Read tyap Luka 11 Bible Online

Luka 11 - tyap bible

Luka 11

¹Á̱ghyang á̱tuk nang Yesu shya̱ di̱ naai A̱gwaza da̱ a̱vwuo a̱ghyang. Nang gu ntyak a̱ni, a̱tyo nyiung mi̱ mman nta̱m nggu na si̱ bai, a̱ ba̱ shya̱ nggu. A̱ si̱ nyia̱, “A̱tyoli, ma̱sa̱kut, tyiet zi̱t si̱sak nang zi̱ na nnaai A̱gwaza wu a̱ni; ma̱nang Yoona a̱tyu nyian ba̱ptisman ku ntyiet mman ta̱m nggu na a̱ni.”

²Yesu si̱ nyia̱ ma̱ng a̱mba, “A̱ni wa nyi na nnaai A̱gwaza wu: ‘A̱tyia̱ nzi̱t wu a̱ shya̱ tswazwa ka a̱ni, á̱ ja̱u a̱lyoot ang ka. Tyok ang hu ku bai.

³Nang nzi̱t kyayak kwa mam.

⁴Chi a̱ka̱tuk nyia̱ nang zi̱ nyia̱ a̱ni; ma̱nang zi̱ nchi a̱bun nang á̱ghyang á̱niet nyia̱ nzi̱t ndyo a̱ni. Yok ghwon nzi̱t zi̱ kwa di̱n jen mak bah.[70]’ ”

⁵Yesu si̱ bu mbeang tyiet mman ta̱m nggu na tazwa naai A̱gwaza di̱ kidee, nyia̱, “Ka̱ a̱yin ma̱ nyin nat a̱mali a̱kpa̱ndang gu ma̱ a̱ka̱wa̱tyia̱ a̱tyetuk. A̱ si̱ naai nggu nyia̱, ‘Khwap nung burodi a̱tat.

⁶A̱kpa̱ndang nung wa bai ma̱ninika. A̱wot n byia̱ kyayak n na nang gu a̱ni bah.’

⁷“Shimba a̱tyoli a̱wa ka̱n myia̱, a̱wot gu ta̱ngai ma̱ng a̱nggu, nyia̱, ‘Yok shyui nung a̱fufwuo bah! N wa ka̱n nyim nyinyiit hu. A̱wot kyang bwak nung hu ma̱ng a̱nung zi̱ ka̱n kai nda. N si̱ mi̱n beang ang bah!’

⁸“A̱wot n tak ma̱ng a̱nyin, ku nang a̱tyoli a̱wa na nkhwap burodi wu mat yet á̱kpa̱ndang á̱ghyang a̱ni bah; a̱ na doot a̱ khwap a̱kpa̱ndang wu burodi wu. Mat a̱kpa̱ndang wu yong a̱ tsot nyinyiit hu a̱ nchi̱ri̱ng di̱ mi̱n nsum.[71]

⁹“Mat a̱nia, n shei ma̱ng a̱nyin, nyi ni̱ ndyip, á̱ na nang nyin kyang hu nang nyi lyip a̱ni. Nyi ni̱ nkup á̱ghyi di̱ chat, nyi na shya̱. Nyi ni̱ ntsot nyinyiit hu, á̱ na khwuk nyin ndyo.

¹⁰A̱tsak a̱lyiat, kuzang a̱yin a̱ lyip a̱ni, á̱ na nang nggu. A̱tyu a̱ kup á̱ghyi di̱ chat a̱ni, a̱ na shya̱. A̱wot a̱tyu a̱ tsot nyinyiit hu a̱ni, á̱ na khwuk nggu ndyo.

¹¹“Nyin a̱yaatyia̱, ka̱ mman nyin na lyip nyin a̱fa̱n; da̱ a̱kwonu a̱kya, nyi ni̱ nang mba zwak jaa?

¹²Ku ki̱ mman nyin na lyip nyin a̱chyi nywan, nyi ni̱ nang mba nyang jaa?

¹³Mat a̱nia, ki̱ nyin á̱niet á̱ka̱tuk nyia̱ lyen si̱sak ji nang nyi na nka̱u mman nyin na a̱tsatsak za̱náng a̱ni, ku fa A̱tyia̱ nyin wu a̱ shya̱ tswazwa ka a̱ni; a̱ na nang á̱niet ba ba̱ lyip gu a̱ni A̱za̱za̱rak Ntswa wu a̱ swaak.”

¹⁴Á̱ghyang á̱tuk, Yesu si̱ kam a̱ka̱tuk ntswa a̱ si̱ ghwut ma̱ a̱tyok a̱ yet ma̱ma̱m a̱ni. A̱wot nang a̱ka̱tuk ntswa wu nghwut a̱ni, a̱tyok wu si̱ nwuo a̱lyiat. Á̱kpa á̱niet ka ba̱ shya̱ a̱ja a̱ni si̱ fa̱k a̱ga̱de!

¹⁵A̱wot á̱ghyang á̱niet ba̱ shya̱ a̱ja a̱ni, nang ba̱ ndi kyang hu nang Yesu nyia̱ a̱ni, ba̱ si̱ nyia̱, “Yesu si̱ mi̱n nyia̱ a̱nia, mat a̱ shya̱ chet khai á̱ka̱tuk ntswá hu ba̱ ghwut ma̱ á̱niet ba da̱ a̱vwuo Baalza̱but[72], a̱ yet A̱gwam á̱ka̱tuk ntswá wu a̱ni.”

¹⁶Á̱ghyang á̱niet si̱ kwan ba̱ tya̱ra̱m Yesu. Ba̱ si̱ chat gu nyia̱ mba kyang a̱ri̱bi̱di ku yet a̱lama a̱ neet Ma A̱gwaza tswazwa ku tak ma̱ng a̱mba tyok hu nang gu byia̱ a̱ni.

¹⁷Mat nang Yesu ndyen a̱di̱dam mba wu a̱ni, a̱ si̱ hyia̱ ma̱ng a̱mba di̱ kidee nyia̱, “Kuzang tyok ku ghai, ku si̱ nyia̱ zwang ma̱ng a̱pyia̱ nhu a̱ni, ku na kwa. Ma a̱nia wa, ka̱ á̱niet a̱mali a̱nyiung ghai a̱ka̱feang di̱ na̱nvan, ba̱ na seang.

¹⁸“Nyi nyia̱ a̱gwam á̱ka̱tuk ntswá[73] wa jong nung tyok hu. A̱wot ka̱ A̱ta̱nyeang, ka̱ yet a̱gwam á̱ka̱tuk ntswá a̱ni, ghai ka̱ si̱ kwan ma̱ng a̱pyia̱ nka; tyok nka hu na nyia̱ ni ku ngyong?

¹⁹A̱wot ka̱ a̱gwam á̱ka̱tuk ntswá[74] wa jong nung chet hu, a̱nyan wa ma njong á̱niet nyin ba chet hu meang, nang ba̱ nkhai á̱ka̱tuk ntswá ba̱ ghwut ma̱ á̱niet a̱ni? Mat a̱nia, ba̱ na tak nang nyi nghyuap di̱ kyang nang nyi ntyam nung a̱ni.

²⁰A̱wot ki̱ n khai á̱ka̱tuk ntswá ba̱ ghwut ma̱ á̱niet ma̱ng chet A̱gwaza hwa; ku tak nang Tyok A̱gwaza hu ka̱n bai da̱ a̱vwuo nyin.

²¹“Mat, jen nang a̱tyu nchet nang a̱gwam á̱ka̱tuk ntswá a̱ni, mbyia̱ nkyang nzwang ba̱t, a̱ si̱ chok a̱li nggu ka; nkyang nang gu byia̱ a̱mali nggu ka a̱ni, a̱yin si̱ mi̱n nkwok na a̱ ghwon nggu bah.

²²“Si̱ jen nang a̱ghyang a̱niet a̱ swuo chet a̱tyu nchet wu, ngang a̱ kwa da̱ nggu, a̱ si̱ ta̱wap nkyang zwang nggu na a̱ni; a̱ sii kwok a̱mgba̱m nkyang na nang a̱tyu nchet wu byia̱ a̱ni, a̱ ghwon ngguu.

²³“A̱tyu da̱ a̱ shya̱ dundung ma̱ng a̱nung a̱ni bah, a̱ nyia̱ fi̱p hwa ma̱ng a̱nung. A̱wot a̱tyu da̱ a̱ beang nung ta̱m tung hu a̱ni bah, a̱ yet a̱tyu seang wa.

²⁴“Ka̱ a̱ka̱tuk ntswa wu ghwut ma̱ a̱yin, a̱ ni̱ nat mi̱ tswa a̱yit; da̱nian a̱ ka shya̱ a̱vwuo fwung a̱ja. A̱wot ka̱ a̱ shya̱ nka bah, a̱jawa gu na nnyia̱, ‘N na mbwuok nat mi̱ vam a̱tyu nang n ghwut a̱ni, n bu si̱ swan a̱ja.’

²⁵Mat a̱nia, ka̱ a̱ka̱tuk ntswa wu bwuok, a̱ si̱ shya̱ nang vam a̱tyu a̱hwa li nang a̱li ka ka̱ swan gang, nang á̱ lyang á̱ si̱ shok a̱ni;

²⁶a̱jawa a̱ka̱tuk ntswa wu na nchat a̱ shya̱ á̱ka̱tuk ntswá a̱natat á̱ghyang, ba̱ swak gu ma̱ng a̱ka̱kpa̱t a̱ni; ba̱ ka nwuo mi̱ vam a̱tyu a̱hwa, ba̱ swan a̱ja. A̱wot a̱nia wa a̱tyu a̱wa na mbeang byian hu a̱ swak jen nang a̱ka̱tuk ntswa a̱nyiung wu ku nshya̱ ma̱ nggu a̱ni.”

²⁷Nang Yesu nshya̱ ma̱ a̱lyiat na a̱ni, a̱byii̱k a̱ghyang ma̱ á̱kpa á̱niet ka si̱ kaat mi̱ chet nyia̱, “A̱gwaza gu nang a̱byii̱k a̱ byin ang, a si̱ bu nwaai a̱bi̱baan nggu ba a̱ni a̱li̱ba̱rka!”

²⁸A̱wot Yesu si̱ nwuak gu shim nyia̱, “A̱tsak a̱lyiat, á̱niet ba ba̱ fa̱k a̱lyiat A̱gwaza na, ba̱ si̱ nyia̱ nta̱m ma̱ng á̱na a̱ni; bibya A̱gwaza na nang mba a̱li̱ba̱rka wu a̱ swaak.”

²⁹Nang á̱kpa á̱niet ma̱ a̱di̱di̱t ntung ba̱ si̱ tyong Yesu á̱ keang a̱ni, huhwa gu si̱ lyiat ma̱ng a̱mba nyia̱, “Á̱niet a̱ka̱tuk nche bani yong mi̱ di̱ lyi̱ri̱m nung n tak a̱lama a̱ri̱bi̱di a̱ tak nang A̱gwaza wa nta̱m nung a̱ni. Mi̱ a̱lama a̱ri̱bi̱di wu n na ntak ma̱ng a̱mba a̱ni; nggu wa yet a̱si̱ Yunana, a̱ta̱m a̱kwonu A̱gwaza wu.

³⁰Kyang ku ku shya̱ Yunana a̱ta̱m a̱kwonu A̱gwaza a̱ni, huhwa yet a̱lama a̱ri̱bi̱di da̱ a̱vwuo á̱niet Ni̱neba, ku tak nang A̱gwaza wa nta̱m nggu a̱ni. Ma a̱nia wa, kyang ku na shya̱ Nggwon A̱tyubishyi a̱ni, ku na yet a̱lama a̱ri̱bi̱di da̱ a̱vwuo á̱niet mi̱ che bani, ku tak nang A̱gwaza wa nta̱m nggu.

³¹“A̱wot Sa̱ra̱uniya Sheba[75] na doot a̱ yong mi̱ che huni, a̱ tak hu nang ku mbwuo a̱bun a̱tuk shi̱ri̱ya ka. Mat a̱ ku ghwut a̱ neet ma̱ a̱byin a̱ghyang ma̱ gbang, a̱ bai a̱ ka fa̱k mumwang a̱gwam Solomon hu. Ma̱ninika, a̱tyu a̱ swak a̱gwam Solomon ma̱ng shi a̱ni shya̱ a̱ji. A̱mgba̱m ma̱ng a̱nia, nyi si̱ lak myiai a̱fufwuo, nyi fa̱k a̱lyiat nggu na.

³²“Ma a̱nia wa, á̱niet Ni̱neba ba meang, na doot ba̱ tak che huni nang ku mbwuo a̱bun a̱tuk shi̱ri̱ya A̱gwaza ka. Mat, ba̱ ku ghwon a̱ka̱tuk nyia̱ mba wu di̱n jen nang Yunana, a̱ta̱m a̱kwonu A̱gwaza wu, ku nshei mba A̱lyiat A̱gwaza na a̱ni. A̱wot ma̱ninika, a̱tyu a̱ swak Yunana, a̱ta̱m a̱kwonu A̱gwaza a̱ni, shya̱ a̱ji. A̱wot nyi si̱ lak ghwon a̱ka̱tuk nyia̱ nyin wu, nyi khwi A̱gwaza.

³³“Á̱ mbyia̱ a̱tyu a̱ na tyia̱ long mi̱ fi̱tila, a̱wot a̱ sii kyiak kham a̱ nkup hu a̱ni bah. Da̱ a̱kwonu a̱kya, a̱ wa ni̱ sak fi̱tila ji tazwa a̱tyii, ji̱ ka sai a̱vwuo ka; á̱niet ba ba̱ na nwuo mi̱ nyuo hu a̱ni, ba̱ ka li sai nji hu.

³⁴“Tswa a̱li ang ji tyei sai mi̱ vam ang hu nang fi̱tila a̱ni. Ka̱ tswa a̱li ang ji yet a̱tan,[76] a̱mgba̱m vam ang hu na sai ma̱ kyenkyai. A̱wot ka̱ tswa a̱li ang ji ma nwuan duduu,[77] vam ang hu na byia̱ lyin ma̱ kyi̱ri̱p!

³⁵Mak a li sai hu nang a dam a byia̱ a̱ni, mami a̱chuchuk nang ku ngyet a̱tsatsak sai wa, ku bu yet lyin hwa bah.

³⁶Ka̱ a byia̱ sai ba̱t, nang a byia̱ lyin mi̱ vam ang hu bah, a̱mgba̱m swat ang hu na sai ba̱t. Ku li á ngyei sai fi̱tila hu sai ang wa ma̱ kyenkyai.”

³⁷Nang Yesu nshya̱ ma̱ a̱lyiat na a̱ni, a̱tyu A̱fa̱risawa a̱ghyang si̱ yei ngguu ya kyayak a̱gbang gu. Mat a̱nia, Yesu si̱ nat, a̱ si̱si̱ swan a̱ ya kyayak hu.

³⁸A̱tyu A̱fa̱risawa wu a̱ yei Yesu ya kyayak hu a̱mali nggu ka a̱ni; si̱ fa̱k a̱ga̱de di̱ si̱sak nang Yesu nwai kwi mbwak nggu na, a̱ sii ya kyayak hu ma̱nang taada A̱yahudawa ji nchat á̱ nyia̱ a̱ni.

³⁹A̱jawa A̱tyoli Yesu si̱ nyia̱ ma̱ng a̱nggu, “Nyin A̱fa̱risawa ba, nyi ni̱ ta̱bam nyi kwi nta a̱kashyi ji ma̱ng a̱ka̱gba wu. Ma a̱nia wa nyi ngyet a̱sham ka nta. A̱wot mami nfwuo nyin na, na̱ nhyat tyentyang ma̱ng wuwok ma̱ng a̱ka̱kpa̱t!

⁴⁰Nyin á̱bwuon á̱niet! Nyi lyen nang A̱gwaza wa nnyia̱ nta ji, a̱ si̱ bu nyia̱ mami ka baa?

⁴¹Mat a̱nia, nyi ti̱n wuwok mi̱ nfwuo nyin na, a̱wot nyi nang á̱kunak na za̱náng; nyi ka yet a̱za̱za̱rak mami ka ma̱ng nta ji.

⁴²“Nyin A̱fa̱risawa, ku swan nyin! Mat nyi ni̱ ta̱bam nyi ti̱n a̱kpa a̱nyiung ma̱ a̱yaakpa nkyang swak, nyi ka neap A̱gwaza, ku ma̱ a̱kikyo nang nyi kap ma̱ a̱bachyuang bibyin nyin na a̱ni. A̱wot a̱mgba̱m ma̱ng a̱nia, nyi ni̱ kai tsotswat ma̱ng chat A̱gwaza hu ghwon! Ku myim nyi ni̱ ngya a̱son ma̱ng neap A̱gwaza a̱kpa a̱nyiung ma̱ a̱yaakpa nkyang swak mi̱ nkyang nang nyi shyat a̱ni. A̱wot nyi yok ghwon á̱kum tsatsak nkyang ka̱ swak ma̱ng yet hu a̱ni bah.

⁴³“Nyin A̱fa̱risawa ba, ku swan nyin! Mat nyi ni̱ chat nyi swan da̱ a̱cha̱chet nkyang swat ma̱ á̱tutu a̱tung A̱yahudawa ba. A̱wot ki̱ nyi chong mi̱ tungga, nyi ni̱ chat á̱ chyin nyin, a̱wot á̱ tang nyin a̱didyep.

⁴⁴“Nyin A̱fa̱risawa ba, a̱tsatsak a̱lyiat, ku swan nyin! Mat nyi li nang a̱ka̱bi na̱ byia̱ a̱na̱ndyung, nang á̱ nniat nkwom á̱niet mi̱ kyai a̱ni. Á̱niet ba ni̱ shai na á̱ sweap. Da̱ mba ba̱ lyen a̱na̱ndyung nang ba̱ shyat di̱ shai na a̱ni bah.”

⁴⁵A̱tyo nyiung mami a̱yaagwak lyen doka A̱gwaza ba si̱ nyia̱ ma̱ng Yesu, “A̱tyu tyiet, a mun tok nzi̱t mami a̱lyiat nang a lyiat a̱ni!”

⁴⁶Yesu si̱ nyia̱ ma̱ng a̱nggu, “A̱tsak a̱lyiat, ku swan nyin meang, nyin a̱yaagwak lyen doka! Mat nyi ni̱ nyap á̱kum á̱niet ka ma̱ng a̱kpi̱di̱dyi̱k taada nyin ji, ji̱ swuo chet á̱niet ba a̱ni. A̱wot da̱ nyin, nyi si̱ mi̱n neap ga̱swuong jhyung, nyi byiam kpa̱t hu bah!

⁴⁷“Ku swan nyin a̱yaagwak lyen doka A̱gwaza! Mat nyi ni̱ nok bibi a̱yaata̱m a̱kwonu A̱gwaza ku yet a̱sham, nyi ka nwuak ba shi. A̱wot bibya nang a̱yaatyia̱ a̱khwop nyin ba ku hyaai gbangbang.

⁴⁸A̱wot mami a̱chuchuk, nyi si̱ li̱n a̱ma nyi si̱ shim kyang nang a̱yaatyia̱ a̱khwop nyin ba ku nyia̱ a̱ni; ba̱ ku hyaai a̱yaata̱m a̱kwonu A̱gwaza ba. A̱wot nyi si̱ mun á̱pyia̱ ma̱ng a̱ka̱tuk nyia̱ mba wu, mat nok bibi ku yet a̱sham!

⁴⁹“Mat a̱nia, kyang hu nang A̱gwaza hyia̱ mami mumwang nggu hu tazwa nyin a̱ni, huhwa hu: ‘N na nta̱m ma̱ng a̱mba a̱yaata̱m a̱kwonu A̱gwaza ma̱ng a̱yaata̱m á̱ghyang. A̱wot ba̱ na hyaai á̱ghyang, a̱wot ba̱ ya̱shuk á̱ghyang.’

⁵⁰“Mat a̱nia, á̱ na ba̱ng che huni mat hyaai a̱mgba̱m a̱yaata̱m a̱kwonu A̱gwaza ba, neet di̱n jen nang A̱gwaza nnyia̱ swanta hu a̱ni;

⁵¹kyiak neet di̱ hyat Habila a̱ ku yet a̱tsotswat a̱ni, ba̱ng si̱ nat di̱ Za̱ka̱riya a̱ ku yet pris gbangbang, a̱tyu á̱ ku hyat ma̱ a̱ka̱wa̱tyia̱ a̱tyii mi̱ didyaat ma̱ng A̱li Nwuat Za̱nang A̱gwaza ka a̱ni. N tak nyin a̱tsak a̱lyiat; A̱gwaza na ba̱ng che huni mat hyaai á̱niet bani!

⁵²“Ku swan nyin a̱yaagwak lyen doka A̱gwaza! Mat nyi ni̱ fwun á̱niet ba vak hu nang ba̱ na ndyen[78], a̱wot ba̱ shya̱ nwuo mi̱ Tyok A̱gwaza hu a̱ni. Nyin ma̱ á̱pyia̱ nyin, nyi nwuo bah. A̱wot da̱ nyin nyi ghwon á̱ghyang á̱niet ba̱ chat nwuo hu a̱ni, si̱ nwuo bah!”

⁵³Jen nang Yesu ndoot a̱ na ghwon a̱vwuo ka a̱ni, a̱yaagwak tyiet doka ma̱ng A̱fa̱risawa ba si̱ mwuat ndyen ba̱ si̱ ta̱gba̱k guu. A̱wot ba̱ si̱ kwan ba̱ tyia̱ nggu a̱ ghyuap di̱ lyi̱ri̱m nggu nkyang ma̱ a̱di̱di̱t.

⁵⁴Ba̱ si̱ chat ba̱ tya̱ra̱m ngguu gu hyia̱ kyang ku na tyia̱ gu ghyuap ba̱ ka nta̱bat nggu a̱ni.