Read tyap Yoona 16 Bible Online

Yoona 16 - tyap bible

Yoona 16

¹“N shei nyin a̱mgba̱m nkyang nani, da̱nian nyi ka bwuok lilyim da̱ nwuak fwuo nyin hu da̱ nung bah.

²Ba̱ na ti̱n nyin, á̱ ghwut ndyo mami á̱tutu a̱tung A̱yahudawa ba. A̱wot jen bye bai, nang á̱ghyang á̱niet na nhyaai nyin. Ba̱ nyia̱, ba̱ nyia̱ A̱gwaza wa ta̱m!

³Ba̱ na nyia̱ a̱nia, mat ba̱ ka̱n dyen A̱tyia̱ wu ma̱ng a̱nung bah.

⁴Huhwa mbyia̱ n shei nyin á̱lyiat nani, da̱nian ka̱ jen ji ba̱ nyia̱ nang á̱niet ba na nnyia̱ nkyang nani a̱ni; nyi ka jhyung nyi lyen nang n ku mi̱ ngba nyin da̱ na. N ku nhyia̱ ma̱ng a̱nyin nkyang nani neet di̱n tsa hu bah, mat n ku shya̱ dundung ma̱ng a̱nyin.

⁵“A̱wot di̱ yong huni, ma̱ninika n bwuot naat da̱ a̱vwuo a̱tyu a̱ ta̱m nung a̱ni. Ma̱ng a̱nia, a̱yin du lyip nung, ‘A̱ji wa nang a naat?’ bah.

⁶A̱wot ma̱ninika nang n tak ma̱ng a̱nyin á̱lyiat nani a̱ni, nfwuo nyin na si̱ byian.

⁷A̱wot, n shei nyin a̱chuchuk; ka̱ n ghwon nyin, ku na yet nyin a̱sham za̱m. Mat, ki̱ n nkat n si̱ ghwon nyin bah, A̱tyu Beang[84] wu[85] na bai da̱ a̱vwuo nyin bah. Huhwa mbyia̱, ka̱ n nkat, n na nta̱m ma̱ng a̱nyin guu.

⁸Jen ji nang A̱tyu Beang wu na mbai a̱ni, a̱ na tak á̱niet mi̱ swanta ba nang a̱di̱dam mba wu ngyet bah; tazwa a̱ka̱tuk nyia̱, ma̱ng tsotswat, mbeang shi̱ri̱ya.

⁹“A̱tyu Beang na tyiet mba nang a̱di̱dam mba wu tazwa a̱ka̱tuk nyia̱ ngyet bah. Mat ba̱ lak nwuak fwuo da̱ nung.

¹⁰“A̱ bu na tyiet mba tazwa tsotswat hu. Mat n naat da̱ a̱vwuo A̱tyia̱ nung ka; da̱ nyin, nyi bu na li nung bah.

¹¹“A̱wot a̱ bu na tyiet mba tazwa nyia̱ shi̱ri̱ya. Mat á̱ wa ka̱n nyia̱ A̱ta̱nyeang swanta ka[86] shi̱ri̱ya.

¹²“N byia̱ nkyang ma̱ a̱di̱di̱t nang n na hyia̱ ma̱ng a̱nyin a̱ni. A̱wot ma̱ninika nyi si̱ mi̱n ba̱ng na bah.

¹³Mat a̱nia, ka̱ A̱za̱za̱rak Ntswa a̱ yet a̱chuchuk a̱ni bai, a̱ na kwak nyin a̱son di̱ kuzang a̱chuchuk. A̱lyiat a̱pyia̱ nggu nia gu na lyiat bah. A̱ na lyiat kyang nang gu fwuong wa a̱ni. A̱wot a̱ bu na tak ma̱ng a̱nyin nkyang na̱ na bai á̱zanson a̱ni.

¹⁴A̱ bye nnwuak nung shi, da̱nian á̱lyiat nung nia gu bye hyia̱ ma̱ng a̱nyin.

¹⁵A̱mgba̱m nkyang nang A̱tyia̱ wu byia̱ a̱ni, si̱ nung nia. Huhwa mbyia̱ nang n nyia̱ A̱za̱za̱rak Ntswa wu na kyiak kyang hu nang n hyia̱ a̱ni, a̱ tak nyin.

¹⁶“Á̱ na labeang bah, nyi na chat nung lyin. A̱wot á̱ bu na labeang bah, nyi bu li nung.”

¹⁷Huhwa mman ta̱m nggu á̱ghyang nyia̱ ma̱ng á̱ghyang mba, “Yihwa nang gu fa nang gu nyia̱ ma̱ng a̱nzi̱t; ‘Á̱ na labeang bah, nyi na chat nung lyin, á̱ bu labeang bah, nyi bu na li nung?’ ” A̱wot ba̱ si̱ bu lyip á̱ghyang, “Yihwa nang gu fa a̱ naat da̱ a̱vwuo A̱tyia̱ wu?”

¹⁸A̱wot ba̱ si̱ bu lyip á̱ghyang, nyia̱ “Yihwa nang gu fa nang gu nnyia̱, ‘Á̱ na labeang bah?’ Zi̱ fi̱k kyang hu nang gu lyiat a̱ni bah.”

¹⁹Yesu ku lyen nang mman ta̱m nggu na nchat ba̱ lyip gu kyang gu fa tazwa á̱lyiat nani a̱ni. Huhwa gu si̱ nyia̱ ma̱ng a̱mba, “Nyi lyi̱ri̱m á̱ghyang nyin tazwa a̱lyiat nang n hyia̱, ‘Á̱ na labeang bah, nyi na li nung bah; á̱ bu na labeang bah, nyi na li nung’ a?

²⁰“N chat n tak ma̱ng a̱nyin a̱chuchuk; nyi na twei, nyi shya̱ byian fwuo. A̱mgba̱m ma̱ng a̱nia, á̱niet mi̱ swanta ba na shya̱ ma̱ng a̱gwai. Nyi na shya̱ byian fwuo. A̱wot byian fwuo nyin ji na tyia̱ a̱gwai.

²¹Ka̱ a̱byii̱k nwuo twei ma̱ng byin, a̱ ni̱ fa̱k a̱khwu za̱m, mat jen swuo a̱bung ja yet twei ma̱ng byin hu. A̱wot ka̱ a̱ ba̱ byin nggwon ka, a̱ si̱ tyia̱ ka̱nka̱ra̱ng a̱ tyak, a̱ na bwung swuo a̱bung hu ma̱ng a̱khwu nang gu ku fa̱k a̱ni. Mat a̱ shya̱ ma̱ng a̱gwai, mat nggwon ka nang gu byin a̱ mat mi̱ swanta hu a̱ni.

²²A̱nia wa ku na ndi da̱ a̱vwuo nyin. Ma̱ninika, nyi shya̱ ma̱ng byian fwuo. A̱mgba̱m ma̱ng a̱nia, n bu na ndi nyin. A̱wot a̱yin si̱ mi̱n ti̱n nyin a̱gwai a̱nia bah.

²³“A̱tuk a̱kya, nyi si̱ ba̱ lyip nung kyang bah. N tak ma̱ng a̱nyin a̱chuchuk; a̱tyia̱ nung wu na nang nyin a̱mgba̱m kyang hu nang nyi lyip mami a̱lyoot nung a̱ni.

²⁴Ba̱ tat nang yong huni a̱ni, nyi ka̱n dyip kyang da̱ a̱lyoot nung bah. Nyi lyip, nyi na san, da̱nian a̱gwai nyin na na̱ ka yet a̱jhyem.

²⁵“N ku ndyiat ma̱ng a̱nyin di̱ kidee ja, da̱nian n ka ntyai nyin nkyang nani. A̱wot jen chobai nang n bye ndyiat ma̱ng a̱nyin kuzang kyang kpa̱sai tazwa A̱tyia̱ nung wu a̱ni. N bu bye ndyiat ma̱ng a̱nyin di̱ kidee bah.

²⁶A̱tuk a̱kya, nyi na naai da̱ a̱lyoot nung. Nyi na naai A̱tyia̱ ma̱ á̱pyia̱ nyin. Nung gwa na naai nyin ndyo bah.

²⁷“Nggu A̱tyia̱ wu fa̱k da̱ nyin ma̱ a̱pyia̱ nggu, mat si̱sak nang nyi nfa̱k da̱ nung a̱ni, a̱wot nyi si̱ bu nwuak a̱chuchuk nang n neet da̱ a̱vwuo gu kya.

²⁸N ghwut neet da̱ a̱vwuo A̱tyia̱ kikya, n si̱ mbai mi̱ swanta hu. A̱wot ma̱ninika, n na ghwon swanta hu, n bwuok nat da̱ a̱vwuo A̱tyia̱ nung ka.”

²⁹Huhwa mman ta̱m Yesu na si̱ nyia̱ ma̱ng a̱nggu a̱ni, “Nhyii! Ma̱nini kya nang a ndyiat ma̱ng a̱nzi̱t kpa̱sai. A bu lyiat ma̱ng a̱nzi̱t di̱ kidee bah.

³⁰Ma̱nini kikya nang zi̱ nfi̱k nang a ndyen kuzang kyang ka̱ doot a nwuak shim nang a̱yin ka̱n dyip ang kyang bah. Si̱ huni tyia̱ zi̱ si̱ nwuak a̱chuchuk nang a neet Ma A̱gwaza tswazwa kya.”

³¹Yesu si̱ nyia̱, “Ma̱nini kya nang nyi mang nwuak a̱chuchuk a?

³²To, ka̱ a̱nia wa, jen na bai, di̱ yong huni ji wa ka̱n nyia̱, nang á̱ na nseang nyin! Konyan a̱ bwuok a̱ nat a̱mali nggu, nyi ghwon nung ma̱nyin nung! Ma̱ng a̱nia, nung gwa ma̱nyin nung bah; a̱tyia̱ nung wu shya̱ dundung ma̱ng a̱nung.

³³“N wa ka̱n tak ma̱ng nyin nkyang nani, da̱nian nyi ka shya̱ dundung ma̱ng a̱nung. Nyi na shya̱ swat nyinyang. Mi̱ swanta hu nyi na swuo a̱bung. Ma̱ng a̱nia, nyi gwai, mat n wa ka̱n swuo chet swanta hu!”