Read tyap Luka 9 Bible Online

Luka 9 - tyap bible

Luka 9

¹Á̱ghyang á̱tuk, Yesu si̱ yorong mman ta̱m[60] swak ma̱ a̱feang nggu na ndung. Ba̱ si̱ bai, a̱ si̱ nwuak ba chet ma̱ng tyok ba̱ khai a̱mgba̱m á̱ka̱tuk ntswá ba̱ ghwut ma̱ á̱niet, ba̱ bu choot á̱niet nzwán.

²A̱ si̱ ta̱m ba, ba̱ ka shei ma̱ng kuzang a̱yin A̱sham Nkhang Tyok A̱gwaza ka. Ba̱ bu choot á̱niet nzwán ba.

³Yesu si̱ bu hyia̱ ma̱ng a̱mba nyia̱, “Ma̱ a̱chyet nyin ka, nyi yok kyiak kyang bah; ku shan a̱chyet, gumaat, kyayak, ku kurum, mbeang a̱ta̱swak che sweang bah.

⁴A̱li ka nang nyi nnwuo, á̱niet mali ba si̱ san nyin mbwak feang a̱ni; nyi swan a̱mali a̱kya. Nyi labeang si̱ nat jen nyi si̱ ba̱ ndoot ma̱ a̱keang ka a̱ni.

⁵A̱keang ka nang á̱niet ba ndak san nyin mbwak feang a̱ni; nyi gbaat mbwuk a̱keang na da̱ a̱ti̱tak nyin ba. Nyi ghwon a̱keang ka. Ku na yet a̱lama ku tak nang A̱gwaza na nnyia̱ mba shi̱ri̱ya a̱ni mut!”

⁶Mat a̱nia, mman ta̱m na si̱ nwuo nwuai a̱ka̱keang á̱ shei A̱sham Nkhang ka, á̱ tsa á̱ bu nchoot á̱niet nzwán ba.

⁷Jen nang Hiridut Antibat, a̱ ku yet a̱gwam fam a̱byin Ga̱lili wu nfa̱k nkhang tazwa kuzang kyang nang Yesu nyia̱ a̱ni; a̱ si̱ tyia̱ ma̱ a̱tai. Mat á̱ghyang á̱niet ku nyia̱ Yoona a̱tyu nyia̱ ba̱ptisman wa doot ma̱ng swuan ma̱ á̱niet ba̱ ka̱n kwi a̱ni.

⁸Á̱ghyang á̱niet si̱ dam á̱ ngyei Yesu yet Iliya wa; ku a̱ta̱m a̱kwonu A̱gwaza a̱ghyang a̱ ka̱n khwu a̱ si̱ doot ma̱ng swuan ma̱ á̱niet ba̱ ka̱n kwi a̱ni.

⁹A̱gwam Hiridut si̱ nyia̱, “N wa ka̱n tyap a̱pyia̱ Yoona ka n ti̱n, a̱ si̱ khwu. Mat a̱nia, a̱nyan wa wu nang n fwuong tangka̱i nkhang huni tazwa nggu?” A̱wot a̱gwam Hiridut si̱ ya a̱son di̱ kwan a̱ shya̱ Yesu, a̱ li nggu ma̱ng a̱ghyi.

¹⁰Jen nang a̱yaata̱m Yesu ba mbwuok á̱ bai a̱ni, ba̱ si̱ bwoi Yesu nkhang kuzang kyang nang ba̱ nyia̱ a̱ni. Yesu si̱ yorong mba da̱ a̱gbang a̱nyiung. Ba̱ si̱ nat ndung ma̱ a̱keang nang á̱ ngyei Ba̱tsaida a̱ni.

¹¹A̱mgba̱m ma̱ng a̱nia, á̱kpa á̱niet ka si̱ fa̱k nkhang a̱vwuo nang Yesu naat a̱ni, a̱wot ba̱ si̱ khwi ngguu. Yesu si̱ san mba mbwak feang. A̱ si̱ tyiet ba tazwa Tyok A̱gwaza hu. A̱wot a̱ si̱ choot á̱niet nzwán ba.

¹²Nang mam hu nhyian a̱ naat kwa a̱ni, mman ta̱m swak ma̱ feang na si̱ bai da̱ a̱vwuo Yesu, ba̱ si̱ nyia̱, “A̱tyoli, ma̱sa̱kut, tyia̱ á̱kpa á̱niet ka ba̱ nat ma̱ a̱ka̱keang ma̱ng bibyin ku shya̱ kpa̱mkpaan a̱ni. Da̱nian ba̱ ka shya̱ kyayak ma̱ng a̱vwuo kwai a̱tyetuk ka. Mat, á̱ mbyia̱ kyayak nang ba̱ na ya mi̱ tswa a̱yit jini a̱ni bah!”

¹³A̱wot Yesu si̱ nyia̱ ma̱ng a̱mba, “Nyin ma̱ á̱pyia̱ nyin, nyi nang mba kyayak ba̱ ya la!” Mman ta̱m na si̱ nwuak Yesu shim nyia̱, “Zi̱ byia̱ burodi a̱fwuon wa ma̱ng fa̱n feang. Ke a fa zi̱ nat zi̱ san kyayak ku na maai a̱mgba̱m á̱kpa á̱niet kani a̱ni a?”

¹⁴Mat á̱tyok ba̱ ku shya̱ a̱ja a̱ni, ba̱ ku tat chyikwop tsuon! Yesu si̱ nyia̱ ma̱ng mman ta̱m nggu na, “Nyi tyia̱ á̱niet ba ba̱ swuat a̱byin di̱ susot nswak fwufwuon kuzang sot.”

¹⁵A̱mgba̱m á̱niet ba si̱ swan a̱byin.

¹⁶Yesu si̱ kyiak burodi a̱fwuon wu mbeang fa̱n feang hu. A̱ si̱ gba̱t á̱ghyi tswazwa, a̱ si̱ gwai A̱gwaza. A̱ si̱ kpa̱ra̱m burodi wu ma̱ng fa̱n hu, a̱ si̱ nwuat mman ta̱m nggu na. Mba meang, ba̱ si̱ ka̱u á̱kpa á̱niet ka.

¹⁷A̱mgba̱m á̱niet ba, ba̱ si̱ ya ba̱ si̱ swa̱i nang ba̱ nchat a̱ni. Mman ta̱m na si̱ kwok á̱kukum nkyayak na̱ bwat a̱ni. Ba̱ si̱ tyia̱ ma̱ a̱ka̱cheang na̱ tat swak ma̱ a̱feang a̱ni.

¹⁸Á̱ghyang á̱tuk, Yesu si̱ ghwon á̱kpa á̱niet ka. A̱ si̱ nat a̱ naai A̱gwaza ma̱nyin nggu. Mi̱ mman ta̱m ni̱nia ma̱nyin na ku shya̱ ndung ma̱ng a̱nggu. A̱wot Yesu si̱ lyip ba nyia̱, “Zang tangka̱i a̱yin hwa nang á̱niet ba nyia̱ n gyet?”

¹⁹Mman ta̱m na si̱ nwuak gu shim nyia̱, “Á̱ghyang á̱niet nyia̱, a yet Yoona a̱tyu nyia̱ ba̱ptisman wa. Á̱ghyang á̱niet si̱ nyia̱, a yet Iliya, a̱ta̱m a̱kwonu A̱gwaza wa. A̱wot á̱ghyang si̱ nyia̱, a yet a̱tyo nyiung wa ma̱ a̱yaata̱m a̱kwonu A̱gwaza gbangbang ba̱ ka̱n kwi a̱ni; nggu wa bu doot ma̱ng swuan.”

²⁰Yesu si̱ bu lyip ba nyia̱, “A̱wot nyin, zang tangka̱i a̱yin hwa nang nyi nyia̱ n gyet?” Bitut si̱ nyia̱, “Nwan wa yet Kristi wu, a̱tyu nang A̱gwaza kup gu tyok, a̱ si̱ ta̱m ma̱ng a̱nggu mi̱ swanta hu a̱ni!”

²¹A̱jawa Yesu si̱ gba mman ta̱m na nyia̱, da̱ ba̱ yok hyia̱ ma̱ng a̱yin tangka̱i a̱yin nang gu yet a̱ni bah.

²²A̱ si̱ bu hyia̱ ma̱ng a̱mba, nyia̱, “Nung, Nggwon A̱tyubishyi, ku yet ta hwa n swuo a̱bung da̱ á̱ka̱tuk nkyang ma̱ a̱di̱di̱t. Á̱niet khwop á̱niet, a̱cha̱chet a̱yaapris, ma̱ng a̱yaagwak tyiet doka A̱gwaza na lak li nung. Á̱ na hyat nung. A̱wot a̱tuk mam tat ka, á̱ na ta̱ngam nung ma̱ng swuan ma̱ á̱niet ba̱ ka̱n kwi a̱ni.”

²³A̱wot Yesu si̱ bu nyia̱ ma̱ng á̱kpa á̱niet ka, “Ka̱ a̱yin ma̱nyin chat khwi nung, ku yet gu ta hwa, gu yok chat a̱pyia̱ nggu bah; gu kyiak a̱team a̱khwu nggu wu a̱ faat kuzang a̱tuk, a̱ khwi nung.

²⁴Mat a̱tyu a̱ chat san swuan nggu ji a̱ni, a̱ na nwai nji. A̱wot a̱tyu a̱ nwai swuan nggu ji da̱nian nung mi̱ swanta hu a̱ni; nggu wa na shya̱ swuan sang sangba̱p ji.

²⁵“A̱wot yihwa na yet kpangti̱n ang ji, ka̱nang a shya̱ a̱mgba̱m zwá swanta ji, a̱wot nwan ma̱ a̱pyia̱ ang a si̱ nwai swuan ang ji?

²⁶Ka̱ a̱yin fa̱k nsum nung ma̱ng tyiet nung hu; ma a̱nia wa nung Nggwon A̱tyubishyi, n bye fa̱k nsum guu di̱n jen nang n na mbwuok mbai mi̱ a̱kyenkyai shi nung wu, ma̱ng a̱si̱ A̱tyia̱ nung wu, mbeang á̱za̱za̱rak a̱yaata̱m tswá A̱gwaza ba a̱ni.

²⁷Yok ntak nyin a̱tsak a̱lyiat; á̱ghyang á̱niet ba̱ yong a̱ji ma̱nini a̱ni, ba̱ na kwi bah; si̱ nang ba̱ li Tyok A̱gwaza hu bai!”

²⁸Nang mam a̱ni̱nai nswak a̱ni, Yesu si̱ yorong Bitut, Yoona, ma̱ng Yakubu, ba̱ si̱ nat ba̱ si̱si̱ nyeak á̱ nat tazwa a̱fan, ba̱ ka naai A̱gwaza a̱ja.

²⁹A̱wot nang Yesu nshya̱ di̱ naai A̱gwaza wu a̱ni, a̱ghyi nggu ba si̱ shyak. A̱wot a̱yaatoot nggu ba si̱ mun á̱ shyak li hu, ba̱ si̱ sai ma̱ kyenkyai a̱nkyai!

³⁰Mi̱ di̱ yong a̱hwa, á̱niet a̱feang si̱ kin ntat á̱ ghwut a̱ja á̱ lyiat ma̱ng Yesu! Bibya yet Musa ma̱ng Iliya.

³¹Ba̱ si̱ byia̱ a̱kyenkyai shi A̱gwaza wu. A̱wot ba̱ si̱ lyiat ma̱ng Yesu tazwa si̱sak nang gu na nkhwu a̱ ghwut mi̱ swanta hu a̱ni; ma̱ng si̱sak ji nggu wa na ntyia̱ si̱ a̱hwa ku mbai da̱ a̱nu ka mi̱ Urusha̱lima a̱ni.

³²Di̱n jen a̱ja, nang nda ka̱n ta̱bat Bitut ba̱t ma̱ng á̱niet a̱chyet nggu ba, nang ba̱ nshyip a̱ni; ba̱ si̱ li a̱kyenkyai shi Yesu wu ma̱ng a̱yaata̱m a̱kwonu A̱gwaza a̱feang ba̱ yong ma̱ng a̱nggu a̱ni.

³³Nang Musa ma̱ng Iliya nshim doot ba̱ nkat a̱ni, Bitut si̱ nyia̱ ma̱ng Yesu, “A̱tyoli, ku yet a̱sham nang zi̱ nshya̱ a̱ji a̱ni! Yok zi̱ tat á̱suswak a̱tat di̱ lyulyoot nyin; suswak nyiung da̱nian ang, nyiung da̱nian Musa, a̱wot nyiung ku yet si̱ Iliya!” Bitut ku lyiat a̱nia, mat a̱ ku lyen kyang nang gu lyiat a̱ni bah

³⁴Jen nang Bitut ndyiat a̱ni, á̱ni̱nian si̱ kin neet ma̱ vwuu a̱ ba̱ kup mbaa! Mman ta̱m na si̱ fa̱k a̱wun ba̱t.

³⁵A̱jawa ba̱ si̱ kin fa̱k a̱nwuat a̱yin ka̱ ghwut ma̱ á̱ni̱nian ba nyia̱, “Nggwon nung kya lili huni nang n khai a̱ni! Kikya nang nyi na myiai a̱fufwuo, nyi fa̱k ka shansham!”

³⁶Jen nang a̱nwuat ka ntyia̱ nywang a̱ni, nang Yesu wa yong a̱ja ma̱nyin nggu; di̱n jen a̱ja, mman nta̱m nggu na, Bitut, Yoona, ma̱ng Yakubu, si̱ tak ma̱ng a̱yin kyang nang ba̱ li a̱ni bah.

³⁷Da̱ a̱tsotson ntat ka, nang Yesu ma̱ng mman ta̱m nggu na nchyok á̱ neet tazwa a̱fan ka á̱ bai a̱byin a̱ni; a̱gba̱ndang á̱kpa á̱niet si̱ bai á̱ ba̱ shya̱ nggu.

³⁸A̱jawa a̱tyok a̱ghyang mami á̱kpa á̱niet ka si̱ yorong mi̱ chet nyia̱, “A̱tyu tyiet! Ma̱sa̱kut, n naai ang, di nggwon seam nung ka, kikya yet nggwon nung ka ma̱nyin ka!

³⁹A̱ka̱tuk ntswa wu a̱ ni̱ ta̱bat kaa. Ka̱ tyia̱ kun, a̱ kyiak ka a̱ lwi a̱byin. Ka̱ nwuo tyi̱ri̱m vam nang ja̱fi̱k a̱ta̱mpyia̱ vak a̱ ghwut a̱bwonu nggu ka. A̱ka̱tuk ntswa wu ni̱ bwoi nka a̱fi̱fa̱t. Da̱ nggu a̱ si̱ mi̱n kai nka a̱ ghwon bah.

⁴⁰N wa ka̱n naai mman ta̱m ang na ba̱ kam a̱ka̱tuk ntswa wu a̱ ghwut ma̱ a̱nggu. A̱wot ku si̱ khat mbaa.”

⁴¹Huhwa Yesu si̱ nyia̱ ma̱ng á̱niet ba, “Kwot! Nyin á̱niet nwai nwuak a̱chuchuk mi̱ che huni, n na nswan ma̱ng a̱nyin si̱ nat zang jen ja? Zang jen ja n na ngya a̱son ma̱ng nyap fwuo ma̱ng a̱nyin?” A̱jawa gu si̱ nyia̱ ma̱ng a̱tyia̱ nggwon wu a̱ni, “Da̱ bai ma̱ng nggwon seam ang ka a̱ji!”

⁴²Nang nggwon seam ka nnwuo chobai da̱ a̱vwuo Yesu a̱ni, a̱ka̱tuk ntswa wu si̱ bu kyiak ka a̱ lwi a̱byin! Ka̱ si̱ nwuo tyi̱ri̱m vam, a̱ vak ja̱fi̱k a̱ta̱mpyia̱. A̱wot Yesu si̱ kam a̱ka̱tuk ntswa wu a̱ si̱ ghwut. A̱ si̱ choot nggwon seam ka, a̱ si̱ neap a̱tyia̱ wu.

⁴³A̱mgba̱m á̱kpa á̱niet ka si̱ fa̱k a̱ga̱de nang ba̱ ndi A̱gwaza ntak a̱gba̱ndang chet nggu wu a̱ni! Nang konyan nfa̱k a̱ga̱de di̱ kyang nang Yesu nyia̱ a̱ni, Yesu si̱ tak ma̱ng mman ta̱m nggu na, nyia̱,

⁴⁴“Nyi myiai a̱fufwuo nyi fa̱a̱k! A̱wot nyi jhyung kyang hu n dyiat a̱ni. Á̱ na kyiak Nggwon A̱tyubishyi, á̱ tyia̱ nka mbwak á̱niet ba̱ lak li nka a̱ni!”

⁴⁵A̱wot ba̱ si̱ lyen kyang nang gu fa a̱ni bah. Á̱ si̱ niat ma̱ng a̱mba ndyo, kalak ba̱ du fi̱k. Mba mameang, ba̱ si̱ fa̱k a̱wun ba̱ lyip gu a̱tsak kyang nang gu fa a̱ni.

⁴⁶Huhwa mman ta̱m Yesu na si̱ nwuo ya fwuang tsi̱tsak mba, tazwa a̱nyan wa swak ma̱ng shi hu ma̱ mba.

⁴⁷A̱wot nang Yesu ndyen kyang nang ba̱ nyia̱ a̱di̱dam mi̱ nfwuo mba na a̱ni; huhwa gu si̱ kyiak a̱bada̱dei nggwon a̱ yong ndyo da̱ a̱beam guu.

⁴⁸A̱jawa gu nyia̱ ma̱ng a̱mba, “A̱tyu a̱ san a̱da̱dei nggwon nang a̱si̱ kani a̱ni da̱nian nung, ku li á ngyei nung gwa gu san. A̱wot konyan wa san nung a̱ni, nung gwa gu san ma̱nyin nung bah; a̱ mun a̱ san A̱tyia̱ nung wu a̱ ta̱m nung a̱ni. Mat a̱nia, konyan wa swak ma̱ng yet a̱da̱dei wu mami nyin, nggu wa swak ma̱ng shi hu.”

⁴⁹Yoona a̱fai Za̱ba̱di, si̱ nyia̱ ma̱ng Yesu, “A̱tyoli, zi̱ li a̱yin gu khai á̱ka̱tuk ntswá ba̱ ghwut ma̱ á̱niet da̱ a̱lyoot ang. Huhwa zi̱ si̱ hyia̱ ma̱ng a̱nggu, gu yok. Mat a̱ shya̱ ndung mi̱ sot nzi̱t ji bah.”

⁵⁰A̱wot Yesu si̱ nyia̱ ma̱ng a̱mba, “Kaai! Nyi yok vwuong nggu khai á̱ka̱tuk ntswá ba̱ ghwut ma̱ á̱niet bah. Konyan wa da̱ a̱ nyia̱ na̱nvan ma̱ng a̱nyin bah, a̱ shya̱ dundung ma̱ng a̱nyin wa.”

⁵¹Nang jen nshya̱i a̱ bai kpa̱mkpaan á̱ kyiak Yesu á̱ nat ndyo Ma A̱gwaza tswazwa a̱ni; huhwa Yesu si̱ la̱p mi̱ fwuo a̱ nat Urusha̱lima.

⁵²A̱ si̱ ta̱m a̱yaata̱m ba̱ khwat a̱son nggu, ba̱ nat a̱bakeang á̱ghyang mi̱ Sa̱mariya; ba̱ ka jhya̱ nggu kuzang kyang nang gu chobai.

⁵³A̱wot A̱sa̱mariyawa ba si̱ lak san gu hu, mat nang gu nshya̱ di̱n vak naat dyep A̱gwaza mi̱ Urusha̱lima a̱ni.

⁵⁴Nang Yakubu ma̱ng Yoona ndi a̱nia a̱ni, ba̱ si̱ nyia̱ ma̱ng Yesu, “A̱tyoli, ku myim zi̱ naai A̱gwaza gu tyia̱ long neet tswazwa, ku wum á̱niet a̱keang bani a̱mgba̱m a?”

⁵⁵A̱wot Yesu si̱ bwuak, a̱ si̱ kam mbaa, ba̱ yok nyia̱ a̱nia bah.

⁵⁶Mat a̱nia, ba̱ si̱ swak á̱ nat ma̱ a̱bakeang a̱ghyang.

⁵⁷Nang Yesu ma̱ng mman ta̱m nggu na nshya̱ di̱ chyet hu a̱ni, a̱ghyang a̱niet si̱ nyia̱ ma̱ng Yesu, “N na nkhwi ang nat kuzang a̱vwuo nang a naat a̱ni.”

⁵⁸Yesu si̱ nyia̱ ma̱ng a̱nggu, “A̱ka̱kyong swuat ma̱ a̱bubwong, a̱ka̱man mamang si̱ byia̱ a̱ka̱le. A̱wot nung, Nggwon A̱tyubishyi, n byia̱ a̱vwuo kwai bah.”

⁵⁹Yesu si̱ nyia̱ ma̱ng a̱ghyang a̱niet a̱ni, “Nwan, bai a khwi nung!” A̱tyu a̱wa si̱ naai Yesu nyia̱, “A̱tyoli, yok n ya nat n fwuong, n ba̱ niat a̱tyia̱ nung wu.”

⁶⁰Yesu si̱ nyia̱ ma̱ng a̱nggu, “Yok á̱niet ba̱ nwai khwi A̱gwaza a̱ni, ba̱ niat nkwom mba na! Nwan, ta̱m ang huhwa yet; a naat a shei A̱sham Nkhang tazwa Tyok A̱gwaza hu.”

⁶¹A̱ghyang a̱niet si̱ nyia̱, “A̱tyoli, a̱tsak a̱lyiat, n na nkhwi ang. A̱wot ya ngyok, n nat n byiat kyang bwak nung hu saak.”

⁶²A̱wot Yesu si̱ nwuak gu shim nyia̱, “A̱tyu a̱ tsa khap ma̱ng nyak khap, a̱ si̱ tsa a̱ bwan a̱ nwuan lilyim a̱ni; a̱ maai a̱ nwuo mi̱ Tyok A̱gwaza hu bah.”