Read tyap Luka 5 Bible Online

Luka 5 - tyap bible

Luka 5

¹Á̱ghyang á̱tuk, nang Yesu nshya̱ di̱ tyiet di̱n khwong a̱gba̱ndang jok Ga̱lili a̱ni; á̱kpa á̱niet si̱ keang gu da̱nian ba̱ ka fa̱k A̱lyiat A̱gwaza na.

²Yesu si̱ li a̱kukwon a̱wak feang di̱ khwong a̱sa̱khwot nang á̱niet bwoi fa̱n ba doot á̱ ghwon, a̱wot ba̱ shya̱ di̱ kwi á̱ka̱li mba na.

³Yesu si̱ kan nwuo a̱ swan mi̱ kukwon a̱wak nyiung, ku yet si̱ Siman[40] a̱ni. A̱ si̱ nyia̱ ma̱ng Siman, “Yuut kukwon hu ma̱ a̱da̱dei ku nwuo mami a̱sa̱khwot na.” Mi̱ kukwon a̱wak huhwa nang Yesu ku nswan, a̱ si̱ ntyiet á̱kpa á̱niet ka.

⁴Nang Yesu ntyak tyiet á̱kpa á̱niet ka A̱lyiat A̱gwaza na a̱ni, a̱ si̱ nyia̱ ma̱ng Siman, “Bu yuut kukwon a̱wak hu nat ndyo ma̱ a̱tsuung jok wu. A̱wot nyi koot á̱ka̱li nyin na a̱ja, nyi ka mbwoi fa̱n hu.”

⁵Siman si̱ nwuak gu shim nyia̱, “Kwot A̱tyoli! Zi̱ hyai ta̱m ntyak a̱tyetuk ka, da̱ nzi̱t zi̱ bwoi fa̱n bah! A̱wot ka̱ a hyia̱ a̱nia, n bu na koot á̱ka̱li na!”

⁶Nang ba̱ nkoot á̱ka̱li na a̱ni, ba̱ si̱ bwoi fa̱n ma̱ a̱di̱di̱t! Ku si̱ hyaai á̱ka̱li na. A̱wot á̱ka̱li na si̱ nwuo chak!

⁷Ba̱ ndi a̱nia a̱ni, ba̱ si̱ yei á̱kpa̱ndang ta̱m mba ba ma̱ng bwak, ba̱ shya̱ mi̱ kukwon a̱wak ghyang a̱ni, ba̱ bai ba̱ beang ba kwak a̱ka̱li ka. Da̱ a̱banjen ma̱ a̱da̱dei, ba̱ si̱ kwok fa̱n hu á̱ hyaai a̱kukwon a̱wak a̱feang ba. A̱wot a̱kukwon a̱wak ba si̱ nwuo ya̱lyi̱ri̱p!

⁸Nang Siman Bitut ndi a̱nia a̱ni, a̱ si̱ kpaat a̱khwukhwut a̱zaghyi Yesu nyia̱, “Ka̱t A̱tyoli! Doot a ghwon nung, n gyet a̱tyu a̱ka̱tuk nyia̱ wa ba̱t! N maai n bai kpa̱mkpaan ma̱ng a̱nwan bah.”

⁹Mat, nggu ma̱ng á̱kum á̱niet ka ku fa̱k a̱ga̱de ba̱t, mat a̱di̱di̱t fa̱n wu nang ba̱ bwoi a̱ni.

¹⁰Á̱kpa̱ndang bwoi fa̱n Bitut ba mameang, Yakubu ma̱ng Yoona, ba̱ yet á̱fai Za̱ba̱di ba a̱ni, si̱ fa̱k a̱ga̱de. Yesu si̱ nwuak Bitut shim nyia̱, “Yok fa̱k a̱wun bah! Ma̱ninika si̱ nat á̱zanson, a na nya̱baat á̱niet bya chong ndyo da̱ a̱vwuo nung; ma̱nang a bwoi fa̱n hu a̱ni!”

¹¹A̱wot nang ba̱ ngyuut a̱kukwon a̱wak ba á̱ nat ndyo, á̱ si̱ sak di̱ khwong a̱gba̱ndang jok hu a̱ni; ba̱ si̱ ghwon kuzang kyang a̱ja, ba̱ si̱ khwi Yesu.

¹²Jen nang Yesu nshya̱ ma̱ a̱keang a̱ghyang a̱ni, a̱ si̱ tyia̱ gba̱ng ma̱ng a̱tyok a̱ghyang nang gbap ya gu ba̱t a̱ni. Nang a̱tyu a̱wa ndi Yesu a̱ni, a̱ si̱ totong a̱ghyi nggu ba a̱byin, a̱ si̱ naai Yesu nyia̱, “A̱tyoli, ma̱sa̱kut, ka̱ a shim, a tyia̱ nung n choot, n bu ndi za̱za̱rak.”

¹³Yesu si̱ neap bwak, a̱ si̱ mbyiam gu nyia̱, “N shim, da̱ choot!” Mi̱ di̱ yong a̱hwa, a̱tyu gbap wu si̱ kin choot! Vam nggu hu si̱ tyia̱ za̱za̱rak.

¹⁴A̱wot Yesu si̱ gba gu nyia̱, “Yok tak ma̱ng a̱yin bah. Da̱ a̱kwonu a̱kya, nat a si̱ tak a̱pyia̱ ang da̱ a̱vwuo pris a̱ ka zop ang. A̱wot a neap za̱nang nang Musa ku tak mami doka A̱gwaza ji, ku myim á̱niet gbap nang á̱ choot ba̱ neap a̱ni.[41] Si̱ huni na tak á̱niet ba kpa̱sai nang a nchoot, a si̱ tyia̱ za̱za̱rak.”

¹⁵A̱mgba̱m ma̱ng a̱nia, nkhang chet nang Yesu nchoot á̱niet ba a̱ni, si̱ kai kuzang a̱vwuo ma a̱nggang. A̱wot á̱kpa á̱niet si̱ bai da̱nian ba̱ ka fa̱k A̱lyiat A̱gwaza na da̱ a̱vwuo nggu; a̱ bu choot ba nzwán mba ji.

¹⁶A̱wot Yesu ni̱ tyia̱ ghyuai a̱ doot kuzang jen a̱ nat da̱ a̱vwuo nang a̱yin nshya̱ a̱ni bah. A̱ si̱ naai A̱gwaza a̱ja.

¹⁷Á̱ghyang á̱tuk nang Yesu shya̱ di̱ tyiet á̱niet ba, nang A̱fa̱risawa á̱ghyang ma̱ng a̱yaagwak tyiet doka A̱gwaza swan kpa̱mkpaan a̱ja. (Shimba á̱niet bani ku neet mi̱ kuzang a̱keang mi̱ nfam bibyin Ga̱lili ma̱ng Yahudiya. Á̱ghyang si̱ bu neet mi̱ Urusha̱lima). A̱wot A̱gwaza ku nwuat Yesu chet choot á̱niet nzwán hu ba̱t.

¹⁸Á̱ghyang á̱niet si̱ bai ma̱ng a̱tyu nang nkap nggu na ta̱luk, nang gu myian da̱ a̱gbaat a̱ni. Ba̱ si̱ kwan ba̱ li nang ba̱ nwuo ma̱ng a̱nggu da̱ a̱vwuo Yesu.

¹⁹A̱wot nwuo hu si̱ kaat mba mat á̱kpa á̱niet ka. Ba̱ si̱ nyeak tazwa nyuo ji. Ba̱ si̱ khwuk a̱kup wu. A̱wot ba̱ si̱ chyok ma̱ng a̱tyu nzwan wu ma̱ng a̱gbaat nggu wu, á̱ sak a̱byin cha̱chaat a̱zaghyi Yesu mami á̱kpa á̱niet ka.

²⁰Nang Yesu ndi si̱sak ji nang ba̱ nnwuak nfwuo mba na da̱ a̱nggu a̱ni, a̱ si̱ nyia̱ ma̱ng a̱tyu nzwan wu, “Nggwon seam, á̱ chi a̱ka̱tuk nyia̱ ang wu.”

²¹A̱wot A̱fa̱risawa ma̱ng a̱yaagwak tyiet doká A̱gwaza ba si̱ nyia̱ ma̱ng á̱ghyang mba, “Kwot! A̱ fa nyia̱ a̱ yet zang tangka̱i a̱yin hwa? A̱tyu wuni nyia̱ A̱gwaza lihyat hwa! A̱gwaza wa ma̱nyin gu maai a̱ chi a̱ka̱tuk nyia̱ a̱yin!”

²²Yesu ku lyen a̱di̱dam mba wu, a̱ si̱ lyip ba nyia̱, “Yihwa mbyia̱ nyi nyia̱ tangka̱i a̱di̱dam huni mi̱ nfwuo nyin na?

²³Zang huhwa yet a̱hyohyoot a̱ swak; á̱ tak kpa̱sai nyia̱, ‘Á̱ chi a̱ka̱tuk nyia̱ ang wu;’ ke á̱ nyia̱ ma̱ng a̱tyu ta̱luk nkap wu, ‘Doot yong, a chong’?

²⁴Mat a̱nia, n na ntak nyin kpa̱sai nang Nggwon A̱tyubishyi mbyia̱ tyok mi̱ swanta hu ka̱ chi a̱ka̱tuk nyia̱.” Huhwa Yesu si̱ bwuak, a̱ si̱ nyia̱ ma̱ng a̱tyu ta̱luk nkap wu, “Doot yong, kyiak a̱gbaat ang wu, a nkat a̱mali!”

²⁵A̱wot mi̱ di̱ yong a̱hwa, a̱tyok a̱wa si̱ kin fi̱p a̱ doot a̱zaghyi á̱kpa á̱niet ka! A̱ si̱ kyiak a̱gbaat nggu wu, a̱ si̱ nat a̱mali a̱ dyep A̱gwaza.

²⁶Konyan ma̱ á̱kpa á̱niet ba̱ shya̱ a̱ja a̱ni, si̱ fa̱k a̱ga̱de ma̱ng a̱wun! A̱wot ba̱ si̱ dyep A̱gwaza nyia̱, “Kwot! Zi̱ li nkyang a̱ga̱de a̱fwun!”

²⁷Nang si̱ a̱hwa nswak a̱ni, Yesu si̱ doot ma̱ a̱keang ka. A̱ si̱ li a̱tyu saai kurum ga̱ndu a̱ghyang nang á̱ ngyei La̱wi a̱ni; nang gu swan mi̱ tutu nta̱m nggu hu. Yesu si̱ nyia̱ ma̱ng a̱nggu, “Khwi nung, a yet nggwon ta̱m nung!”

²⁸Huhwa, La̱wi si̱ kin doot a̱ si̱ ghwon kuzang kyang a̱ja. A̱ si̱ khwi Yesu.

²⁹Á̱ si̱ labeang bah, La̱wi si̱ yei Yesu gu yet a̱gba̱ndang á̱nietchen di̱ ya kyayak a̱gbang gu. Á̱niet saai kurum ga̱ndu ma̱ a̱di̱di̱t ba̱ yet á̱kpa̱ndang La̱wi a̱ni, ma̱ng á̱ghyang á̱niet si̱ nshya̱; ba̱ si̱ ya nkyayak na ma̱ng a̱mba.

³⁰A̱wot A̱fa̱risawa ba ma̱ng a̱yaagwak tyiet doka A̱gwaza ba si̱ kwop a̱dyii̱ng ma̱ng byian fwuo da̱ a̱vwuo mman ta̱m Yesu na nyia̱, “Yihwa mbyia̱ nyi ngya tsa nswuo ma̱ng á̱niet saai kurum ga̱ndu, mbeang á̱niet a̱ka̱tuk nyia̱ á̱ghyang?”

³¹Yesu si̱ nwuak ba shim nyia̱, “Á̱niet ba̱ swan ka̱nka̱ra̱ng a̱ni, ba̱ ni̱ chat a̱tyu kan bah. Á̱niet nzwán bya ni̱ chat a̱tyu kan wu.

³²N bai n gyei á̱niet ba̱ fa ba̱ yet a̱tsotswat bya a̱ni bah. Da̱ a̱kwonu a̱kya, n bai ngyei á̱niet ba̱ lyen nang ba̱ ngyet á̱niet á̱ka̱tuk nyia̱ bya a̱ni, a̱wot ba̱ ka ghwon a̱ka̱tuk nyia̱ mba wu, ba̱ khwi A̱gwaza.”

³³Á̱ghyang á̱tuk, á̱ghyang á̱niet si̱ kwop a̱dyii̱ng ma̱ng Yesu, nyia̱, “Mman ta̱m Yoona a̱tyu nyia̱ ba̱ptisman na ni̱ swan a̱fa a̱khwot di̱ naai A̱gwaza kuzang jen; ma a̱nia wa á̱si̱ A̱fa̱risawa na. Yihwa mbyia̱ á̱si̱ nwan mman ta̱m na ngya á̱ tsa nswuo kuzang jen?”

³⁴Yesu si̱ nwuak ba shim nyia̱, “Ku myim á̱kpa̱ndang a̱tyu byia̱ nyeang ba̱ lak ya kyayak mi̱ nyeang, nang nggu a̱tyu byia̱ nyeang wu ni̱ shya̱ ndung ma̱ng a̱mbaa? Kaai.

³⁵A̱wot jen bye bai nang á̱ na nkyiak a̱tyu byia̱ nyeang wu á̱ ghwon ba a̱ni. Jen a̱ja ja ba̱ na ndak ya kyayak hu.”

³⁶Yesu si̱ tak ba kidee jini, nyia̱ “Á̱ mbyia̱ a̱tyu a̱ na seap tyiang a̱toot swai, a̱ mbeet da̱ a̱toot a̱lyen a̱ni bah! Mat tyiang a̱toot swai ji na kuut, ji̱ seap a̱toot a̱lyen wu. A̱wot di̱ tyiang a̱toot swai ji, ji̱ na tai a̱toot a̱lyen wu bah.

³⁷“A̱wot da̱ mba, á̱ mbyia̱ a̱tyu a̱ ni̱ kyiai a̱ta̱bwai a̱fai ma̱ a̱ta̱bwai a̱lyen a̱ni bah. Kalak a̱ta̱bwai a̱fai na na̱ guup, na̱ tyia̱ za̱nzam, na̱ byian.[42]

³⁸Ku yet ta hwa á̱ kyiai a̱ta̱bwai a̱fai ma̱ng a̱ta̱bwai a̱fai á̱ghyang nia.

³⁹Kyang ku shya̱ a̱ja a̱ni, huhwa yet; á̱ mbyia̱ a̱tyu a̱ na swuo a̱ta̱bwai a̱lyen, a̱wot a̱ bu chat swuo a̱ta̱bwai a̱fai a̱ni bah. Mat á̱ ni̱ nyia̱, ‘A̱ta̱bwai a̱lyen na yet á̱ lan a̱fai na.’ ”