Read tyap Luka 20 Bible Online

Luka 20 - tyap bible

Luka 20

¹Á̱ghyang á̱tuk nang Yesu shya̱ di̱ tyiet á̱niet, a̱ tsa a̱ bu nshei mba A̱sham Nkhang A̱mali Nwuat Za̱nang A̱gwaza ka; a̱cha̱chet a̱yaapris, a̱yaagwak tyiet doka, ma̱ng á̱niet khwop á̱niet si̱ bai da̱ a̱vwuo nggu.

²Ba̱ si̱ lyip gu nyia̱, “Zang tangka̱i tyok hwa nang a byia̱ nyia̱ nkyang nani? A̱nyan wa nwuak ang a̱wat ka nang a nyia̱ tyok a̱hwa a̱ni?”

³Yesu si̱ nwuak ba shim nyia̱, “Nung meang, n ma na ndyip nyin kyang nyiung!

⁴Nyi tak nung, tyok nyia̱ ba̱ptisman Yoona hu neet a̱ji wa; ku neet Ma A̱gwaza tswazwa kya, kee da̱ a̱vwuo a̱tyubishyi kya?”

⁵Ba̱ si̱ shya̱i á̱ nat da̱ gbang a̱nyiung. Ba̱ si̱ ya nwuo lyiat tsi̱tsak mba nyia̱, “Ka̱ zi̱ shim nyia̱ A̱gwaza wa nwuak Yoona tyok nyia̱ ba̱ptisman hu; a̱ na lyip zi̱t nyia̱ da̱ yihwa mbyia̱ zi̱ ndak nwuak a̱chuchuk di̱ tyiet Yoona hu?

⁶“A̱wot ki̱ zi̱ nyia̱ a̱tyubishyi wa nwuak Yoona tyok nyia̱ ba̱ptisman hu; shimba, a̱mgba̱m á̱niet ba na doot jhya̱ ba̱ mang nzi̱t ma̱ng nfang. Mat ba̱ wa ka̱n nwuak a̱chuchuk nang Yoona ngyet a̱tsak a̱ta̱m a̱kwonu A̱gwaza wa.”

⁷Mat a̱nia, di̱ ngaan hu ba̱ si̱ nwuak Yesu shim nyia̱, “Zi̱ lyen a̱tyu a̱ nwuak Yoona tyok nyia̱ ba̱ptisman hu a̱ni bah.”

⁸A̱wot Yesu si̱ ma nwuak ba shim nyia̱, “Ka̱ a̱nia wa, nung meang, n na ntak ma̱ng a̱nyin a̱tyu a̱ nwuak nung tyok hu n nyia̱ nkyang nani a̱ni bah.”

⁹A̱jawa Yesu si̱ bu bwuak, a̱ si̱ nwuo lyiat ma̱ng á̱niet ba di̱ kidee jhyang nyia̱, “A̱tyok a̱ghyang wa kap a̱byin a̱na̱p. A̱ si̱ khwap á̱niet khap á̱ghyang a̱byin ka, ba̱ kap nggu ndyo. A̱wot a̱ si̱ nkat a̱byin á̱ghyang ma̱ gbang. A̱ si̱si̱ swan a̱ja, a̱ si̱ nyia̱ ndyia̱ ma̱ a̱di̱di̱t.

¹⁰A̱wot nang jen kpa̱i sum a̱na̱p ji nnyia̱ a̱ni, a̱tyu byia̱ a̱byin wu si̱ ta̱m ma̱ng a̱khwo nggu a̱ghyang; a̱ ka si̱ san sum a̱na̱p ku yet a̱kwonu nggu ka a̱ni. A̱wot á̱niet khap ba si̱ kwa da̱ a̱khwo a̱wa. Ba̱ si̱ tsot gu, ba̱ si̱ fi̱n nggu! A̱ si̱ nkat mbwak nkhwot.

¹¹“A̱tyu byia̱ a̱byin wu si̱ bu ta̱m ma̱ng a̱khwo a̱ghyang. A̱wot ba̱ si̱ bu nyia̱ nggu lihyat. Ba̱ si̱ tsot gu, ba̱ si̱ fi̱n gu, a̱ si̱ nkat mbwak nkhwot.

¹²Ma̱ a̱nia wa, a̱tyu byia̱ a̱byin wu si̱ bu nta̱m ma̱ng a̱khwo a̱tat wu. A̱wot ba̱ si̱ bwoi nggu kun. Ba̱ si̱ bu fi̱n nggu. A̱ si̱ nkat mbwak khwot.

¹³“Di̱ ngaan hu, a̱tyu byia̱ a̱byin wu si̱ nyia̱ a̱di̱dam mi̱ fwuo nggu. A̱ si̱ lyip a̱pyia̱ nggu nyia̱, ‘Ma̱ninika, yihwa n na nyia̱? Yok, n dyen kyang n na nyia̱ a̱ni! N na nta̱m ma̱ng nggwon byin nung, nang n chat ba̱t a̱ni. A̱tsak a̱lyiat, ba̱ na nwuak nggwon nung ka shi!’

¹⁴“A̱wot jen nang á̱niet khap ba ndi nggwon a̱tyu byia̱ a̱byin ka chobai a̱ni, ba̱ si̱ lyiat tsi̱tsak mba nyia̱, ‘Di nggwon ka̱ na ya gado a̱byin hu a̱ni; kikya chobai! Nyi bai zi̱ hyat ka, da̱nian zi̱ ka san a̱byin ka, ka̱ yet a̱si̱ nzi̱t!’

¹⁵Huhwa ba̱ si̱ ta̱bat nggwon ka, ba̱ si̱ kwak ka á̱ nat ndyo a̱ma̱nta a̱byin a̱na̱p ka. Ba̱ si̱si̱ hyat ka a̱ja!” “Yihwa nang nyi fa a̱tyu byia̱ a̱byin wu na nyia̱ á̱niet khap a̱bya ndyo?

¹⁶N tak ma̱ng a̱nyin, a̱tyu byia̱ a̱byin wu na bai a̱ hyaai á̱niet khap a̱bya! A̱wot a̱ khwap á̱ghyang á̱niet a̱byin a̱na̱p ka!” Nang á̱niet ba nfa̱k a̱nia a̱ni, ba̱ si̱ nyia̱, “Kwot, A̱gwaza gu yok tyia̱ a̱ka̱tuk kyang gu bai a̱nia bah!”[117]

¹⁷Yesu si̱ sak ba á̱ghyi, a̱ si̱ nyia̱, “Yihwa nang A̱lyiat A̱gwaza nang á̱ lyuut a̱ni fa nyia̱, ‘A̱fang ka nang á̱niet nok ba lak a̱ni; kikya nang á̱ kpaat da̱ a̱ta̱m kuntyin nok ka.’[118]

¹⁸Konyan wa ga̱u da̱ a̱fang a̱kya a̱ si̱ kwa,[119] a̱ na chwaat di̱ chunchong. A̱wot a̱tyu nang a̱fang a̱kya meang kwa da̱ nggu a̱ni, ka̱ na kwang nggu a̱ tyia̱ nkyuo ma̱ luluk a̱luk![120]”

¹⁹Á̱niet tyiet doka A̱gwaza ma̱ng a̱cha̱chet a̱yaapris ba, si̱ kin chat vak nang ba̱ na nta̱bat Yesu a̱ni. A̱wot ba̱ si̱ fa̱k a̱wun á̱niet ka. Mat ba̱ ku fi̱k nang bibya Yesu nfa; ba̱ yet á̱ka̱tuk á̱niet khap ba mi̱ kidee jini.

²⁰Á̱niet tyiet doka A̱gwaza ma̱ng a̱cha̱chet a̱yaapris ba si̱ cham Yesu. Ba̱ chat ba̱ shya̱ a̱wat nang ba̱ na nta̱bat nggu a̱ni. Mat a̱nia, ba̱ si̱ ta̱m á̱niet zop da̱ bang, ba̱ nat ba̱ si̱ tya̱ra̱m Yesu, gu ka hyia̱ kyang ku na tyia̱ gwomna A̱romawa wu a̱ nta̱bat gu a̱ni.

²¹Nang á̱niet zop da̱ bang ba nshya̱ Yesu a̱ni, ba̱ si̱ but gu á̱ghyi. Ba̱ si̱ nyia̱, “A̱tyu tyiet, zi̱ lyen a tyiet a si̱ bu lyiat kyang ku yet a̱tsotswat a̱ni. A̱wot zi̱ bu lyen a tyiet vak A̱gwaza mami a̱chuchuk, a̱wot a si̱ khai á̱niet da̱ á̱ghyi bah.

²²“Ma̱ninika, tak ma̱ng a̱nzi̱t; ku myim zi̱ tan Kaisar a̱gwam shan A̱romawa wu kurum ga̱ndu hu a; kee zi̱ yok?”

²³Yesu si̱ fi̱k nang ba̱ nyia̱ mumwang hwa ba̱ ka tya̱ra̱m ngguu. A̱wot a̱ si̱ nyia̱,

²⁴“Nyi bai ma̱ng a̱nung tswa kurum A̱romawa ji, n di. Ghwughwu huni ma̱ng a̱lyoot kani tazwa kurum hu; yet si̱ a̱nyan hwa?” Huhwa ba̱ si̱ nwuak gu shim nyia̱, “Si̱ Kaisar hwa!”

²⁵Huhwa Yesu si̱ ma nyia̱, “Ka̱ a̱nia wa, kyang ku yet si̱ Kaisar a̱ni, nyi nwuak Kaisar. Ma a̱nia wa, kyang ku yet si̱ A̱gwaza a̱ni, nyi nwuak A̱gwaza.”

²⁶Mat a̱nia, á̱niet zop da̱ bang ba si̱ lyin kyang nang ba̱ na ntya̱ra̱m Yesu a̱zaghyi á̱kpa á̱niet ka a̱ni. Da̱ a̱kwonu a̱kya, ba̱ si̱ fa̱k a̱ga̱de[121], mat shim hu nang gu nwuak ba a̱ni. Ba̱ si̱ tyia̱ nywang.

²⁷A̱sa̱ndukiyawa ba yet sot a̱yaakwak a̱son á̱niet khwi A̱yahudawa ja; di̱ ba̱ shim nyia̱ á̱niet ba̱ ka̱n kwi a̱ni, na doot ma̱ng swuan bah. Á̱ghyang á̱niet ma̱ mba si̱ bai da̱ a̱vwuo Yesu.

²⁸Ba̱ si̱ nyia̱ ma̱ng a̱nggu, “A̱tyu tyiet, Musa ku lyuut nzi̱t doka nyia̱: Ka̱ a̱na̱nyiuk a̱ yet a̱niet khwop a̱ni khwu, a̱ si̱ ghwon a̱byii̱k nggu wu di̱ mi̱n nggwon; ku myim a̱na̱nyiuk wu a̱ yet a̱shushyuo a̱tyu a̱ khwu wu a̱ni, gu chi̱t a̱byii̱k a̱wa. Ba̱ ka nshya̱ a̱tyu a̱ khwu wu nggwon, ka̱ ya gado a̱li a̱tyu a̱ khwu ka, da̱nian a̱li ka ka̱ ka ya a̱son.[122]

²⁹Mat a̱nia, di̱n jen jhyang, á̱ ku byia̱ á̱na̱nyiuk a̱natat, a̱niet khwop wu si̱ bwuo a̱byii̱k, a̱wot a̱tyok wu si̱ khwu di̱ mi̱n nggwon.

³⁰A̱wot a̱tyu a̱ yet a̱feang wu a̱ ntung da̱ a̱niet khwop wu a̱ni, si̱ chi̱t a̱byii̱k a̱wa. A̱wot a̱tyok a̱wa meang, a̱ si̱ khwu di̱ mi̱n nggwon.

³¹“A̱wot a̱na̱nyiuk a̱tat wu si̱ chi̱t a̱byii̱k a̱wa. A̱wot a̱tyok a̱wa meang, a̱ si̱ khwu di̱ mi̱n nggwon. Ma a̱nia wa, ku si̱ ngya a̱son ma̱ng a̱mgba̱m á̱na̱nyiuk a̱natat a̱bya ba̱ chi̱t a̱byii̱k a̱wa konyan mi̱ njen nggu a̱ni; a̱mgba̱m ba si̱ kwi di̱ mi̱n mman.

³²Di̱ ngaan hu, a̱byii̱k wu meang si̱ khwu.

³³“Ka̱ a̱nia wa di̱ yong huni, tak ma̱ng a̱nzi̱t; a̱byii̱k a̱nyan wa nang gu na yet, di̱n jen nang á̱niet ba̱ ka̱n kwi na ndoot ma̱ng swuan a̱ni? Mat, a̱byii̱k a̱wa swan nyeang ma̱ng a̱mgba̱m á̱na̱nyiuk a̱natat a̱bya!”

³⁴Yesu si̱ nwuak ba shim nyia̱, “Nyeang hu yet si̱ á̱nietbishyi hwa mi̱ swanta huni.

³⁵A̱wot jen nang á̱niet á̱ kyiak ba̱ myim ba̱ doot ma̱ng swuan ma̱ á̱niet ba̱ ka̱n kwi mi̱ che chobai hu a̱ni; ba̱ na nyia̱ a̱ka̱nyeang, ku á̱ tyei mba a̱ka̱nyeang bah.

³⁶A̱wot da̱ mba, ba̱ bu na kwi bah. Da̱ a̱kwonu a̱kya, ba̱ na li nang a̱yaata̱m tswá A̱gwaza a̱ni. Ba̱ na yet mman A̱gwaza nia. Mat ba̱ na doot ma̱ng swuan ma̱ á̱niet ba̱ ka̱n kwi a̱ni.

³⁷“A̱wot da̱ a̱lyiat doot ma̱ng swuan ma̱ á̱niet ba̱ ka̱n kwi a̱ni: Ku Musa meang ku lyuut tazwa nkhang nang sop ji ku ngya long mi̱ tswa a̱yit a̱ni; a̱ ku tak si̱sak ji nang A̱gwaza ku ndyiat ma̱ng a̱nggu a̱yit ka a̱ni, tazwa a̱yaatyia̱ a̱khwop ba̱ ka̱n kwi a̱ni; nyia̱ da̱ a̱ yet A̱gwaza Ibrahim, A̱gwaza Ishaku, ma̱ng A̱gwaza Yakubu, ku nang di̱ li a̱tyubishyi ba̱ ka̱n kwi a̱ni.[123]

³⁸Mat a̱nia, si̱ huni tak nang A̱gwaza ngyet A̱gwaza á̱niet ba̱ ka̱n kwi wa a̱ni bah. A̱ yet A̱gwaza á̱niet swuan wa. Mat di̱ li A̱gwaza hu, a̱mgba̱m á̱niet ba ni̱ swuan da̱ a̱vwuo nggu.”

³⁹A̱yaagwak tyiet doká A̱gwaza ba̱ yong a̱ja a̱ni, si̱ nyia̱ ma̱ng Yesu, “A̱tyu tyiet, a̱lyiat ang na yet a̱sham. A hyia̱ cha̱chaat[124]!”

⁴⁰A̱wot nang si̱ a̱hwa nswak a̱ni, á̱ si̱ bu mbyia̱ a̱tyu a̱ gbang a̱lyia̱ a̱ si̱ lyip Yesu kyang ghyang a̱ni bah.

⁴¹A̱jawa Yesu si̱ bu lyip a̱yaagwak tyiet doka A̱gwaza ba nyia̱, “Yihwa mbyia̱ nang á̱ ntyiet nyia̱, Kristi[125] neet mi̱ kwai A̱gwam Da̱wuda ja?

⁴²Mat, Da̱wuda ma̱ a̱pyia̱ nggu lyuut mami Za̱bura nyia̱: ‘A̱gwaza nyia̱ ma̱ng A̱tyoli nung: “Swan da̱ a̱vwuo shi Tyok a̱zayak nung,

⁴³si̱ nat jen nang n na ntyia̱ á̱niet lak li ang ba, a̱tafa á̱tai a̱ti̱tak ang ba a̱ni.” ’

⁴⁴“Ki̱ Da̱wuda, ma̱ a̱pyia̱ nggu, a̱ yet a̱gba̱ndang a̱gwam a̱ni, ku ngyei Kristi, ‘A̱tyoli,’ á̱ na nyia̱ ni wa, Kristi a̱ ngyet a̱ka̱mbwon Da̱wuda?”

⁴⁵Nang á̱niet ma̱ a̱di̱di̱t mmyiai a̱fufwuo á̱ fwuong Yesu a̱ni, a̱ si̱ bwuak a̱ si̱ nyia̱ ma̱ng mman ta̱m nggu na,

⁴⁶“Nyi ta̱bam ma̱ng gan a̱yaagwak tyiet doka. Mat ba̱ ni̱ chat ba̱ khwi a̱cha̱chet a̱yaawurup a̱toot. Ba̱ chong á̱ kat mi̱ tungga ma̱ sa̱t. Ba̱ chat á̱niet ba̱ ka li mba á̱ chyin mbaa, á̱ tang mba a̱didyep, á̱ bu byat ba nang a̱cha̱chet á̱niet a̱ni. Ba̱ bu ni̱ chat ba̱ khai a̱cha̱chet nkyang swat nang á̱ na nnwuat mba shi ma̱ á̱tutu a̱tung A̱yahudawa, ma̱ng a̱ka̱vwuo song a̱yaayet a̱ni.

⁴⁷“A̱mgba̱m ma̱ng a̱nia, mba ma̱ á̱pyia̱ mba, bibya yet á̱niet ba̱ shyuo á̱nyiuk nang á̱tyok mba ba ka̱n kwi a̱ni, di̱ kwok nkyang[126] mba na di̱ mi̱n nsum. A̱wot ba̱ ni̱ but á̱ghyi nyia̱ ba̱ yet á̱tsotswat á̱niet, di̱ si̱sak nang ba̱ ni̱ nkyiak a̱junjung jen nang ba̱ naai A̱gwaza kpa̱sai a̱zaghyi á̱niet a̱ni. Mat a̱nia, A̱gwaza na nyiak baa, ba̱ swuo a̱bung a̱ swak á̱kum á̱niet ka!”