Read tyap Luka 4 Bible Online

Luka 4 - tyap bible

Luka 4

¹A̱wot Yesu si̱ bwuok a̱ neet a̱ma̱nyi a̱ghyui Urdun, nang chet A̱za̱za̱rak Ntswa wu shya̱ da̱ nggu. A̱za̱za̱rak Ntswa wu si̱ nat ma̱ng a̱nggu mi̱ tswa a̱yit.

²A̱jawa A̱ta̱nyeang ka si̱si̱ mak gu mam swak nnaai. Mi̱ mam a̱nia, Yesu du ya kyayak bah. A̱wot a̱ si̱ fa̱k zong ba̱t.

³Huhwa A̱ta̱nyeang ka si̱ nyia̱ ma̱ng Yesu, “Ki̱ nwan wa yet nggwon A̱gwaza ka za̱m, kam a̱fang kani ka̱ bwuak a̱ tyia̱ burodi!”

⁴A̱wot Yesu si̱ nyia̱ ma̱ng A̱ta̱nyeang ka, “Kaai! Á̱ lyuut mami A̱lyiat A̱gwaza na nyia̱, ‘Mi̱ kyayak hwa ma̱nyin hu nang a̱tyubishyi na ya á̱ nswuan bah.’[33] ”

⁵A̱jawa A̱ta̱nyeang ka si̱ bu kyiak gu a̱ nat ndyo tazwa a̱fan. Mi̱ di̱ yong a̱hwa, ka̱ si̱ kin tak ma̱ng Yesu a̱mgba̱m ntyok swanta na.

⁶A̱ta̱nyeang ka si̱ nyia̱ ma̱ng Yesu, “N na nang ang shi bibyin ntyok nani, a̱wot a na nyia̱ tyok tazwa na, mat na̱ yet á̱si̱ nung nia. A̱wot ka̱ n doot n nang a̱tyu nang n chat nang hu a̱ni.

⁷Mat a̱nia, ka̱ a kyuak ntong a̱zaghyi nung, a̱mgba̱m na, n na nang ang naa.”

⁸Yesu si̱ bu nwuak A̱ta̱nyeang ka shim nyia̱, “Á̱ lyuut ma̱ A̱lyiat A̱gwaza na nyia̱, ‘Ku yet ta hwa a kyuak ntong a̱zaghyi A̱tyoli a̱ yet A̱gwaza ang a̱ni; a̱wot nggu wa a bu nyia̱ nggu ta̱m ma̱nyin nggu.’[34] ”

⁹A̱jawa A̱ta̱nyeang ka si̱ bu kyiak Yesu a̱ nat ndyo Urusha̱lima. Ka̱ si̱si̱ sak gu da̱ a̱ga̱nga̱ng a̱ta̱n A̱li Nwuat Za̱nang A̱gwaza ka. Ka̱ si̱ nyia̱ ma̱ng a̱nggu, “Ka̱ nwan wa yet Nggwon A̱gwaza ka chi̱k, fi̱p kwa a̱byin!

¹⁰Mat á̱ lyuut ma̱ A̱lyiat A̱gwaza na nyia̱, ‘A̱gwaza na kam a̱yaata̱m tswá nggu ba ba̱ cham ang; ba̱ bu chok ang shansham.

¹¹A̱wot ba̱ na fwun ang ma̱ng mbwak mba na; kalak a du tuk tak ang hu da̱ a̱fang, a kwa.’ ”[35]

¹²Yesu si̱ bu nwuak ka shim nyia̱, “Kaai, á̱ lyuut ma̱ A̱lyiat A̱gwaza na, nyia̱, ‘Yok mak mi̱ mak a mak A̱gwaza yet A̱tyoli ang a̱ni bah.’[36] ”

¹³Nang A̱ta̱nyeang ka ntyak mak Yesu di̱ kuzang tangka̱i mai a̱ni, ka̱ si̱ doot a̱ ghwon guu, a̱ fwuong jen jhyang.

¹⁴A̱wot Yesu si̱ bwuok a̱ nat Ga̱lili mami chet A̱za̱za̱rak Ntswa. Nkhang nggu na si̱ kai kuzang a̱vwuo ma a̱nggang mi̱ fam a̱byin a̱hwa.

¹⁵A̱ ni̱ tyiet kuzang jen ma̱ á̱tutu a̱tung mba na, a̱wot konyan ni̱ chyin guu.

¹⁶Nang Yesu mbwuok a̱ bai Na̱za̱ra̱t, a̱keang nang gu nshi a̱ni, a̱ si̱ nat mi̱ tutu a̱tung A̱yahudawa hu ma̱nang gu mmeang mi̱ chong hu a̱tuk Mam Fwung A̱yahudawa ka a̱ni. A̱ si̱ doot a̱ yong a̱ ka fang A̱lyiat A̱gwaza na.

¹⁷Ba̱ si̱ neap gu ta̱ka̱da A̱lyiat A̱gwaza nang Ishaya a̱ta̱m a̱kwonu A̱gwaza ku lyuut a̱ni. A̱ si̱ khwuk, a̱ si̱ fang ba tyan nang á̱ ndyuut nyia̱:

¹⁸“Tswa A̱gwaza ji shya̱ da̱ nung; mat A̱gwaza khai nung n shei A̱sham Nkhang ka da̱ a̱vwuo á̱kunak. A̱ si̱ ta̱m nung n shei ma̱ng á̱niet ba̱ shya̱ mi̱ khwo a̱ni, nang á̱ nkai mba á̱ ghwon; n bu nshei á̱niet a̱fi̱fan nang ba̱ na nshya̱ nwuan a̱vwuo; a̱wot n bu nshei á̱niet á̱ ya̱shuk a̱ni, nang á̱ na nkai mba á̱ ghwon;

¹⁹a̱wot jen nang A̱gwaza na nfa̱k shok á̱niet nggu ba a̱ni, ji̱ bai.”[37]

²⁰Nang Yesu ntyak fang A̱lyiat A̱gwaza na a̱ni, a̱ si̱ kuut ta̱ka̱da hu a̱ si̱ bwuok ndyo, a̱ nwuak a̱tyu nta̱m tutu a̱tung A̱yahudawa wu. A̱ si̱ bwuok a̱ swan a̱zaghyi mba. A̱mgba̱m á̱niet ba̱ shya̱ mi̱ tutu a̱tung hu a̱ni, si̱ sak Yesu á̱ghyi di̱di̱r.

²¹A̱jawa gu si̱ nwuo tyiet ba nyia̱, “A̱lyiat A̱gwaza na nang nyi fa̱k n fang nyin ndyo a̱fwun kani a̱ni; ma̱ninika, na̱ bai cha̱chaat da̱ a̱nu ka!”

²²A̱mgba̱m á̱niet ba si̱ chyin guu. A̱wot ba̱ si̱ fa̱k a̱ga̱de[38] nang gu ntak a̱lyiat nggu na tí̱tak a̱ni. Ba̱ si̱ lyip nyia̱, “Ku na nyia̱ ni ku ndi a̱nia? A̱tyu wuni wa yet nggwon Isuu ka baa?”

²³A̱wot Yesu si̱ nyia̱ ma̱ng a̱mba, “A̱tsak a̱lyiat, nyi na hyia̱ ma̱ng a̱nung kidee nyia̱, ‘A̱tyu kan, choot a̱pyia̱ ang!’ Á̱ fa, ‘Nyia̱ nkyang a̱ri̱bi̱di a̱ji ma̱ a̱keang ang ka, nang zi̱ ku nfa̱k a nyia̱ mi̱ Ka̱fanahum a̱ni.’

²⁴N hyia̱ ma̱ng a̱nyin a̱tsak a̱lyiat, a̱ta̱m a̱kwonu A̱gwaza shyat shi ma̱ a̱keang gu bah!”

²⁵“A̱tsak a̱lyiat, gbangbang mi̱ njen Iliya a̱ta̱m a̱kwonu A̱gwaza, á̱ ku byia̱ á̱nyiuk ma̱ a̱di̱di̱t ma̱ a̱byin Isi̱rela, nang á̱tyok mba ba ka̱n kwi a̱ni. Di̱n jen a̱ja, á̱ si̱ nyia̱ a̱lyia̱ a̱tat ma̱ng á̱kum nang za va bah. A̱wot a̱gba̱ndang zong si̱ kwa ma̱ a̱byin ka.

²⁶A̱mgba̱m ma̱ng a̱nia, A̱gwaza si̱ ta̱m Iliya da̱ a̱vwuo a̱byii̱k a̱nyiung mami á̱nyiuk ba̱ shya̱ mi̱ a̱byin Isi̱rela ka a̱ni bah. Da̱ a̱kwonu a̱kya, A̱gwaza si̱ ta̱m gu da̱ a̱vwuo a̱nap Nnwap a̱ nwai yet A̱yahudawa a̱ni nang a̱tyok nggu wu khwu; a̱ shya̱ ma̱ a̱keang Za̱rifat mi̱ fam a̱byin Sidon a̱ni.

²⁷“Ma a̱nia wa, á̱ ku byia̱ á̱niet gbap ma̱ a̱di̱di̱t ma̱ a̱byin Isi̱rela di̱n jen Ilisha, a̱ta̱m a̱kwonu A̱gwaza. A̱wot ma̱ a̱tyu gbap a̱nyiung nang á̱ ku choot a̱ni; nggu wa yet Naaman a̱tyu Nnwap a̱ nwai yet A̱yahudawa, a̱ neet ma̱ a̱byin Suriya a̱ni.”

²⁸Nang á̱niet ba̱ shya̱ mi̱ tutu a̱tung A̱yahudawa hu nfa̱k a̱nia a̱ni, ba̱ si̱ mwuat ndyen ba̱t.

²⁹Ba̱ si̱ doot á̱ yong. Ba̱ si̱ kwak Yesu á̱ ghwut ndyo ma̱ a̱keang ka. Ba̱ si̱ chong ma̱ng a̱nggu tazwa ntsok nang á̱ nnok a̱keang ka a̱ni. Ba̱ si̱ chat ba̱ yuut gu da̱ a̱ta̱n tsok ka, gu si̱ kwa a̱byin.

³⁰A̱wot a̱ si̱ tyia̱ ghyuai a̱ nwuo ma̱ka̱wa̱tyia̱ á̱kpa á̱niet ka, a̱ si̱si̱ nkat!

³¹Yesu si̱ nat a̱keang Ka̱fanahum mi̱ fam a̱byin Ga̱lili. Kuzang a̱tuk Mam Fwung, a̱ ni̱ tyiet mi̱ tutu a̱tung A̱yahudawa hu.

³²A̱ja meang, á̱niet ba si̱ fa̱k a̱ga̱de di̱ tyiet nggu hu. Mat a̱lyiat nggu na ku yet a̱si̱ a̱tyu a̱ byia̱ tyok a̱ni!

³³Á̱ghyang á̱tuk nang Yesu nshya̱ mi̱ tutu a̱tung A̱yahudawa hu a̱ni, a̱tyok a̱ghyang a̱ ku byia̱ a̱ka̱tuk ntswa a̱ni, si̱ ta̱ngam a̱nwuat mi̱ chet, a̱ si̱ nyia̱,

³⁴“Yesu a̱tyu Na̱za̱ra̱t, tyong a ghwon zi̱t! Yihwa yet a̱ka̱ta ang ka ma̱ng a̱nzi̱t? A bai a hyaai nzi̱t wa kee? N dyen tangka̱i a̱yin nang a yet a̱ni; a yet A̱za̱za̱rak Nggwon A̱gwaza wa!”

³⁵Yesu si̱ kam a̱ka̱tuk ntswa wu nyia̱, “Tyia̱ nywang! Ghwut mi̱ vam a̱tyok a̱hwa, a ghwon guu!” A̱ka̱tuk ntswa wu si̱ kin ma a̱tyu a̱wa a̱byin, nang á̱kpa á̱niet ka nwuan. A̱ka̱tuk ntswa wu si̱ ghwut a̱ ghwon guu. Da̱ nggu, a̱ bu bwuo nggu kun bah.

³⁶A̱mgba̱m á̱kpa á̱niet ka si̱ fa̱k a̱ga̱de! Ba̱ si̱ nyia̱ ma̱ng á̱ghyang mba, “Zang tangka̱i tyok ma̱ng chet hwa nang a̱lyiat a̱tyu nani byia̱ a̱nia! Ku á̱ka̱tuk ntswá meang ba̱ mun á̱ fwuong guu. A̱wot ka̱ a̱ kam baa, ba̱ ni̱ ghwut ma̱ á̱niet ba!”

³⁷Nkhang Yesu na si̱ kai kuzang a̱vwuo mi̱ fam a̱byin a̱hwa.

³⁸A̱tuk a̱kya, nang Yesu nghwut mi̱ tutu a̱tung A̱yahudawa hu a̱ni, a̱ si̱ swak a̱ nat a̱mali Siman. A̱ si̱si̱ shya̱ nang a̱kwang Siman wu nyia̱ ma̱ng zwan a̱sok a̱za. Konyan si̱ naai Yesu nyia̱, “A̱tyoli, ma̱sa̱kut, choot guu!”

³⁹Yesu si̱ nat a̱ si̱ yong kpa̱mkpaan ma̱ng a̱gbaat nang gu mmyian a̱ni. A̱ si̱ kam zwan ji. A̱kwang Siman wu si̱ kin choot! A̱wot a̱ si̱ kin doot kiki, a̱ si̱ wan mba kyayak.

⁴⁰Nang jenshyung nnyia̱ a̱ni, á̱niet ma̱ a̱keang a̱bya si̱ bai ma̱ng á̱niet mbaa ba̱ nyia̱ ma̱ng nzwán a̱ni da̱ a̱vwuo Yesu. A̱wot kuzang tangka̱i nzwan ja ji̱ nyia̱ mba a̱ni, Yesu si̱ byam mba ma̱ng bwak, ba̱ si̱ choot.

⁴¹Á̱niet ma̱ a̱di̱di̱t ku byia̱ á̱ka̱tuk ntswá. A̱wot nang Yesu nkam á̱ka̱tuk ntswá mba a̱ni, ba̱ si̱ ghwut á̱ khwot a̱gugong mi̱ chet nyia̱, “Nwan wa yet Nggwon A̱gwaza ka!” A̱wot Yesu si̱ kam mbaa. A̱ si̱ vwuong ba kaat a̱lyiat, mat nang ba̱ ndyen nang gu ngyet Kristi wa a̱ni.

⁴²Da̱ a̱tsotson tat ka, Yesu si̱ nat da̱ a̱vwuo nang a̱yin nshya̱ a̱ni bah. Á̱kpa á̱niet ka si̱ ta̱bat chat gu mi̱ kuzang a̱vwuo. A̱wot nang ba̱ nshya̱ gu a̱ni, ba̱ si̱ naai gu, gu yok doot a̱ ghwon ba bah.

⁴³A̱wot Yesu si̱ nwuak ba shim nyia̱, “Ku yet ta hwa n shei A̱sham Nkhang Tyok A̱gwaza hu ma̱ a̱ka̱keang á̱ghyang meang. Mat ta̱m huni hwa nang á̱ nta̱m nung n nyia̱.”

⁴⁴Huhwa Yesu si̱ ya a̱son mi̱ chyet a̱ kat a̱ka̱keang na. A̱ shei A̱sham Nkhang ka mi̱ a̱mgba̱m á̱tutu a̱tung A̱yahudawa ba mi̱ fam a̱byin Yahudiya[39] hu.