba, a̱byii̱k a̱ghyang ku nshya̱, nang gu bwuo mbwak a̱ si̱ nyia̱ a̱lyia̱ swak ma̱ a̱feang nang a̱sok na tyong, da̱ na na̱ yong bah.

²⁶Nang gu ka̱ ndyiai a̱mgba̱m nkyang gu byia̱ a̱ni di̱ chong da̱ a̱vwuo á̱niet a̱ki̱kan, a̱ si̱ swuo a̱bung mbwak ba, da̱ a̱nggu a̱ choot bah. Da̱ a̱kwonu a̱kya, zwan ji sii wa mban wa ba̱t.

²⁷Nang gu nfa̱k nkhang Yesu na a̱ni, a̱ si̱ khwi nggu lilyim ma̱ á̱kpa á̱niet ka, a̱ si̱ byiam a̱junjung a̱toot Yesu wu.

²⁸Mat a̱ ku nyia̱ a̱di̱dam nyia̱, “Ki̱ n wa si̱ mi̱n byam ma̱ a̱junjung a̱toot nggu wu ma̱nyin gu, n na nchoot.”

²⁹Nang gu si̱ mbyiam a̱junjung a̱toot Yesu wu a̱ni, ma̱nang but á̱ghyi a̱ni, tyong a̱sok hu si̱ kin gyong! A̱ si̱ fa̱k mi̱ vam nggu hu si̱sak ji nang Yesu nchoot gu a̱ni.

³⁰Mi̱ di̱ yong a̱hwa, Yesu si̱ kin fa̱k si̱sak ji chet choot á̱niet hu nghwut ma̱ a̱nggu a̱ni. Huhwa a̱ si̱ bwuak, a̱ si̱ lyip mami á̱kpa á̱niet ka nyia̱, “A̱nyan wa byiam a̱junjung a̱toot nung wu?”

³¹Mman ta̱m nggu na si̱ nwuak gu shim, nyia̱, “A̱tyoli, a li si̱sak ji nang á̱kpa á̱niet ka nfam ang a̱ni baa? Yihwa mbyia̱ a ndyi̱ri̱m a̱tyu a̱ byiam ang a̱ni?”

³²A̱wot Yesu si̱ ya a̱son ma̱ng nwuan ke a̱ na li a̱tyu a̱ byiam gu a̱ni.

³³Nang a̱byii̱k wu nfi̱k kyang hu á̱ nyia̱ gu ndyo a̱ni, a̱ si̱ neet a̱ bai ma̱ng a̱wun, ma̱ng tyi̱ri̱m vam, a̱ si̱ ba̱ ta̱bwak a̱zaghyi Yesu. A̱ si̱ kwok gu a̱tsak a̱lyiat wu.

³⁴Yesu si̱ nyia̱ ma̱ng nggu, “Nggwon nung, nwuak fwuo ang hu choot ang. Nat ma̱ng a̱lyia̱ sai, a fwung di̱ swuo a̱bung ang hu!”

³⁵Neet nang Yesu ni̱ shya̱ da̱ a̱lyiat na, á̱ghyang á̱niet si̱ kin neet mali Da̱ri̱yut á̱ bai. Ba̱ si̱ nyia̱ ma̱ng a̱nggu, “Nggwon a̱nap ang ka khwu. Yok tyia̱ a̱tyu tyiet wu dyem bah.”

³⁶A̱wot nang Yesu nggup kyang hu ba̱ lyiat a̱ni a̱ fa̱k, a̱ si̱ nyia̱ ma̱ng Da̱ri̱yut a̱kwak a̱son tutu a̱tung A̱yahudawa wu, “Yok fa̱k a̱wun bah! Nwuak fwuo da̱ nung!”

³⁷Yesu si̱ shim a̱yin a̱ khwi gu bah, mi̱ Bitut ma̱ng Yakubu mbeang Yoona a̱na̱nyiuk Yakubu wu; bibya si̱ khwi nggu.

³⁸Ba̱ si̱ ntat a̱li a̱kwak a̱son tutu a̱tung A̱yahudawa hu a̱ni, Yesu si̱ li a̱vwuo ka nurung nang á̱ shya̱ da̱ a̱nak á̱ tyiet nkun mi̱ chet.

³⁹A̱ si̱ nwuo a̱mali ka a̱ si̱ nyia̱ ma̱ng a̱mba, “Yihwa mbyia̱ nyi ntyia̱ ma̱ tai bu ntwei? Nggwon ka khwu bah, ka̱ shya̱ mi̱ nda nia.”

⁴⁰A̱wot ba̱ si̱ nwuo mai nggu mai lihyat. Nang gu ntyia̱ ba̱ si̱ ghwut a̱ni, a̱ si̱ kyiak a̱tyia̱ nggwon wu ma̱ng a̱yang wu, mbeang mman ta̱m nggu na a̱tat; a̱ si̱ nwuo da̱ a̱vwuo ka nang á̱ myiai kwom nggwon hu a̱ni.

⁴¹Yesu si̱ ta̱bat ka di̱ mbwak. A̱ si̱ nyia̱ ma̱ng a̱nka da̱ a̱lyem A̱ra̱mik, “Talita kumi!” Huhwa yet, “A̱banggwon neam, doot!”

⁴²Mi̱ di̱ yong a̱hwa a̱banggwon neam ka si̱ kin doot, ka̱ si̱ nwuo chong a̱ kat! (Ka̱ ku yet a̱lyia̱ swak ma̱ a̱feang kya). Si̱ huni si̱ tyia̱ ba̱ si̱ fa̱k a̱ga̱de gba̱mgbam.

⁴³Yesu si̱ khwat ba a̱fufwuo nyia̱ ba̱ yok hyia̱ ma̱ng a̱yin nkhang nani bah. A̱ si̱ nyia̱ ma̱ng a̱mba, ba̱ nang nggwon ka kyayak ka̱ ya.