Read tyap Ma̱rkut 9 Bible Online

Ma̱rkut 9 - tyap bible

Ma̱rkut 9

¹Yesu si̱ ya a̱son mi̱ shei mba nyia̱, “N tak nyin a̱tsak a̱lyiat, á̱ghyang á̱niet ba̱ yong a̱ji ma̱nini a̱ni, ba̱ na kwi bah, si̱ nang ba̱ li Tyok A̱gwaza hu bai ma̱ng chet!”

²Nang mam a̱taa nswak a̱ni, Yesu si̱ kyiak Bitut, Yakubu ma̱ng Yoona dundung ma̱ng a̱nggu, a̱ si̱ nat ma̱ng a̱mba tazwa a̱ga̱nga̱ng a̱fan. Nang ba̱ nshya̱ a̱ja ma̱nyin ba a̱ni, á̱ si̱ shyak li Yesu hu a̱zaghyi mba!

³A̱yaatoot nggu ba si̱ tyiak sai ma̱ kyenkyai, a̱ ya á̱ghyi ma̱ mya̱myat a̱myat da̱nang a̱tyubishyi mi̱ swanta huni si̱ mi̱n tyia̱ ba̱ sai a̱nia a̱ni bah.

⁴A̱wot Iliya ma̱ng Musa si̱ tat á̱ ghwut da̱ a̱ka̱nyiung a̱zaghyi mba. A̱wot ba̱ si̱ nwuo lyiat ma̱ng Yesu.

⁵Bitut si̱ kaat ma̱ng Yesu, nyia̱, “A̱tyu tyiet, ku yet a̱sham nang zi̱ nshya̱ a̱ji a̱ni. Yok zi̱ tat á̱suswak a̱tat di̱ lyulyoot nyin; nyiung da̱nian ang, nyiung da̱nian Musa, a̱wot nyiung ku yet si̱ Iliya!”

⁶A̱ hyia̱ a̱nia, mat a̱ ku lyin kyang nang gu na lyiat a̱ni. Ba̱ ku fa̱k a̱wun ba̱t!

⁷A̱jawa á̱ni̱nian si̱ kin neet ma̱ vwuu á̱ ba̱ kup baa! Ba̱ si̱ fa̱k a̱nwuat ghwut neet ma̱ á̱ni̱nian nyia̱, “Nggwon nung kya ka nang nfa̱k da̱ nka a̱ni ba̱t! Kikya nyi na myiai a̱fufwuo, nyi fwuong!”[50]

⁸Mi̱ di̱ yong a̱hwa, ba̱ si̱ kin nwuan á̱ kaat, ba̱ si̱ li Musa ma̱ng Iliya bah; mi̱ Yesu wa ma̱nyin gu ma̱ng a̱mba.

⁹Nang ba̱ nshya̱ di̱ chorop neet tazwa a̱fan ka a̱ni, Yesu si̱ kam ba nyia̱, “Nyi yok hyia̱ ma̱ng a̱yin kyang nang nyi li a̱ni bah; si̱ jen nang Nggwon A̱tyubishyi[51] si̱ ba̱ ndoot ma̱ng swuan ma̱ á̱niet ba̱ ka̱n kwi a̱ni.”

¹⁰Ba̱ si̱ ba̱ng a̱lyiat na tsi̱tsak mba. Ba̱ si̱ ta̱bat lyi̱ri̱m á̱ghyang mba kyang nang “Doot ma̱ng swuan ma̱ á̱niet ba̱ ka̱n kwi” fa a̱ni.

¹¹A̱wot ba̱ si̱ lyip Yesu nyia̱, “Yihwa mbyia̱ nang a̱cha̱chet á̱niet tyiet doka ba nnyia̱, ku yet ta hwa Iliya wa a̱ yet a̱son bai ka[52]; Kristi a̱ sii bai?”

¹²Yesu si̱ nwuak ba shim nyia̱, “A̱nia wa chi̱k. Iliya wa na yet a̱son bai ka, da̱nian gu ka jhyi nkyang jhyang a̱ sak nang na̱ ku ndi di̱n tsa hu a̱ni. Ma̱ng a̱nia, yihwa mbyia̱ nang á̱ ndyuut ma̱ A̱lyiat A̱gwaza na, nang Nggwon A̱tyubishyi na nswuo a̱bung ba̱t, a̱wot á̱ lak ka?

¹³N tak ma̱ng a̱nyin, Iliya wa ka̱n bai[53]. A̱wot á̱niet ba si̱ nyia̱ gu lihyat, ma̱nang á̱ ndyuut ma̱ A̱lyiat A̱gwaza na tazwa nggu a̱ni.”[54]

¹⁴Nang Yesu ma̱ng mman ta̱m a̱tat nggu na mbai da̱ a̱vwuo á̱kum mman ta̱m ka a̱ni; ba̱ si̱ li á̱kpa á̱niet ma̱ a̱di̱di̱t tyong mba á̱ keang nang a̱cha̱chet á̱niet tyiet doka ba shya̱ di̱ ya fwuang ma̱ng a̱mba.

¹⁵Nang á̱kpa á̱niet ka ndi Yesu a̱ni, ba̱ si̱ fa̱k a̱ga̱de di̱ bai gu hu. Ba̱ si̱ kin doot di̱n chung á̱ nat á̱ si̱ byiat guu.

¹⁶Yesu si̱ lyip ba nyia̱, “Yihwa nang nyi ngya fwuang ji ma̱ng á̱ghyang?”

¹⁷A̱tyok a̱ghyang mami á̱kpa á̱niet ka si̱ nwuak gu shim nyia̱, “A̱tyu tyiet, ma̱sa̱kut n bai ma̱ng a̱nwan nggwon nung kya, a ka choot kaa. Mat ka̱ byia̱ a̱ka̱tuk ntswa a̱ vwuong nka a̱lyiat a̱ni.

¹⁸Kuzang jen nang a̱ka̱tuk ntswa wu ndoot kaa, a̱ ni̱ kyiak ka a̱ ma a̱byin. A̱wot ja̱fi̱k a̱ta̱mpyia̱ zi̱ ta̱bat ghwut a̱bwonu ka, ka̱ nwuo fat a̱nyunyung ba. Á̱kum vam ka, ka̱ kin tyia̱ ma̱ ka̱nka̱ng. N si̱ naai mman ta̱m ang na, ba̱ kam a̱ka̱tuk ntswa wu a̱ ghwut ma̱ a̱nggu. A̱wot ku si̱ khat baa.”

¹⁹Yesu si̱ nyia̱ ma̱ng a̱mba, “Kwot! Nyin á̱niet nwai nwuak a̱chuchuk mi̱ nche huni. N na nswan ma̱ng a̱nyin si̱ nat zang jen ja? Zang jen ja n na ngya a̱son mi̱ nyap fwuo ma̱ng a̱nyin? Nyi bai ma̱ng a̱nung nggwon ka a̱ji.”

²⁰Ba̱ si̱ bai ma̱ng a̱nka da̱ a̱vwuo Yesu. Nang a̱ka̱tuk ntswa wu ndi Yesu a̱ni, a̱ si̱ kin jhyip nggwon ka mi̱ chet, a̱ ma a̱byin. Ka̱ si̱ ta̱bat byiit a̱ bwan a̱ vak ja̱fi̱k a̱ta̱mpyia̱ a̱bwonu ka.

²¹Yesu si̱ lyip a̱tyia̱ nggwon wu, nyia̱ “Neet zang jen kya nang nggwon ka nswuo a̱bung ma̱ng a̱ka̱tuk ntswa wuni?” A̱tyia̱ wu si̱ nwuak gu shim nyia̱, “Neet nang ka̱ yet a̱da̱dei nggwon.

²²Kuzang jen a̱ka̱tuk ntswa wu kwok ka a̱ tang mi̱ ndong ku ma̱ a̱sa̱khwot, a̱ kwan a̱ hyat ka. A̱wot ka a si̱ mi̱n nyia̱ kyang, ma̱sa̱kut fa̱k kunak nzi̱t a beang zi̱t!”

²³Yesu si̱ nyia̱ ma̱ng a̱nggu, “Yihwa a fa nang a nyia̱, ‘Ka a si̱ mi̱n nyia̱ kyang’? Kuzang kyang na tyia̱ da̱ a̱vwuo a̱tyu a̱ nwuak fwuo da̱ nung a̱ni.”

²⁴Mi̱ di̱ yong a̱hwa, a̱tyia̱ nggwon wu si̱ kin ta̱ngam a̱nwuat mi̱ chet nyia̱, “N nwuak fwuo, beang nung, n mbeang nwuak fwuo nung hu!”

²⁵Nang Yesu ndi á̱kpa á̱niet ka mban a̱ni, a̱ si̱ kam a̱ka̱tuk ntswa wu a̱ vwuong nggwon ka lyiat ma̱ng fwuong hu a̱ni, nyia̱, “Nwan a̱ka̱tuk ntswa, n kam ang, ghwut ma̱ nka. Yok bu bwuok nwuo ma̱ a̱nka bah.”

²⁶A̱ka̱tuk ntswa wu si̱ tyia̱ kun. A̱ si̱ jhyip nggwon ka mi̱ chet a̱ ma a̱byin. A̱ si̱ ghwut ma̱ nka! Nggwon ka si̱ bwuok a̱ myia̱ nang kwom a̱ni. Huhwa á̱niet ma̱ a̱di̱di̱t si̱ kyiak nyia̱, “Ka̱ khwu!”

²⁷A̱wot Yesu si̱ ta̱bat bwak nggwon hu, a̱ si̱ ta̱ngam kaa, ka̱ si̱ kin doot a̱ yong.

²⁸Nang Yesu ndoot a̱ nwuo a̱mali a̱ni, mman ta̱m nggu na si̱ lyip gu da̱ bang nyia̱, “Yihwa mbyia̱ nang zi̱ nwai kam a̱ka̱tuk ntswa a̱ si̱ ghwut ma̱ a̱nggu?”

²⁹Yesu si̱ nyia̱ ma̱ng a̱mba, “Tangka̱i huni, si̱ mi̱ naai A̱gwaza hwa ma̱nyin hu[55], ku na nghwut.”

³⁰Ba̱ si̱ ghwon a̱vwuo a̱kya, ba̱ si̱ kai á̱ ghwut Ga̱lili. Yesu ku chat a̱yin a̱ lyen a̱vwuo ka nang gu nshya̱ a̱ni bah.

³¹Mat a̱ ku chat a̱ tyiet mman ta̱m nggu na nyia̱, “Á̱ na ta̱bat Nggwon A̱tyubishyi, á̱ tyia̱ nka mbwak á̱niet ba̱ na hyat ka a̱ni. A̱wot a̱tuk mam tat, ka̱ na doot ma̱ng swuan ma̱ á̱niet ba̱ ka̱n kwi a̱ni.”

³²Ba̱ ku fi̱k kyang hu nang gu fa a̱ni bah. A̱wot ba̱ si̱ fa̱k a̱wun ba̱ lyip gu.

³³Nang ba̱ mbai Ka̱fanahum a̱ni, jen nang ba̱ nshya̱ a̱mali a̱ni, Yesu si̱ lyip ba, “Yihwa nang nyi ngya fwuang ji di̱n vak hu?”

³⁴A̱wot ba̱ si̱ tyia̱ nywang. Mat ba̱ ku ya fwuang di̱n vak tazwa a̱tyu a̱ na swak ma̱ng shi hu mami mba a̱ni.[56]

³⁵Yesu si̱ swan a̱byin a̱ si̱ yorong mman ta̱m nggu na swak ma̱ a̱feang. A̱wot a̱ si̱ tyiet ba nyia̱, “A̱tyu a̱ chat yet a̱son ka ma̱ nyin a̱ni, nggu wa na yet a̱ngaan ka. A̱wot a̱ bu yet a̱khwo konyan.”[57]

³⁶A̱ si̱ ta̱bat a̱bada̱dei nggwon ma̱ng mbwak, a̱ sak ma̱ a̱ka̱wa̱tyia̱ mba. A̱ si̱ sak mbwak da̱ nka, a̱ si̱ tyiet ba nyia̱,

³⁷“A̱tyu a̱ san a̱da̱dei nggwon nang a̱si̱ kani a̱ni da̱nian nung, ku li á̱ ngyei nung gwa gu san. A̱wot konyan wa san nung a̱ni, nung gwa gu san ma̱nyin nung bah; a̱ mun a̱ san A̱tyia̱ nung wu a̱ ta̱m nung a̱ni.”[58]

³⁸Yoona si̱ nyia̱ ma̱ng Yesu, “A̱tyu tyiet, zi̱ li a̱yin gu khai á̱ka̱tuk ntswá nang ba̱ ghwut ma̱ á̱niet da̱ a̱lyoot ang. A̱wot zi̱ si̱ nyia̱ ma̱ng a̱nggu gu yok. Mat a̱ shya̱ ndung ma̱ng a̱nzi̱t bah.”

³⁹Yesu si̱ nyia̱, “Nyi yok vwuong gu bah. Mat á̱ mbyia̱ a̱tyu a̱ na nyia̱ kyang a̱ri̱bi̱di da̱ a̱lyoot nung, gu bu hyia̱ a̱ka̱tuk a̱lyiat da̱ nung a̱ni bah.

⁴⁰Mat a̱tyu a̱ nwai nyia̱ na̱nvan ma̱ng a̱nzi̱t a̱ni, a̱ yet a̱si̱ nzi̱t wa.[59]

⁴¹A̱tsak a̱lyiat n tak ma̱ng a̱nyin, konyan wa nang nyin a̱sa̱khwot swuo ma̱ kashyi, mat a̱ lyen nyi yet a̱si̱ nung a̱ni; a̱ na shya̱ zang gu ji za̱m.”[60]

⁴²“A̱wot ka̱ a̱yin na tyia̱ a̱bamman nani na̱ nwuak fwuo da̱ nung a̱ni na̱ nyia̱ a̱ka̱tuk; ku na lan á̱ lya̱u a̱nyuu naan kwang a̱ma̱nfwuo, á̱ ta nggu ma̱ kyai a̱sa̱khwot.

⁴³A̱wot ki̱ bwak ang hu tyia̱ ang nyia̱ a̱ka̱tuk, a tyat hu ji̱p. Ku na lan a shya̱ swuan sang sangba̱p ji̱ ma̱ng bwak nyiung, nang á̱ na nta ang mi̱ ndong sang sangba̱p hu ma̱ng mbwak ang na feang a̱ni. A̱wot di̱ long hu a̱ja ku nyi̱ri̱p bah.[61] [62]

⁴⁴

⁴⁵A̱wot ka̱ tak ang hwa ma ntyei ang nyia̱ a̱ka̱tuk, a tyat hu ji̱p. Ku na lan a shya̱ swuan sang sangba̱p ji ma̱ng tak nyiung, nang á̱ na nta ang mi̱ ndong sang sangba̱p ma̱ng a̱ti̱tak ang ba a̱feang a̱ni.[63]

⁴⁶

⁴⁷“A̱wot ka̱ tswa a̱li ang ja ma ntyei ang nyia̱ a̱ka̱tuk, a ti̱n ji̱ ji̱p. Ku na lan a nwuo Tyok A̱gwaza hu ma̱ng tswa a̱li jhyung nang á̱ na nta ang mi̱ ndong sang sangba̱p hu[64] mi̱ tswá á̱ghyi ang ji̱ sweang a̱ni;[65]

⁴⁸a̱vwuo nang á̱ma̱njhyiit nkwi a̱ni bah; da̱ long hu ku nyi̱ri̱p a̱ja bah.[66]

⁴⁹“Mat á̱ na jaat konyan ma̱ng long.[67]

⁵⁰Nfak na jhyi nkyayak. A̱wot ka̱ nyinyang nna hu tyak, á̱ na nyia̱ ni wa na̱ jhyi kyayak hu? Si̱ nyi yet nfak mi̱ swat nyin hu, di̱ swan swat nyinyang ma̱ng a̱ghyang nyin.”[68]