Read tyap Yoona 11 Bible Online

Yoona 11 - tyap bible

Yoona 11

¹A̱tyok a̱ghyang ku nshya̱, á̱ si̱ ngyei nggu Laaza̱rut. A̱ ku swan ma̱ a̱bada̱dei a̱keang nang á̱ ngyei Ba̱ta̱ni a̱ni. A̱ si̱ nyia̱ ma̱ng zwan. Ba̱ta̱ni ku yet a̱keang á̱niet Ma̱ryamu ma̱ng a̱na̱nyiuk nggu wu Ma̱rta.

²Laaza̱rut, a̱ ku nyia̱ ma̱ng zwan ji a̱ni, a̱ ku yet a̱na̱nyiuk Ma̱ryamu wa. (Ma̱ryamu wuni wa, na kwon Yesu a̱sham a̱myia̱ ka, ka̱ nyui turare a̱ni; a̱wot a̱ lyang a̱ti̱tak Yesu ba ma̱ng pyia̱ nggu hu.)

³Á̱na̱nyiuk a̱nap Laaza̱rut ba si̱ ta̱m da̱ a̱vwuo Yesu nyia̱, “A̱tyoli, a̱kpa̱ndang nang a fa̱k da̱ nggu a̱ni, a̱ fa̱k nyinyang bah.”

⁴Nang Yesu nfa̱k a̱nia a̱ni, huhwa gu nyia̱, “Zwan ji nyia̱ Laaza̱rut a̱ni, zwan a̱khwu ja bah. Ji̱ na bai ma̱ng A̱gwaza wa shi ma̱ng Nggwon ka.”

⁵Yesu ku fa̱k da̱ Ma̱rta ba̱t mbeang a̱na̱nyiuk nggu wu Ma̱ryamu ma̱ng Laaza̱rut.

⁶A̱mgba̱m ma̱ng a̱nia, nang Yesu nfa̱k nkhang zwan Laaza̱rut na a̱ni, a̱ si̱ mbeang mam feang di̱ tyan nang nggu nshya̱ a̱ni.

⁷Gu si̱ nyia̱ ma̱ng mman ta̱m nggu na a̱ni, “Nyi bai, zi̱ bwuok nat fam a̱byin Yahudiya!”

⁸Mman ta̱m nggu na si̱ nyia̱, “A̱tyu tyiet, á̱ ka̱n dabeang bah, mi̱ mam nani nia nang a̱cha̱chet A̱yahudawa ba[61] nchat ba̱ mang ang ma̱ng nfang. Huhwa a bu chat zi̱ bwuok nat a̱ja a?”

⁹Yesu si̱ nwuak ba shim nyia̱, “Awa swak ma̱ a̱feang wa nang mam nyiung byia̱ baa? To, konyan wa chong a̱ta̱mam a̱ni, a̱ si̱ mi̱n tuk tak bah. Mat a̱ nwuan shansham mat sai swanta hu.

¹⁰A̱wot a̱tyu a̱ chong a̱tyetuk a̱ni, a̱ na tuk tak, mat a̱vwuo ka byia̱ lyin.”

¹¹Nang Yesu ntyak a̱lyiat nani a̱ni, a̱jawa gu nyia̱ ma̱ng a̱mba, “Laaza̱rut, a̱kpa̱ndang nzi̱t wu kai nda. Mat a̱nia, n naat n shyip gu mi̱ nda na.”

¹²Huhwa mman ta̱m na si̱ nyia̱, “Ki̱ nda nia nang gu kai, a̱ na shyip!”

¹³Yesu ku fa Laaza̱rut khwu wa. A̱wot mba mman ta̱m nggu na, ba̱ ku fi̱k kyang hu gu lyiat a̱ni bah. Ba̱ ku fa nyia̱ Laaza̱rut kai nda nia, da̱nian gu ka fwung.

¹⁴Huhwa Yesu si̱ tak ma̱ng a̱mba kpa̱sai nyia̱, “Laaza̱rut khwu.

¹⁵A̱wot, n byia̱ a̱sai a̱lyia̱ da̱nian nyin, nang n ku nshya̱ da̱ a̱vwuo kya a̱ni bah; da̱nian nyi ka nwuak fwuo da̱ nung. A̱mgba̱m ma̱ng a̱nia, nyi bai zi̱ nat da̱ a̱vwuo nggu ka.”

¹⁶A̱jawa nang Toma, a̱ byia̱ a̱lyoot nggan nang á̱ ngyei “A̱hyaai ka” a̱ni, si̱ nyia̱ ma̱ng á̱kum mman ta̱m ka a̱ni, “Nzi̱t mameang, zi̱t nat zi̱ kwi dundung ma̱ng a̱nggu!”

¹⁷Nang Yesu si̱ nwuo ma̱ a̱keang Laaza̱rut ka a̱ni, a̱ si̱ shya̱ nang á̱ wa ka̱n niat gu; a̱ si̱ nyia̱ mam naai ma̱ a̱bi ka.

¹⁸(A̱keang Ba̱ta̱ni ka shya̱ kpa̱mkpaan ma̱ng Urusha̱lima, ku tat met a̱tat[62] bah).

¹⁹A̱yahudawa ma̱ a̱di̱di̱t ku bai ba̱ byiat Ma̱rta ma̱ng Ma̱ryamu á̱na̱nyiuk mba wu a̱khwu ka.

²⁰Nang Ma̱rta nfa̱k nyia̱ Yesu chobai a̱ni, a̱ si̱ doot a̱ si̱ nat a̱ san ngguu, a̱ bu tyia̱ nggu a̱la̱baa. A̱ si̱ ghwon Ma̱ryamu a̱mali.

²¹Huhwa Ma̱rta si̱ nyia̱ ma̱ng Yesu a̱ni, “A̱tyoli, ka̱ a wa ku nshya̱, si̱ a̱na̱nyiuk nung wu khwu bah!

²²A̱mgba̱m ma̱ng a̱nia, n dyen A̱gwaza doot a̱ nang ang kuzang kyang nang a lyip gu a̱ni.”

²³Yesu si̱ nyia̱ ma̱ng a̱nggu, “A̱na̱nyiuk ang wu na shyip ma̱ng swuan.”

²⁴Ma̱rta si̱ nwuak gu shim nyia̱, “N dyen nang gu bye doot ma̱ng swuan a̱tuk mam fak shi̱ri̱ya ngaan ka.”

²⁵Yesu si̱ nyia̱ ma̱ng a̱nggu a̱ni, “Nung gwa ngyet a̱tyu ya̱ngam á̱niet ba̱ ka̱n kwi a̱ni ma̱ng swuan. Nung gwa si̱ bu ngyet swuan ji. A̱tyu a̱ nwuak fwuo da̱ nung a̱ni, a̱ na shya̱ swuan, ku nang gu khwu.

²⁶A̱tyu a̱ shya̱ a̱chet, a̱ si̱ bu nwuak fwuo da̱ nung a̱ni; a̱ na khwu bah, ba̱ng si̱ nat sang sangba̱p. A nwuak a̱chuchuk a?”

²⁷A̱jawa Ma̱rta si̱ nwuak Yesu shim nyia̱, “Ii, A̱tyoli, n nwuak a̱chuchuk nwan wa yet Kristi a̱tyu nang A̱gwaza kup gu tyok nang zi̱ fwuong a̱ni; Nggwon A̱gwaza ka nang á̱ ku sak ka̱ na bai mi̱ swanta hu a̱ni.”

²⁸Nang Ma̱rta ntyak a̱lyiat na ma̱ng Yesu a̱ni, a̱ si̱ doot a̱ si̱ nat. A̱ si̱si̱ yei a̱na̱nyiuk nggu wu Ma̱ryamu nyia̱, “A̱tyu tyiet bai, a̱ chat li ang!”

²⁹Nang Ma̱ryamu nfa̱k a̱nia a̱ni, a̱ si̱ kin tat a̱ doot ma a̱nggang, a̱ si̱ nat da̱ a̱vwuo Yesu.

³⁰Ba̱ng ba̱ ntat jen a̱ja, Yesu ka̱n nwuo a̱da̱dei a̱keang Ba̱ta̱ni wu bah. Nang gu ni̱ nshya̱ di̱n tyan nang Ma̱rta ba̱ myim ma̱ng a̱nggu a̱ni.

³¹Nang A̱yahudawa ba̱ shya̱ a̱mali ka dundung ma̱ng Ma̱ryamu á̱ byiat gu a̱khwu ka a̱ni, ndi nang gu ndoot ma a̱nggang; ba̱ si̱ ma ndoot ba̱ si̱ khwi ngguu. Ba̱ ku fa nyia̱ a̱ naat ma̱ a̱bi kikya, gu si̱ twei a̱ja.

³²Nang Ma̱ryamu si̱ ntat tyan ji Yesu nshya̱ a̱ni, nang gu ndi Yesu a̱ni; a̱ si̱ ka̱n ta̱bwak a̱zaghyi nggu. A̱ si̱ nyia̱ ma̱ng a̱nggu, “A̱tyoli, ka̱ a wa ku nshya̱, si̱ a̱na̱nyiuk nung wu ku khwu bah!”

³³Nang Yesu ndi Ma̱ryamu twei, a̱ si̱ bu li nang A̱yahudawa ba̱ shya̱ dundung ma̱ng a̱nggu twei a̱ni; fwuo hu si̱ byian ba̱t[63].

³⁴Huhwa gu si̱ nyia̱ ma̱ng a̱mba, “A̱ji wa nang nyi mmyiai ngguu?” Ba̱ si̱ nyia̱ ma̱ng a̱nggu a̱ni, “A̱tyoli, bai a lii!”

³⁵A̱jawa Yesu si̱ koot ndang a̱ghyi.

³⁶Huhwa si̱ mbyia̱ A̱yahudawa ba si̱ nyia̱, “Nyi li si̱sak ji nang gu nchat gu a̱ni!”

³⁷Bi̱ri̱ng ma̱ng a̱nia, A̱yahudawa á̱ghyang si̱ nyia̱ ma̱ng á̱ghyang mba a̱ni, “A̱tyu a̱ ku teak a̱tyu a̱fi̱fan wu á̱ghyi ba a̱ni, ka̱ doot a̱ vwuong a̱tyu wuni a̱khwu ka baa?”

³⁸Nang Yesu ni̱ nshya̱ ma̱ng byian fwuo[64] ba̱t, a̱ si̱ nat ma̱ a̱bi Laaza̱rut ka. A̱bi Laaza̱rut ka, ku yet a̱ghwop a̱fang kya. A̱wot á̱ si̱ kyiak a̱fang a̱ghyang, á̱ si̱ nkup a̱nu a̱bi ka.

³⁹A̱jawa Yesu si̱ nyia̱ ma̱ng a̱mba, “Nyi yuut a̱fang ka, sak zan!” A̱jawa Ma̱rta a̱na̱nyiuk a̱tyo a̱ khwu a̱ni si̱ nyia̱, “A̱tyoli, di̱ yong huni mam naai hwa hu nang gu nkhwu á̱ si̱ niat gu a̱ni. A̱ na nyui!”

⁴⁰Yesu si̱ nyia̱ ma̱ng Ma̱rta, “Wa n gyei n nyia̱, ka̱ a nwuak fwuo da̱ nung, a na li shi A̱gwaza hu a?”

⁴¹Ba̱ si̱ yuut a̱fang ka á̱ sak zan. Yesu si̱ gba̱t á̱ghyi Ma A̱gwaza tswazwa. A̱ si̱ nyia̱, “Nwan A̱tyia̱ nung, n gwai ma̱ng a̱nwan nang a mmyiai a̱fufwuo a si̱ fa̱k nung a̱ni.

⁴²Neet gbangbang, n za ma ndyen kuzang jen a fwuong nung. A̱wot n hyia̱ á̱si̱ nani da̱nian á̱niet ba̱ yong a̱ji a̱ni, ba̱ ka nwuak a̱chuchuk nang nwan wa nta̱m nung mi̱ swanta hu.”

⁴³Nang gu nhyia̱ a̱nia a̱ni, a̱ si̱ kin ta̱ngam a̱nwuat nggu ka mi̱n chet. A̱ si̱ yorong, “Laaza̱rut, ghwut!”

⁴⁴A̱jawa nang a̱tyo a̱ khwu wu si̱ kin ghwut, nang a̱ti̱tak nggu ba ma̱ng bwak na shya̱ di̱ gat ma̱ng kikyak; ma a̱nia wa a̱ghyi nggu ba, a̱ si̱ gat ma̱ng kikyak nang á̱ nniat nkwom na a̱ni. Yesu si̱ nyia̱ ma̱ng a̱mba, “Nyi byii̱k gu ghwon, gu nkat.”

⁴⁵Mat a̱nia A̱yahudawa ma̱ a̱di̱di̱t ba̱ ku bai byiat Ma̱ryamu a̱khwu Laaza̱rut ka a̱ni, nang ba̱ ku ndi kyang hu nang Yesu nyia̱ a̱ni, ba̱ si̱ nwuak fwuo da̱ nggu!

⁴⁶A̱wot á̱ghyang si̱ nat da̱ a̱vwuo A̱fa̱risawa. Ba̱ si̱ hyia̱ ma̱ng a̱mba kyang hu nang Yesu nyia̱ a̱ni.

⁴⁷Mat a̱nia, a̱cha̱chet a̱yaapris ba mbeang A̱fa̱risawa si̱ yorong a̱gba̱ndang a̱tung sot a̱cha̱chet A̱yahudawa wu. Ba̱ si̱ lyip á̱ghyang mba nyia̱, “Yihwa nang zi̱ na nyia̱ la?! Di, a̱tyu wuni nyian nkyang a̱ga̱de[65] ma̱ a̱di̱di̱t!

⁴⁸Ka̱ zi̱ kai nggu ghwon nang gu nyian nkyang nani, a̱mgba̱m á̱niet ba na nwuak fwuo da̱ nggu! A̱wot A̱romawa ba na bai, ba̱ seang a̱byin nzi̱t ka, mbeang A̱li Nwuat Za̱nang A̱gwaza nzi̱t ka!”

⁴⁹A̱jawa nang a̱tyo nyiung ma̱ a̱mba, á̱ ku ngyei nggu Ka̱yafat (nggu wa ku yet a̱gba̱ndang pris wu a̱lyia̱ a̱kya); a̱ si̱ nyia̱ ma̱ng a̱mba, “Nyin, nyi lyen kyang bah za̱m!

⁵⁰Da̱ nyin, nyi nyia̱ a̱di̱dam bah. Ku na lan a̱tyo nyiung a̱khwu da̱nian á̱niet ma̱ a̱di̱di̱t, nang á̱ na mbwuk a̱mgba̱m a̱byin a̱ni!”

⁵¹A̱lyiat nani nang Ka̱yafat ku lyiat a̱ni, na̱ ku yet a̱di̱dam a̱pyia̱ nggu wa bah. Kyang hu ku mbyia̱ a̱ni; nang nggu wa ngyet a̱gba̱ndang pris wu ma̱ a̱lyia̱ a̱kya, a̱ ku hyia̱ kyang ku na bai á̱zanson kya a̱ni; nang Yesu na nkhwu da̱nian á̱niet A̱yahudawa a̱ni.

⁵²(A̱wot A̱yahudawa bya ma̱nyin ba Yesu na khwu da̱nian ba bah. A̱ na khwu da̱nian a̱ ka tung a̱mgba̱m á̱niet ba̱ yet mman A̱gwaza na ba̱ kai swanta hu a̱ni, ba̱ ka mun á̱pyia̱ ba̱ yet kyang nyiung.)

⁵³Neet a̱tuk a̱kya, ba̱ si̱ la̱p a̱nu di̱ si̱sak ji nang ba̱ na nhyat Yesu a̱ni.

⁵⁴Huhwa si̱ mbyia̱ Yesu si̱ bu chong kpa̱sai ma̱ a̱byin A̱yahudawa ka bah. A̱ si̱ ghwon a̱byin a̱kya, a̱ si̱ nat ma̱ a̱byin ka̱ shya̱ kpa̱mkpaan mi̱ tswa a̱yit a̱ni, A̱ ku si̱ nwuo ma̱ a̱keang nang á̱ ngyei Ifremu a̱ni. A̱jawa gu si̱ nswan dundung ma̱ng mman ta̱m nggu na.

⁵⁵Nang A̱yet Ghwut Mman Isi̱rela mi̱ Khwo wu ku mbai kpa̱mkpaan a̱ni, á̱niet ma̱ a̱di̱di̱t si̱ ghwut á̱ neet ma̱ bachyuang a̱ka̱keang. Ba̱ si̱ nat Urusha̱lima da̱nian ba̱ ka nyia̱ taada kwi vam hu á̱ nfwuong jen Song A̱yet ji.

⁵⁶Ba̱ si̱ chat ba̱ ta̱bat Yesu. Ba̱ si̱ yong mi̱ didyaat A̱li Nwuat Za̱nang A̱gwaza hu. Ba̱ si̱ lyi̱ri̱m á̱ghyang, nyia̱, “Yihwa nang nyi li? A̱ na bai A̱yet wu a?”

⁵⁷Mat nang a̱gba̱ndang pris wu ma̱ng A̱fa̱risawa ba ku mi̱ nnwuak doka nyia̱; konyan wa lyen a̱vwuo ka nang Yesu nshya̱ a̱ni, gu bai a̱ hyia̱, da̱nian ba̱ ka ta̱bat guu.