Read tyap Yoona 15 Bible Online

Yoona 15 - tyap bible

Yoona 15

¹“Nung gwa ngyet a̱tsatsak a̱kwon a̱na̱p wu. A̱wot A̱tyia̱ nung wa si̱ yet a̱tyu khap wu.

²Kuzang bwak a̱kwon ku shya̱ da̱ nung a̱ni, ka̱ ku tyia̱ sum bah, á̱ na tyap hu á̱ ji̱p. Kuzang bwak a̱kwon ku tyei sum a̱ni, á̱ ni̱ shyok hu da̱nian hu ka mbeang sum hu.

³Nyin ma̱ninika, nyi yet á̱za̱za̱rak á̱niet bya. Mat a̱lyiat na nang n hyia̱ ma̱ng a̱nyin a̱ni.

⁴Nyi ta̱meet da̱ nung; nung mameang n na nta̱meet da̱ nyin. Ma̱nang bwak a̱kwon a̱na̱p si̱ mi̱n tyia̱ sum ma̱nyin hu ka̱nang ku ta̱meet da̱ a̱tyin a̱kwon a̱na̱p ka a̱ni bah; ma a̱nia wa nyin mameang, nyi si̱ mi̱n nyia̱ kyang ma̱nyin nyin, ka̱nang nyi ta̱meet da̱ nung bah.

⁵“Nung gwa ngyet a̱tyin a̱na̱p ka. Nyin bya yet mbwak a̱kwon na. A̱tyu a̱ ta̱meet da̱ nung a̱ni; nung mameang n si̱ nta̱meet da̱ nggu. A̱ na tai a̱kwon ka̱ tyei sum ma̱ a̱di̱di̱t a̱ni. Mat, ka̱ nyi ta̱meet da̱ nung wa bah, nyi maai nyi nyia̱ kyang bah.

⁶Konyan wa da̱ a̱ ta̱meet da̱ nung a̱ni bah, a̱ tai bwak a̱kwon nang á̱ ni̱ tyap á̱ ji̱p ku khwot a̱ni. Á̱nietbishyi ni̱ tung ntangka̱i a̱khwot mbwak a̱kwon a̱nia á̱ ntyia̱ long. Long hu ku ya na a̱mgba̱m.

⁷Ka̱ nyi ta̱meet da̱ nung, a̱wot a̱lyiat nung na si̱ shya̱ mi̱ fwuo nyin na; nyi doot nyi lyip kuzang kyang nang nyi chat a̱ni, á̱ na shim á̱ nyia̱ nyin ndyo.

⁸Ka̱ nyi tyei sum ma̱ a̱di̱di̱t nang A̱gwaza chat a̱ni, nyi na tak nang nyi ngyet a̱tsatsak mman ta̱m nung nia. Nyi tsa bu nshei shi A̱tyia̱ nung hu kpa̱sai.

⁹“Ma̱nang A̱tyia̱ wu nchat nung a̱ni; ma a̱nia wa nang n chat nyin. Ma̱ninika, nyi ya a̱son ma̱ng swan mami chat nang n tak nyin a̱ni.

¹⁰Ka̱ nyi khwi doká nung ji; huhwa na tak nang nyi nchat nung. Ma̱ cha̱chaat nang n khwi doká A̱tyia̱ nung ji, n si̱ ntak si̱sak nang n chat gu a̱ni.

¹¹“N tak ma̱ nyin á̱lyiat nani, da̱nian nyi ka shya̱ ma̱ng a̱gwai nang n byia̱ a̱ni. A̱wot a̱gwai nyin na, na̱ bu yet a̱jhyem a̱gwai wa.

¹²Doka nung ji nang n nwuat nyin a̱ni, jija yet; nyi chat á̱ghyang nyin, ma̱ cha̱chaat di̱ si̱sak nang n chat nyin a̱ni.

¹³A̱gba̱ndang chat nang a̱tyubishyi na tak a̱kpa̱ndang nggu ba a̱ni, huhwa yet; gu nwuak swuan nggu ji da̱nian mbaa.

¹⁴“A̱wot nyi yet á̱kpa̱ndang nung bya, ka̱nang nyi khwi doka ji nang n nwuak nyin a̱ni.

¹⁵N bu si̱ mi̱n mak yorong nyin á̱khwo bah. Mat, á̱khwo lyen kyang hu nang A̱tyoli nggu wu nyia̱ a̱ni bah. Da̱ a̱kwonu a̱kya, n gyei nyin á̱kpa̱ndang bya. Mat n tak ma̱ng a̱nyin a̱mgba̱m nkyang na nang n fa̱k da̱ a̱vwuo A̱tyia̱ nung ka a̱ni.

¹⁶“Nyin bya ku khai nung bah. Nung gwa ku khai nyin. N si̱ ntyia̱ nyin, nyi nat nyi tyei sum ma̱ a̱di̱di̱t. Sum hu ku na labeang a̱ni. Huhwa na mbyia̱, A̱tyia̱ wu a̱ nang nyin a̱mgba̱m nkyang nang nyi naai mami a̱lyoot nung ka a̱ni.

¹⁷Doka ji nang n nwuak nyin a̱ni, ji ja yet; nyi chat á̱ghyang nyin.

¹⁸“Ka̱ á̱niet mi̱ swanta ba lak li nyin, nyi yok bwung bah, ku myim nyi lyen nang ba̱ ntsa lak li nung hu á̱ ghwon nyin.

¹⁹Ka̱ nyi wa yet á̱niet mi̱ swanta bani bya, si̱ á̱niet swanta ba chat nyin nang á̱si̱ mba a̱ni. Nung gwa khai nyin ghwut ndyo mi̱ swanta hu. Huhwa mbyia̱ nang á̱niet mi̱ swanta ba ndak li nyin hu.

²⁰Nyi jhyung nkyang na nang n ku hyia̱ ma̱ng a̱nyin a̱ni; nyi yok bwung bah. N ku nyia̱, ‘A̱khwo si̱ mi̱n shya̱ shi a̱ swak a̱tyoli nggu bah.’ Ka̱ ba̱ lak li nung, ba̱ si̱ ya̱shuk nung; nyin mameang, ba̱ na lak li nyin, ba̱ ya̱shuk nyin. Ka̱ ba̱ wa ku khwi á̱lyiat nung na, si̱ ba̱ na khwi á̱lyiat nyin na mameang.

²¹“Ba̱ na nyia̱ nyin a̱ka̱kpa̱t, mat nyi yet a̱si̱ nung bya. A̱wot ba̱ bu lyen a̱tyu a̱ ta̱m ma̱ng a̱nung a̱ni bah.

²²Ka̱ n wa ku ngyok bai n si̱ ndyiat ma̱ng a̱mba bah; si̱ ba̱ yet á̱niet bwoi a̱bun bya. Nang ku ndi a̱nia a̱ni, di̱ yong huni ba̱ byia̱ ta̱fwat kyang tazwa a̱ka̱tuk nyia̱ mba wu bah.

²³Konyan wa lak li nung, a̱ lak li A̱tyia̱ nung wu wa oo!

²⁴“N ku nyia̱ nkyang a̱ga̱de ma̱ a̱di̱di̱t a̱zaghyi mba. Mami mba, á̱ mbyia̱ a̱tyu a̱ ka̱ mak nyia̱ na a̱ni bah. Ka̱ á̱ wa nyia̱, di̱ n wa nyia̱ nkyang a̱ga̱de a̱nia a̱zaghyi mba bah; si̱ ba̱ byia̱ a̱bun bah. A̱wot ma̱ninika, ba̱ li kyang hu nang n nyia̱ a̱ni. A̱mgba̱m ma̱ng a̱nia, ba̱ si̱ lak li nung, á̱ tsa bu ndak li A̱tyia̱ nung wu.

²⁵“Kyang hu ba̱ nyia̱ a̱ni, ku ku bai da̱ a̱nu ka ma̱ cha̱chaat ma̱ng kyang nang á̱ ku lyuut mami doka mba ji a̱ni nyia̱, ‘Ba̱ ku lak li nung ma̱ kpa̱a̱t. Da̱ mba, ba̱ byia̱ ta̱fwat bah.’[83]

²⁶“A̱wot n na ntyia̱ A̱tyu Beang gu bai da̱ a̱vwuo nyin. A̱ na neet da̱ a̱vwuo A̱tyia̱. Nggu wa yet A̱za̱za̱rak Ntswa a̱ shei a̱chuchuk wu a̱ni. Nggu, a̱ na neet da̱ a̱vwuo A̱tyia̱ kya. Nggu wa na tak nyin kpa̱sai tazwa nung.

²⁷A̱wot nyin mameang, ku yet ta hwa nyi na shei kpa̱sai a̱chuchuk wu nang nyi lyen tazwa nung a̱ni. Mat nyi shya̱ dundung ma̱ng a̱nung neet di̱ tsa a̱tyin ta̱m nung ka.