Read tyap Yoona 10 Bible Online

Yoona 10 - tyap bible

Yoona 10

¹“Yok n hyia̱ ma̱ng a̱nyin a̱chuchuk; a̱tyu da̱ a̱ nwuo a̱na̱nyuo a̱ta̱mpwom zón seap ka a̱ni bah, a̱wot a̱ si̱ nwuo di̱n vak ghyang hwa ma̱ zan; a̱tyu a̱wa yet a̱tang, a̱ si̱ bu yet a̱tyu a̱tsaai wa!

²A̱tyu a̱ nwuo a̱na̱nyuo a̱ta̱mpwom ka nang á̱ ntyia̱ nyinyiit hu a̱ni; a̱ yet a̱tyu chok zón seap wa.

³A̱tyu a̱ chok a̱na̱nyuo a̱ta̱mpwom ka a̱ni, ni̱ khwuk gu ndyo. A̱wot zón seap ji ni̱ fa̱k a̱nwuat nggu ka a̱ lyen. A̱wot nggu mameang, a̱ ni̱ yei kuzang zon seap da̱ a̱lyoot ji. A̱ kwak ji a̱son a̱ ghwut ma̱ng a̱nji ta̱usa.

⁴“Ka̱ a̱ ghwut ma̱ng zón seap gu ji ta̱usa, gu khwat a̱son, ji̱ khwi ngguu, mat ji̱ fi̱k a̱nwuat nggu ka.

⁵Zón seap ji si̱ mi̱n khwi á̱nietchen bah. Ka̱ ji̱ li ngguu ji̱ ni̱ tyong gu, mat ji̱ lyen a̱nwuat á̱nietchen bah.”

⁶Yesu ku tak ma̱ng a̱mba kidee jini. Da̱ mba, ba̱ fi̱k kyang hu nang gu lyiat a̱ni bah.

⁷Yesu si̱ bu nyia̱, “Yok, n tak nyin a̱chuchuk; nung gwa ngyet a̱na̱nyuo zón seap ka.

⁸A̱mgba̱m á̱niet ba̱ yet a̱son ka á̱ bai á̱ ghwon nung a̱ni;[55] ba̱ yet á̱tang bya, ma̱ng á̱niet á̱tsaai, mat zón seap ji ku lak fa̱k mba hu.

⁹Nung gwa ngyet a̱na̱nyuo ka. Konyan wa nwuo da̱ a̱na̱nyuo ka, a̱ na shya̱ san. A̱ na nwuai a̱ ghwut, a̱ shyat nkyang nang gu chat a̱ni.

¹⁰A̱tang wu ni̱ bai da̱nian gu ka nyiin, gu hyaat. Nung, n bai n nwuak á̱niet ba a̱jhyem swuan, ba̱ shya̱ nji gba̱mgbam!

¹¹“Nung gwa ngyet a̱tan a̱tyu chok wu. A̱tan a̱tyu chok wu ni̱ nwuak swuan nggu ji da̱nian zón seap ji.

¹²A̱tyu a̱ chok da̱nian á̱ ka tan gu zang a̱ni, a̱ yet a̱tsatsak a̱tyu chok wa bah. A̱wot di̱ zón seap ji, ji̱ yet si̱ nggu bah. Ka̱ a̱ li a̱bwu a̱yit ka chobai, a̱ ni̱ tyong a̱ kai zón seap ji a̱ ghwon, a̱bwu a̱yit ka ka̱ ya̱baat, a̱wot ka̱ seang á̱kum ka ka̱ mat a̱ fwuoi.

¹³Mat, a̱ nyia̱ ta̱m a̱tan gu zang ja. Zón seap ji yet si̱ nggu ja bah. A̱wot a̱ chok ji shansham bah.

¹⁴“Nung gwa ngyet a̱tan a̱tyu chok wu. N dyen zón seap nung ji, a̱wot ji̱ si̱ lyen nung.

¹⁵Ma̱nang A̱tyia̱ nung wu ndyen nung a̱ni; nung mameang, n si̱ ndyen A̱tyia̱ nung wu. N shya̱ mi̱ fwuo n khwu da̱nian zón seap nung ji.

¹⁶N byia̱ zón seap jhyáng di̱ ji̱ shya̱ ma̱ a̱sorong kani a̱ni bah. Zón seap a̱ja, ku yet ta hwa mbai ma̱ng a̱nji ma̱ a̱sorong kani. Ba̱ na fa̱k a̱nwuat nung ka, ba̱ yet a̱sorong a̱nyiung, a̱tyu chok a̱nyiung.

¹⁷“Huhwa mbyia̱, A̱tyia̱ nung wu fa̱k da̱ nung. Mat, n shim n neap swuan nung ji, a̱wot n bu byia̱ chet mbwuok ma̱ng a̱nji.

¹⁸Á̱ mbyia̱ a̱tyu a̱ na san swuan nung ji a̱ ghwon nung a̱ni bah. Nung gwa shim, n na neap swuan nung ji, a̱wot n doot n bu mbwuok ma̱ng a̱nji. Si̱ huni hwa yet kyang hu nang A̱tyia̱ nung wu ta̱m nung n nyia̱ a̱ni.”

¹⁹A̱wot a̱lyiat nani si̱ tyia̱ a̱cha̱chet A̱yahudawa ba[56] si̱ ta̱bat ya fwuang tsi̱tsak mba.

²⁰Á̱ghyang mba si̱ nyia̱, “A̱tyu a̱wa byia̱ a̱ka̱tuk ntswa! A̱ tyong jhyiip wa! Yihwa mbyia̱ nang nyi myiai a̱fufwuo fwuong kyang hu gu lyiat a̱ni?”

²¹Á̱ghyang á̱niet mameang si̱ nyia̱, “Kaai, a̱tyu byia̱ a̱ka̱tuk ntswa si̱ mi̱n dyiat a̱ni bah! Á̱ na nyia̱ ni wa, a̱ka̱tuk ntswa a̱ nkhwuk á̱ghyi a̱tyu a̱fi̱fan?”

²²Jen A̱yet Khwuk A̱li Nwuat Za̱nang A̱gwaza mi̱ Urusha̱lima, si̱ kaat a̱ bai.

²³Jen a̱ja ku yet seam hwa. Yesu si̱ chong a̱ bwan mi̱ a̱junjung didyaat a̱ byia̱ a̱kup a̱ni, nang á̱ ngyei “Didyaat Solomon hu[57]” a̱ni.

²⁴Huhwa a̱cha̱chet A̱yahudawa ba[58] si̱ tyong nggu á̱ keang, ba̱ si̱ nyia̱ ma̱ng a̱nggu, “A̱zatuk kya a na ghwon zi̱t ma̱ a̱di̱dam? Tak ma̱ng a̱nzi̱t kpa̱sai a̱tsak a̱lyiat; nwan wa yet a̱tyu A̱gwaza kup gu tyok hu nang zi̱ fwuong a̱ni a?”

²⁵Yesu si̱ nwuak ba shim nyia̱, “N wa ka̱n tak ma̱ng a̱nyin. A̱mgba̱m ma̱ng a̱nia, nyi si̱ lak nwuak fwuo hu da̱ nung. Nkyang a̱ga̱de na nang n nyia̱ da̱ a̱lyoot A̱tyia̱ nung ka a̱ni, ni̱nia lyiat a̱kwonu nung ka, na̱ si̱ bu shei kyang hu nang n gyet a̱ni.

²⁶“A̱wot, nyi nwuak fwuo da̱ nung bah, mat nyi yet zón seap nung ja bah.

²⁷Zón seap nung ji ni̱ myiai a̱fufwuo ji̱ fa̱k a̱nwuat nung ka. N dyen mba. A̱wot ba̱ si̱ khwi nung.

²⁸N na nwuak mba swuan sang sangba̱p, a̱wot ba̱ na kwi bah. A̱yin si̱ mi̱n ta̱wap mba bwak nung bah.

²⁹A̱tyia̱ nung wu a̱ nwuak nung mba a̱ni, a̱ swak ma̱ng shi hu. A̱wot á̱ byia̱ a̱tyu á̱ na ta̱wap mba bwak A̱tyia̱ nung ka a̱ni bah.

³⁰Nung ma̱ng A̱tyia̱ nung wu, zi̱ yet kyang nyiung hwa[59].”

³¹Huhwa A̱yahudawa ba si̱ bu kyiak nfang nang ba̱ na mmang nggu a̱ni.

³²A̱jawa, Yesu si̱ nyia̱ ma̱ng a̱mba, “N ka̱n nyia̱ a̱tan nta̱m ma̱ a̱di̱di̱t nang A̱tyia̱ nung wu nwuak nung n nyia̱ a̱ni a̱zaghyi nyin. Zang huhwa nang n nyia̱, nang nyi nchat mang nung ma̱ng nfang na?”

³³A̱yahudawa ba si̱ nwuak Yesu shim nyia̱, “Zi̱ na mang ang mat a̱tan nta̱m nang a nyia̱ a̱ni bah. A̱wot mat lihyat nang a nyia̱ A̱gwaza ndyo wa a̱ni! Nwan a yet a̱tyubishyi a̱ni, a kyiak a̱pyia̱ ang cha̱chaat ma̱ng A̱gwaza!”

³⁴Yesu si̱ nyia̱ ma̱ng a̱mba a̱ni, “Á̱ ku lyuut mi̱ doka nyin ji nyia̱, A̱gwaza nyia̱ ma̱ng a̱yaakwak a̱son á̱niet Isi̱rela á̱ghyang; ‘Nyi yet a̱yaagwaza bya.’[60]

³⁵A̱wot nyi lyen nang A̱lyiat A̱gwaza na nang á̱ lyuut a̱ni, ngyet a̱ka̱laa nia bah. Ka̱ A̱gwaza ngyei á̱niet ba ba̱ fa̱k a̱lyiat nggu na a̱ni, nyia̱ ba̱ yet ‘a̱yaagwaza’;

³⁶to, ka̱ nung nang A̱tyia̱ wu ja̱u, a̱wot a̱ si̱ bu ta̱m ndyo mi̱ swanta hu a̱ni, lihyat hwa nang n dyiat A̱gwaza wu ndyo nang n nyia̱, ‘N gyet Nggwon A̱gwaza kya’ a̱ni a?

³⁷“Ki̱ nta̱m A̱tyia̱ nung nia nang n nyia̱ bah, nyi yok nwuak fwuo da̱ nung bah.

³⁸A̱wot ki̱ nta̱m A̱tyia̱ nung nia nang n nyia̱, ku da̱ nyi nwuak fwuo da̱ nung bah; ku myim nyi nwuak a̱chuchuk di̱ nta̱m a̱ga̱de na; nyi ka lyen, nyi bu fi̱k nang A̱tyia̱ wu nshya̱ dundung ma̱ng a̱nung; nung mameang n si̱ shya̱ dundung ma̱ng a̱nggu.”

³⁹A̱wot ba̱ si̱ bu chat ta̱bat Yesu, a̱ si̱ bu ghyuai a̱ ghwut.

⁴⁰A̱wot Yesu si̱ bu bwuok lilyim, a̱ nat ma̱ a̱ma̱nyi fam a̱tak a̱ghyui Urdun, da̱ a̱vwuo nang Yoona ku nnyia̱ á̱niet ba ba̱ptisman ji a̱ni. A̱ si̱si̱ ya nswan a̱ja.

⁴¹A̱wot á̱niet ma̱ a̱di̱di̱t si̱ bu bai da̱ a̱vwuo nggu. Ba̱ si̱ shei á̱ nchi̱ri̱ng nyia̱, “Yoona ku nyia̱ nkyang a̱ga̱de bah. Ma̱ng a̱nia, a̱mgba̱m nkyang nang gu ku lyiat tazwa a̱tyu kani a̱ni, na̱ yet a̱chuchuk wa!”

⁴²Da̱ a̱vwuo a̱kya, á̱niet ma̱ a̱di̱di̱t si̱ nwuak fwuo di̱ Yesu.