Read tyap Luka 16 Bible Online

Luka 16 - tyap bible

Luka 16

¹Yesu si̱ bu lyiat ma̱ng mman ta̱m nggu na di̱ kidee jhyang nyia̱, “A̱tyu nzwá wa swan, a̱ ku byia̱ byia̱k, ji̱ chok gu nkyang a̱bwuang nggu na a̱ni. A̱ghyang a̱niet si̱ bai da̱ a̱vwuo a̱tyu nzwá wu. A̱ si̱ ba̱ kwop gu a̱dyii̱ng nyia̱, byia̱k nggu ji seang a̱tyu nzwá wu zwá ji.

²Huhwa a̱tyu nzwá wu si̱ yei byia̱k nggu ji, gu bai. Nang gu mbai a̱ni, a̱tyu nzwá wu si̱ lyip gu nyia̱, ‘Yihwa nang n fwuong tazwa ang? Nat, a si̱ lyuut si̱sak ji nang a nnyia̱ ta̱m ma̱ng nkyang a̱bwuang nung na a̱ni! Mat n na nfi̱n ang mi̱ ta̱m nung hu!’

³“Byia̱k ji si̱ nyia̱ a̱di̱dam mi̱ fwuo nggu hu, nyia̱, ‘A̱tyoli nung wu fi̱n nung mi̱ ta̱m hu. Yihwa n na nyia̱? Da̱ nung, n byia̱ chet khap bah. A̱wot n swuo chet n ngyet a̱tyu a̱shweang.

⁴Nnhii, n ndyen kyang n na nyia̱ a̱ni; da̱nian jen a̱tyoli nung wu nfi̱n nung mi̱ ta̱m a̱ni, n na mbyia̱ á̱kpa̱ndang á̱ghyang ba̱ na san nung ma̱ a̱ka̱sa mba na mbwak nfeang a̱ni.’

⁵“Huhwa byia̱k ji si̱ doot, a̱ si̱ yei a̱mgba̱m á̱niet ba ba̱ ba̱ng a̱ti̱ta a̱tyu nzwá nggu ba a̱ni; nyia̱ ba̱ bai ba̱ bwoi nkhang tazwa a̱ti̱ta nang ba̱ ba̱ng a̱tyu nzwá wu ndyo a̱ni. A̱ si̱ lyip a̱tyo nyiung wu nyia̱, ‘Ta a̱mang hwa nang a̱tyoli wu khwi ang?’

⁶A̱tyu a̱wa si̱ nyia̱, ‘N ba̱ng nggu a̱ka̱kurung a̱myia̱ chyi a̱ni̱nai nia.’ Huhwa byia̱k ji si̱ nyia̱ ma̱ng a̱nggu a̱ni, ‘Kyiak ta̱ka̱da a̱ti̱ta hu, a lyang, a ndyuut a̱ka̱kurung chyi nyaai[90] nia cha̱chaat.’

⁷“A̱ si̱ bu lyip a̱tyu ntung wu, ‘Ta a̱mang hwa nang a̱tyoli wu khwi ang?’ A̱tyu a̱wa si̱ nyia̱ ‘N ba̱ng nggu a̱lka̱ma a̱shasha swak wa.’ Byia̱k ji si̱ nyia̱ ma̱ng a̱nggu, ‘Kyiak ta̱ka̱da a̱ti̱ta hu, a lyang, a ndyuut a̱lka̱ma a̱shasha a̱ni̱nai[91] wa cha̱chaat.’

⁸“A̱tyu nzwá wu si̱ chyin byia̱k nggu ji ji̱ sang a̱chuchuk wu a̱ni; mat nang gu ndi si̱sak ji nang byia̱k ji nnyia̱ mumwang da̱ a̱bwuang wu a̱ni. “A̱tsak a̱lyiat, á̱niet swanta bani byia̱ mumwang di̱ nyia̱ nta̱m ma̱ng á̱ghyang a̱ swak á̱niet ba̱ shya̱ mi̱ sai hu a̱ni.

⁹N shei ma̱ng a̱nyin; nyi kwok zwá swanta nyin ji nyi mbeang á̱ghyang, nyi bu mbwoi á̱kpa̱ndang ma̱ng kurum nyin hu. Ka̱ nyi nyia̱ a̱nia, jen nang zwá nyin ji ntyak a̱ni, nyi na shya̱ á̱kpa̱ndang ba, ba̱ na san nyin ma̱ a̱ka̱sa sang sangba̱p mba na a̱ni[92].

¹⁰“Ka̱ nyi nyia̱ tsotswat di̱ nyia̱ a̱chyuang nta̱m; ma a̱nia wa, nyi na nyia̱ tsotswat di̱ nyia̱ a̱cha̱chet nta̱m wu. A̱wot ka̱ nyi nwai nyia̱ tsotswat ma̱ a̱chyuang nta̱m, nyi si̱ mi̱n nyia̱ tsotswat ma̱ a̱cha̱chet nta̱m wu bah.

¹¹Ka̱ nyi nyia̱ tsotswat ma̱ng zwá swanta jini bah; a̱nyan wa na tyia̱ a̱tsatsak nzwá wu mbwak nyin?

¹²Ma a̱nia wa, ka̱ nyi nyia̱ tsotswat ma̱ng zwá á̱ghyang á̱niet bah; a̱nyan wa na nang nyin zwá ji̱ yet si̱ nyin a̱ni?

¹³“A̱khwo si̱ mi̱n nyia̱ a̱yaatyoli a̱feang ta̱m bah. Mat, ka̱ a̱ nyia̱ a̱nia, a̱ na lak li a̱tyoli a̱nyiung, a̱wot a̱ chat a̱tyoli nyiung wu. Ma a̱nia wa, a̱ na fwuong a̱tyoli a̱nyiung, a̱wot a̱ jhyuai a̱tyoli a̱nyiung wu. Mat a̱nia, nyi si̱ mi̱n khwi A̱gwaza ma̱ng zwá swanta ji di̱n jen jhyung bah.”

¹⁴Nang A̱fa̱risawa ba nfa̱k tyiet huni a̱ni, ba̱ si̱ mai ngguu á̱ ma̱ng gu a̱lyem. Mat ba̱ yet á̱niet bya ba̱ la̱u chat zwá a̱ni.

¹⁵Huhwa Yesu si̱ nyia̱ ma̱ng a̱mba a̱ni, “Nyin, nyi bya yet tangka̱i á̱niet ba̱ chat nyia̱ nkyang kpa̱sai da̱nian á̱niet ba̱ ka kwok nyin nang á̱tsotswat á̱niet a̱ni. A̱wot A̱gwaza wa za̱m lyen nkyang nang nyi nyia̱ a̱di̱dam mi̱ nfwuo nyin na a̱ni. A̱wot kyang nang á̱niet mi̱ swanta chyin nyia̱ ku yet a̱ni, da̱ a̱vwuo A̱gwaza ku yet a̱shi̱shi̱k kyang wa za̱m!”

¹⁶Yesu si̱ bu nyia̱, “Doka Musa ji mbeang a̱lyiat a̱yaata̱m a̱kwonu A̱gwaza na; ni̱nia ku chok á̱niet ba si̱ ntat jen nang Yoona a̱tyu nyia̱ ba̱ptisman mbai a̱ni. A̱wot ma̱ninika, á̱ shei ma̱ng á̱niet ba A̱sham Nkhang Tyok A̱gwaza ka. A̱wot konyan kwan a̱ li nang gu nwuo mi̱ Tyok A̱gwaza hu.[93]

¹⁷A̱mgba̱m ma̱ng a̱nia, ku na yet a̱hyohyoot kyai tswazwa ma̱ng a̱byin ba̱ ta̱yuut, nang a̱bachunchwiit zwunzwuo a̱nyiung mami A̱lyiat A̱gwaza na, na nshyak a̱ni.

¹⁸“Kidee, ka̱ a̱yin tyat nyeang ma̱ng a̱byii̱k nggu wu, a̱ si̱ bwuo a̱ghyang; a̱ katnaan nia. Ma a̱nia wa, a̱tyu a̱ bwuo a̱byii̱k a̱ tyat nyeang ma̱ng a̱tyok a̱ghyang a̱ni; gu meang, a̱ katnaan nia.”

¹⁹Yesu si̱ bu nyia̱, “A̱tyu nzwá wa swan, a̱ si̱ khwi a̱sham a̱shong a̱cha̱chet a̱yaatoot ma̱ng á̱si̱ mami ba̱ byia̱ kurum a̱ni. A̱wot a̱ si̱ swan, a̱ swuo nyinyang kuzang a̱tuk.

²⁰A̱ghyang a̱niet si̱ nshya̱ á̱ ngyei gu Laaza̱rut. A̱ ku byia̱ a̱yaagap mi̱ nvam nggu hu a̱mgba̱m. Á̱ ni̱ myiai gu a̱zanunyuo a̱tyu nzwá ka.

²¹A̱jawa nang nggu Laaza̱rut ni̱ nswan a̱ fwuong di̱dang chunchong kyayak, ji̱ kwa̱i a̱ neet da̱ a̱tyii a̱tyu nzwá wu a̱ni. A̱wot a̱ka̱bwu nia ni̱ bai mameang, na̱ ba̱ nyiai a̱yaagap nggu ba.

²²“Di̱ ngaan hu, Laaza̱rut a̱tyu kunak a̱wa si̱ khwu. A̱yaata̱m tswá A̱gwaza si̱ bai ba̱ si̱ kyiak gu á̱ nat ndyo Ma A̱gwaza tswazwa. Ba̱ si̱si̱ sak gu da̱ a̱vwuo Ibrahim. A̱tyu nzwá wu mameang, si̱ khwu, á̱ si̱ niat gu.

²³“Á̱ si̱ nat ma̱ng a̱nggu da̱ a̱vwuo nkwom[94], a̱mali a̱nga̱ngak ndong sang sangba̱p. Nang gu ngba̱t á̱ghyi, a̱ si̱ nwuan tswazwa a̱ni; a̱ si̱ li Ibrahim ma̱ gbang mbeang Laaza̱rut nang gu swan da̱ a̱beam Ibrahim.

²⁴“Nggu, a̱tyu nzwá wu si̱ yei mi̱ chet nyia̱, ‘Ibrahim, a̱tyia̱ nung, fa̱k kunak nung! Ma̱sa̱kut, ta̱m Laaza̱rut gu swom ga̱swuong nggu ji ma̱ a̱sa̱khwot, na̱ gba̱i na̱ ka shyim nung a̱lyem ka. N swuo a̱gba̱ndang a̱bung wa ba̱t di̱ tyan a̱nga̱ngak ndong jini!’

²⁵“Ibrahim si̱ nyia̱ ma̱ng a̱nggu, ‘Nggwon nung, jhyung jen ji nang a ku nswan nswat nyinyang ang hu mi̱ swanta hu a̱ni. Di̱n jen a̱ja, a ku shyat a̱tan kyang nang fwuo ang hu chat a̱ni, a si̱ swa̱i. Da̱ a̱kwonu a̱kya, nggu Laaza̱rut, a̱ ku shya̱ a̱bya̱bya̱ kyang wa! A̱wot ma̱ninika, a̱ji wa nang gu nshya̱ nang á̱ shyim nggu fwuo hu; nang nwan, a shya̱ di̱ swuo a̱bung ang a̱ja.

²⁶A̱wot kang ma̱ng a̱nia, ma̱ a̱ka̱wa̱tyia̱ nzi̱t ma̱ng a̱nyin, á̱ byia̱ a̱tsuung a̱ngam a̱ khap nzi̱t ma̱ng a̱nyin a̱ni. A̱mgba̱m á̱niet ba̱ shya̱ a̱ma̱nyi nzi̱t ka a̱ni, ba̱ si̱ mi̱n byia̱k á̱ nat ma̱ng a̱nyin bah. Ma a̱nia wa, á̱niet ba̱ shya̱ a̱ma̱nyi nyin ka a̱ni, ba̱ si̱ mi̱n byia̱k á̱ bai da̱ a̱ma̱nyi nzi̱t ka bah.’

²⁷“A̱jawa a̱tyu nzwá wu si̱ bu nyia̱, ‘Ibrahim, a̱tyia̱ nung, ka̱ a̱nia wa, n chat n bu naai ang kyang ghyang. N byia̱ á̱na̱nyiuk a̱fwuon ba̱ shya̱ a̱mali a̱tyia̱ nung ka a̱ni. Ma̱sa̱kut, ta̱m ma̱ng Laaza̱rut gu nat a̱ja, gu ka khwat ba a̱fufwuo. Kalak ba̱ du bai di̱n tyan swuo a̱bung jini di̱n jen nang ba̱ bye nkwi a̱ni.’

²⁹“A̱wot Ibrahim si̱ nwuak gu shim nyia̱, ‘Kaai, ka̱ ba̱ doot ba̱ fang doka Musa ma̱ng a̱lyiat nang a̱yaata̱m a̱kwonu A̱gwaza ba ku lyuut, ba̱ si̱ ngba mba a̱ni. Yok, ba̱ nyia̱ nta̱m ma̱ng a̱lyiat a̱nia.’

³⁰“A̱tyu nzwá wu si̱ nyia̱, ‘Kaai! Ibrahim a̱tyia̱ nung. Da̱ a̱kwonu a̱kya, ka̱ á̱ ta̱m ma̱ng a̱mba a̱tyu doot ma̱ng swuan ma̱ á̱niet ba̱ ka̱n kwi a̱ni; ba̱ na ghwon a̱ka̱tuk nyia̱ mba wu, ba̱ khwi A̱gwaza za̱m!’

³¹“Ibrahim si̱ nyia̱, ‘Kaai, ka̱ ba̱ lak myiai a̱fufwuo, ba̱ si̱ nyia̱ ta̱m ma̱ng doka Musa ji ma̱ng a̱lyiat a̱yaata̱m a̱kwonu A̱gwaza a̱nia; ku nang a̱yin doot ma̱ng swuan ma̱ á̱niet ba̱ ka̱n kwi a̱ni, a̱ si̱ nat da̱ a̱vwuo mba; ba̱ na myiai a̱fufwuo ba̱ nyia̱ ta̱m ma̱ng a̱lyiat nggu na bah!’ ”