Read tyap Luka 19 Bible Online

Luka 19 - tyap bible

Luka 19

¹Yesu si̱ nwuo a̱keang Yeriko a̱ chong a̱ sweap.

²A̱tyok a̱ghyang ku shya̱ a̱ja, á̱ si̱ ngyei nggu Za̱ka. A̱ ku yet a̱gba̱ndang a̱tyu saai kurum ga̱ndu wa, mi̱ fam a̱byin a̱hwa. A̱wot a̱ si̱ byia̱ zwá gba̱mgbam.

³Za̱ka ku kwan ba̱t a̱ ka li tangka̱i a̱yin nang Yesu yet a̱ni. A̱wot a̱ si̱ shya̱ vak hu bah. Mat a̱ ku shi a̱za bah; á̱kpa á̱niet ka si̱ fwun nggu li Yesu hu.

⁴Mat a̱nia, a̱ si̱ tyong chung a̱ nat a̱zanson. A̱ si̱si̱ nyeak a̱kwon a̱bwabwap da̱ a̱beam vak ka. Da̱nian a̱ ka li Yesu di̱n jen nang Yesu na nswak di̱n vak hu a̱ni.

⁵Jen nang Yesu nchong, a̱ si̱ tat a̱tyin a̱kwon a̱bwabwap nang Za̱ka nyeak a̱ni; a̱ si̱ gba̱t á̱ghyi, a̱ si̱ li Za̱ka. A̱ si̱ yorong nggu da̱ a̱lyoot nggu ka mi̱ chet nyia̱, “Za̱ka, chyok bai a̱byin a̱nggang! Mat, ku yet nung ta hwa n gyet a̱nietchen a̱gbang ang a̱fwun!”

⁶Za̱ka si̱ kin ghan a̱nggang. A̱ si̱ chyok a̱ bai a̱byin. A̱wot a̱ si̱ nat ma̱ng Yesu a̱gbang nggu ka da̱ a̱gwai ma̱ng a̱lyia̱ sai!

⁷A̱wot á̱niet ba si̱ fa̱k a̱lyia̱ ya. Ba̱ si̱ kwop a̱dyii̱ng nyia̱, “Yesu nat a̱ yet a̱nietchen a̱mali a̱tyu nang á̱ lyen gu yet a̱tyu a̱ka̱tuk nyia̱ ba̱t a̱ni!”

⁸Á̱ labeang bah, Za̱ka si̱ doot a̱ yong a̱zaghyi A̱tyoli Yesu, a̱ si̱ nyia̱, “A̱tyoli, n na nka̱u zwá nung ji a̱ka̱feang, n nang á̱kunak á̱kum! A̱wot ki̱ n shyok á̱niet ba nang nsaai kurum ga̱ndu hu da̱ a̱vwuo mba a̱ni; n na mbwuok ndyo, n nwuak mbaa! N na tan mba kurum hu che a̱ka̱naai di̱ si̱sak ji nang n nshyok mba a̱ni!”

⁹Yesu si̱ nyia̱, “A̱fwun, á̱niet mali bani shya̱ san! Mat a̱tyu wuni tak kpa̱sai nang gu ngyet a̱tsatsak nggwon a̱ ghwut mi̱ kwai Ibrahim ja a̱ni.

¹⁰Mat Nggwon A̱tyubishyi[111] bai ka̱ kup á̱ghyi di̱ chat, a̱wot ka̱ san á̱niet ba̱ bwuk mat a̱ka̱tuk nyia̱ a̱ni.”

¹¹Di̱n jen a̱ja, á̱kpa á̱niet ka si̱ myiai a̱fufwuo á̱ fwuong tyiet Yesu hu. A̱wot mat nang gu nshim tat a̱keang Urusha̱lima ka a̱ni, a̱ si̱ lyiat ma̱ng a̱mba di̱ kidee jhyang. Da̱nian gu ka jhyi a̱di̱dam mba wu di̱ si̱sak nang ba̱ nfa a̱ni, nyia̱ Tyok A̱gwaza hu na bai di̱n jen nang Yesu nnwuo Urusha̱lima hu a̱ni.

¹²Yesu si̱ nyia̱, “Á̱ ku byia̱ nggwon a̱gwam a̱ghyang, ka̱ si̱ ghwut a̱ naat a̱byin á̱ghyang ma̱ gbang; da̱nian á̱ ka kup ka tyok, ka̱ sii bwuok a̱ bai.

¹³Nang ka̱ ndoot na nat a̱ni, ka̱ si̱ yorong á̱khwo swak nang ka̱ byia̱ a̱ni dundung. Ka̱ si̱ jong kuzang a̱khwo ma̱ mba kurum, ku yet zang a̱tyu nta̱m zwát tsat a̱ni. A̱wot ka̱ si̱ nyia̱ ma̱ng a̱mba, ‘Nyi nyia̱ nung a̱bwuang ma̱ng kurum huni, si̱ nang n bwuok.’

¹⁴A̱wot á̱niet a̱byin nggwon a̱bya si̱ lak li nkaa. Ba̱ si̱ ta̱m a̱yaata̱m ba̱ khwi nka da̱ bang, ba̱ si̱ hyia̱ ma̱ng a̱gba̱ndang a̱gwam shan wu nyia̱, ‘Zi̱ chat nggwon kani ka̱ ba̱ yet a̱gba̱ndang a̱gwam shan nzi̱t wu bah.’

¹⁵“A̱mgba̱m ma̱ng a̱nia, á̱ si̱ labeang bah, á̱ si̱ kup ka tyok hu, ka̱ si̱ bwuok a̱ bai. A̱ si̱ yorong á̱khwo nggu ba nang gu jong mba kurum a̱bwuang hu a̱ni. A̱ si̱ chat a̱ lyen kpangti̱n nang konyan ma̱ mba shya̱ nggu ndyo a̱ni.

¹⁶“A̱khwo ntsa wu si̱ bai, a̱ ba̱ hyia̱ ma̱ng a̱nggu nyia̱, ‘A̱tyoli, di kurum zwát tsat ang huhwa hu nang a ku jong nung a̱ni. N mbwuang, n si̱ nshya̱ kpangti̱n a̱ka̱swak tazwa!’

¹⁷“A̱jawa a̱tyoli wu si̱ nyia̱ ma̱ng a̱nggu, ‘Ku yet a̱sham! A yet a̱tan a̱khwo wa za̱m! Ma̱nang a nyia̱ tsotswat da̱ a̱bada̱dei kyang nang n tyia̱ ang ndyo mbwak a̱ni; mat a̱nia, n na ntyia̱ ang a nyia̱ tyok tazwa a̱ka̱keang swak. Huhwa na yet zang ang ji.’

¹⁸“A̱khwo a̱ yet a̱feang wu a̱ni si̱ bai, a̱ ba̱ hyia̱ ma̱ng a̱nggu nyia̱, ‘A̱tyoli, di kurum zwát tsat ang huhwa hu nang a ku jong nung a̱ni. N mbwuang, n si̱ nshya̱ kpangti̱n a̱ka̱fwuon tazwa!’

¹⁹“A̱jawa a̱tyoli wu si̱ nyia̱ ma̱ng a̱nggu, ‘Ku yet a̱sham! Nwan, n na ntyia̱ ang a nyia̱ tyok tazwa a̱ka̱keang a̱fwuon.’

²⁰“A̱wot a̱khwo a̱ yet a̱tat wu a̱ni, si̱ bai ma̱ng kurum nang á̱ ku jong nggu wa a̱ni ma̱nyin hu. A̱ si̱ nyia̱, ‘A̱tyoli, di kurum ang huhwa hu. N ku niat hu[112]. Di huhwa hu ma̱ cha̱chaat ma̱nang a ku jong nung a̱ni!

²¹N ku nfa̱k a̱wun, mat n dyen a yet a̱tyu shim kyang wa ba̱t. A ni̱ kyiak kyang ku yet si̱ nwan a̱ni bah. A̱wot a ni̱ chak yak da̱ a̱vwuo ka nang a nchyui a̱ni bah.’

²²“A̱jawa a̱tyoli wu si̱ doot lyen. A̱ si̱ nyia̱ ma̱ng a̱nggu, ‘Nwan a̱buk a̱khwo! N na nyia̱ ang shi̱ri̱ya ji cha̱chaat ma̱ng á̱lyiat na̱ ghwut a̱bwonu ang ka a̱ni. Nang a wa ndyen nang n gyet a̱tyu shim kyang wa, a̱wot n ni̱ nkyiak kyang di̱ ku yet si̱ nung a̱ni bah. Nang a wa ndyen n bu ni̱ nchak yak da̱ a̱vwuo ka nang n chyui a̱ni bah.

²³Nang a ndyen a̱nia a̱ni, mi̱ yihwa mbyia̱ nang a ndak tyia̱ kurum nung hu mbwak á̱niet a̱bwuang? Ka̱ a wa nyia̱ a̱nia, shimba, ki̱ n bwuok mbai, n na nsan kurum nung hu ma̱ng kpangti̱n ji!’

²⁴“A̱jawa a̱gwam wu si̱ nyia̱ ma̱ng á̱khwo á̱ghyang ba̱ yong a̱ja a̱ni, ‘Nyi ta̱wap kurum hu mbwak a̱ka̱tuk a̱khwo wuni. Nyi nwuak a̱khwo wu a̱ shya̱ kpangti̱n a̱ka̱swak tazwa kurum nang n jong nggu a̱ni.’

²⁵“A̱wot á̱khwo ba ba̱ yong a̱ja a̱ni si̱ nyia̱, ‘Kwot a̱tyoli! A̱khwo a̱wa ka̱n shya̱ kpangti̱n a̱ka̱swak tazwa kurum nang a jong nggu a̱ni!’

²⁶“A̱gwam wu si̱ nwuak mba shim nyia̱, ‘A̱tsak a̱lyiat, á̱niet ba ba̱ nyia̱ tsotswat ma̱ng kyang nang á̱ jong mba a̱ni; á̱ na mbeang mba ghyáng. Ma a̱nia wa, á̱niet ba di̱ ba̱ nyia̱ tsotswat a̱ni bah; ku ba̱ byia̱ kyang ma̱ a̱da̱dei, á̱ na ta̱wap hu á̱ ghwon mbaa.

²⁷“ ‘A̱wot tazwa á̱niet ba̱ lak li nung, ba̱ bu lak n gyet a̱gwam mba wu a̱ni; nyi bai ma̱ng a̱mba, nyi hyaai mba a̱zaghyi nung!’ ”

²⁸Nang Yesu ntyak lyiat ma̱ng á̱niet ba di̱ kidee ji a̱ni, a̱ si̱ ghwon a̱keang ka nang gu nshya̱ a̱ni. A̱ si̱ khwat a̱son mman ta̱m nggu na, a̱ naat Urusha̱lima.

²⁹Nang ba̱ nshya̱ da̱ a̱chyet ka a̱ni, ba̱ si̱ tat kpa̱mkpaan ma̱ng a̱baka̱keang Ba̱ti̱faji ma̱ng Ba̱ta̱ni, na̱ shya̱ da̱ a̱beam Tsok Za̱itun a̱ni. A̱jawa Yesu si̱ nta̱m mman ta̱m nggu a̱feang, ba̱ khwat a̱son nggu.

³⁰A̱ si̱ nyia̱, “Nyi nat ma̱ a̱keang keniaau. Mi̱ di̱ nwuo nyin hu a̱ja, nyi na li a̱banggwon a̱ka̱za̱nki nang á̱ la̱p a̱ni, a̱yin ka̱n mak nyeak ka bah. Nyi byii̱k kaa, nyi bai ma̱ng a̱nung ndyo.

³¹Ka̱ a̱yin lyip nyin kyang ku mbyia̱ nang nyi mbyi nka a̱ni, nyi nyia̱ ma̱ng a̱nggu, ‘A̱tyoli wa chat ka.’ ”

³²Huhwa mman ta̱m a̱feang na si̱ nat á̱ si̱ shya̱ a̱banggwon a̱ka̱za̱nki ka ma̱ cha̱chaat nang Yesu nhyia̱ a̱ni.

³³A̱wot nang ba̱ nshya̱ di̱ byi a̱banggwon a̱ka̱za̱nki ka a̱ni, á̱niet byia̱ ba si̱ lyip ba nyia̱, “Yihwa mbyia̱ nang nyi mbyi a̱banggwon a̱ka̱za̱nki ka?”

³⁴Mman ta̱m na si̱ nwuak gu shim nyia̱, “A̱tyoli wa chat ka.”

³⁵Huhwa ba̱ si̱ kwak a̱banggwon a̱ka̱za̱nki ka á̱ bai ndyo da̱ a̱vwuo Yesu. Ba̱ si̱ khwut a̱yaatoot mba ba. Ba̱ si̱ teak da̱ a̱banggwon a̱ka̱za̱nki ka, Yesu si̱ nyeak a̱ nswan.

³⁶Nang gu nta̱bat a̱chyet da̱ a̱ka̱za̱nki ka a̱ni, á̱kpa á̱niet ka si̱ teak a̱yaatoot mba ba di̱n vak hu, Yesu a̱ ka nchong.

³⁷Jen nang gu ntat a̱vwuo ka nang vak hu nkpa̱k a̱ chyok neet da̱ Tsok Za̱itun ji a̱ni; a̱mgba̱m á̱niet ba̱ khwi nggu a̱ni, ba̱ si̱ nwuo khwot a̱gugong á̱ bwom á̱ dyep A̱gwaza, mat a̱mgba̱m nkyang a̱ri̱bi̱di nang ba̱ li a̱ni, nyia̱,

³⁸“A̱gwam a̱ chobai da̱ a̱lyoot A̱gwaza a̱ni, a̱ yet a̱tyu a̱li̱ba̱rka wa! Swat nyinyang shya̱ Ma A̱gwaza tswazwa! A̱wot yok á̱ nwuak A̱gwaza a̱ shya̱ a̱ja a̱ni shi!”[113]

³⁹A̱wot A̱fa̱risawa á̱ghyang ba̱ shya̱ ma̱ á̱kpa á̱niet ka a̱ni, si̱ nyia̱ ma̱ng Yesu, “A̱tyu tyiet, kam mman ta̱m ang na ba̱ tyia̱ nywang!”

⁴⁰Yesu si̱ nwuak ba shim nyia̱, “Yok, n tak ma̱ng a̱nyin; ku á̱niet ba tyia̱ nywang, nfang nani na̱ shya̱ a̱beam vak ka a̱ni, na nwuo dyep nung mi̱ chet da̱ a̱kwonu mbaa.”

⁴¹A̱wot nang Yesu nchong a̱ si̱ tat kpa̱mkpaan ma̱ng Urusha̱lima a̱ni; a̱ si̱ ta̱kang, a̱ si̱ li a̱keang ka. A̱jawa fwuo nggu hu si̱ byian. A̱ si̱ twei tazwa á̱niet Urusha̱lima ba.

⁴²A̱ si̱ nyia̱, “A̱yaa, a̱fwun kani, n na nyia̱ ni wa, a̱mgba̱m nyin á̱niet Urusha̱lima ba, nyi ndyen vak shyat swat nyinyang hu! A̱wot ma̱ninika, nang ku ndi a̱nia a̱ni, jen ji swak nyin! Nyi si̱ mi̱n fi̱k kyang ku na nwuak nyin swat nyinyang a̱ni bah.

⁴³A̱wot nyin á̱niet Urusha̱lima, á̱ na labeang bah, á̱niet lak li nyin ba na tung mbyin, ba̱ nnok a̱gba̱ndang a̱junjung a̱kuu; da̱nian á̱ ka tat a̱za mbat a̱keang nyin na. Á̱niet nzwang A̱romawa[114] na bu na kpaat a̱ka̱chya̱ na̱ tyong nyin á̱ keang di̱ kuzang fam.

⁴⁴Á̱niet lak li nyin ba na nyeap nyin á̱ tyei a̱byin; nyin ma̱ng mman nyin na, ba̱ na hyaai nyin. Ba̱ bu na ghyun kuzang a̱fang ma̱ a̱keang nyin ka, ka̱ bai a̱byin! Mat nyi lak san a̱wat nang á̱ nwuak nyin, nyi ka nshya̱ san hu a̱ni.”

⁴⁵A̱jawa Yesu si̱ nwuo mi̱ didyaat A̱li Nwuat Za̱nang A̱gwaza hu. A̱ si̱ nwuo fi̱n á̱niet a̱bwuang ma̱ng á̱niet lyiai nkyang nzwá nang á̱ na nnwuat za̱nang a̱ni.

⁴⁶Yesu si̱ ta̱ngam a̱nwuat mi̱ chet, a̱ si̱ nyia̱, “Á̱ lyuut mami A̱lyiat A̱gwaza na nyia̱, ‘A̱li nung ka na yet a̱li naai A̱gwaza kya.’[115] “A̱wot da̱ a̱kwonu a̱kya, nyin, nyi bwuak ka ntyia̱ ‘kuu á̱niet á̱tsaai!’[116]”

⁴⁷Nang si̱ a̱hwa nswak a̱ni, Yesu si̱ tyiet á̱niet ba Mali Nwuat Za̱nang A̱gwaza ka kuzang a̱tuk. A̱wot a̱cha̱chet a̱yaapris ba, ba̱ yet a̱yaakwak a̱son ba a̱ni, ma̱ng a̱yaagwak tyiet doka A̱gwaza ba, mbeang a̱yaakwak a̱son A̱yahudawa á̱ghyang; ba̱ si̱ nwuo vwuoi a̱ka̱shuk di̱ si̱sak nang ba̱ na nhyat Yesu a̱ni.

⁴⁸A̱wot a̱yaakwak a̱son A̱yahudawa ba si̱ shya̱ vak hyat Yesu hu bah. Mat a̱mgba̱m á̱niet ba ku myiai a̱fufwuo á̱ fwuong tyiet Yesu hu.