Read tyap Yoona 17 Bible Online

Yoona 17 - tyap bible

Yoona 17

¹Nang Yesu ntyak á̱lyiat nani a̱ni, huhwa gu si̱ gba̱t á̱ghyi, a̱ si̱ nwuan Ma A̱gwaza tswazwa. A̱ si̱ naai nyia̱, “A̱tyia̱ nung, jen nyia̱. Nwuak nggwon ang ka shi; nka mameang, ka̱ ma nwuak ang shi.

²A nwuak Nggwon ang ka tyok tazwa a̱mgba̱m á̱niet ba. Da̱nian ka̱ ka nnwuak á̱niet ba nang a nwuak nka a̱ni swuan sang sangba̱p.

³“Swuan sang sangba̱p jini ja yet; á̱niet ba ba̱ lyen ang, nang nwan wa ma̱nyin ang ngyet a̱tsatsak A̱gwaza wu, ma̱ng Yesu Kristi, a̱tyo nang a ku nta̱m ndyo mi̱ swanta hu a̱ni.

⁴“N wa ka̱n nwuak ang shi mi̱ swanta hu, mat si̱sak ji nang n ku ntyak ta̱m hu nang á̱ ku nwuak nung n nyia̱ a̱ni.

⁵A̱wot ma̱ninika, A̱tyia̱ nung, bu nwuak nung a̱kyenkyai shi nang n ku mbyia̱ a̱zaghyi ang, neet nang á̱ ka̱n mat swanta hu a̱ni bah.

⁶“N wa ka̱n tyai za̱kwa[87] ang ji da̱ a̱vwuo á̱niet nang a nwuak nung mi̱ swanta hu a̱ni. Neet a̱fwun bah, ba̱ yet á̱niet ang bya. Mat a̱nia, a si̱ nwuak nung mbaa. Mba mameang, ba̱ si̱ khwi a̱lyiat ang na.

⁷A̱wot ma̱ninika ba̱ lyen nang kuzang kyang nang a nang nung a̱ni, ku neet da̱ a̱vwuo ang kya.

⁸A̱lyiat na nang a ku hyia̱ ma̱ng a̱nung nyia̱ n si̱ hyia̱ ma̱ng mba a̱ni; n ku hyia̱ ma̱ng a̱mba, ba̱ si̱ san. Ba̱ lyen za̱m nang nung n neet da̱ a̱vwuo ang kya. A̱wot ba̱ si̱ nwuak a̱chuchuk nang nwan wa ta̱m nung.

⁹“N naai ang da̱nian mbaa. N naai da̱nian á̱niet ba̱ yet á̱niet swanta bya a̱ni bah. A̱wot n naai da̱nian á̱niet nang a nwuak nung, mat ba̱ bu tsa á̱ ngyet á̱si̱ nwan bya a̱ni.

¹⁰A̱mgba̱m á̱niet ba ba̱ yet á̱si̱ nung a̱ni, á̱si̱ nwan bya. A̱wot a̱mgba̱m á̱niet ba nang a byia̱ a̱ni, á̱si̱ nung bya. A̱wot bibya shei a̱kyenkyai shi nung wu.

¹¹“A̱wot ma̱ninika, n bwuot chobai da̱ a̱vwuo ang. N bu na swan mi̱ swanta huni bah. Bibya ni̱ ya nswan mi̱ swanta hu. Nwan A̱za̱za̱rak A̱tyia̱ nung! Chok ba ma̱ng tyok a̱lyoot ang nhu; a̱lyoot ka nang a ku tyia̱ nung da̱nian ba̱ ka mun á̱pyia̱ ma̱ng á̱ghyang; ma̱ cha̱chaat nang nwan ma̱ng a̱nung, zi̱ mmun á̱pyia̱ ma̱ng á̱ghyang a̱ni.

¹²Nang n ku nshya̱ dundung ma̱ng a̱mba a̱ni, n ku nchok ba mi̱ chet a̱lyoot ang hu; a̱lyoot ka nang a ku tyia̱ nung a̱ni. N si̱ nkeang mba ntyia̱, á̱ si̱ byia̱ a̱tyu a̱ bwuk a̱ni bah; a̱tyo nyiung wa ma̱nyin nggu ku bwuk. A̱ ku bwuk wa ma̱nang á̱ ku ndyuut mami A̱lyiat A̱gwaza na a̱ni, ku si̱ bai ma̱ cha̱chaat da̱ a̱nu ka.

¹³“Ma̱ninika n chobai da̱ a̱vwuo ang. A̱wot n tak ma̱ng a̱mba nkyang nani neet nang n ni̱ shya̱ mi̱ swanta hu. Da̱nian á̱niet khwi nung ba, ba̱ ka shya̱ a̱jhyem a̱gwai nung wu mi̱ nfwuo mba na.

¹⁴N si̱ ntak ma̱ng a̱mba A̱lyiat ang na. A̱wot á̱niet mi̱ swanta ba si̱ lak li mbaa, mat ba̱ yet á̱niet mi̱ swanta bya bah; ma̱nang nung n nwai ngyet a̱tyu mi̱ swanta wu a̱ni.

¹⁵N naai ang da̱nian a ka kyiak ba ghwut ndyo mi̱ swanta huhwa bah. N naai da̱nian a ka chok ba wa, kalak A̱ta̱nyeang ka ka̱ bwuk ma̱ng mba.

¹⁶Ba̱ yet á̱si̱ mi̱ swanta bya bah, ma̱nang nung n nwai ngyet a̱tyu mi̱ swanta wu a̱ni.

¹⁷“Ja̱u mba ma̱ng a̱chuchuk wu, a̱wot a bu tyiet mba á̱lyiat ang na; ni̱nia yet a̱chuchuk wu.

¹⁸Ma̱nang a nta̱m nung mi̱ swanta hu a̱ni; a̱nia wa n ma nta̱m mba mi̱ swanta hu.

¹⁹Mat bibya mbyia̱ n ja̱u a̱pyia̱ nung di̱ nyia̱ ta̱m, da̱nian mba mameang á̱ ka ja̱u mbaa ba̱ nyia̱ ta̱m shansham mami a̱chuchuk.

²⁰“Á̱niet bani bya ma̱nyin mba nang n naai ba ndyo bah. N naai tazwa a̱mgba̱m á̱niet ba̱ na nwuak fwuo da̱ nung, mat A̱lyiat A̱gwaza nang á̱niet bani na shei ma̱ng a̱mba a̱ni.

²¹A̱tyia̱ nung, n naai da̱nian a̱mgba̱m á̱niet khwi ba ba̱ mun á̱pyia̱ ma̱ng á̱ghyang, ma̱nang nwan ma̱ng a̱nung zi̱ mun á̱pyia̱ ma̱ng á̱ghyang a̱ni. N naai da̱nian mba mameang; ba̱ na mun á̱pyia̱ ma̱ng a̱nzi̱t da̱nian á̱niet mi̱ swanta ba na nwuak a̱chuchuk nang nwan wa nta̱m nung mi̱ swanta hu.

²²“Nung, n nwuak á̱niet a̱bya shi nang a nwuak nung a̱ni. Da̱nian ba̱ ka mun á̱pyia̱ ma̱ng á̱ghyang; ma̱nang nung ma̱ng a̱nwan, zi̱ mun á̱pyia̱ ma̱ng á̱ghyang a̱ni.

²³N na swan dundung ma̱ng a̱mba; nwan mameang, a ma nswan dundung ma̱ng a̱nung. Yok ba̱ mun á̱pyia̱ za̱m, ku na tyia̱ á̱niet ma̱ a̱di̱di̱t mi̱ swanta hu ba̱ lyen nang nwan wa nta̱m nung; a̱wot ba̱ bu lyen nang a nchat ba ma̱ cha̱chaat nang a nchat nung a̱ni.

²⁴“A̱tyia̱ nung, n chat á̱niet bani nang a nwuak nung a̱ni, ba̱ swan dundung ma̱ng a̱nung di̱n tyan nang a[88] nshya̱ a̱ni, da̱nian ba̱ ka li a̱kyenkyai shi ang wu, nang a ku nwuak nung a̱ni. A ku chat nung neet nang a ka mat swanta hu bah.

²⁵“A̱tsotswat A̱tyia̱ nung, á̱niet mi̱ swanta ba lyen ang bah. A̱wot nung, n dyen ang. Á̱niet bani mameang, ba̱ si̱ lyen nang nwan wa nta̱m nung.

²⁶N si̱ ntyai mba si̱sak ji nang za̱kwa ang ji ndi a̱ni. A̱wot n bu na ngya a̱son ma̱ng tyai mba ndyo hu. Da̱nian mba, ba̱ ma nshya̱ tangka̱i chat nang a tak nung a̱ni; nung mameang, n swan dundung ma̱ng a̱mba.”