Read tyap Yoona 12 Bible Online

Yoona 12 - tyap bible

Yoona 12

¹Mam a̱taa nia bwat á̱ nwuo A̱yet Ghwut Mman Isi̱rela mi̱ Khwo hu, Yesu si̱ doot a̱ si̱ nat Ba̱ta̱ni di̱ tyan nang Laaza̱rut nshya̱ a̱ni. Nggu wa yet a̱tyu a̱ ku khwu, á̱ si̱ niat; a̱wot Yesu si̱ shyip gu ma̱ng swuan ma̱ á̱niet ba̱ ka̱n kwi a̱ni.

²Á̱ ku wan gu kyayak a̱tyetuk a̱kya, nang gu na ya a̱ nkwai a̱ni. Ma̱rta wa ku ka̱u kyayak hu. Laaza̱rut si̱ ya kyayak hu dundung ma̱ng Yesu.

³Ma̱ryamu si̱ doot, a̱ si̱ kyiak sha̱p a̱myia̱ ji byia̱ swam turare a̱ni. A̱wot na̱ si̱ bu byia̱ kurum ba̱t, á̱ ku nyia̱ na ma̱ng nar wa. A̱ si̱ koot a̱sham a̱myia̱ ka da̱ a̱ti̱tak Yesu ba. A̱wot a̱ si̱ fwut ma̱ng pyia̱ nggu hu. Swam a̱sham a̱myia̱ a̱hwa si̱ kai a̱li ka a̱mgba̱m.

⁴A̱wot a̱tyo nyiung mami mman ta̱m Yesu na, á̱ ku ngyei nggu Yahuda Iska̱riyoti, nggu wa ku[66] bwuk ma̱ng Yesu, a̱ si̱ nyia̱,

⁵“Yihwa mbyia̱ á̱ ndak lyap a̱myia̱ nani, á̱ si̱ ka̱u á̱kunak na kurum hu?! Kurum a̱myia̱ hu tat si̱ nta̱m a̱lyia̱ a̱nyiung!”

⁶Yahuda ku hyia̱ a̱lyiat nani mat nang gu nchat á̱kunak ni̱nia a̱ni bah; a̱wot mat nang gu ngyet a̱tang wa a̱ni. Nggu wa ku yet a̱tyu ba̱ng gumaat kurum ji. A̱ ku nyiin a̱ tsa a̱ bu mbwoi pinchee mami.

⁷Ma̱ng a̱nia, Yesu si̱ nyia̱ ma̱ng Yahuda a̱ni, “Yok a̱byii̱k a̱wa shonshyon! A̱ sak kyang hu nang gu byia̱ a̱ni, da̱nian mam nang n na nkhwu á̱ niat nung a̱ni.

⁸Á̱kunak na shya̱ dundung ma̱ng a̱nyin kuzang jen. A̱wot nung n na shya̱ dundung ma̱ng a̱nyin kuzang jen bah.”

⁹Nang A̱yahudawa ma̱ a̱di̱di̱t ku nfa̱k nkhang nyia̱ Yesu shya̱ ma̱ a̱keang Ba̱ta̱ni ka a̱ni; ba̱ si̱ ghwut ba̱ si̱ bai, da̱nian ba̱ ka li Yesu wa ma̱nyin gu bah; ba̱ ku chat ba̱ bu ndi Laaza̱rut wa; a̱tyu nang Yesu ku ta̱ngam ma̱ng swuan ma̱ á̱niet ba̱ ka̱n kwi a̱ni.

¹⁰A̱jawa, a̱cha̱chet a̱yaapris ba si̱ la̱p a̱nu nyia̱ ba̱ na hyat Laaza̱rut mameang.

¹¹Mat kyang hu ku shya̱ Laaza̱rut a̱ni, huhwa si̱ mbyia̱ A̱yahudawa ma̱ a̱di̱di̱t ku ndak khwi a̱yaapris ba, ba̱ si̱ nwuak fwuo di̱ Yesu.

¹²Da̱ a̱tsotson tat ka, á̱niet ma̱ a̱di̱di̱t ba̱ ku bai song A̱yet Ghwut Mman Isi̱rela mi̱ Khwo hu a̱ni; nang ba̱ ku nfa̱k nyia̱ Yesu shya̱ di̱n vak chobai Urusha̱lima a̱ni;

¹³ba̱ si̱ kin sam a̱kyikyo a̱ka̱kwon tswan. Ba̱ si̱ ghwut á̱ nat ba̱ myim ma̱ng a̱nggu, ba̱ san guu. Ba̱ si̱ kan ta̱ngam nwunwuat hu mi̱ chet nyia̱, “Dyep A̱gwaza! Dyep yet si̱ A̱tyu a̱ chobai mami a̱lyoot A̱gwaza a̱ni! A̱gwaza, gu nang A̱gwam Isi̱rela wu a̱li̱ba̱rka!”

¹⁴Yesu ku shya̱ a̱banggwon a̱ka̱za̱nki kya, a̱ si̱ nyeak. Ku si̱ bai ma̱ cha̱chaat ma̱ng kyang hu nang á̱ ku lyuut ma̱ A̱lyiat A̱gwaza na, nyia̱,

¹⁵“Nyi yok fa̱k a̱wun bah; nyin á̱niet Urusha̱lima![67] Di A̱gwam nyin wu wa chobai, a̱ nyeak a̱banggwon a̱ka̱za̱nki!”[68]

¹⁶Da̱ a̱chak a̱kya mman ta̱m Yesu na ku fi̱k kyang hu ku bai a̱ni bah. Jen nang Yesu ku ba̱ ndoot á̱ si̱ nwuak gu a̱kyenkyai shi a̱ni; jija mman ta̱m na ku njhyung nang á̱ ndyuut nkyang nani tazwa nggu. A̱wot nkyang na si̱ bai ma̱ cha̱chaat da̱ a̱nu ka nang á̱ ndyuut na a̱ni.

¹⁷Á̱kpa á̱niet ba̱ ku shya̱ dundung ma̱ng Yesu di̱n jen nang gu ku ngyorong Laaza̱rut a̱ si̱ ghwut ma̱ a̱bi ka a̱ni; a̱wot a̱ si̱ bu ta̱ngam guu ma̱ng swuan ma̱ á̱niet ba̱ ka̱n kwi a̱ni; bibya ku yong mi̱ di̱ shei á̱niet ba kpa̱sai tazwa kyang hu nang Yesu ku nyia̱ a̱ni.

¹⁸Á̱niet ma̱ a̱di̱di̱t ku nat, ba̱ san Yesu mat ba̱ ku fa̱k nkhang kyang a̱ga̱de[69] nang gu nyia̱ a̱ni.

¹⁹A̱jawa A̱fa̱risawa ba si̱ lyiat ma̱ng á̱ghyang mba nyia̱, “Nyi nwuan nyi lii, zi̱ si̱ mi̱n mak swuo chet a̱tyu wuni bah! A̱ swak chet zi̱t ba̱t. Nyi li si̱sak nang swanta hu ntyong a̱ khwi nggu a̱ni!”

²⁰Mami á̱niet ba̱ ku bai song A̱yet Ghwut Mman Isi̱rela mi̱ Khwo hu, a̱wot ba̱ bu kyuak ntong a̱zaghyi A̱gwaza a̱ni; A̱helenawa ku nshya̱.

²¹Ba̱ si̱ bai da̱ a̱vwuo Filibut, a̱ ku neet ma̱ a̱keang Ba̱tsaida ka̱ shya̱ mi̱ fam a̱byin Ga̱lili a̱ni. Ba̱ si̱ nyia̱ ma̱ng a̱nggu a̱ni, “A̱tyoli, zi̱ chat zi̱ bwoi nkhang ma̱ng Yesu.”

²²Filibut si̱ nat, a̱ si̱ shya̱ Anda̱rawut. Mba a̱feang, ba̱ si̱ nat dundung, ba̱ si̱si̱ hyia̱ ma̱ng Yesu ta̱m ji.

²³Huhwa Yesu si̱ nwuak ba shim nyia̱, “Jen nyia̱ nang á̱ na nnwuak Nggwon A̱tyubishyi a̱kyenkyai shi a̱ni.

²⁴A̱tsatsak a̱lyiat wa za̱m nang n shei nyin; ka̱ á̱ ti̱p tswa nswaat a̱byin bah, ji̱ na swan jhyung ja ma̱nyin ji. Ki̱ ji khwu a̱byin ka, ji̱ na saat ba̱t. Ji̱ tyei tswá ma̱ a̱di̱di̱t.

²⁵“Konyan wa chat swuan gu, a̱ na nwai nji. A̱tyu a̱ ma ndak swuan gu ji mi̱ swanta huni a̱ni, a̱ na shya̱ swuan sang sangba̱p.

²⁶Konyan wa nyia̱ nung ta̱m a̱ni, ku yet ta hwa gu khwi nung. Mat a̱mgba̱m a̱vwuo ka nang n shya̱ a̱ni, a̱ja wa nang a̱khwo nung wu na nshya̱ dundung ma̱ng a̱nung. A̱tyia̱ nung wu mameang, na nwuak a̱tyu a̱ nyia̱ nung ta̱m a̱ni shi.”

²⁷“Di̱ yong huni fwuo nung hu byian ba̱t! Yihwa nang n na hyia̱? N hyia̱ nyia̱, ‘A̱tyia̱, ti̱n jen jini ji̱p nung ndyo a?’ Kaai, n na hyia̱ a̱nia bah. Mat kyang ku bai ma̱ng a̱nung a̱ni, huhwa hu; n swuo a̱bung di̱n jen jini.

²⁸A̱tyia̱, nwuak a̱lyoot ang ka shi!” A̱nwuat si̱ kin ghwut a̱ neet Ma A̱gwaza tswazwa nyia̱, “N mi̱ nkai nwuak a̱lyoot nung ka shi. A̱wot n bu na nwuak ka shi hu mbeang!”

²⁹Á̱kpa á̱niet ba̱ ku yong a̱ja ba̱ si̱ fa̱k a̱nwuat ka a̱ni; á̱ghyang si̱ nyia̱, “A̱gbai nza wa a̱wa!” Á̱ghyang si̱ ma nyia̱, “A̱ta̱m tswa A̱gwaza wa kaat ma̱ng a̱nggu!”

³⁰A̱jawa Yesu si̱ nyia̱ ma̱ng a̱mba, “A̱nwuat ka nang nyi fa̱k fa̱k huni a̱ni, ka̱ bai da̱nian kpangti̱n nyin ja; da̱ nyia̱ nung gwa bah.

³¹Ma̱nini kya nang á̱ na nyia̱ á̱niet mi̱ swanta ba shi̱ri̱ya, a̱wot á̱ bu vwuong A̱ta̱nyeang swanta kani[70].

³²Jen nang á̱ bye nta̱ngam[71] nung ma̱ng swuan ma̱ á̱niet ba̱ ka̱n kwi a̱ni, n bye nkhwat a̱mgba̱m á̱niet ba bai ndyo da̱ a̱vwuo nung.”

³³Yesu ku hyia̱ a̱lyiat nani da̱nian gu ka tak ma̱ng a̱mba tangka̱i a̱khwu nang gu na khwu wa a̱ni.

³⁴Huhwa á̱kpa á̱niet ka si̱ nyia̱ ma̱ng Yesu a̱ni, “Doka nzi̱t ji ma̱ng A̱lyiat A̱gwaza na tak ma̱ng a̱nzi̱t nyia̱; Kristi[72] a̱tyu nang zi̱ fwuong a̱ni, na swan ba̱ng si̱ nat sang sangba̱p. Yihwa mbyia̱ nang a na nnyia̱ hu yet ta hwa á̱ ta̱ngam Nggwon A̱tyubishyi? A̱nyan wa yet Nggwon A̱tyubishyi a̱kya?”

³⁵Yesu si̱ nyia̱ ma̱ng a̱mba, “Sai hu shya̱ dundung ma̱ng a̱nyin da̱ a̱bada̱dei njen. Nyi chong di̱n jen ji nang sai hu nshya̱ dundung ma̱ nyin a̱ni, kalak lyin ku shya̱ nyin. Mat a̱tyu a̱ chong mi̱ ndyin a̱ni, a̱ lyen a̱vwuo ka nang gu nchong a̱ ntyei a̱ni bah.

³⁶Nyi nwuak a̱chuchuk di̱ sai hu, neet nang nyi ni̱ shya̱ ndung ma̱ng a̱nhu. Da̱nian nyin, nyi ka yet mman a̱tyu a̱ yet sai hu a̱ni.” Nang Yesu ntyak a̱lyiat nani a̱ni, a̱ si̱ nat a̱ si̱ ta̱kup.

³⁷A̱mgba̱m ma̱ng a̱cha̱chet nkyang a̱ga̱de[73] ma̱ a̱di̱di̱t nang Yesu ku nyia̱ a̱zaghyi A̱yahudawa ba a̱ni, ba̱ si̱ nwuak fwuo da̱ nggu bah.

³⁸Hu ku bai ma̱ cha̱chaat nang Ishaya a̱ta̱m a̱kwonu A̱gwaza wu nshei á̱zanson a̱ni, nyia̱, “A̱tyoli, a̱nyan wa nwuak a̱chuchuk da̱ a̱lyiat nzi̱t na? Da̱ a̱vwuo a̱nyan kya nang á̱ ntak chet Tyok A̱gwaza hu kpa̱sai?”[74]

³⁹Huhwa si̱ mbyia̱ nwuak fwuo hu si̱ nkaat mbaa, mat Ishaya bu hyia̱ nyia̱,

⁴⁰“A̱gwaza ku koot mba a̱fi̱fan. A̱ si̱ bu tyia̱ nfwuo mba na si̱ khwu. Kalak ba̱ du li ma̱ng á̱ghyi mba ba, kalak ba̱ du fi̱k a̱lyiat nggu na mi̱ nfwuo mba na. Ka̱ ku li a̱nia, kalak ba̱ du bwuok á̱ bai da̱ a̱vwuo nung, n choot baa.”[75]

⁴¹Ishaya ku hyia̱ a̱lyiat nani á̱ nfa Yesu, mat a̱ ku mi̱ ndi a̱kyenkyai shi Kristi wu, a̱wot a̱ si̱ mbwoi á̱niet ba nkhang.

⁴²A̱mgba̱m ma̱ng a̱nia, á̱niet ma̱ a̱di̱di̱t si̱ mun nwuak fwuo di̱ Yesu. Mbeang a̱cha̱chet a̱yaakwak a̱son mba ba, ba̱ ku mun a̱ nwuak fwuo di̱ Yesu. A̱wot mat si̱sak nang ba̱ ku nfwuong a̱wun A̱fa̱risawa ba a̱ni; ba̱ ku ghwut kpa̱sai ba̱ si̱ tak nang ba̱ nnwuak fwuo bah; nyia̱ kalak á̱ vwuong mba á̱ ghwut ndyo ma̱ á̱tutu a̱tung A̱yahudawa ba.

⁴³Mat ba̱ ku chat dyep da̱ a̱vwuo á̱nietbishyi a̱ swak si̱sak nang A̱gwaza na ndyep mba a̱ni.

⁴⁴A̱jawa Yesu si̱ ngeap a̱nu. A̱ si̱ hyia̱ ma̱ng a̱gba̱ndang a̱nwuat nyia̱, “Konyan wa nwuak fwuo da̱ nung a̱ni, da̱ nung wa nang gu nnwuak fwuo hu bah; a̱ nwuak fwuo da̱ a̱tyu a̱ ta̱m nung wa a̱ni!

⁴⁵Konyan wa nwuan nung a̱ni, a̱ nwuan A̱tyu a̱ ta̱m nung wa a̱ni.

⁴⁶N ku mbai mi̱ swanta hu. N si̱ ndi nang sai a̱ni, da̱nian konyan wa nwuak fwuo da̱ nung, a̱ si̱ mi̱n swan mi̱ ndyin bah.

⁴⁷“Konyan wa fa̱k tyiet nung hu, da̱ nggu a̱ khwi hu a̱ni bah, nung gwa na nyia̱ gu shi̱ri̱ya ji bah. Mat n ku mbai n nyia̱ swanta hu shi̱ri̱ya ja bah. N ku mbai wa n san a̱mgba̱m á̱niet ba mi̱ swanta hu.

⁴⁸“A̱tyu a̱ lak nung, a̱wot a̱ si̱ lak san a̱lyiat nung na a̱ni; a̱tyu a̱wa byia̱ a̱tyu á̱ na nyia̱ gu shi̱ri̱ya a̱ni. A̱lyiat na nang n dyiat a̱ni, ni̱nia na faat gu shi̱ri̱ya ji a̱tuk mam ngaan ka.

⁴⁹“Nkyang nang n tyiet a̱ni, na̱ neet da̱ a̱vwuo nung kya bah. A̱tyia̱ nung wu wa a̱ ta̱m nung a̱ni; nggu wa tak nung a̱lyiat nang n dyiat a̱ni.

⁵⁰A̱wot n bu ndyen, a̱lyiat nggu na[76] nwuat swuan sang sangba̱p. Mat a̱nia, a̱mgba̱m kyang nang n hyia̱ a̱ni, n hyia̱ nhu ma̱ cha̱chaat ma̱ng kyang hu nang A̱tyia̱ nung tak ma̱ng a̱nung n dyiat a̱ni.”