Read tyap Luka 6 Bible Online

Luka 6 - tyap bible

Luka 6

¹A̱tuk Mam Fwung A̱yahudawa a̱ghyang, Yesu ma̱ng mman ta̱m nggu na si̱ chong á̱ si̱ nwuo mi̱ bibyin a̱lka̱ma. Mman ta̱m nggu na si̱ ta̱bat chak dudung a̱lka̱ma hu. Ba̱ si̱ fwut hu mi̱ bwak, ba̱ si̱ taan tswá ji.

²A̱wot A̱fa̱risawa á̱ghyang si̱ nyia̱ ma̱ng mman ta̱m Yesu na, “Yihwa mbyia̱ nyi ntyat doka ji, di̱ nyia̱ ta̱m chak a̱lka̱ma hu a̱tuk Mam Fwung ka?”

³Yesu si̱ nwuak mba shim nyia̱, “Nyi ka̱n fang ma̱ A̱lyiat A̱gwaza na tazwa kyang nang a̱gwam Da̱wuda, ma̱ng á̱kpa̱ndang chyet nggu ba, ku nyia̱ di̱n jen nang zong ji ku nta̱bat ba a̱ni baa?

⁴“Da̱wuda ku nwuo a̱mali A̱gwaza ka, a̱ si̱ tyat doka ji, mat ya burodi nang á̱ khap á̱ sak á̱ neap A̱gwaza a̱ni. A̱za̱za̱rak burodi wuni yet a̱si̱ nang á̱ shim konyan a̱ ya a̱ni bah; si̱ mi̱ a̱yaapris bya ma̱nyin ba myim ba̱ ya. Da̱wuda si̱ ya, a̱ si̱ mun a̱ ka̱u á̱kpa̱ndang a̱chyet nggu ba!”

⁵Yesu si̱ bu nyia̱, “Nung Nggwon A̱tyubishyi, n gyet A̱tyoli wa ku tazwa a̱tuk Mam Fwung ka.”

⁶Nang a̱tuk Mam Fwung a̱ghyang nkaat a̱ bai a̱ni, Yesu ku shya̱ di̱ tyiet mi̱ tutu a̱tung A̱yahudawa hu, nang a̱tyok a̱ghyang nang bwak yak nggu hu khwu a̱ni, ma nshya̱ a̱ja.

⁷A̱yaagwak tyiet doká A̱gwaza ma̱ng A̱fa̱risawa si̱ tyia̱ Yesu á̱ghyi, á̱ cham nggu. Da̱nian ba̱ ka li ka̱ a̱ na nyia̱ ta̱m choot a̱tyu nang bwak hu khwu a̱ni, a̱tuk Mam Fwung ka; ba̱ ka shya̱ ta̱fwat nang ba̱ na mbat gu a̱bun a̱ni.

⁸A̱wot nang Yesu wa ka̱n dyen a̱di̱dam mba wu a̱ni, a̱ si̱ nyia̱ ma̱ng a̱tyok nang bwak yak nggu hu khwu a̱ni, “Doot, a bai a̱zaghyi konyan.” A̱tyok a̱wa si̱ nat, a̱ si̱ yong a̱zaghyi mba.

⁹Yesu si̱ nyia̱, “N byia̱ lyip n na ndyip nyin a̱ni. Doka ji shim á̱ nyia̱ a̱yin a̱tan nkyang a̱tuk Mam Fwung ka; kee á̱ nyia̱ nggu a̱ka̱tuk wa? A̱tuk Mam Fwung ka yet mam san swuan hwa kee; á̱ hyat ji wa?”

¹⁰Yesu si̱ nwuan mba a̱nyanyin, huhwa gu nyia̱ ma̱ng a̱tyu nang bwak nggu hu khwu a̱ni, “Neap bwak ang hu!” A̱tyu a̱wa si̱ neap bwak nggu hu. A̱wot bwak nggu hu si̱ kin choot!

¹¹Mat a̱nia, a̱yaagwak tyiet doká ma̱ng A̱fa̱risawa ba si̱ mwuat ndyen ba̱t. Ba̱ si̱ nwuo vwuoi kyang hu nang ba̱ na nyia̱ ma̱ng Yesu a̱ni.

¹²Á̱ghyang á̱tuk, Yesu si̱ nat di̱ tsok di̱ naai A̱gwaza. A̱ si̱ tyak a̱tyetuk ka nang gu naai guu.

¹³Da̱ a̱tsotson tat ka, a̱ si̱ yorong a̱mgba̱m mman ta̱m nggu na. A̱ si̱ khai á̱niet swak ma̱ a̱feang, ba̱ yet a̱yaata̱m guu. Lyulyoot a̱yaata̱m huhwa hu:

¹⁴Siman (Nang Yesu ntyia̱ a̱lyoot, “Bitut” ka a̱ni), Anda̱rawut (A̱na̱nyiuk Bitut wu), Yakubu, Yoona, Filibut, Ba̱tolomi,

¹⁵Matyu, Toma, Yakubu (a̱fai A̱lfayat), Siman (nang á̱ ngyei Za̱loti[43] a̱ni),

¹⁶Yahuda (a̱fai Yakubu wu), ma̱ng Yahuda Iska̱riyoti (a̱tyu a̱ ku[44] yet a̱bang a̱byin wu a̱ni).

¹⁷Nang ba̱ nchyok á̱ neet di̱ tsok ji a̱ni, a̱gba̱ndang á̱kpa mman ma̱ a̱di̱di̱t si̱ yong ndung ma̱ng Yesu di̱ tyan ji byia̱ a̱kpai, ji̱ si̱ myia̱ dadaa a̱ni. A̱gba̱ndang á̱kpa á̱niet ba̱ khwi Yesu a̱ni, si̱ tyong mba á̱ keang. Ba̱ ku neet mi̱ kuzang a̱vwuo mi̱ fam a̱byin Yahudiya ma̱ng a̱keang Urusha̱lima. Á̱ghyang á̱niet si̱ bu neet ma̱ gbang mi̱ fam a̱za Taya ma̱ng Sidon; a̱ka̱keang na̱ shya̱ kpa̱mkpaan ma̱ng kyai a̱sa̱khwot a̱ni.

¹⁸Ba̱ ku bai fa̱k tyiet Yesu hu, a̱wot a̱ ka choot ba zwán mba ji. Á̱niet ba̱ swuo a̱bung ma̱ng á̱ka̱tuk ntswá a̱ni, a̱ si̱ mun a̱ choot baa.

¹⁹Konyan si̱ kwan a̱ byiam Yesu, mat chet choot á̱niet nzwán ku ghwut ma̱ a̱nggu a̱ni. A̱wot a̱ si̱ choot konyan wa a̱ byiam gu a̱ni.

²⁰A̱wot Yesu si̱ bwuak a̱ nwuan mman ta̱m nggu na, a̱ si̱ nyia̱, “A̱gwaza tyei a̱li̱ba̱rka da̱ nyin, nyi yet á̱kunak da̱ a̱vwuo nggu a̱ni; mat Tyok A̱gwaza hu yet si̱ nyin hwa.

²¹A̱gwaza tyei a̱li̱ba̱rka da̱ nyin, nyi fwuong zong ma̱nini a̱ni; mat nyi na ya, nyi swa̱i. A̱gwaza tyei a̱li̱ba̱rka da̱ nyin, nyi twei ma̱nini a̱ni; mat ki̱ jen nyia̱, nyi na mai.

²²A̱gwaza tyei nyin a̱li̱ba̱rka, nyin á̱niet nang á̱ lak li; á̱ si̱ bu khap nyin zan mami á̱niet; á̱ si̱ bu nyia̱ nyin lihyat; á̱ si̱ tyam nyin nang á̱ka̱tuk á̱niet a̱ni; mat nyi khwi nung, Nggwon A̱tyubishyi.

²³Ka̱ nkyang nani bai nyin a̱nia, nyi gwai, nyi gyera̱p! Mat á̱ na nang nyin a̱gba̱ndang zang Ma A̱gwaza tswazwa! “A̱wot nyi yok bwung bah; ma a̱nia wa nang a̱yaatyia̱ a̱khwop mba ba gbangbang ku ngyong mi̱ di̱ nyia̱ a̱yaata̱m a̱kwonu A̱gwaza ba ndyo.

²⁴A̱wot ku swan nyin, á̱niet nzwá; mat nyi san a̱mgba̱m fa̱k nyinyang nyin wu wa wu ma̱nini.

²⁵Ku swan nyin á̱niet, nyi byia̱ a̱swa, nyi si̱ bu ya a̱son ma̱nini a̱ni; mat a̱gba̱ndang zong na ya nyin á̱zanson. Ku swan nyin á̱niet, nyi mai ma̱nini a̱ni; mat mai nyin hu na bwuak a̱ tyia̱ byian fwuo ma̱ng a̱nak.

²⁶Ku swan nyin á̱niet, nang á̱kpa á̱niet chyin a̱ni; mat a̱nia wa a̱yaatyia̱ a̱khwop mba ba ku nchyin a̱yaata̱m bwoi a̱ka̱laa, ba̱ ku kyiak á̱pyia̱ mba nang á̱tsatsak a̱yaata̱m a̱ni.”

²⁷Yesu si̱ bu nyia̱, “A̱wot nyin á̱niet nyi myiai a̱fufwuo fwuong a̱lyiat nung na a̱ni; n tak ma̱ng a̱nyin; nyi chat á̱niet lak li nyin ba. Nyi bu nyia̱ á̱niet ba̱ lak nyin a̱ni a̱tan kyang.

²⁸Á̱niet ba̱ shyi nyin a̱ni; nyi tyei mba a̱li̱ba̱rka. Nyi bu naai A̱gwaza da̱nian á̱niet, ba̱ nyia̱ nyin a̱ka̱kpa̱t a̱ni.

²⁹Ka̱ a̱yin ni̱ ndwi ang di̱ kpang nyiung di̱ lihyat;[45] a ni̱ mbwuak gu a̱nyiung hu, a̱ bu lwi. Ka̱ a̱yin ni̱ nkyiak a̱gba̱ndang a̱toot ang wu di̱n vak bwoi a̱bun; a ni̱ nnwuak nggu a̱si̱ mami wu mbeang.

³⁰Ka̱ a̱yin ni̱ nnaai kyang ma̱ng a̱nyin; nyi ni̱ nnang gu. A̱wot ka̱ a̱yin ni̱ nkyiak kyang nyin; nyi ni̱ ngyok tyia̱ gu bwuok ndyo bah.

³¹Nyi ni̱ nyia̱ á̱niet ba kyang, nang nyi chat ba̱ nnyia̱ nyin ndyo a̱ni.

³²Ka̱ nyi chat á̱niet ba̱ chat nyin wa a̱ni ma̱nyin mba; yihwa na yet zang nyin ji? Ma a̱nia wa, á̱niet a̱ka̱tuk nyia̱ ba meang, ni̱ nchat á̱niet ba̱ chat ba wa a̱ni!

³³A̱wot ka̱ nyi ni̱ nyia̱ á̱niet ba a̱tan kyang, mat nang ba̱ nnyia̱ nyin a̱tan wa a̱ni; yihwa na yet zang nyin ji? Ma a̱nia wa á̱niet a̱ka̱tuk nyia̱ ba meang ni̱ nnyia̱!

³⁴A̱wot ka̱ nyi ni̱ khwap ma̱ á̱niet ba kurum nang nyi fa ba̱ na tan nyin wa a̱ni; nyi na nyia̱ ni wa, nyi shya̱ a̱li̱ba̱rka wu? Ma̱ a̱nia wa á̱niet a̱ka̱tuk nyia̱ ni̱ nkhwap á̱niet a̱ka̱tuk nyia̱ ba; ba̱ fa ba̱ na tan ba cha̱chaat a̱ni.

³⁵Nyi ni̱ nchat á̱niet ba̱ lak li nyin a̱ni! Nyi nyia̱ mba a̱tan nkyang. Nyi bu khwap baa. Nyi yok dam kee ba̱ na nwai tan nyin bah. A̱wot A̱gwaza na tyia̱ nyin a̱gba̱ndang a̱li̱ba̱rka! A̱nia wa nyi na ngyet á̱tsatsak mman A̱gwaza a̱ Swak ma̱ng A̱kyenkyai Shi a̱ni; mat a̱ ni̱ nyia̱ á̱niet sang a̱gwai ma̱ng á̱niet a̱ka̱tuk nyia̱ shok.

³⁶Ku yet ta hwa nyi yet á̱niet fwuong kunak; ma̱nang A̱gwaza a̱ yet a̱tyia̱ nyin wu nfwuong kunak a̱ni.

³⁷Nyi ni̱ ngyok nwuan a̱bun á̱ghyang nyin bah. A̱wot nyin meang, á̱ ma na nwuan a̱bun nyin wu bah. Nyi ni̱ ngyok tyei á̱ghyang nyin a̱bun bah. A̱wot nyin meang, á̱ ma na tyei nyin a̱bun bah. Nyi ni̱ nchi á̱ghyang nyin a̱ka̱tuk nyia̱. A̱wot nyin meang, á̱ ma na chi a̱ka̱tuk nyia̱ nyin wu.

³⁸Nyi ni̱ nang á̱ghyang nyin a̱tan za̱nang. A̱wot nyin meang nyi ma na san. Za̱nang nyin ji na bwuok a̱ bai ma̱ng a̱nyin, nang tswá yak ni̱ nhyat shit tyentyang, ji̱ si̱ ta̱ra̱m ji̱ si̱ weam a̱ni; a̱wot á̱ koot nyin á̱kum ka ma̱ a̱toot a̱ni! Mat, shit ji nang nyi mmak a̱ni, jija á̱ ma na mmak nyin dyo.”

³⁹Yesu si̱ bu nwuak ba kidee jini, nyia̱ “Ka̱ doot a̱tyu a̱fi̱fan a̱ kwak a̱ghyang gu shan a? A̱mgba̱m mba, ba̱ naat ba̱ si̱ kwa mi̱ bwong baa?

⁴⁰Nggwon nta̱m si̱ mi̱n swak a̱tyoli nka bah. Ma̱ng a̱nia, ka̱ nggwon nta̱m ka tyak myiam ta̱m hu shansham, ka̱ na li nang a̱tyoli nka wu a̱ni.

⁴¹“Yihwa mbyia̱ nang a nwuan a̱bachinchyat ka̱ shya̱ mi̱ tswa a̱li a̱kpa̱ndang swat ang wu a̱ni. A̱wot a si̱ bwung a̱gwut nkwon ka̱ shya̱ ma̱ a̱si̱ nwan a̱li ka a̱ni?

⁴²A na nyia̱ ni a nyia̱ ma̱ng a̱kpa̱ndang swat ang wu, ‘A̱kpa̱ndang, yok n ti̱n ang a̱bachinchyat ka̱ shya̱ mi̱ tswa a̱li ang ji a̱ni.’ “A̱wot nang nwan, a si̱ mi̱n di a̱gut nkwon ka̱ shya̱ mi̱ si̱ nwan tswa a̱li ji a̱ni baa? Nwan a̱bubuk a̱yin, ya nti̱n a̱gut nkwon ka̱ shya̱ mi̱ tswa a̱li ang ji a̱ni; a sii nwuan shansham a nti̱n a̱bachinchyat ka̱ shya̱ mi̱ tswa a̱li a̱kpa̱ndang swat ang wu a̱ni.

⁴³“A̱tan a̱kwon si̱ mi̱n tyia̱ a̱bya̱bya̱ sum bah. Ma a̱nia wa, a̱bya̱bya̱ a̱kwon si̱ mi̱n tyia̱ a̱tan sum bah.

⁴⁴Á̱ ni̱ fi̱k a̱kwon mat sum nka hu hwa. Á̱ ni̱ kpa̱i a̱lu[46] da̱ a̱kwon sa̱kan bah. Da̱ mba, á̱ ni̱ kpa̱i a̱wut[47] da̱ a̱kwon shop bah.

⁴⁵Ma a̱nia wa, a̱tan a̱yin ni̱ nyia̱ a̱tan kyang nang gu nyia̱ a̱di̱dam ma̱ a̱tan fwuo nggu wu a̱ni. A̱wot a̱ka̱tuk a̱yin ni̱ nyia̱ a̱ka̱tuk kyang nang gu nyia̱ a̱di̱dam ma̱ a̱ka̱tuk fwuo nggu wu a̱ni. Kyang ku shya̱ mi̱ fwuo ang hu a̱ni, huhwa yet a̱tyin kyang nang a lyiat a̱ni.”

⁴⁶“Yihwa mbyia̱ nang nyi ni̱ mmyiai a̱nu nyi ngyei nung, ‘A̱tyoli, A̱tyoli!’ A̱wot da̱ nyin nyi khwi tyiet nung hu bah?

⁴⁷N na tak nyin si̱sak ji ku ndi a̱ni, ka̱ a̱yin bai da̱ a̱vwuo nung a̱ si̱ myiai a̱fufwuo a̱ fwuong tyiet nung hu, a̱ si̱ nyia̱ ta̱m ma̱ng a̱nhu.

⁴⁸“A̱tyu a̱wa li nang a̱tyu a̱ na nok a̱li. A̱ si̱ lung bwong ma̱ tsuung. A̱ si̱ nkpaat kuntyin hu tazwa a̱fang a̱ni. Jen nang a̱ri̱giwa a̱sa̱khwot nghwut a̱ni, na̱ si̱ ba̱ mma mi̱ chet a̱mali a̱kya. A̱wot ka̱ si̱ zwun bah. Mat á̱ nok ka da̱ kuntyin ku byia̱ chet a̱ni.

⁴⁹“A̱wot konyan wa fa̱k tyiet nung hu, da̱ nang gu nnyia̱ ta̱m ma̱ng a̱nhu bah; a̱ li nang a̱tyu a̱ nok a̱li a̱ si̱ nwai nkpaat kuntyin ku byia̱ chet a̱ni. Jen nang a̱ri̱giwa a̱sa̱khwot nghwut na̱ si̱ mma a̱mali ka, ka̱ si̱ zwun a̱ni. Ka̱ na bi̱ri̱m ka̱ kwa ma̱ wurum!”