Read tyap Luka 7 Bible Online

Luka 7 - tyap bible

Luka 7

¹Nang Yesu ntyak tyiet á̱niet ba a̱mgba̱m nkyang nani a̱ni, a̱ si̱ bwuok a̱ nat a̱keang Ka̱fanahum.

²Di̱n jen a̱ja a̱kwak a̱son á̱niet nzwang A̱romawa a̱ghyang ku nshya̱. A̱ si̱ byia̱ a̱khwo nang gu chat ba̱t a̱ni. A̱khwo wu si̱ nyia̱ ma̱ng zwan, a̱ si̱ shim a̱khwu.

³Jen nang a̱kwak a̱son á̱niet nzwang a̱wa nfa̱k nkhang Yesu na a̱ni; a̱ si̱ ta̱m a̱cha̱chet A̱yahudawa á̱ghyang nang á̱ nwuat ba shi a̱ni, ba̱ si̱ naai Yesu gu ka bai a̱ choot a̱khwo nggu wu.

⁴Mat a̱nia, á̱niet a̱bya si̱ nat, ba̱ si̱si̱ shya̱ Yesu. Ba̱ si̱ naai gu a̱fat a̱sa̱kut nyia̱, “A̱tyoli, a̱kwak a̱son á̱niet nzwang wuni myim a beang ngguu.

⁵Mat, a̱ chat A̱yahudawa ba ba̱t. A̱ si̱ bu nok zi̱t tutu a̱tung!”

⁶Huhwa Yesu si̱ nat ma̱ng a̱mba. Nang ba̱ mbwat kpa̱mkpaan ma̱ng a̱li a̱kwak a̱son á̱niet nzwang ka a̱ni; a̱kwak a̱son á̱niet nzwang wu si̱ ta̱m á̱kpa̱ndang nggu ba da̱ a̱vwuo Yesu ma̱ng ta̱m jini nyia̱, “A̱tyoli, yok tyia̱ a̱pyia̱ ang van bah. Mat n maai a̱yin nang nwan a̱ni a̱ nwuo a̱gbang nung bah. Da̱ nung, n maai a nwuak nung shi a̱hwa bah.

⁷Da̱ nung, n bu maai n bai n shya̱ ang bah. A̱wot ka̱ a kaat mi̱ swáng a̱lyiat di̱n tyan nang a nshya̱ a̱ni, a̱khwo nung wu na choot.

⁸“N dyen a̱nia, mat n shya̱ mbwak tyok a̱cha̱chet a̱yaakwak a̱son á̱niet nzwang ba̱ swak nung a̱ni. A̱wot n si̱ mbyia̱ á̱niet nzwang ba̱ shya̱ mbwak nung a̱ni. Ka̱ n nyia̱ ma̱ng a̱mba, ‘Nat,’ ba̱ na nat. Ki̱ n ma nyia̱, ‘Bai,’ ba̱ na bai. A̱wot ka̱ n nyia̱ ma̱ng á̱khwo nung ba, ‘Nyia̱ si̱ huni,’ ba̱ na nyia̱ hu.”

⁹Nang Yesu nfa̱k a̱lyiat a̱kwak a̱son á̱niet nzwang na a̱ni, a̱ si̱ fa̱k a̱ga̱de! A̱wot a̱ si̱ bwuak, a̱ si̱ nwuan á̱kpa á̱niet ka ba̱ khwi nggu a̱ni, a̱ si̱ nyia̱, “Yok n tak ma̱ng a̱nyin, n ka̱n di tangka̱i nwuak fwuo huni da̱ nung ma̱ a̱mgba̱m a̱byin Isi̱rela ka bah!”

¹⁰A̱wot nang á̱kpa̱ndang a̱kwak a̱son á̱niet nzwang ba mbwuok á̱ bai a̱mali a̱kwak a̱son á̱niet nzwang ka a̱ni; ba̱ si̱si̱ shya̱ nang a̱khwo wu wa ka̱n choot!

¹¹Á̱ si̱ la beang bah, Yesu ma̱ng mman ta̱m nggu na si̱ nat a̱keang a̱ghyang nang á̱ ngyei Na̱yin a̱ni. A̱wot á̱kpa á̱niet ka si̱ khwi ngguu.

¹²Nang gu mbai kpa̱mkpaan ma̱ng a̱na̱nwuai a̱keang ka a̱ni, a̱ si̱ li nang sot á̱niet kyiak kwom nggwon seam ba̱ naat niat. Nggwon seam ka̱ khwu a̱ni, kikya yet nggwon a̱byii̱k nang a̱tyok wu ka̱n khwu a̱ni ma̱nyin ka. A̱wot á̱niet ma̱ a̱di̱di̱t ma̱ a̱keang ka ku shya̱ ndung ma̱ng a̱yang nggwon wu.

¹³Nang A̱tyoli Yesu ndi a̱byii̱k wu a̱ni, a̱ si̱ fa̱k kunak gu ba̱t, a̱ si̱ nyia̱, “Yok twei bah!”

¹⁴A̱wot Yesu si̱ shyei a̱ nat kpa̱mkpaan, a̱ si̱si̱ byiam kikyak ji. A̱wot á̱niet ba̱ kyiak kwom hu a̱ni, si̱ bwuok á̱ yong. Yesu si̱ nyia̱, “Nggwon seam, n nyia̱ ma̱ng a̱nwan, a doot!”

¹⁵A̱jawa nggwon seam ka ka̱ khwu a̱ni, si̱ kin doot a̱ swan! Ka̱ si̱ nwuo lyiat! Yesu si̱ neap a̱yang byin wu nggwon ka.

¹⁶Á̱kpa á̱niet ka si̱ fa̱k a̱wun ba̱t! Ba̱ si̱ dyep A̱gwaza nyia̱, “A̱gba̱ndang a̱ta̱m a̱kwonu A̱gwaza bai da̱ a̱vwuo nzi̱t! A̱wot A̱gwaza bai a̱ san á̱niet nggu ba a̱fwun!”

¹⁷A̱wot nkhang Yesu na si̱ kai fam a̱byin Yahudiya ma̱ng a̱mgba̱m bibyin ku shya̱ kpa̱mkpaan a̱ja a̱ni.

¹⁸Mman ta̱m Yoona a̱tyu nyia̱ ba̱ptisman si̱ bwoi Yoona nkhang tazwa kuzang kyang nang Yesu nyia̱ a̱ni. Mat a̱nia, Yoona si̱ yorong á̱niet a̱feang mi̱ mman ta̱m nggu na.

¹⁹A̱ si̱ ta̱m ba da̱ a̱vwuo A̱tyoli Yesu, ba̱ si̱ lyip gu nyia̱, “Nwan wa yet Kristi[48] wu nang zi̱ swan fwuong chobai nggu hu[49] a̱ni a? Ke zi̱ swan fwuong a̱ghyang a̱niet wa?”

²⁰Jen nang mman ta̱m a̱feang Yoona na nshya̱ Yesu a̱ni, ba̱ si̱ lyip gu nyia̱, “Yoona a̱tyu nyia̱ ba̱ptisman ta̱m nzi̱t zi̱ lyip ang nyia̱, ‘Nwan wa yet Kristi wu a̱ chobai nang zi̱ fwuong a̱ni a? Ke zi̱ swan fwuong a̱ghyang a̱niet wa?’ ”

²¹Da̱ a̱cha̱chaat njen a̱wa, Yesu ku shya̱ di̱ choot á̱niet ma̱ a̱di̱di̱t ba̱ ku nyia̱ ma̱ng kuzang tangka̱i nzwan a̱ni. A̱ si̱ kam á̱ka̱tuk ntswá, ba̱ si̱ ghwut. A̱wot a̱ si̱ teak á̱ghyi á̱niet a̱fi̱fan ma̱ a̱di̱di̱t, ba̱ si̱ shya̱ nwuan á̱vwuo.

²²Yesu si̱ nwuak mman ta̱m Yoona a̱nia shim nyia̱, “Nyi bwuok nat, nyi si̱ tak ma̱ng Yoona nta̱m nung na nang nyi fa̱k nyi si̱ bu li a̱ni: Á̱ teak á̱niet a̱fi̱fan á̱ghyi. Á̱niet nang a̱ti̱tak ba kwi a̱ni, si̱ nwuo a̱chyet. Á̱ si̱ choot á̱niet gbap, ba̱ si̱ tyia̱ za̱za̱rak. A̱yaashi̱lan si̱ nwuo fwuong á̱vwuo. Á̱niet ba̱ ka̱n kwi a̱ni, si̱ doot ma̱ng swuan. A̱wot á̱ si̱ bu shei á̱kunak na A̱sham Nkhang ka.

²³“Nyi bu tak ma̱ng ang gu nyia̱, ‘A̱tyu a̱ nwai but mi̱ fwuo da̱nian nung a̱ni; a̱ yet a̱tyu a̱gwai wa.’ ”

²⁴Jen nang mman ta̱m Yoona na nkat a̱ni, Yesu si̱ ka̱n nwuo lyiat ma̱ng á̱kpa á̱niet ka tazwa Yoona: “Zang tangka̱i a̱yin hwa nang nyi ku nat nwuan hu mi̱ tswa a̱yit ji? A̱ ku li nang a̱ga̱nga̱ng á̱kwop nang wun hyap nang ba̱ ghwap wa a̱ni kee?

²⁵Ka̱ a̱nia wa bah, yihwa nang nyi ku nat nwuan hu? Nyi ku nat nwuan a̱tyu a̱ kup a̱sham a̱yaatoot kya a̱ni kee? Kaai, á̱niet ba̱ ni̱ kup a̱sham a̱yaatoot kurum, a̱wot ba̱ bu fwuong nyinyang a̱ni; bibya shya̱ ma̱ a̱ka̱sa á̱gwam na!

²⁶“Nyi nat nwuan a̱ta̱m a̱kwonu A̱gwaza waa? A̱tsak a̱lyiat, a̱nia wa! A̱wot Yoona swak a̱ta̱m a̱kwonu A̱gwaza ma̱ za̱nzan.

²⁷Yoona wa yet a̱tyu nang á̱ lyuut tazwa nggu ma̱ A̱lyiat A̱gwaza na a̱ni, nyia̱, ‘Di! N na nta̱m a̱ta̱m nung wu, a̱ khwat a̱son ang. A̱wot a̱ na jhyi ang vak hu nang a na mbai a nchong a̱ni.’[50]

²⁸“N tak ma̱ng a̱nyin, ma̱ á̱niet nang á̱nyiuk tyei a̱ni; á̱ mbyia̱ a̱tyu a̱ swak Yoona a̱tyu nyia̱ ba̱ptisman ma̱ng shi a̱ni bah. A̱mgba̱m ma̱ng a̱nia, a̱tyu a̱ yet a̱bada̱dei ka mi̱ Tyok A̱gwaza hu a̱ni; a̱ swak Yoona ma̱ng shi hu!”

²⁹Nang á̱niet ba nfa̱k a̱nia a̱ni, a̱mgba̱m ba, mbeang á̱niet saai kurum ga̱ndu ba, si̱ shim nang vak A̱gwaza hu ngyet a̱chuchuk wa. Mat Yoona wa ka̱n nyia̱ mba ba̱ptisman ji.

³⁰A̱wot A̱fa̱risawa ma̱ng a̱yaagwak lyen doka A̱gwaza ba si̱ lak kyang nang A̱gwaza la̱p a̱ sak a̱ni. Mat ba̱ ku lak san ba̱ptisman Yoona ji.

³¹Yesu si̱ lyip ba nyia̱, “Ma̱ninika, yihwa n na ntyan á̱niet mi̱ che bani? Zang kidee ja n na nwuak da̱ mba?

³²Ba̱ tai mman na̱ vwuo mi̱ tungga a̱ni. Ba̱ kwop a̱dyii̱ng ma̱ng á̱kpa̱ndang mba ba nyia̱, ‘Zi̱ tyiap nyin gugwa nyeang. Da̱ nyin, nyi song bah. Ma a̱nia wa, zi̱ si̱ tyiap nyin gugwa a̱nak. Da̱ nyin, nyi twei bah.’

³³“Mat Yoona a̱tyu nyia̱ ba̱ptisman ku swan di̱ mi̱ ya kyayak, di̱ mi̱n swuo a̱sa̱khwot a̱na̱p. A̱wot nyi si̱ nyia̱, ‘A̱ byia̱ a̱ka̱tuk ntswa!’

³⁴Ma a̱nia wa, Nggwon A̱tyubishyi bai ka̱ ya a̱ tsa nswuo. A̱wot nyi si̱ ta̱bat kwop a̱dyii̱ng nyia̱, ‘A̱ yet a̱tyu a̱fa a̱lyiak, a̱tyu hyeng. A̱ si̱ yet a̱kpa̱ndang á̱niet saai kurum ga̱ndu, ma̱ng á̱niet nyia̱ a̱ka̱tuk nyia̱ á̱ghyang!’

³⁵A̱mgba̱m ma̱ng a̱nia, a̱tan swat á̱niet ba̱ khwi mumwang a̱ni, tak nang mumwang a̱hwa ngyet a̱tsatsak wa.[51]”

³⁶A̱tyu A̱fa̱risawa a̱ghyang si̱ yei Yesu ya kyayak dundung ma̱ng a̱nggu, Yesu si̱ nat a̱gbang gu ka. A̱ si̱si̱ swan a̱ na ya kyayak hu.

³⁷Nang a̱byii̱k nyian a̱ka̱tuk nyia̱ a̱ghyang a̱ shya̱ ma̱ a̱keang a̱kya nfa̱k nang Yesu nshya̱ di̱ ya kyayak a̱mali a̱tyu A̱fa̱risawa ka a̱ni; a̱ si̱ bai ma̱ng a̱sham sha̱p a̱la̱basta, nang ji̱ nhyat ma̱ng a̱myia̱ na̱ byia̱ swam nyinyang, na̱ si̱ yet a̱si̱ kurum ba̱t a̱ni.

³⁸A̱byii̱k wu si̱ kpaat a̱khwukhwut da̱ a̱ma̱nta a̱ti̱tak Yesu ba, a̱ twei a̱nak. Ndang a̱ghyi nggu na si̱ kwa̱i da̱ a̱ti̱tak Yesu ba. A̱wot a̱ si̱ lyang a̱ti̱tak Yesu ba ma̱ng pyia̱ nggu hu. A̱ si̱ ya a̱son ma̱ng vwuk a̱ti̱tak Yesu ba. A̱ si̱ koot a̱myia̱ na̱ byia̱ swam nyinyang hu a̱ni da̱ a̱ti̱tak nggu ba.

³⁹Nang a̱tyu A̱fa̱risawa wu a̱ yei Yesu ya kyayak hu ndi a̱nia a̱ni, a̱ si̱ nwuo a̱di̱dam mi̱ fwuo nggu hu nyia̱, “Kwot! Ka̱ a̱tyu wuni wa yet a̱tsak a̱ta̱m a̱kwonu A̱gwaza wa, si̱ a̱ lyen nang tangka̱i a̱byii̱k ku byiam gu a̱ni; ngyet a̱byii̱k a̱ka̱tuk nyia̱ wa!”

⁴⁰A̱jawa Yesu si̱ nyia̱ ma̱ng a̱tyu A̱fa̱risawa wu a̱ni, “Siman, n byia̱ kyang n na nkaat ma̱ng a̱nwan a̱ni.” Siman si̱ nyia̱, “A̱tyu tyiet, ya a̱son.”

⁴¹A̱wot Yesu si̱ tak ma̱ng a̱nggu kidee jini, nyia̱ “A̱yin wa swan a̱ khwi á̱niet a̱feang ta kurum. A̱tyo nyiung ba̱ng chyikwop tsuon; a̱tyo a̱nyiung si̱ ba̱ng nswak nfwuon.

⁴²A̱mgba̱m ba, kurum hu si̱ kaat ba tan hu. Mat a̱nia, a̱tyu a̱ khwap ba kurum hu a̱ni si̱ fa̱k kunak ba. A̱ si̱ yok mba ndyo. A̱nyan wa mami á̱niet a̱feang bani na chat a̱tyu a̱ khwap ba kurum hu a̱ni a̱ swaak?”

⁴³Huhwa Siman si̱ nwuak shim nyia̱, “Di̱ li nung hu, a̱tyu a̱ ba̱ng a̱gba̱ndang ta wu a̱ni; nggu wa.” Yesu si̱ nyia̱ ma̱ng a̱nggu a̱ni, “A nwuak shim hu cha̱chaat.”

⁴⁴A̱jawa Yesu si̱ bwuak, a̱ si̱ nwuan a̱byii̱k a̱wa, a̱ si̱ nyia̱ ma̱ng Siman, “Di, a̱byii̱k a̱ kpaat a̱khwukhwut bani a̱ni. Di̱n jen nang n nwuo a̱gbang ang ka a̱ni, a si̱ nang nung a̱sa̱khwot kwi a̱ti̱tak bah. A̱wot nggu, a̱ kwi a̱ti̱tak nung ba ma̱ng ndang a̱ghyi nggu na. A̱wot a̱ si̱ lyang ba ma̱ng pyia̱ nggu hu.

⁴⁵Nwan Siman, a tyia̱ nung ma aba̱n, a si̱ vwuk nung bah. A̱wot a̱byii̱k wuni, neet di̱ jen nang n ba̱ nnwuo a̱ji a̱ni, a̱ ka̱n ghwon vwuk a̱ti̱tak nung ba bah.

⁴⁶Nwan, a koot a̱myia̱ na̱ byia̱ swam nyinyang a̱ni a̱pyia̱ nung ka bah. A̱wot a̱byii̱k wuni, koot a̱myia̱ na̱ byia̱ swam nyinyang, na̱ si̱ byia̱ kurum ba̱t a̱ni, ma̱ a̱ti̱tak nung ba.

⁴⁷“N tak ma̱ng a̱nwan, nang a̱ka̱tuk nyia̱ a̱byii̱k wuni nshi á̱kpa a̱ni; á̱ si̱ chi nggu ndyo. Mat a̱nia, a̱ tak nang gu nchat nung wa ba̱t. A̱wot a̱tyu a̱ fa á̱ chi a̱ka̱tuk nyia̱ nggu wu ma̱ a̱da̱dei a̱ni; a̱tyu a̱wa tak nang nggu nchat nung ma̱ a̱da̱dei wa.[52]”

⁴⁸A̱jawa Yesu si̱ nyia̱ ma̱ng a̱byii̱k a̱wa, “Á̱ chi a̱ka̱tuk nyia̱ ang wu.”

⁴⁹Á̱niet ba̱ swan da̱ a̱vwuo ya nkyayak ka ma̱ng Yesu a̱ni, ba̱ si̱ nwuo kwop a̱dyii̱ng ma̱ng á̱ghyang mba nyia̱, “Zang tangka̱i a̱yin hwa nang a̱tyu wuni fa a̱ yet; nang gu nchi a̱ka̱tuk nyia̱ á̱niet wu?”

⁵⁰A̱wot Yesu si̱ nyia̱ ma̱ng a̱byii̱k wu a̱ni, “Nwuak fwuo ang hu san ang. Nat a̱ si̱ swan swat nyinyang.”