Read tyap Luka 14 Bible Online

Luka 14 - tyap bible

Luka 14

¹A̱tuk Mam Fwung A̱yahudawa á̱ghyang, Yesu si̱ nat ya kyayak a̱mali a̱kwak a̱son A̱fa̱risawa. A̱wot á̱niet ba si̱ tyia̱ á̱ghyi á̱ cham gu.

²A̱tyok a̱ghyang ku shya̱ a̱ja, nang mbwak nggu na ma̱ng a̱ti̱tak nggu ba mwuat a̱ni.

³Yesu si̱ lyip A̱fa̱risawa ba ma̱ng a̱yaagwak tyiet doka Musa ba nyia̱, “Á̱ shim mi̱ doka Musa ji, á̱ choot á̱niet nzwán a̱tuk Mam Fwung ka, kee á̱ yok?”

⁴Nang ba̱ ndak nwuak shim hu a̱ni, Yesu si̱ byiam a̱tyu nzwan wu. A̱ si̱ choot guu, a̱ si̱ ti̱n nggu a̱ si̱ nkat.

⁵A̱jawa Yesu si̱ bwuak, a̱ si̱ nyia̱ ma̱ng a̱mba, “A̱nyan wa ma̱ nyin, ki̱ nggwon ku nyak nggu kwa mi̱ bwong a̱tuk Mam Fwung, a̱ na nyia̱ ta̱m a̱ nwuo a̱ ti̱n nggwon[85] ka ku nyak ji mi̱ bwong hu baa?”

⁶A̱wot shim hu si̱ khat baa.

⁷Nang Yesu ndi a̱mgba̱m á̱niet ba nang á̱ yei mba song nyeang ji nkwan ba̱ swan da̱ a̱cha̱chet nkyang nswat a̱ni; huhwa gu si̱ lyiat di̱ kidee jini nyia̱,

⁸“Ka̱ á̱ yei ang song nyeang, yok khai nkyang swat a̱cha̱chet á̱niet na bah. Kalyem a̱ghyang a̱niet nang a̱tyoli a̱wa yei gu song nyeang ji a̱ni, na bai a̱ swak ang ma̱ng shi hu.

⁹Kalak a̱tyu a̱ yei nyin song nyeang ji a̱mgba̱m nyin a̱feang a̱ni; na bai a̱ nyia̱ ma̱ng a̱nwan, ‘Doot, a ghwon a̱tyu wuni kyang swat huni.’ Di̱n jen a̱ja, a na fa̱k nsum mami á̱niet nang á̱ na ntyia̱ a doot a nat a si̱ swan da̱ tangka̱i kyang swat da̱ ku yet si̱ a̱cha̱chet á̱niet a̱ni bah.

¹⁰“Da̱ a̱kwonu a̱kya, ka̱ á̱ yei ang song nyeang ji, nat a si̱ swan di̱ kyang swat da̱ ku yet si̱ a̱cha̱chet á̱niet a̱ni bah. A̱wot ka̱ a̱tyu byia̱ nyeang wu bai, a̱ na nyia̱, ‘A̱tuba nung, doot a nat a si̱ swan di̱ kyang swat a̱cha̱chet á̱niet huni!’ A̱jawa a na shya̱ shi mami á̱niet ba̱ bai song nyeang ji a̱ni.

¹¹Mat a̱nia, a̱tyu a̱ nwuak a̱pyia̱ nggu shi a̱ swak á̱ghyang á̱niet a̱ni, A̱gwaza na ghyuai nggu. A̱wot a̱tyu a̱ ghyuai a̱pyia̱ nggu a̱ni; nggu wa A̱gwaza na tyia̱ gu shi hu.”

¹²Yesu si̱ bwuak, a̱ si̱ bu nyia̱ ma̱ng a̱tyu a̱ yei nggu song nyeang ji a̱ni, nyia̱, “Ka̱ a shya̱ mi̱ fwuo a yei á̱niet ba̱ bai ya kyayak a̱gbang ang, ku myim a yok yei á̱kpa̱ndang, á̱na̱nyiuk, á̱niet mi̱ kwai ang, ku á̱kpa̱ndang swat ba̱ byia̱ zwá a̱ni bah. Kalak mba meang, ba̱ ba̱ yei ang ya kyayak a̱ghyang a̱tuk, ba̱ ka tan ang zang ji.

¹³Da̱ a̱kwonu a̱kya, ka̱ a shya̱ mi̱ fwuo a yei á̱niet ba̱ bai ya nkyayak; ku myim a yei á̱kunak, á̱niet ta̱luk nkap, á̱niet kwang a̱byin, ma̱ng á̱niet a̱fi̱fan.

¹⁴Mat ntangka̱i á̱niet a̱nia byia̱ kyang ba̱ na ntan ang a̱ni bah. “Ka̱ a nyia̱ a̱nia, a yet a̱tyu a̱li̱ba̱rka wa, mat A̱gwaza na nang ang zang ba̱t, di̱n jen nang á̱tsotswat á̱niet ba bye ndoot ma̱ng swuan ma̱ á̱niet ba̱ ka̱n kwi a̱ni.”

¹⁵Nang a̱tyo nyiung ma̱ á̱niet ba ba̱ swan a̱ ya a̱ tsa nswuo ma̱ng Yesu nfa̱k a̱lyiat nggu na a̱ni, a̱ si̱ nyia̱ ma̱ng Yesu a̱ni, “A̱tyoli, a̱tyu a̱li̱ba̱rka wa yet a̱tyu a̱ na ya mi̱ song a̱yet mi̱ Tyok A̱gwaza hu[86] a̱ni!”

¹⁶Yesu si̱ nwuak gu shim di̱ kidee, nyia̱, “A̱tyoli a̱ghyang wa swan, a̱ shya̱ di̱ jhyi nkyang a̱gba̱ndang song a̱yet. A̱ si̱ yei á̱niet ma̱ a̱di̱di̱t, ba̱ bai song a̱yet ji.

¹⁷Jen nang gu ntyak jhyi nkyang song a̱yet na a̱ni, a̱ si̱ ta̱m a̱khwo nggu wu nyia̱ gu nat a̱ si̱ hyia̱ ma̱ng á̱niet nang gu wa ka̱n shei mba song a̱yet ji a̱ni; nyia̱ ba̱ bai, jen song a̱yet ji nyia̱.

¹⁸“A̱wot a̱mgba̱m á̱niet ba nang a̱tyoli wu yei a̱ni, si̱ nwuo nwuat a̱khwo nggu wu ta̱fwat. A̱tyo nyiung si̱ nyia̱ ma̱ng a̱khwo wu, ‘N sii nsan a̱byin. Ku yet nung ta hwa n ya nnat n ndi kaa. Ma̱sa̱kut, yok nung, n nat.’

¹⁹A̱ghyang a̱niet si̱ bu nyia̱ ma̱ng a̱khwo wu, ‘N sii kwai nyák khap swak. Ma̱sa̱kut yok n ya nnat n mak ji ma̱ a̱byin nung ka.’

²⁰A̱ghyang a̱niet si̱ bu nyia̱ ma̱ng a̱khwo wu, ‘N sii mbwuo a̱byii̱k a̱fai. Mat a̱nia, n si̱ mi̱n bai bah.’

²¹“Huhwa a̱khwo wu si̱ bwuok a̱ nat a̱mali, a̱ si̱si̱ hyia̱ ma̱ng a̱tyoli nggu wu ta̱fwat nang á̱niet a̱bya nwuat a̱ni. A̱tyoli wu si̱ kan mwai lyen ba̱t! A̱ si̱ bu ta̱m a̱khwo wu nyia̱, “ ‘Nat a̱nggang ma̱ a̱keang ka a kai nvak ma̱ng a̱beam a̱vwuo ma̱ a̱keang ka. A chong a yei á̱kunak, ma̱ng á̱niet nang nkap na ta̱luk a̱ni, á̱niet a̱fi̱fan, mbeang á̱niet ba̱ kwang a̱byin a̱ni; ba̱ bai song a̱yet ji.’

²²Nang a̱khwo wu ngyei á̱niet á̱fai a̱bya, a̱ si̱ bwuok a̱ bai, a̱ si̱ hyia̱ ma̱ng a̱tyoli wu a̱ni, ‘A̱ka̱vwuo nswat ni̱ bwat da̱ a̱vwuo song a̱yet ka.’

²³“Mat a̱nia, a̱tyoli wu si̱ bu nyia̱ ma̱ng a̱khwo wu, ‘Nat ma̱ a̱chyuang nvak a̱ka̱keang na ma̱ng a̱ma̱nta a̱gi̱gak a̱ka̱keang na mameang; a shei a̱mgba̱m á̱niet nang a shya̱ a̱ni song a̱yet ji. Da̱nian a̱li nung ka, ka̱ ka nhyat ma̱ng á̱nietbishyi.

²⁴N tak ma̱ng a̱nyin; á̱ mbyia̱ ku a̱tyo nyiung mami á̱niet nang n tsa yei a̱ni, a̱ na ya mi̱ song a̱yet nung ji a̱ni bah!’ ”

²⁵Nang a̱gba̱ndang á̱kpa á̱niet nkhwi Yesu á̱ naat a̱ni, a̱ si̱ bwuak a̱ si̱ nyia̱ ma̱ng a̱mba,

²⁶“Ka̱ a chat a yet nggwon ta̱m nung, ku myim a chat nung ba̱t swaak a̱tyia̱ ang wu[87], a̱yang ang wu, a̱byii̱k ang wu, á̱na̱nyiuk ang ba, mbeang swuan ang ji mameang. Ka̱ a̱nia wa bah, a maai a yet nggwon ta̱m nung bah.

²⁷Ma a̱nia wa, ka̱ a si̱ mi̱n kyiak a̱team a̱khwu ang wu a faat a khwi nung bah, a maai a yet nggwon ta̱m nung bah.

²⁸“Ka̱ a shya̱ mi̱ fwuo nyia̱ a na nok a̱li, ku myim a ya nswan a nyia̱ a̱di̱dam, a fang kurum hu nang a na hyat a̱ni, a lii ka̱ ku na maai tyak ta̱m nok hu.

²⁹Kalak ka a nok che kuntyin ji tyak, kurum ang hu si̱ lat, ta̱m nok hu na bwuok a̱ yong. A̱jawa á̱niet ba na mai ang,

³⁰ba̱ mang ang a̱lyem nyia̱, ‘Inhii ang, a̱tyu wuni doot ta̱m nok hu. A̱wot a̱ byia̱ kurum ku maai nang gu na ntyak ta̱m nok hu a̱ni bah!’

³¹“Ma a̱nia wa, ka̱ a̱gwam naat zwang ma̱ng a̱gwam a̱ghyang, ku myim a̱ ya nswan ma̱ng a̱yaakwak a̱son á̱niet nzwang nggu ba, ba̱ ka dam ka̱ á̱niet nzwang chyikwop swak mba ba, na swuo chet á̱niet nzwang chyikwop swak nfeang ba̱ chobai zwang ji ma̱ng a̱mba a̱ni.

³²Ka̱ á̱niet nzwang chyikwop swak ba maai kwan zwang ji bah, a̱gwam mba wu na ta̱m byia̱k nggu ji a̱zanson. A̱ si̱ chat swat nyinyang ma̱ng a̱gwam a̱ byia̱ á̱niet nzwang chyikwop swak nfeang ba a̱ni, neet nang ba̱ ni̱ shya̱ gbang ba̱t.

³³“Mat a̱nia, n hyia̱ ma̱ng a̱nyin; ka̱ nyi ghwon zwá nyin ji, nyi si̱ khwi nung bah, nyi maai nyi yet mman ta̱m nung bah.

³⁴“Nfak ni̱ swan nya̱nyiat ba̱t, na̱ bu nyia̱ ta̱m nna hu. A̱wot ka̱ swat nya̱nyiat nna hu tyak, á̱ bu na nyia̱ ni á̱ mbwuok ma̱ng swat nya̱nyiat nna hu?

³⁵Nfak na̱ tyak swat nya̱nyiat a̱ni, ni̱ tyia̱ a̱buk kyang. Na̱ na tyia̱ a̱byin ka ka̱ byia̱ chet bah. Da̱ mba, á̱ si̱ mi̱n nyia̱ bwum ma̱ng á̱na bah. Na̱ myim á̱ weam na wa. A̱tyu a̱ chat lyen a̱ni, yok gu myiai a̱fufwuo gu fa̱a̱k!”