Read tyap Luka 22 Bible Online

Luka 22 - tyap bible

Luka 22

¹Di̱n jen nang A̱yet Ya Burodi Sang Yit mbwat kpa̱mkpaan a̱ni, a̱yet wuni wa nang á̱ ku tsa ma̱ng song A̱yet ghwut Mman Isi̱rela mi̱ Khwo.

²A̱cha̱chet a̱yaapris ma̱ng á̱niet tyiet doka A̱gwaza ba, si̱ ta̱bat vwuoi a̱ka̱shuk di̱ si̱sak nang ba̱ na nhyat Yesu a̱ni. A̱wot ba̱ si̱ lyin vak nang ba̱ na nta̱bat gu mami á̱kpa á̱niet ka a̱ni. Mat ba̱ fwuong a̱wun kyang hu nang á̱kpa á̱niet ka na nyia̱ a̱ni.

³A̱ta̱nyeang[132] ka si̱ kan nwuo nyia̱ tyok mi̱ fwuo Yahuda Iska̱riyoti; a̱ ku yet a̱tyo nyiung mi̱ mman ta̱m swak ma̱ a̱feang Yesu na a̱ni.

⁴A̱wot Yahuda si̱ doot a̱ nat a̱ si̱ shya̱ a̱cha̱chet a̱yaapris ba ma̱ng a̱yaakwak a̱son á̱niet chok A̱li Nwuat Za̱nang A̱gwaza ka; ba̱ ka la̱p a̱nu di̱ si̱sak gu na ndyap mba Yesu a̱ni.

⁵A̱yaakwak a̱son a̱bya si̱ fa̱k nyinyang ba̱t nang Yahuda nshim a̱ lyap mba Yesu a̱ni. A̱wot ba̱ si̱ nyia̱ a̱li̱ka̱uli ba̱ na tan Yahuda zang kurum.

⁶Mat a̱nia, Yahuda si̱ shim. A̱ si̱ nwuo chat a̱wat nang gu na ntyia̱ Yesu mbwak a̱cha̱chet A̱yahudawa ba, da̱nian ba̱ ka ta̱bat guu di̱n jen nang á̱kpa á̱niet ka nnwai shya̱ ndung ma̱ng a̱nggu a̱ni.

⁷A̱tuk nang á̱ na nsong A̱yet Ya Burodi Sang Yit wu nkaat a̱ bai a̱ni; jen jini ja bu yet jen nang kuzang kyang bwak ni̱ nfaat fi̱ng a̱nfwuk da̱nian ba̱ ka song A̱yet Ghwut Mman Isi̱rela mi̱ Khwo hu a̱ni.

⁸Mat a̱nia, Yesu si̱ ta̱m Bitut ma̱ng Yoona a̱zanson, ba̱ nat Urusha̱lima. A̱wot a̱ si̱ nyia̱, “Nyi nat nyi jhyi nkyayak A̱yet na, mat zi̱ ka ya na dundung.”

⁹Ba̱ si̱ lyip Yesu nyia̱, “A̱ji wa nang a nchat zi̱ njhyi nkyayak na?”

¹⁰Yesu si̱ nwuak ba shim nyia̱, “Mi̱ di̱ nwuo nyin hu mi̱ Urusha̱lima, a̱tyok a̱ghyang na myim ma̱ng a̱nyin, a̱ faat a̱kurung a̱sa̱khwot. Nyi khwi guu. Nyi nat a̱mali ka nang gu na nnwuo a̱ni.

¹¹Nyi hyia̱ ma̱ng a̱tyu byia̱ a̱li wu, nyia̱ ‘A̱tyu tyiet nzi̱t wu lyip: Di̱ tutu á̱nietchen hu shya̱ a̱ji wa nang n na ngya nkyayak A̱yet na ma̱ng mman ta̱m nung na a̱ni?’

¹²A̱tyoli a̱wa na tak ma̱ng a̱nyin a̱gba̱ndang tutu a̱ghyang a̱mali tazwa nang á̱ wa ka̱n jhyi a̱ni. A̱ja wa nang nyi na njhyi nzi̱t nkyayak a̱yet na.”

¹³Ba̱ si̱ doot á̱ nat ma̱ a̱keang ka. Ba̱ si̱si̱ shya̱ kuzang kyang ma̱ cha̱chaat ma̱nang Yesu ntak ma̱ng a̱mba a̱ni. A̱wot ba̱ si̱ jhyi nkyayak a̱yet na a̱ja.

¹⁴Nang jenshyung nnyia̱ a̱ni, Yesu ma̱ng a̱yaata̱m swak ma̱ a̱feang nggu ba si̱ swan dundung, da̱nian ba̱ ka ya kyayak.

¹⁵Yesu si̱ nyia̱ ma̱ng a̱mba, “N ka̱n chat ba̱t n gya nkyayak A̱yet na dundung ma̱ng a̱nyin, n sii du nwuo swuo a̱bung nung hu.

¹⁶A̱wot ma̱ninika, yok n tak ma̱ng a̱nyin; n bu na ngya nkyayak A̱yet na ndung ma̱ng a̱nyin bah, si̱ nang kyang hu A̱yet wu fa a̱ni bai da̱ a̱nu ka mi̱ Tyok A̱gwaza hu.”

¹⁷A̱jawa Yesu si̱ kyiak a̱kashyi wu ma̱ng a̱sa̱khwot nsum a̱na̱p na[133], a̱ si̱ gwai A̱gwaza. A̱wot a̱ si̱ nyia̱ ma̱ng a̱yaata̱m nggu ba, “Nyi ngga, nyi fi̱ri̱p nwuat á̱ghyang.

¹⁸Mat n bu na ngya nkyayak a̱yet na bah,[134] si̱ nang Tyok A̱gwaza hu bai.”

¹⁹Ma a̱nia wa, Yesu si̱ kyiak burodi sang yit wu, a̱ si̱ gwai A̱gwaza. A̱wot a̱ si̱ kpa̱ra̱m di̱ gbi̱ngba̱ra̱m, a̱ si̱ ka̱u mman ta̱m nggu na. A̱ si̱ nyia̱, “Burodi wuni yet kidee vam nung ja, nang á̱ nwuak da̱nian nyin a̱ni. Nyi ni̱ ngya da̱nian nyi ka nyia̱ a̱di̱dam da̱ nung.”

²⁰Ma a̱nia wa nang ba̱ ngya kyayak hu á̱ tyak a̱ni, Yesu si̱ ta̱ngam a̱kashyi a̱sa̱khwot nsum a̱na̱p a̱ghyang[135]. A̱ si̱ nyia̱, “A̱kashyi a̱sa̱khwot nsum a̱na̱p wuni, yet kidee la̱p a̱li̱ka̱uli a̱fai nang A̱gwaza la̱p ma̱ng á̱niet nggu ba a̱ni. “Ma a̱nia wa, a̱sok nung na nang n neap na̱ yet za̱nang da̱nian nyin a̱ni; ni̱nia yet vak nang A̱gwaza ntyia̱ la̱p a̱li̱ka̱uli hu si̱ nnwuo nyia̱ ta̱m a̱ni.[136]

²¹“Nyi fa̱k la! A̱tyu a̱ yet a̱bang a̱byin wu a̱ni, a̱ swan a̱ji dundung ma̱ng a̱nzi̱t nang a̱kpa̱ndang nzi̱t a̱ni; nggu wa yet a̱tyu a̱ na lyap nung a̱ni.

²²A̱tsak a̱lyiat, á̱ ka̱n da̱p á̱ sak, ku yet ta hwa Nggwon A̱tyubishyi ka̱ khwu. A̱wot ku swan a̱tyu a̱wa a̱ yet jat ji nang á̱ na mbwuk ma̱ng Nggwon A̱tyubishyi a̱ni!”

²³Huhwa mman ta̱m na si̱ nwuo lyi̱ri̱m á̱ghyang mba nyia̱, “A̱nyan wa ma̱ a̱nzi̱t na nyia̱ tangka̱i kyang nang si̱ a̱hwa a̱ni?”

²⁴A̱jawa mman nta̱m Yesu na si̱ nwuo ya fwuang tsi̱tsak mba tazwa a̱tyu a̱ na swak ma̱ng shi hu ma̱ mba a̱ni.

²⁵Yesu si̱ tak ma̱ng a̱mba nyia̱, “Nyi lyen nang á̱gwam ma̱ng a̱cha̱chet á̱niet nnwap na̱ chyi A̱gwaza bani ni̱ nnyeap á̱niet mba ba ma̱ng chet. A̱mgba̱m ma̱ng a̱nia, ba̱ chat á̱niet ba̱ chyin mbaa, ba̱ nwuak mba a̱lyoot tyok, nang á̱ ngyei, ‘Á̱kpa̱ndang á̱niet’ a̱ni.

²⁶“A̱wot nyin, ku yet ta hwa nyi vwuon ma̱ng a̱mba. Nyi yok nyia̱ a̱nia bah. Da̱ a̱kwonu a̱kya, a̱cha̱chet á̱niet ba ma̱ nyin, ku myim ba̱ kyiak á̱pyia̱ mba nang a̱chyuang á̱niet a̱ni. Ma a̱nia wa, a̱kwak a̱son wu ma̱ nyin, ku yet ta hwa gu kyiak a̱pyia̱ nggu nang a̱khwo a̱ni.

²⁷A̱nyan wa swak ma̱ng shi hu; a̱tyu a̱ swan a̱ ya kyayak hu a̱ni a, ke a̱tyu a̱ ka̱u kyayak hu a̱ni? A̱tsak a̱lyiat, a̱tyu a̱ swan a̱ ya kyayak hu a̱ni; nggu wa swak ma̱ng shi hu. A̱wot a̱nia wa ku ndi ma̱ng a̱nyin bah! Mat, nung n shya̱ ndung ma̱ng a̱nyin, n si̱ nyia̱ nyin nta̱m nang a̱khwo a̱ni.

²⁸“A̱wot nyin, nyi shya̱ ndung ma̱ng a̱nung di̱n jen nang n ku nswuo a̱bung a̱ni.

²⁹A̱wot ma̱nang A̱gwaza, A̱tyia̱ nung wu nnwuak nung Tyok a̱ni; ma a̱nia wa, nung meang ma̱ninika, n nwuak nyin a̱wat nyi nyia̱ tyok hu.

³⁰Da̱nian nyi ka swan ma̱ng a̱nung zi̱ ya tsa nswuo mi̱ Tyok nung hu. A̱wot nyi na swan da̱ a̱cha̱chet chuchuk tyok, nyi ya tyok tazwa kwaí swak ma̱ a̱feang Isi̱rela ji.”

³¹Yesu si̱ bu nyia̱, “Siman, Siman, fa̱k la! A̱ta̱nyeang[137] ka chat ka̱ mak nyin a̱mgba̱m, ma̱nang á̱ ni̱ nchyok yak á̱ ti̱n a̱sunsong wu á̱ ghwon tswá ji a̱ni!

³²A̱wot nung, n wa ka̱n naai A̱gwaza da̱nian ang Siman; a na but mi̱ fwuo di̱ nwuak fwuo ang hu da̱ nung bah. Mat a̱nia, jen nang a bye mbwuok a bu nwuak fwuo ang da̱ nung mi̱ chet a̱ni, a ba̱ beang á̱kpa̱ndang ta̱m ang ba, ba̱ yong mi̱ chet di̱ nwuak fwuo mba hu da̱ nung.”

³³A̱wot Bitut si̱ nyia̱, “A̱tyoli, n da̱p vam, á̱ nyim nung mi̱ jaru ndung ma̱ng a̱nwan! A̱wot ku a̱khwu kya, n khwu ndung ma̱ng a̱nwan!”

³⁴A̱jawa Yesu si̱ nyia̱ ma̱ng a̱nggu, “Bitut[138], a̱tsak a̱lyiat, yok n tak ma̱ng a̱nwan; a na fwuo lyen nung hu a̱ka̱tat, a̱gbak a̱ sii tyiap mi̱ shong a̱tson.”

³⁵A̱wot Yesu si̱ lyip mman ta̱m nggu na, nyia̱, “Di̱n jen swak ji nang n ku nta̱m nyin nyi shei A̱sham Nkhang ka a̱ni, a̱wot n si̱ ntak ma̱ng a̱nyin nyi yok kyiak kurum, ku gumaat, ma̱ng á̱kwatak che sweang nang nyi na shai a̱ni bah; nyi ku lyin kyang a?” Ba̱ si̱ nwuak Yesu shim nyia̱, “Kaai, A̱tyoli. Zi̱ ku lyin kyang bah.”

³⁶A̱jawa Yesu si̱ nyia̱, “A̱wot ma̱ninika, ku li á ngyei tangka̱i njen ji myim nyi mba̱ng kurum ma̱ng gumaat a̱ni, jija ji. A̱wot ku bu li á ngyei tangka̱i njen ji̱ myim a̱tyu a̱ byia̱ tswat ma̱ nyin a̱ni bah, gu lyap a̱junjung a̱ta̱swak nggu wu, a̱ nsan jii.

³⁷Mat jen nyia̱ nang A̱lyiat A̱gwaza nang á̱ lyuut tazwa nung a̱ni, na mbai da̱ a̱nu ka, nyia̱, ‘Á̱ ku kyiak gu nang a̱tyo nyiung ma̱ á̱niet bwoi a̱bun a̱ni.’[139] A̱tsatsak a̱lyiat, a̱mgba̱m nkyang nang a̱yaata̱m a̱kwonu A̱gwaza ba ku shei á̱zanson, ba̱ si̱ lyuut tazwa nung a̱ni; na̱ na bai da̱ a̱nu ka ma̱ cha̱chaat.”

³⁸Mman ta̱m Yesu na si̱ nyia̱ ma̱ng a̱nggu, “A̱tyoli, di! Zi̱ byia̱ tswát sweang a̱ji!” Yesu si̱ nyia̱ ma̱ng a̱mba, “Nyi yok a̱nia!”

³⁹A̱jawa Yesu si̱ ghwon nyuo ku shya̱ a̱mali tazwa ka nang ba̱ ngya kyayak a̱yet hu ma̱ng mman nta̱m nggu na a̱ni. A̱ si̱ nat, a̱ si̱ nyeak Tsok Za̱itun ji, nang gu mmeang ma̱ng chong hu a̱ni.

⁴⁰Nang gu ntat a̱ja a̱ni, a̱ si̱ nyia̱ ma̱ng a̱mba, “Nyi swan cham. Nyi naai A̱gwaza, kalak nyi ba̱ kwa di̱n jen mak ji.”

⁴¹A̱wot Yesu si̱ doot mman nta̱m na a̱ ghwon. A̱ si̱ laai neap ti̱taa. A̱ si̱ kpaat a̱khwukhwut, a̱ si̱ naai A̱gwaza nyia̱,

⁴²“A̱tyia̱ nung wu, n naai ang, ka a shim; ma̱sa̱kut ti̱n a̱kashyi swuo a̱bung wuni, a ghwon nung. A̱mgba̱m ma̱ng a̱nia, n chat a nyia̱ kyang ku myim ang wa a̱ni, si̱ nung hwa a na nyia̱ bah.”

⁴³[[A̱jawa a̱ta̱m tswa A̱gwaza si̱ kin ghwut a̱ neet Ma A̱gwaza tswazwa, a̱ si̱ ba̱ tyia̱ Yesu chet.

⁴⁴A̱mgba̱m ma̱ng a̱nia, Yesu si̱ bu naai A̱gwaza ma̱ng fwuo nyiung. A̱wot a̱ si̱ swuo a̱bung ma̱ng a̱di̱dam, a̱ si̱ ta a̱lahyia̱. Ka̱ si̱ shyot a̱ kwa̱i a̱byin nang a̱kukwang a̱sok a̱ni.]][140]

⁴⁵Nang Yesu ntyak naai A̱gwaza hu a̱ni, a̱ si̱ bu doot. A̱ si̱ bwuok a̱ nat, a̱ si̱ shya̱ mman ta̱m na, nang ba̱ khat nda, mat ba̱ shya̱ ma̱ng van mat byian fwuo.

⁴⁶Yesu si̱ nyia̱ ma̱ng a̱mba, “Yihwa mbyia̱ nyi nkhat nda na? Nyi doot nyi naai A̱gwaza, kalak nyi ba̱ kwa di̱n jen nang á̱ mmak nyin a̱ni.”

⁴⁷A̱wot nang Yesu nshya̱ da̱ a̱lyiat na a̱ni, á̱kpa á̱niet si̱ kin neet a̱ bai, nang Yahuda Iska̱riyoti wa kwak ba a̱son ka; a̱ ku yet a̱tyo nyiung mi̱ mman ta̱m swak ma̱ a̱feang na. Yahuda si̱ nat da̱ a̱vwuo Yesu. A̱ si̱si̱ vwuk guu, a̱ si̱ byiat guu.

⁴⁸Yesu si̱ nyia̱ ma̱ng a̱nggu, “Kwot, Yahuda! Ma̱ng vwuk hwa nang a na ndyap, a mbwuk ma̱ng Nggwon A̱tyubishyi a?”

⁴⁹Nang á̱kum mman ta̱m Yesu ka nfi̱k kyang ku na bai a̱ni, huhwa ba̱ si̱ lyip Yesu nyia̱, “A̱tyoli, zi̱ na kwok tswát nzi̱t ji, zi̱ kwan ma̱ng a̱mba!”

⁵⁰A̱wot a̱tyo nyiung mi̱ mman ta̱m Yesu na si̱ kin khwat tswat, a̱ si̱ ntyap fufwuo mbwak yak a̱khwo a̱gba̱ndang pris hu a̱ ti̱n!

⁵¹A̱wot Yesu si̱ kam mba nyia̱, “Nyi yok nyia̱ a̱nia bah!” A̱wot a̱ si̱ byiam fufwuo a̱khwo hu, a̱ si̱ kin choot guu!

⁵²A̱jawa Yesu si̱ lyiat ma̱ng a̱cha̱chet a̱yaapris, a̱yaakwak a̱son á̱niet chok A̱li Nwuat Za̱nang A̱gwaza, ma̱ng á̱niet khwop á̱niet ba, ba̱ bai ba̱ ka ta̱bat gu a̱ni. A̱ si̱ nyia̱, “Nyi ghwut ma̱ a̱keang ka ma̱ng tswát ma̱ng shán, nyi si̱ bai ta̱bat nung, á ngyei n gyet a̱kwak a̱son á̱niet á̱tsaai a?

⁵³Kuzang a̱tuk n ni̱ shya̱ dundung ma̱ng a̱nyin tyiet A̱mali Nwuat Za̱nang A̱gwaza ka. Da̱ nyin, nyi ta̱bat nung mi̱ jen a̱ja bah. A̱wot jen jini yet si̱ nyin ja. Jen jini ja nang a̱ka̱tuk ndyin nnyia̱ tyok mi̱ swanta hu.”

⁵⁴A̱jawa á̱niet ba̱ bai ta̱bat Yesu wu a̱ni, si̱ kin ta̱bat guu. Ba̱ si̱ nkat ma̱ng a̱nggu a̱mali a̱gba̱ndang pris ka. A̱wot Bitut si̱ khwi mba ti̱taa.

⁵⁵Á̱niet chok a̱vwuo ba si̱ kai long ma̱ a̱ka̱wa̱tyia̱ didyaat a̱li hu. Ba̱ si̱ swan á̱ keang long hu á̱ wa̱i. A̱wot Bitut si̱ swan dundung ma̱ng a̱mba.

⁵⁶Nang long hu ntat sai ma̱ á̱ghyi Bitut ba a̱ni, nggwon neam ka̱ yet a̱khwo a̱ni si̱ nwuan nggu di̱di̱r. Ka̱ si̱ fi̱k gu, ka̱ si̱ nyia̱, “A̱tyu wuni meang, a̱ yet a̱tyu khwi Yesu wa!”

⁵⁷A̱wot Bitut si̱ fwuo a̱lyiat a̱nia, a̱ si̱ nyia̱, “A̱byii̱k, n dyen gu lilyen bah!”

⁵⁸Á̱ si̱ labeang bah, a̱ghyang a̱niet si̱ bu nwuan guu, a̱ si̱ nyia̱, “Nwan meang, a̱tsatsak a̱lyiat, a yet a̱tyo nyiung ma̱ mba!” A̱jawa Bitut si̱ bu fwuo nyia̱, “Kaai, a̱tuba nung, nung gwa bah!”

⁵⁹Á̱ bu labeang bah, a̱ghyang a̱niet si̱ yong mi̱ chet nyia̱, “N but mi̱ fwuo bah. A̱tyu wuni shya̱ dundung ma̱ng a̱mba za̱m! Mat nggu meang a̱ bu yet a̱tyu Ga̱lili wa.”

⁶⁰A̱wot Bitut si̱ bu fwuo nyia̱, “A̱tuba nung, n dyen kyang hu nang a lyiat a̱ni bah!” A̱wot mi̱ di̱ yong a̱hwa nang Bitut ni̱ shya̱ da̱ a̱lyiat na a̱ni, a̱gbak wu si̱ kin tyiap!

⁶¹Yesu si̱ kin bwuak, a̱ si̱ nwuan Bitut di̱di̱r. Bitut si̱ kin jhyung a̱lyiat nang Yesu ku lyiat ma̱ng a̱nggu a̱ni, nyia̱, “A na fwuo lyen nung a̱ka̱tat mi̱ shong a̱tson, a̱gbak a̱ sii tyiap.”

⁶²Bitut si̱ ghwut mi̱ didyaat a̱li a̱gba̱ndang pris hu. A̱ si̱ bai nta. Fwuo nggu hu si̱ byian, a̱ si̱ twei ba̱t!

⁶³Á̱niet ba ba̱ chok Yesu a̱ni, si̱ lyiat gu lihyat. A̱wot ba̱ si̱ tsot gu.

⁶⁴Ba̱ si̱ bu la̱p gu á̱ghyi ba ma̱ng a̱toot. Ba̱ si̱ hyia̱ ma̱ng a̱nggu, nyia̱ “Nwan, a̱ta̱m a̱kwonu A̱gwaza, tyai nzi̱t a̱tyu a̱ lwi ang a̱ni!”

⁶⁵A̱wot ba̱ si̱ fwoi ngguu. Ba̱ si̱ lyiat gu kuzang tangka̱i lihyat.

⁶⁶Da̱ a̱tsotson tat ka, sot a̱cha̱chet á̱niet khwop á̱niet ba, ma̱ng a̱cha̱chet a̱yaapris ba, mbeang a̱yaagwak tyiet doka A̱gwaza ba; ba̱ si̱ nyia̱ a̱gba̱ndang a̱tung sot a̱cha̱chet A̱yahudawa. Ba̱ si̱ tyia̱ á̱ si̱ bai ma̱ng Yesu a̱zaghyi mba.

⁶⁷Ba̱ si̱ lyip gu nyia̱, “Hyia̱ ma̱ng a̱nzi̱t; nwan na yet Kristi, a̱tyu nang A̱gwaza kup gu tyok a̱ni a?” A̱wot Yesu si̱ nwuak ba shim nyia̱, “Ka̱ n hyia̱ ma̱ng a̱nyin, nyi na nwuak a̱chuchuk bah.

⁶⁸A̱wot ka̱ n dyip nyin kyang, nyi na nwuak nung shim bah.

⁶⁹A̱wot doot ma̱nini si̱ nat á̱zanson, Nggwon A̱tyubishyi na swan da̱ a̱gba̱ndang chuk tyok a̱zayak A̱gwaza, a̱ byia̱ a̱mgba̱m chet a̱ni[141]!”

⁷⁰Huhwa a̱mgba̱m ba, ba̱ si̱ lyip gu nyia̱, “Kwot! Ka̱ a̱nia wa, a kyiak a̱pyia̱ ang nang Nggwon A̱gwaza a̱ni a?” Yesu si̱ nyia̱ ma̱ng a̱mba, “Nyi hyia̱ a̱nia. Nung gwa.”

⁷¹Ba̱ si̱ nyia̱, “Yihwa mbyia̱ zi̱ bu nchat sheda ghyang? Nzi̱t ma̱ á̱pyia̱ nzi̱t, zi̱ fa̱k lihyat nang gu lyiat a̱ni, ku tak nang gu mbyia̱ a̱bun!”