Read tyap Luka 23 Bible Online

Luka 23 - tyap bible

Luka 23

¹A̱jawa sot a̱cha̱chet A̱yahudawa ba si̱ doot, ba̱ si̱ nat ma̱ng Yesu a̱zaghyi Bilatut, a̱ yet gwomna A̱romawa wu a̱ni.

²Ba̱ si̱ nwuo bat gu a̱hyiak nyia̱, “Zi̱ ta̱bat a̱tyu wuni nang gu tyei á̱niet nzi̱t ba ba̱ teap; nyia̱ ba̱ yok teang a̱gwam Kaisar A̱ugustut wu kurum ga̱ndu hu bah! A̱wot a̱ si̱ bu kyiak a̱pyia̱ nggu, nyia̱ nggu wa yet Kristi wu, a̱tyu a̱ yet a̱gwam a̱ni.”

³A̱jawa gwomna Bilatut si̱ lyip Yesu nyia̱, “Nwan wa yet a̱gwam A̱yahudawa wu a?” Yesu si̱ nwuak gu shim nyia̱, “A hyia̱ a̱nia.”

⁴Gwomna Bilatut si̱ bwuak, a̱ si̱ hyia̱ ma̱ng a̱cha̱chet a̱yaapris ba, ma̱ng á̱kpa á̱niet ka nyia̱, “Nung ma̱ a̱pyia̱ nung, n shya̱ a̱tyu wuni ma̱ng a̱bun bah.”

⁵A̱jawa ba̱ si̱ yong mi̱ chet ba̱t, nyia̱, “Tyiet nggu hu ni̱ fuut jhya̱ koji wa nang gu nnat; ba̱ng si̱ tat a̱mgba̱m fam a̱byin Yahudiya! A̱ ku tsa tangka̱i tyiet huni neet mi̱ fam a̱byin Ga̱lili. A̱wot a̱ bu bai ma̱ng tyiet nggu hu a̱ji mi̱ Urusha̱lima!”

⁶Nang gwomna Bilatut nfa̱k a̱nia a̱ni, a̱ si̱ lyip nyia̱, “Nggu a̱tyu wuni yet a̱tyu Ga̱lili wa a?”

⁷Nang ba̱ nhyia̱ nyia̱ Yesu ngyet a̱tyu Ga̱lili wa a̱ni, gwomna Bilatut si̱ ta̱m ma̱ng Yesu da̱ a̱vwuo a̱gwam Hiridut Antibat. Mat fam a̱byin Ga̱lili hu shya̱ mbwak tyok a̱gwam Hiridut hwa. A̱wot di̱n jen a̱ja nang a̱gwam Hiridut meang shya̱ mi̱ Urusha̱lima.

⁸Nang á̱ mbai ma̱ng Yesu a̱ni, a̱gwam Hiridut si̱ gwai ma̱ng a̱wat ka nang gu shya̱ a̱ ndi Yesu a̱ni. Mat a̱gwam Hiridut wa ka̱n fa̱k nkhang Yesu na. A̱wot a̱ si̱ tyia̱ fwuo a̱ li Yesu ma̱ a̱pyia̱ nggu, da̱nian Yesu a̱ ka nyia̱ nggu kyang a̱ri̱bi̱di.

⁹A̱jawa a̱gwam Hiridut si̱ lyi̱ri̱m Yesu á̱lyiat ma̱ a̱di̱di̱t. A̱wot Yesu si̱ lak nwuak gu shim hu.

¹⁰Da̱ a̱cha̱chaat njen a̱wa, a̱cha̱chet a̱yaapris ba ma̱ng a̱yaagwak tyiet doká A̱gwaza ba, si̱ yong a̱ja a̱ khwot a̱gugwong á̱ bat Yesu a̱hyiak.

¹¹A̱jawa a̱gwam Hiridut ma̱ng á̱niet nzwang nggu ba, ba̱ si̱ ta̱bat mang Yesu a̱lyem á̱ bu nyia̱ nggu lihyat. Di̱ ngaan hu, ba̱ si̱ kup gu a̱junjung a̱toot tyok. A̱wot ba̱ si̱ ta̱m ma̱ng a̱nggu da̱ a̱vwuo gwomna Bilatut.

¹²(A̱gwam Hiridut ma̱ng gwomna Bilatut, ba̱ ku lak li á̱ghyang di̱n jen jhyang a̱ni; ba̱ si̱ kin ta̱bat kpa̱ndang ma̱ng á̱ghyang neet a̱tuk a̱kya.)

¹³A̱jawa gwomna Bilatut si̱ yei a̱cha̱chet a̱yaapris, a̱yaagwak tyiet doka ma̱ng á̱kpa á̱niet ka, ba̱ si̱ bai da̱ a̱vwuo nggu.

¹⁴A̱wot a̱ si̱ nyia̱ ma̱ng a̱mba, “Nyi ka̱n bai ma̱ng a̱tyu wuni da̱ a̱vwuo nung. Nyi si̱ bat gu a̱hyiak, nyia̱ a̱ fuut jhya̱. Mat a̱nia, n zóp gu shansham a̱zaghyi nyin. A̱wot n si̱ nshya̱ nang gu byia̱ a̱bun bah.

¹⁵“Ma a̱nia wa, a̱gwam Hiridut zóp gu, a̱ si̱ shya̱ nang gu byia̱ a̱bun bah. A̱ si̱ bwuok ma̱ng a̱nggu a̱ bai ndyo da̱ a̱vwuo nzi̱t. A̱tyu wuni bwuo a̱bun a̱ maai á̱ nfaat gu shi̱ri̱ya a̱khwu a̱ni bah.

¹⁶Mat a̱nia, n na ntyia̱ á̱ tsot gu ma̱ng a̱ya̱u a̱ byia̱ pyipyia̱ ntswam a̱ni, a̱wot n kai nggu ghwon.”

¹⁷[142]

¹⁸A̱jawa á̱kpa á̱niet ka si̱ kin koot a̱gugwong mi̱ chet da̱ a̱ka̱nyiung nyia̱, “Kaai! Yok á̱ hyat Yesu, a̱wot á̱ ti̱n Ba̱ra̱bat á̱ ghwon nzi̱t ndyo!”

¹⁹(Ba̱ra̱bat wa nang á̱ ku tyia̱ mi̱ jaru ji, mat nang gu ku nfuut jhya̱ a̱ si̱ chat ta̱gurup tyok A̱romawa hu mi̱ Urusha̱lima a̱wot a̱ si̱ hyat a̱yin a̱ni.)

²⁰Gwomna Bilatut si̱ bu chat a̱ kai Yesu a̱ ghwon. Mat a̱nia, a̱ si̱ bu ya fwuang ma̱ng a̱mba.

²¹A̱mgba̱m ma̱ng a̱nia, ba̱ si̱ ya a̱son ma̱ng khwot a̱gugwong nyia̱, “Á̱ kpang gu da̱ a̱team a̱khwu! Á̱ kpang gu da̱ a̱team a̱khwu!”

²²Da̱ a̱ka̱tat ka, gwomna Bilatut si̱ bu lyip ba nyia̱, “Zang a̱bun wa nang gu bwuo? N shya̱ ta̱fwat ji̱ maai á̱ faat gu shi̱ri̱ya a̱khwu a̱ni bah! Mat a̱nia, n na tyia̱ á̱ tsot gu ma̱ng a̱ya̱u a̱ byia̱ pyipyia̱ ntswam a̱ni. A̱wot n kai nggu ghwon.”

²³A̱wot á̱kpa á̱niet ka si̱ bu mbeang khwot a̱gugwong wu mi̱ chet nyia̱, “Á̱ kpang Yesu da̱ a̱team a̱khwu wu!” Ba̱ si̱ la̱u shyui gwomna Bilatut a̱fufwuo ma̱ng a̱gugwong mba wu.

²⁴Mat a̱nia, gwomna Bilatut si̱ shim, a̱ si̱ faat Yesu shi̱ri̱ya a̱khwu ma̱nang á̱kpa á̱niet ka nchat a̱ni.

²⁵Ma̱nang á̱kpa á̱niet ka nchat a̱ni, gwomna Bilatut si̱ ti̱n Ba̱ra̱bat mi̱ jaru ji a̱ ghwon, a̱tyu nang á̱ ku nyim, mat a̱ ku fuut jhya̱ a̱ si̱ chat ta̱gurup tyok A̱romawa hu; a̱wot a̱ si̱ hyat a̱yin a̱ni! Gwomna Bilatut si̱ bwuok ma̱ng Yesu a̱ tyia̱ mba ndyo mbwak, ba̱ nat ba̱ si̱ kpang nggu da̱ a̱team a̱khwu nang ba̱ nchat a̱ni.

²⁶Nang á̱niet nzwang A̱romawa ba nnaat ma̱ng Yesu ba̱ ka kpang nggu da̱ a̱team a̱khwu wu a̱ni; ba̱ si̱ tyia̱ gba̱ng ma̱ng a̱ghyang a̱niet á̱ gyei nggu Siman, a̱tyu a̱ neet ma̱ a̱keang Si̱ri̱n[143] a̱ni; nang gu neet ma̱ a̱keang a̱ghyang a̱ naat Urusha̱lima. Á̱niet nzwang ba si̱ nyia̱ nggu khwo, ba̱ si̱ tyia̱ nggu a̱ si̱ faat a̱team a̱khwu Yesu wu.

²⁷Á̱nyiuk ma̱ a̱di̱di̱t mami a̱gba̱ndang á̱kpa á̱niet ka si̱ khwi Yesu á̱ twei.

²⁸A̱wot Yesu si̱ bwuak, a̱ si̱ nyia̱ ma̱ng á̱nyiuk a̱bya, “Á̱nyiuk Urusha̱lima! Nyi yok twei da̱nian nung bah! Nyi twei da̱nian á̱pyia̱ nyin ma̱ng mman nyin na.

²⁹Jen chobai nang á̱niet na nnyia̱, ‘Danduk á̱nyiuk ba̱ yet a̱yaana̱khwu, da̱ ba̱ ka̱n tyei mman a̱ni bah; á̱si̱ ba nang mman ka̱n nwai nwaai a̱bi̱baan mba ba a̱ni!’

³⁰A̱wot jen a̱ja ja nang á̱niet na naai a̱ka̱fan nyia̱, ‘Nyi kwa̱i tazwa nzi̱t!’ Ba̱ bu naai tsutsok, nyia̱, ‘Nyi niat nzi̱t!’[144]

³¹“A̱tsak a̱lyiat, ka̱ á̱ nyia̱ nkyang nani di̱n jen nang a̱kwon ngyet a̱shyim[145] a̱ni; ku na li ni wa di̱n jen nang a̱kwon ka na nkhwot a̱ni?”

³²Di̱n jen a̱ja, á̱ si̱ ghwut ma̱ng á̱niet á̱tsaai a̱feang mi̱ jaru. Á̱ si̱ mun á̱ kpang mba ma̱ng Yesu; konyan da̱ a̱team a̱khwu nggu.

³³Nang ba̱ ntat a̱vwuo nang á̱ ngyei “A̱ghyighyak A̱pyia̱” a̱ni; a̱ja wa ba̱ si̱ kpang Yesu da̱ a̱team a̱khwu wu. A̱wot á̱ si̱ kpang a̱tyu a̱tsaai a̱nyiung a̱zayak Yesu, a̱wot a̱tyu a̱tsaai a̱nyiung wu a̱zamyian nggu ka.

³⁴[[Yesu si̱ naai A̱gwaza nyia̱, “A̱tyia̱ nung, ma̱sa̱kut chi a̱ka̱tuk nyia̱ á̱niet wuni, mat ba̱ lyen kyang nang ba̱ nyia̱ a̱ni bah.[146]”]][147] A̱wot á̱niet nzwang ba si̱ koot tswák da̱nian ba̱ ka li a̱tyu a̱ na shya̱ a̱yaatoot Yesu ba a̱ni.[148]

³⁵Á̱kpa á̱niet ka si̱ yong á̱ nwuan. A̱wot a̱cha̱chet A̱yahudawa ba si̱ mai nggu á̱ nyia̱ nggu lihyat, nyia̱, “Hee ang, a̱ san á̱ghyang á̱niet; yok gu san a̱pyia̱ nggu, zi̱ ka li kee nggu wa yet Kristi wu, A̱tyu nang A̱gwaza khai, a̱ si̱ kup gu tyok a̱ni!”

³⁶Á̱niet nzwang ba meang, ba̱ si̱ bai kpa̱mkpaan ma̱ng a̱nggu. Ba̱ si̱ nang nggu a̱sa̱sat a̱sa̱khwot a̱na̱p. Ba̱ si̱ bu nwuo mai ngguu, á̱ mang nggu a̱lyem nyia̱,

³⁷“Ka̱ nwan wa yet A̱gwam A̱yahudawa wu, san a̱pyia̱ ang!”

³⁸Ba̱ si̱ lyuut a̱bun nang ba̱ mbat gu a̱ni da̱ a̱lo á̱ si̱ lya̱u tazwa a̱pyia̱ nggu ka nyia̱, “DI, A̱GWAM A̱YAHUDAWA WU WA WU!”

³⁹A̱tyo nyiung ma̱ á̱niet á̱tsaai a̱feang nang á̱ ku mun á̱ kpang mba da̱ a̱team a̱khwu wu á̱ hyia̱k Yesu a̱ni; si̱ ma mat Yesu a̱lyem nyia̱, “Mee nwan wa yet Kristi wu a? San a̱pyia̱ ang, a mun san nzi̱t la!”

⁴⁰A̱tyo a̱tsaai a̱feang wu si̱ kam nggu nyia̱, “A fwuong a̱wun A̱gwaza baa? Mat á̱ faat ang shi̱ri̱ya a̱khwu cha̱chaat ma̱ng a̱nggu.

⁴¹A̱wot nzi̱t, zi̱ maai á̱ faat nzi̱t shi̱ri̱ya a̱khwu. A̱wot a̱tyu wuni, a̱ bwuo a̱bun bah!”

⁴²A̱tyu a̱tsaai a̱feang wu si̱ bwuak a̱ si̱ nwuan Yesu. A̱ si̱ nyia̱, “A̱tyoli, ma̱sa̱kut, ka̱ a nwuo mi̱ Tyok ang hu, a yok bwung nung bah!”

⁴³A̱jawa Yesu si̱ nyia̱ ma̱ng a̱nggu, “A̱tsak a̱lyiat, a̱fwun kani, a na shya̱ dundung ma̱ng a̱nung Ma A̱gwaza Tswazwa[149]!”

⁴⁴Di̱n jen a̱ja, ma̱ a̱tyia̱ka̱u a̱ta̱mam, a̱wot a̱gba̱ndang dyin si̱ kup a̱mgba̱m a̱byin ka ma̱ kyi̱ri̱p si̱ nat tswam tsat!

⁴⁵A̱wot mam hu si̱ nyiip! Mi̱ di̱ yong a̱hwa, a̱gba̱ndang a̱kpi̱mi̱mi̱t a̱teap nang á̱ lya̱u á̱ si̱ nghai A̱za̱za̱rak A̱vwuo wu, ma̱ng A̱swang ka̱ Swak ma̱ng yet A̱za̱za̱rak hu A̱mali Nwuat Za̱nang A̱gwaza ka a̱ni; si̱ kin seap ma̱ kpeak ma̱ a̱ka̱wa̱tyia̱ neet tazwa a̱ bai a̱byin!

⁴⁶A̱jawa Yesu si̱ kin ngyorong ma̱ng a̱gba̱ndang a̱nwuat nyia̱, “A̱tyia̱ nung, n neap swuan nung ji mbwak ang!”[150] Nang gu nhyia̱ a̱nia a̱ni, a̱ si̱ khwat a̱mgba̱m swuan nggu wu, a̱ si̱ khwu.

⁴⁷Jen nang a̱gba̱ndang a̱kwak a̱son á̱niet nzwang A̱romawa wu ndi si̱sak nang Yesu nkhwu a̱ni, a̱ si̱ dyep A̱gwaza, nyia̱, “A̱tsak a̱lyiat, a̱tyu wuni byia̱ a̱bun bah, za̱m!”

⁴⁸A̱wot jen nang á̱niet ma̱ a̱di̱di̱t ma̱ á̱kpa á̱niet ka mbai ba̱ ka li si̱sak ji nang á̱ nkpang Yesu da̱ a̱team a̱khwu wu a̱ni; nang ba̱ ndi kyang nang á̱ nyia̱ nggu ndyo a̱ni; ba̱ si̱ bwuok á̱ nat ma̱ a̱ka̱sa, á̱ saai mbwak di̱n fi̱ri̱ng, mat byian fwuo.

⁴⁹A̱wot á̱kpa̱ndang Yesu ba, ma̱ng á̱nyiuk ba̱ khwi nggu neet mi̱ fam a̱byin Ga̱lili a̱ni, si̱ yong ma̱ gbang á̱ nwuan kyang hu á̱ nyia̱ Yesu ndyo a̱ni.

⁵⁰A̱ghyang a̱niet ku nshya̱, á̱ si̱ ngyei Isuu, a̱ ku neet ma̱ a̱keang A̱ri̱matiya, mi̱ fam a̱byin Yahudiya. Isuu ku yet a̱tan ma̱ng a̱tsotswat a̱yin wa. A̱ si̱ swan ma̱ng di̱dang a̱ fwuong Tyok A̱gwaza hu ku bai. A̱ ku yet a̱tyo nyiung wa mi̱ sot a̱cha̱chet A̱yahudawa ji. A̱wot a̱ ku shim kyang nang ba̱ la̱p a̱nu ka á̱ na nyia̱ Yesu ndyo a̱ni bah.

⁵¹

⁵²Isuu si̱ nat da̱ a̱vwuo gwomna Bilatut, a̱ si̱ naai á̱ nwuak gu kwom Yesu hu.

⁵³A̱wot Isuu si̱ tyia̱, á̱ si̱ chyok ma̱ng kwom Yesu hu da̱ a̱team a̱khwu wu. A̱wot a̱ si̱ gat hu ma̱ng kikyak ji̱ yet a̱sha̱shet a̱sai a̱toot a̱ni. A̱ si̱ myiai nhu mi̱ lyak fai nang á̱ lung da̱ a̱fang a̱ni.

⁵⁴Á̱ ku niat Yesu a̱tuk Juma kya, nang mam hu ka̱n dwi a̱ hyian; mam hu nang A̱yahudawa ba nvwuoi á̱ saai á̱ fwuong a̱tuk Mam Fwung ka ka̱ tsa jenshyung a̱ni.

⁵⁵Nang á̱ nkyiak kwom Yesu hu á̱ naat ndyo mi̱ lyak hu a̱ni, á̱nyiuk á̱ghyang ba̱ ku khwi Yesu neet mi̱ fam a̱byin Ga̱lili a̱ni; ba̱ si̱ nkhwi, ba̱ ka li lyak hu nang á̱ na niat gu a̱ni.

⁵⁶Nang á̱nyiuk a̱bya ndi a̱cha̱chaat tyan lyak ji a̱ni, ba̱ si̱ bwuok á̱ nat a̱mali. Ba̱ si̱si̱ jhyi nkyuo turare ma̱ng a̱myia̱ na̱ byia̱ swam nyinyang a̱ni; ba̱ ka si̱ kwon di̱n kwom Yesu hu. A̱wot jen nang ba̱ na ntyak jhyi hu a̱ni, á̱ si̱ nwuo A̱tuk Mam Fwung ka jenshyung. Mat a̱nia, ba̱ si̱ fwung ma̱nang á̱ ndyuut mi̱ doka ji a̱ni.