Read tyap Luka 17 Bible Online

Luka 17 - tyap bible

Luka 17

¹Á̱ghyang á̱tuk, Yesu si̱ nyia̱ ma̱ng mman ta̱m nggu na, “Á̱ na mbyia̱ mai ma̱ a̱di̱di̱t ku na tyei á̱niet a̱ka̱tuk nyia̱ a̱ni. A̱mgba̱m ma̱ng a̱nia, ku swan a̱tyu a̱ yet jat mai á̱niet ba̱ ga̱u a̱ni!

²Tangka̱i a̱tyu a̱hwa, ku myim á̱ kyiak a̱gba̱ndang naan kwang, á̱ lya̱u gu ndyo a̱ma̱nfwuo, á̱ mat gu ma̱ a̱tsuung kyai a̱sa̱khwot! Si̱ a̱hwa na yet a̱ swak nang gu na ndaai bachyuang mman A̱gwaza na, ba̱ ga̱u ba̱ nyia̱ a̱ka̱tuk nyia̱ a̱ni!

³“Nyi cham pyipyia̱ nyin mbeang! “Ka̱ a̱tyu khwi nyia̱ a̱ka̱tuk nyia̱, nyi ni̱ nkam nyi bu jhyuk guu. Ka̱ a̱ ghwon a̱ka̱tuk nyia̱ wu, nyi chi ngguu.

⁴Ku nang a̱tyu a̱wa nyia̱ nyin á̱ka̱tuk nyia̱ a̱ka̱natat a̱tuk a̱nyiung, a̱wot a̱ si̱ ghwon a̱ka̱tuk nyia̱ nggu wu a̱ si̱ bwuok a̱ bai ma̱ng a̱nyin nyia̱ nyi chi gu ndyo; ku yet nyin ta hwa nyi chi ngguu.”

⁵A̱yaata̱m Yesu ba si̱ nyia̱ ma̱ng a̱nggu, “A̱tyoli Yesu, ma̱sa̱kut tak ma̱ng a̱nzi̱t si̱sak nang zi̱ na mbeang nwuak fwuo nzi̱t hu da̱ nwan a̱ni!”

⁶A̱tyoli Yesu si̱ nwuak ba shim di̱ kidee nyia̱, “Ka̱ nyi wa nnwuak fwuo da̱ A̱gwaza ma̱ chunchwiit nang a̱bantswa mustat a̱ni; nyi na nyia̱ ma̱ng a̱gba̱ndang a̱kwon[95] wuni, ‘Ngat á̱ni̱nan ang ba! A si̱ ti̱p a̱pyia̱ ang mi̱ kyai a̱sa̱khwot!’ ” A̱wot nyi na li a̱kwon ka ka̱ khwi a̱lyiat nyin na!

⁷Yesu si̱ ya a̱son nyia̱, “Ka̱ a̱tyoli byia̱ a̱khwo a̱ kap gu yak, ku a̱ chok gu zón seap a̱ni; di̱n jen nang a̱khwo a̱wa mbwuok a̱ neet di̱n tyan ta̱m a̱ni, a̱tyoli wu na nyia̱ ma̱ng a̱khwo wu gu swan ma̱ng a̱nggu ba̱ ya kyayak hu dundung a?

⁸Kaai, da̱ a̱kwonu a̱kya, a̱tyoli wu na nyia̱, ‘Di̱ ntsa hu, kup a̱toot nta̱m ang wu, a nat a wan kyayak, a nang nung. A̱wot a sii nat, a ya kyayak hu mameang.’

⁹A̱wot a̱tyoli wu na gwai ma̱ng a̱khwo wu mat a̱ nyia̱ ta̱m hu nang a̱tyoli wu tyia̱ nggu nyia̱ hu a̱ni a? Kaai, a̱ na gwai ma̱ng a̱nggu bah.

¹⁰Ma a̱nia wa nyin mameang, di̱n jen nang nyi nkhwi a̱lyiat nung na a̱ni, ku myim nyi nyia̱, ‘Zi̱ yet ma̱ á̱khwo bya. Zi̱ nyia̱ ta̱m hwa ku myim zi̱ nyia̱ a̱ni. Zi̱ maai á̱ chyin zi̱t bah.’ ”

¹¹Nang Yesu ngya a̱son ma̱ a̱chyet a̱ naat Urusha̱lima a̱ni, a̱ si̱ kai gak ku shya̱ a̱ka̱wa̱tyia̱ nfam bibyin Ga̱lili ma̱ng Sa̱mariya a̱ni.

¹²Nang gu nnwuo a̱bakeang a̱ghyang a̱ni, á̱niet gbap swak si̱ bai ba̱ ka myim ma̱ng a̱nggu. A̱wot ba̱ si̱ yong zan,

¹³ba̱ si̱ yei gu mi̱ chet nyia̱, “Yesu, A̱tyoli nzi̱t, ma̱sa̱kut, fa̱k kunak nzi̱t!”

¹⁴A̱ si̱ nwuan mbaa, a̱ si̱ nyia̱, “Nyi nat, nyi si̱ tak á̱pyia̱ nyin da̱ a̱vwuo a̱yaapris ba[96]; ba̱ ka li si̱sak nyi nchoot a̱ni.” Nang ba̱ nshya̱ da̱ a̱chyet ka a̱ni, ba̱ si̱ li nang á̱ nchoot ba gbap hu.

¹⁵Nang a̱tyo a̱nyiung mami á̱niet gbap swak a̱bya ndi nang á̱ nchoot gu a̱ni; a̱ si̱ bwuok a̱ nat da̱ a̱vwuo Yesu, a̱ si̱ nyia̱, “N dyep A̱gwaza!”

¹⁶A̱ si̱ kpaat a̱khwukhwut, a̱ si̱ kup a̱ghyi a̱byin a̱zaghyi Yesu a̱ si̱ gwai gu. A̱wot a̱tyu gbap a̱wa ku yet a̱tyu Sa̱mariya wa.

¹⁷Yesu si̱ nyia̱, “N wa ngyei n choot á̱niet gbap swak byaa? Á̱kum á̱niet a̱kubunyiung ka shya̱ a̱ji wa?

¹⁸Á̱ mbyia̱ a̱tyu a̱ bwuok a̱ bai a̱ si̱ dyep a̱ bu gwai A̱gwaza a̱ni bah; ma̱ a̱tyu Sa̱mariya a̱ yet á̱nietchen wu a̱ni, nggu wa bwuok a̱ bai ma̱nyin gu a?”

¹⁹Yesu si̱ nyia̱ ma̱ng a̱nggu, “Doot, a nat a̱mali. Nwuak fwuo ang hu da̱ nung hwa, san[97] ang.”

²⁰Á̱ghyang á̱tuk, A̱fa̱risawa á̱ghyang si̱ bai, ba̱ si̱ lyip Yesu jen ji nang Tyok A̱gwaza hu na mbai a̱ni. A̱ si̱ nwuak ba shim nyia̱, “Tyok A̱gwaza hu na bai di̱ si̱sak ji á̱ na ndi hu a̱ni bah.

²¹Da̱ mba, á̱ mbyia̱ a̱tyu a̱ na nyia̱, ‘Di, tyok hu hwa a̱ji,’ ku ‘hu hwa a̱ja̱u’ a̱ni bah. Da̱ a̱kwonu a̱kya, Tyok A̱gwaza hu wa shya̱ dundung ma̱ng a̱nyin ma̱ninika za̱m[98].”

²²A̱jawa gu si̱ nyia̱ ma̱ng mman ta̱m nggu na a̱ni, “Jen chobai nang nyi bye mbyia̱ di̱dang ba̱t, nyi li mam nang nung, Nggwon A̱tyubishyi na mbwuok a̱ bai a̱ni. A̱wot nyi na li nhu bah.

²³Á̱ghyang á̱niet na hyia̱ ma̱ng a̱nyin nyia̱, ‘Di Nggwon A̱tyubishyi kya ka a̱ji!’ Ku ba̱ nyia̱, ‘Di kikya a̱ja̱u!’ Nyi yok doot, nyi khwi mba bah.

²⁴“Ma̱nang á̱ ni̱ ndi sai a̱mya̱ra̱m nza, ku tyia̱ ma̱ mya̱ra̱m a̱ team kyai tswazwa hu a̱ni; ma a̱nia wa nang nung, Nggwon A̱tyubishyi, bye ndi di̱ mam hu nang n bye mbwuok bai mi̱ swanta hu a̱ni.

²⁵A̱wot di̱n tsa hu, ku yet ta hwa Nggwon A̱tyubishyi ka̱ swuo a̱bung ba̱t, á̱niet che bani bu na lak li nkaa, mam a̱hwa ku sii bai.

²⁶“Ma̱nang hu ku ndi di̱n jen Nuhu gbangbang a̱ni; ma a̱nia wa ku na ndi mi̱ mam a̱hwa nang Nggwon A̱tyubishyi na mbwuok a̱ bai a̱ni.

²⁷Di̱n jen Nuhu ji gbangbang, á̱niet ba ku shya̱ da̱ ya á̱ tsa nswuo á̱ tsa nyia̱ nyeang ma̱ng á̱ghyang, ba̱ng si̱ nat mam hu nang Nuhu nnwuo ma̱ a̱gba̱ndang kukwon a̱wak a̱ byia̱ a̱kup a̱ni. A̱jawa za si̱ ba̱ kin ta̱bat va ba̱t! A̱wot a̱gba̱ndang a̱ri̱giwa a̱sa̱khwot si̱ ghwut a̱ si̱ hyaai a̱mgba̱m á̱niet swanta ba.

²⁸“Ma a̱nia wa, á̱niet gbangbang ba ku nnyia̱ di̱n jen nang Lutu ku nswan mi̱ swanta hu a̱ni. Á̱niet ba ku shya̱ di̱ ya á̱ tsa á̱ nswuo, á̱ tsa á̱ nyia̱ a̱bwuang ma̱ng á̱ghyang. Ba̱ si̱ bu shya̱ di̱ khap ma̱ng nok a̱ka̱sa,

²⁹ba̱ng si̱ nat mam nang Lutu nghwut a̱ si̱ ghwon Sodom a̱ni. A̱jawa A̱gwaza si̱ kin tyia̱ a̱nga̱ngak ndong si̱ chyok mbeang a̱chi̱chan ndong nang taan a̱ni, neet mi̱ kyai tswazwa, ku si̱ ba̱ hyaai mba a̱mgba̱m!

³⁰Ma a̱nia wa ku na ndi di̱n jen á̱zanson ji, nang á̱ na ntyai Nggwon A̱tyubishyi kpa̱sai a̱ni.

³¹“A̱tuk a̱kya, a̱tyu a̱ shya̱ tazwa a̱kup a̱li nggu a̱ni, gu yok chyok a̱ nwuo mami a̱li ka, a̱ ka kwok nkyang nggu na a̱ ghwut ndyo bah. Ma a̱nia wa, a̱tyu a̱ shya̱ ma̱ a̱byin khap nggu a̱ni, gu yok bwuok a̱ bai a̱mali, gu kwok nkyang nggu na bah.

³²Nang ku ndi a̱nia a̱ni, nyi jhyung kyang ku shya̱ a̱byii̱k Lutu[99] wu a̱ni!

³³A̱tyu a̱ chat san swuan nggu ji a̱ni, ji̱ na bwuk. A̱wot a̱tyu a̱ shim a̱ si̱ nwai swuan nggu ji a̱ni, a̱ na shya̱ nji si̱ nat sang sangba̱p.

³⁴“N tak nyin, á̱niet a̱feang na shya̱ mi̱ nda da̱ a̱gbaat a̱nyiung a̱tyetuk. A̱wot á̱ na ti̱n a̱tyo nyiung, á̱ ghwon a̱tyu a̱nyiung wu.

³⁵Ma a̱nia wa, á̱nyiuk a̱feang na shya̱ da̱ kwang yak dundung mi̱ tukpak. Á̱ na kyiak a̱tyo a̱nyiung, á̱ ghwon a̱tyo nyiung wu.”

³⁷A̱jawa mman ta̱m nggu na si̱ lyip gu nyia̱, “A̱tyoli, nkyang nani na tsa a̱ji wa?” A̱ si̱ shim di̱ kidee nyia̱, “Di̱ ntyan nang nkwom nshya̱ a̱ni, a̱ja wa nang á̱nggulu ni̱ ntung á̱ ya.”[101]