Read tyap Ma̱rkut 8 Bible Online

Ma̱rkut 8 - tyap bible

Ma̱rkut 8

¹Di̱n jen a̱ja, á̱kpa á̱ghyang á̱niet ma̱ a̱di̱di̱t si̱ bu tung. Nang ba̱ bu byia̱ kyang ba̱ na ya a̱ni bah, Yesu si̱ yorong mman ta̱m nggu na a̱ si̱ nyia̱ ma̱ng a̱mba,

²“N fwuong kunak á̱niet bani, mat ba̱ shya̱ ma̱ng a̱nung mam tat nia na. A̱wot ma̱nini, ba̱ bu bwat kyayak nang ba̱ na ya a̱ni bah.

³Ki̱ n ti̱n mba zong nyia̱ ba̱ nkat a̱mali, á̱ghyang á̱niet na feang di̱n vak. Mat á̱ghyang ma̱ mba neet gbang.”

⁴Mman ta̱m nggu na si̱ nwuak gu shim nyia̱, “A̱wot ma̱ a̱ji wa, mi̱ tswa a̱yit jini nang a̱yin na nshya̱ kyayak ku na maai á̱niet bani a̱ni?”

⁵Yesu si̱ ma ndyip ba, nyia̱, “Burodi a̱mang wa nang nyi byia̱?” Ba̱ si̱ nyia̱, “Burodi a̱natat wa.”

⁶Yesu si̱ nyia̱ ma̱ng á̱kpa á̱niet ka ba̱ swan a̱byin. Nang gu nkyiak burodi a̱natat wu a̱ni, a̱ si̱ gwai A̱gwaza. A̱ si̱ kpa̱ra̱m, a̱ si̱ nwuat mman ta̱m nggu na, ba̱ ka̱u á̱niet ba. A̱wot ba̱ si̱ ma nyia̱ a̱nia.

⁷Ba̱ si̱ bu shya̱ ma̱ng fa̱n ma̱ a̱da̱dei. Yesu si̱ bu gwai A̱gwaza di̱ fa̱n hu, a̱ si̱ nyia̱ ma̱ng mman ta̱m na, ba̱ ka̱u á̱niet ba.

⁸Kuzang a̱yin si̱ ya, a̱ si̱ swa. Mman ta̱m na si̱ kwok á̱kukum ba̱ bwat a̱ni, á̱ hyaai a̱cha̱chet a̱ka̱cheang a̱natat.

⁹Á̱ si̱ tyan á̱kpa á̱niet ba̱ ya kyayak hu a̱tuk a̱kya a̱ni, nang chyikwop nyaai a̱ni. A̱wot nang ba̱ ngya á̱ tyak a̱ni, Yesu si̱ ti̱n mba, ba̱ si̱ nkat.

¹⁰Mi̱ di̱ yong a̱hwa, Yesu si̱ nwuo kukwon a̱wak hu ma̱ng mman ta̱m nggu na. Ba̱ si̱ wak á̱ byia̱k a̱gba̱ndang jok wu, á̱ nat fam a̱byin Da̱lma̱nuta.

¹¹Nang A̱fa̱risawa á̱ghyang nfa̱k nkhang nyia̱ Yesu bai a̱ni, ba̱ si̱ bai da̱ a̱vwuo Yesu. Ba̱ si̱ ta̱bat fwuang ma̱ng a̱nggu. Ba̱ chat mak gu. A̱wot ba̱ si̱ nyia̱ ma̱ng a̱nggu, gu nyia̱ mba kyang a̱ga̱de ku neet Ma A̱gwaza tswazwa ku yet a̱lama a̱ tak tyok nggu hu a̱ni.

¹²Yesu si̱ khwat a̱junjung swuan, a̱ si̱ nyia̱, “Ka̱a̱t! Yihwa mbyia̱ nang che jini ngyong mi̱ di̱ chat li nkyang a̱ga̱de na̱ yet a̱yaalama na̱ tak tyok nung hu a̱ni? N tak nyin a̱tsak a̱lyiat, á̱ mbyia̱ kyang a̱ga̱de nang á̱ na tak nyin a̱ni bah.”[38]

¹³A̱wot a̱ si̱ ghwon mbaa, a̱ si̱ bwuok a̱ nat, a̱ si̱ nwuo kukwon a̱wak hu. Ba̱ si̱ bu wak á̱ byia̱k á̱ nat a̱ma̱nyi a̱gba̱ndang jok ka.

¹⁴Mman ta̱m Yesu na ku mi̱ mbwung ba̱ kyiak burodi da̱nian a̱chyet ka; si̱ ma̱ burodi a̱nyiung[39] wa ba̱ si̱ kyiak mi̱ kukwon a̱wak hu.

¹⁵Nang ba̱ nshya̱ di̱ byei a̱gba̱ndang jok wu a̱ni, Yesu si̱ gba mba nyia̱, “Nyi ta̱bam! Nyi bu chok á̱pyia̱ nyin di̱ yit[40] A̱fa̱risawa ma̱ng a̱si̱ Hiridut wu.”[41]

¹⁶Ba̱ si̱ ya fwuang tsi̱tsak mba nyia̱, “A̱ hyia̱ a̱nia mat zi̱ ba̱ng burodi[42] bah.”

¹⁷Yesu ku lyen kyang ba̱ lyiat a̱ni, gu si̱ nyia̱ ma̱ng a̱mba, “Yihwa mbyia̱ nang nyi ngya fwuang tazwa sang burodi á̱ghyang? Ba̱ng ba̱ tat a̱fwun nyi lyen, nyi si̱ bu fi̱k baa? Nfwuo nyin na tyia̱ gba̱pdok waa?

¹⁸Nyi byia̱ á̱ghyi; da̱ nyin nyi nwuan baa? Nyi byia̱ a̱fufwuo; da̱ nyin nyi fwuong baa? A̱wot nyi bu jhyung kyang baa?[43]

¹⁹Jen nang n ku nkpa̱ra̱m burodi a̱fwuon wu da̱nian á̱tyok chyikwop tsuon ba a̱ni; a̱ka̱cheang a̱mang nia nyi ku kwok á̱kukum ba ntyia̱ na̱ si̱ nhyaai?” Ba̱ si̱ nyia̱, “A̱ka̱cheang swak ma̱ a̱feang nia.”

²⁰“A̱wot nang n ku nkpa̱ra̱m burodi a̱natat wu, n si̱ ntsuung á̱niet chyikwop nyaai ba a̱ni; a̱ka̱cheang a̱mang nia nang nyi ku kwok á̱kukum ba ba̱ bwat a̱ni, ntyia̱ na si̱ nhyaai?” Ba̱ si̱ nyia̱, “A̱ka̱cheang a̱natat nia.”

²¹Yesu si̱ nyia̱ ma̱ng mba, “Ba̱ng ba̱ tat a̱fwun nyi ka̱n fi̱k baa?”[44]

²²Nang ba̱ ntat a̱keang Ba̱tsaida a̱ni, á̱ghyang á̱niet si̱ bai ma̱ng a̱tyu a̱fi̱fan da̱ a̱vwuo Yesu. Ba̱ si̱ naai nggu gu byiam a̱tyu a̱wa a̱ choot gu.

²³Yesu si̱ ta̱bat a̱tyu a̱fi̱fan wu ma̱ng bwak, a̱ si̱ kwak gu a̱ ghwut ndyo ma̱ a̱keang ka. Nang gu nshyup a̱ta̱mpyia̱ nggu na ma̱ á̱ghyi a̱tyu a̱bya a̱ni, a̱ si̱ sak mbwak nggu na da̱ a̱nggu, a̱ si̱ lyip gu nyia̱, “Ka̱ doot a li kyang ma̱ninika a?”

²⁴A̱tyu a̱wa si̱ nwuan a̱ kaat, a̱ si̱ nyia̱, “Ii, n di á̱niet ma̱ ghyughyui nang a̱ka̱kwon a̱ni, ba̱ chong.”

²⁵Yesu si̱ bu sak mbwak nggu na ma̱ á̱ghyi nggu ba. Di̱n jen a̱ja, á̱ghyi nggu ba si̱ khwuk. Nwuan a̱vwuo nggu hu si̱ bwuok a̱ bai cha̱chaat. A̱ si̱ nwuan kuzang kyang shansham!

²⁶Yesu si̱ ti̱n gu a̱ si̱ nkat a̱mali, a̱ si̱ gba nggu nyia̱, “Ka̱ a naat a̱mali, yok kai mami ma̱ a̱keang ka bah!”

²⁷Yesu ma̱ng mman ta̱m nggu na si̱ doot á̱ ghwon a̱keang Ba̱tsaida mi̱ fam a̱byin Ga̱lili, á̱ nat a̱bachyuang a̱ka̱keang kpa̱mkpaan ma̱ng Kaisa̱riya Filibi. Nang ba̱ nshya̱ di̱n vak a̱ni, Yesu si̱ lyip mba nyia̱, “Zang tangka̱i a̱yin hwa nang á̱niet ba nyia̱ n gyet?”

²⁸Ba̱ si̱ nyia̱, “Á̱ghyang nyia̱ nwan wa yet Yoona a̱tyu nyia̱ ba̱ptisman. Á̱ghyang si̱ nyia̱ a yet Iliya wa; á̱ghyang meang, nyia̱ a yet a̱tyo nyiung wa ma̱ a̱yaata̱m a̱kwonu A̱gwaza á̱ghyang.”[45]

²⁹A̱wot a̱ si̱ lyip mba nyia̱, “Nyin meang, zang tangka̱i a̱yin hwa nang nyi nyia̱ n gyet?” Bitut si̱ nyia̱, “Nwan wa yet Kristi wu, a̱tyu A̱gwaza kup gu tyok a̱ni.”[46]

³⁰Yesu si̱ gba mba nyia̱ di̱ ba̱ yok hyia̱ ma̱ng a̱yin tangka̱i a̱tyu nang gu yet a̱ni bah.

³¹A̱wot Yesu si̱ nwuo tyiet mman ta̱m nggu na tazwa a̱pyia̱ gu nyia̱; ku yet ta hwa Nggwon A̱tyubishyi ka̱ swuo a̱bung da̱ a̱ka̱tuk nkyang ma̱ a̱di̱di̱t. A̱wot á̱niet khwop á̱niet, a̱cha̱chet a̱yaapris, ma̱ng á̱niet tyiet doka na lak ka, á̱ bu hyat ka. A̱mgba̱m ma̱ng a̱nia, a̱tuk mam tat ka, ka̱ na doot ma̱ng swuan ma̱ á̱niet ba̱ ka̱n kwi a̱ni.

³²Yesu ku hyia̱ a̱lyiat nani kpa̱sai. A̱wot Bitut si̱ khwat gu da̱ a̱gbang a̱nyiung. A̱ si̱ ta̱bat ngai ma̱ng a̱nggu, nyia̱ gu yok hyia̱ a̱nia bah.

³³A̱wot nang Yesu mbwuak a̱ si̱ nwuan á̱kum mman ta̱m nggu ka a̱ni, a̱ si̱ ngai ma̱ng Bitut a̱zaghyi mba nyia̱, “Sha̱tan[47], tyong a ghwon nung! A̱di̱dam ang wu yet a̱si̱ a̱tyubishyi wa. A̱ yet a̱si̱ A̱gwaza wa bah!”

³⁴A̱jawa Yesu si̱ yorong á̱kpa á̱niet ka ba̱ bai ndung ma̱ng mman ta̱m nggu na, a̱ si̱ nyia̱ ma̱ng a̱mba, “Ka̱ a̱yin byia̱ di̱dang a̱ khwi nung, ku yet ta hwa gu lak a̱di̱dam chat a̱pyia̱ nggu, a̱ faat a̱team a̱khwu nggu wu, a̱ khwi nung.[48]

³⁵“Mat konyan wa chat shya̱ swuan gu ji a̱ni, a̱ na nwai ji. A̱wot a̱tyu a̱ nwai swuan nggu ji da̱nian nung ma̱ng A̱sham Nkhang ka a̱ni, a̱ na shya̱ nji.[49]

³⁶Yihwa na yet kpangti̱n ji; ka̱ a̱tyubishyi shya̱ a̱mgba̱m swanta hu, a̱wot a̱ si̱ nwai swuan nggu ji?

³⁷“Yihwa nang a̱tyubishyi na nwuak ku maai yet zang swuan nggu ji?

³⁸Ka̱ a̱yin fa̱k nsum nung ma̱ng tyiet nung hu mi̱ jen jini nang á̱ nyia̱ a̱ka̱tuk á̱ si̱ lak khwi A̱gwaza tsotswat a̱ni; ma a̱nia wa nung, Nggwon A̱tyubishyi meang, n ma na nfa̱k nsum guu, di̱n jen nang n bye mbai mami a̱kyenkyai shi A̱tyia̱ nung wu, ma̱ng a̱za̱za̱rak a̱yaata̱m tswá A̱gwaza ba a̱ni.”