Read tyap Yoona 14 Bible Online

Yoona 14 - tyap bible

Yoona 14

¹“Nfwuo nyin na na̱ yok byian bah. Nyi nwuak fwuo da̱ A̱gwaza. A̱wot nyi bu nwuak fwuo da̱ nung.

²Mat Mali A̱tyia̱ nung ka, a̱vwuo nswat nshya̱ ma̱ a̱di̱di̱t. Ka̱ á̱ wa nyia̱ da̱ a̱nia wa bah, si̱ n na ntak ma̱ng a̱nyin. N na nat n si̱ njhyi nyin a̱vwuo nswat.

³Ka̱ n nat n si̱si̱ njhyi nyin a̱vwuo nswat ka, n na mbwuok mbai n ba̱ kyiak nyin nat ndyo da̱ a̱vwuo nung ka. Da̱nian nyin mameang, nyi ka swan dundung ma̱ng a̱nung da̱ a̱vwuo nang n shya̱ a̱ni.

⁴Nyi lyen vak nyi na kai nyi nnat da̱ a̱vwuo nang n naat a̱ni.”

⁵A̱jawa Toma si̱ nyia̱ ma̱ng Yesu a̱ni, “Nwan A̱tyoli, zi̱ lyen a̱vwuo ka nang a naat a̱ni bah. Zi̱ na nyia̱ ni wa zi̱ ndyen vak hu?”

⁶Yesu si̱ nyia̱ ma̱ng Toma a̱ni, “Nung gwa ngyet vak hu. Nung gwa si̱ ngyet a̱chuchuk wu. Nung gwa si̱ bu ngyet swuan ji. Á̱ mbyia̱ a̱tyu a̱ na nat da̱ a̱vwuo A̱tyia̱ ka, ka̱nang a̱nyuu khwi nung a̱ni bah.

⁷Ka̱ nyi wa lyen nung, si̱ nyi lyen A̱tyia̱ nung wu mameang. Di̱ yong huni si̱ nat á̱zanson, nyi na lyen gu za̱m! A̱wot nyi wa ka̱n di ngguu.”

⁸Huhwa Filibut si̱ nyia̱ ma̱ng Yesu a̱ni, “A̱tyoli, tak ma̱ng a̱nzi̱t A̱tyia̱ wu, gu ka maai nzi̱t shansham.”

⁹Yesu si̱ nwuak Filibut shim hu nyia̱, “N dabeang ma̱ng a̱nyin ba̱t a̱ni. A̱mgba̱m ma̱ng a̱nia, nyi lyen nung baa? Konyan wa li nung, a̱ wa ka̱n di A̱tyia̱ nung wu za̱m! Yihwa mbyia̱ nang a nyia̱, ‘Tak zi̱t A̱tyia̱ wu’?

¹⁰A nwuak a̱chuchuk nyia̱ n shya̱ mami A̱tyia̱ nung wu, A̱tyia̱ nung wu mameang, si̱ shya̱ mami nung baa? A̱lyiat nang n ndyiat ma̱ng a̱nyin a̱ni, n ndyiat naa mi̱ tyok a̱pyia̱ nung hwa bah. A̱tyia̱ nung wa a̱ swan mami nung ka a̱ni; nggu wa ma̱ a̱pyia̱ nggu nyia̱ nta̱m gu.

¹¹Nyi nwuak a̱chuchuk nang n shya̱ mami A̱tyia̱ nung ka; a̱tyia̱ nung wu mameang, si̱ shya̱ mami nung. Kalak ka̱ nyi na nyia̱ a̱nia bah, nyi nwuak a̱chuchuk di̱ nta̱m a̱ga̱de na nang n nyian a̱ni.

¹²“A̱tsatsak a̱lyiat wa nang n shei nyin; konyan wa nwuak fwuo da̱ nung a̱ni, a̱ na nyia̱ nta̱m nang n nyia̱ a̱ni. Shimba, gu nyia̱ nta̱m na̱ swak á̱si̱ na n nyia̱ a̱ni, mat n naat da̱ a̱vwuo A̱tyia̱ nung.

¹³A̱wot n bu na nyia̱ kuzang kyang nang nyi naai mami a̱lyoot nung da̱nian hu a̱ni. N na nyia̱ nyin ndyo, da̱nian A̱tyia̱ nung wu a̱ ka shya̱ a̱kyenkyai shi wu kpa̱sai mat Nggwon ka.

¹⁴Kuzang kyang nang nyi naai mami a̱lyoot nung a̱ni, n na nyia̱ nyin ndyo.”

¹⁵“Ka̱nang nyi chat nung, ku myim nyi khwi doká nung ji.

¹⁶Nung mameang, n na naai da̱ a̱vwuo A̱tyia̱. Nggu meang, a̱ na ta̱m ma̱ng nyin a̱tyu a̱ na beang nyin a̱ni; gu shya̱ dundung ma̱ng a̱nyin ba̱ng si̱ nat sang sangba̱p.

¹⁷Nggu wa yet a̱chuchuk A̱za̱za̱rak Ntswa wu, nang á̱niet mi̱ swanta ba lak san hu a̱ni. Mat ba̱ si̱ mi̱n ndi nggu bah. Da̱ mba, ba̱ si̱ mi̱n dyen gu bah. A̱wot nyin, nyi lyen nggu, mat a̱ swan dundung ma̱ng a̱nyin, a̱ si̱ bu shya̱ mi̱ nfwuo nyin na.

¹⁸“N na ghwon nyin ma̱nyin nyin nang á̱kunak a̱ni bah. N na mbwuok mbai da̱ a̱vwuo nyin.

¹⁹N bwat a̱banjen ma̱ chunchwiit á̱niet mi̱ swanta ba bu na li nung bah. A̱wot nyin, nyi na li nung. Mat nang nung nshya̱ ma̱ng swuan a̱ni; ma a̱nia wa, nyin mameang nyi na nswuan.

²⁰A̱tuk a̱kyakya nang nyi na ndyen nang nung nshya̱ mami A̱tyia̱ nung; nyin, nyi si̱ ma nshya̱ mami nung; nung mameang, n si̱ ma shya̱ mami nyin.

²¹“Konyan wa lyen doká nung ji, a̱wot a̱ si̱ khwi nji a̱ni, nggu wa yet a̱tyu a̱ chat nung a̱ni. A̱tyu a̱ chat nung a̱ni; nggu wa nang A̱tyia̱ nung wu ma na chat. Nung, mameang, n na chat gu, a̱wot n tyai a̱pyia̱ nung kpa̱sai da̱ a̱vwuo nggu.”

²²Yahuda a̱ghyang (kang ma̱ng Yahuda Iska̱riyoti wu), a̱ si̱ lyip Yesu nyia̱, “Nwan A̱tyoli, yihwa mbyia̱ a na ntyai a̱pyia̱ ang da̱ a̱vwuo nzi̱t kya ma̱nyin zi̱t, kang ma̱ng á̱niet mi̱ swanta ba?”

²³Yesu si̱ ma nwuak gu shim nyia̱, “Konyan wa chat nung a̱ni, a̱ na khwi á̱lyiat nung na. A̱wot A̱tyia̱ nung wu na chat gu. Nung ma̱ng A̱tyia̱ nung wu, zi̱ na bai da̱ a̱vwuo nggu, zi̱ swan dundung ma̱ng a̱nggu.

²⁴A̱tyu a̱ nwai chat nung a̱ni mameang, a̱ khwi á̱lyiat nung na bah. Á̱lyiat nung na nang nyi fwuong a̱ni, á̱si̱ nung nia bah; á̱lyiat A̱tyia̱ nia. Nggu wa ta̱m ma̱ng a̱nung mi̱ swanta hu.

²⁵“A̱mgba̱m á̱lyiat nani, n dyiat na neet nang n ni̱ shya̱ dundung ma̱ng a̱nyin.

²⁶A̱wot A̱tyu Beang wu, nggu wa yet A̱za̱za̱rak Ntswa nang A̱tyia̱ wu na ta̱m ndyo da̱ a̱kwonu nung a̱ni[81]; nggu wa na tyiet nyin kuzang kyang. A̱wot a̱ bu jhyung nyin a̱mgba̱m kuzang kyang nang n ka̱n hyia̱ ma̱ng a̱nyin a̱ni.

²⁷“N nang nyin swat nyinyang; swat nyinyang nung huhwa nang n nwuak nyin. N nwuat nyin huu nang swanta hu nnwuat a̱ni bah. Mat a̱nia, nyi yok byia̱ a̱ka̱tuk a̱fi̱fa, ku nyi bu fa̱k a̱wun bah.

²⁸Nyi jhyung n hyia̱ ma̱ nyin nyia̱; n na nat mbwuok mbai da̱ a̱vwuo nyin. Ka̱ nyi wa chat nung, si̱ nyi gwai nang n naat da̱ a̱vwuo A̱tyia̱ nung a̱ni. Mat A̱tyia̱ nung wu shi a̱ lan nung.

²⁹Ma̱ninika, n hyia̱ ma̱ng a̱nyin neet nang nkyang nani ka̱n bai bah. Da̱nian jen nang na̱ bye mbai a̱ni, nyi na nwuak fwuo da̱ nung.

³⁰“N bu si̱ mi̱n dyiat ma̱ng a̱nyin a̱jojoot a̱lyiat bah, mat A̱ta̱nyeang swanta kani[82], ka̱ chobai. A̱mgba̱m ma̱ng a̱nia, ka̱ si̱ mi̱n nyia̱ tyok tazwa nung bah.

³¹Ma̱ng a̱nia, ku myim swanta hu ku lyen nang n chat A̱tyia̱ wu. Huhwa mbyia̱ nang n nyia̱ kuzang kyang cha̱chaat nang gu ntak ma̱ng a̱nung n nyia̱ a̱ni.” “To, nyi bai zi̱ doot zi̱ ghwon a̱vwuo kani!”