Read tyap Yoona 13 Bible Online

Yoona 13 - tyap bible

Yoona 13

¹Neet nang jen song A̱yet Ghwut Mman Isi̱rela mi̱ Khwo ji ka̱ mbai bah, Yesu ku mi̱ ndyen nang jen gu na nghwon swanta huni gu bwuok a̱ nat da̱ a̱vwuo A̱tyia̱ nggu. Mat nang Yesu nchat á̱niet nggu ba, ba̱ shya̱ mi̱ swanta hu a̱ni. A̱wot a̱ si̱ bu tak mba tangka̱i a̱jhyem chat nang gu byia̱ da̱nian mba a̱ni.

²Di̱n jen nang Yesu ma̱ng mman ta̱m nggu na nshya̱ di̱ ya kyayak a̱tyetuk a̱ni, nang A̱ta̱nyeang ka mameang ka̱n tyia̱ mi̱ fwuo Yahuda Iska̱riyoti, a̱fai Siman, nggu wa ku yet a̱bang a̱byin wu; gu bwuk ma̱ng Yesu.

³Yesu ku lyen nang A̱tyia̱ nggu wu ntyia̱ kuzang kyang bwak gu. A̱ si̱ bu lyen nang gu nneet da̱ a̱vwuo A̱gwaza, a̱wot a̱ bu na bwuok a̱ nat da̱ a̱vwuo A̱gwaza kya.

⁴Di̱n jen nang ba̱ nshya̱ di̱ ya kyayak hu a̱ni, Yesu si̱ kin doot a̱ yong. A̱ si̱ khwuk a̱toot nang gu kup a̱ni. A̱ si̱ ghwon a̱si̱ mami wu, a̱ si̱ kyiak ta̱wul, a̱ si̱ gaat ndyang.

⁵A̱ si̱ bwuo a̱sa̱khwot a̱ si̱ koot mi̱ chi̱chya̱ ntswam. A̱ si̱ kin nwuo khwi mman ta̱m nggu na a̱ti̱tak. A̱ si̱ tyia̱ ta̱wul nang gu la̱p a̱ kaat ndyang ka a̱ni, a̱ si̱ nshwa̱i mba a̱ti̱tak ba.

⁶Nang Yesu ntat da̱ a̱vwuo Bitut a̱ni, a̱jawa nang Bitut nnyia̱ ma̱ng a̱nggu, “A̱tyoli nung, nwan wa na kwi nung a̱ti̱tak baa?!”

⁷A̱jawa Yesu si̱ nwuak gu shim nyia̱, “Ma̱ninika, a si̱ mi̱n dyen kyang hu nang n nyia̱ a̱ni bah. A̱wot a bye fi̱k hu di̱n jen jhyang.”

⁸A̱jawa Bitut si̱ nyia̱ ma̱ng Yesu a̱ni, “Kaai A̱tyoli, n si̱ mi̱n shim a mak khwi nung a̱ti̱tak bah!” Yesu si̱ ma nyia̱, “To, ka̱ a shim n si̱ nkwi ang a̱ti̱tak bah, a tyak a̱kwonu ang da̱ a̱vwuo nung; a byia̱ kyang ma̱ng a̱nung bah.”

⁹Bitut si̱ nyia̱, “A̱tyoli nung, ka̱ a̱nia wa, ma̱ a̱ti̱tak bya ma̱nyin ba nang a na kwi bah. N chat a mun kwi mbwak nung na ma̱ng a̱pyia̱ nung ka mbeang!”

¹⁰Yesu si̱ bu nyia̱, “Ka̱ a̱yin ka̱n swuo, vam nggu hu ni̱ tyia̱ a̱za̱za̱rak wa. Á̱ bu si̱ mi̱n swuo nggu bah, ku myim á̱ kwi nggu a̱ti̱tak bya ma̱nyin mba. Mat a̱nia, a̱mgba̱m nyin nyi yet á̱za̱za̱rak á̱niet bya, kang ma̱ng a̱tyo nyiung.”

¹¹Yesu ku lyen a̱tyu a̱ yet a̱bang a̱byin wu a̱ na bwuk ma̱ng a̱nggu a̱ni. Huhwa ku mbyia̱ a̱ si̱ nyia̱ ma̱ng a̱mba a̱mgba̱m konyan wa ma̱ a̱mba yet a̱za̱za̱rak bah.

¹²Nang Yesu ntyak kwi mba a̱ti̱tak ba a̱ni, a̱ si̱ kyiak a̱ta̱swak nggu wu, a̱ si̱ kup. A̱ si̱ bwuok a̱ nat di̱ tyan swat nggu ji, a̱ si̱si̱ swan a̱byin. A̱jawa gu si̱ lyip ba nyia̱, “Nyi fi̱k kyang hu nang n nyia̱ nyin ndyo a̱ni a?

¹³Nyi yei nung ‘A̱tyu tyiet’ ma̱ng ‘A̱tyoli.’ Nyi shei cha̱chaat, nyi ghyuap bah. A̱nia wa nang ngyet.

¹⁴Ka̱ n gyet A̱tyoli nyin ma̱ng A̱tyu tyiet nyin, a̱mgba̱m ma̱ng a̱nia n si̱ nkwi nyin a̱ti̱tak; nyin mameang ku myim nyi kwi á̱ghyang nyin ndyo.

¹⁵“N tak nyin kidee ja, da̱nian nyin meang nyi ka nyia̱ di̱ si̱sak ji nang n nnyia̱ nyin ndyo a̱ni.

¹⁶A̱tsak a̱lyiat, n tak nyin; a̱khwo si̱ mi̱n shya̱ shi a̱ swak a̱tyoli nggu bah. Ma a̱nia wa, nggwon nta̱m si̱ mi̱n swak a̱tyu a̱ ta̱m ka a̱ni bah.

¹⁷Ma̱ninika nang nyi ndyen tsatsak a̱lyiat wuni, nyi na shya̱ a̱lyia̱ a̱sai ka̱ nyi nyia̱ nta̱m ma̱ng á̱na.

¹⁸“A̱mgba̱m nyin wa nang n dyiat bah. N dyen á̱niet ba nang n ku nkhai ma̱ nyin a̱ni. A̱mgba̱m ma̱ng a̱nia, ku yet ta hwa A̱lyiat A̱gwaza na na̱ bai cha̱chaat nyia̱, ‘A̱tyu a̱ ya kyayak[77] hu ma̱ng a̱nung a̱ni, a̱ bwuak a̱ si̱ tyia̱ a̱tyu lak li nung.[78]’

¹⁹“N shei ma̱ng a̱nyin a̱lyiat nani ma̱ninika, neet nang na̱ ka̱ mbai da̱ a̱nu ka bah. Da̱nian jen nang na̱ bye mbai da̱ a̱nu ka a̱ni, nyi ka nwuak a̱chuchuk nang nung gwa ngyet A̱tyu A̱gwaza kup gu tyok a̱ni[79].

²⁰A̱tsatsak a̱lyiat wa nang n shei ma̱ng a̱nyin; konyan wa san a̱tyu nang n ta̱m ndyo a̱ni ma̱ng fwuo nyiung, ku li á̱ ngyei nung gwa gu san. Ma a̱nia wa, a̱tyu a̱ ma nsan nung ma̱ng fwuo nyiung a̱ni, a̱ mun a̱ san a̱tyu a̱ ta̱m ma̱ng a̱nung wa a̱ni.”

²¹Nang Yesu ntyak a̱lyiat nani a̱ni, fwuo nggu hu si̱ byian. Huhwa si̱ mbyia̱ a̱ si̱ ghwut a̱ si̱ hyia̱ ma̱ng a̱mba kpa̱sai nyia̱, “A̱tsatsak a̱lyiat, n tak ma̱ng a̱nyin; a̱tyo nyiung mami nyin na yet nung a̱bang a̱byin!”

²²Huhwa mman ta̱m Yesu na si̱ ta̱bat bwan nwuan á̱ghyang. Mat, ba̱ lyen nggwon ta̱m ka nang Yesu lyiat a̱ fa da̱ nka a̱ni bah.

²³A̱tyo nyiung mami mman ta̱m nang Yesu fa̱k da̱ nggu a̱ni ba̱t, nang gu swan ma̱ kpa̱mkpaan ma̱ng Yesu;

²⁴huhwa Bitut si̱ lyiat ma̱ng a̱nggu mi̱ bwak, a̱ si̱ tyan nggu ndyo nyia̱, “Lyip A̱tyoli nzi̱t wu, a̱tyu nang gu lyiat a̱ni.”

²⁵A̱jawa, nggwon ta̱m ka nang Yesu fa̱k da̱ nka a̱ni, si̱ shoot a̱ nat kpa̱mkpaan ma̱ng Yesu. Ka̱ si̱ lyip gu nyia̱, “A̱tyoli, a̱nyan wa nang a lyiat?”

²⁶Yesu si̱ nwuak gu shim hu nyia̱, “A̱tyu nang n na nzwup chunchong burodi jini mi̱ nyung, n nang nggu a̱ni; a̱tyu a̱wa wa!” A̱jawa Yesu si̱ kyiak chunchong burodi ji, a̱ si̱ zwup mi̱ nyiung hu. A̱ si̱ nwuak Yahuda, a̱fai Siman Iska̱riyoti.

²⁷Nang Yahuda nsan chunchong burodi ji a̱ni, di̱ yong a̱hwa A̱ta̱nyeang[80] ka si̱ kin nwuo mami nggu. A̱jawa Yesu si̱ nyia̱ ma̱ng Yahuda a̱ni, “Kyang hu nang a chat nyia̱ hu a̱ni; nyia̱ hu a̱nggang.”

²⁸A̱mgba̱m mba, ba̱ shya̱ di̱ ya kyayak hu dundung ma̱ng Yesu a̱ni, á̱ mbyia̱ a̱tyu a̱ ku fi̱k kyang hu ku mbyia̱ Yesu nhyia̱ ma̱ng a̱nggu a̱nia a̱ni bah.

²⁹Mat nang Yahuda wa ku mba̱ng a̱burga kurum mba wu a̱ni; huhwa si̱ mbyia̱ á̱ghyang á̱niet mami mman ta̱m na ku fa Yesu shei ma̱ng a̱nggu gu san kyang nang á̱ na chat ma̱ A̱yet wu a̱ni; kalak ke gu ma nchat kyang gu mbeang á̱kunak ni̱nia a̱ni.

³⁰Nggu Yahuda meang, nang gu nsan chunchong burodi ji a̱ni, a̱ si̱ kin ghwut a̱ nat ta̱usa. Di̱n jen a̱ja nang a̱tyetuk ka̱n khwat.

³¹Nang Yahuda nghwut a̱ si̱ nkat a̱ni, Yesu si̱ nyia̱, “Ma̱nini kya nang á̱ na nnwuak Nggwon A̱tyubishyi, a̱wot a̱ bu nwuak A̱gwaza shi mat Nggwon A̱tyubishyi.

³²Ka̱ A̱gwaza shya̱ shi mat Nggwon A̱tyubishyi; ma a̱nia wa nang A̱gwaza na nnwuak Nggwon ka shi da̱nian a̱pyia̱ nggu. A̱wot ka̱ na shya̱ shi mi̱ di̱ yong a̱hwa.

³³“Nyin mman nung, jen ji nang n na nshya̱ ma̱ng a̱nyin a̱ni, ji̱ bu la̱u shi hu bah. Nyi na chat nung, a̱wot ma̱nang n hyia̱ ma̱ng A̱yahudawa ba a̱ni; a̱vwuo ka nang n naat a̱ni, nyi si̱ mi̱n nat bah. Huhwa n chat n tak nyin.

³⁴Doka swai ja nang n nwuat nyin: Nyi chat á̱ghyang nyin! Ma̱nang n chat nyin a̱ni; ma a̱nia wa nyin mameang, nyi na nchat á̱ghyang.

³⁵A̱nia wa na mbyia̱, konyan mi̱ swanta hu á̱ nfi̱k nang nyi ngyet mman ta̱m nung nia.”

³⁶Siman Bitut si̱ lyip Yesu nyia̱ “Nwan A̱tyoli nung, a naat a̱ji wa?” Yesu si̱ nwuak gu shim hu nyia̱, “A si̱ mi̱n khwi nung di̱ yong huni, a nat tyan ji nang n naat a̱ni bah. Di̱n jen jhyang ja nang a bye nkhwi nung, a nat dundung ma̱ng a̱nung.”

³⁷Bitut si̱ bu lyip Yesu nyia̱, “A̱tyoli nung, yihwa mbyia̱ nang n si̱ mi̱n khwi ang ma̱ninika bah? Di̱ yong huni, n da̱p vam n khwu dundung ma̱ng a̱nwan!”

³⁸Yesu si̱ nyia̱ ma̱ng a̱nggu a̱ni, “A̱tsatsak a̱lyiat wa, a la̱p vam a khwu da̱nian nung a? N chat n tak ang tsatsak a̱lyiat; neet nang a̱gbak ka̱n tyiap bah, a na fwuo lyen nung bwuo a̱ka̱tat!”