Read tyap Yoona 18 Bible Online

Yoona 18 - tyap bible

Yoona 18

¹Nang Yesu ntyak naai hu a̱ni, a̱ si̱ ghwut ma̱ng mman ta̱m nggu na. Ba̱ si̱ byia̱k chen Kidron. Da̱ ma̱nyii chen a̱kya, sop a̱ka̱kwon za̱itun ku nshya̱, Yesu ma̱ng mman ta̱m nggu na, ba̱ si̱ nwuo ma̱ a̱byin ka.

²Yahuda, a̱bang a̱byin wu, ku lyen a̱vwuo ka, mat kuzang jen Yesu ku chong mi̱ mman ta̱m nggu na a̱ja.

³Huhwa Yahuda si̱ kin doot a̱ si̱ bwuo á̱niet nzwang ma̱ng á̱niet chok A̱li Nwuat Za̱nang A̱gwaza ba, nang a̱cha̱chet pris ma̱ng A̱fa̱risawa ku ta̱m a̱ni; ba̱ si̱ nat ma̱ a̱byin ka. Ba̱ si̱ ba̱ng long sang ma̱ng a̱ka̱fi̱t ndong. Ba̱ si̱ mbeang nkyang nzwang.

⁴Yesu mameang ku lyen a̱mgba̱m kyang hu ku na shya̱ nggu a̱ni. Huhwa si̱ mbyia̱ a̱ si̱ ghwut mami mman ta̱m nggu na a̱ bai a̱zanson. A̱ si̱ nyia̱ ma̱ng a̱mba, “A̱nyan wa nang nyi chat?”

⁵Ba̱ si̱ ma shim nggu ndyo nyia̱, “Yesu, A̱tyu Na̱za̱ra̱t wa!” Yesu si̱ nyia̱ ma̱ng a̱mba, “Di, nung gwa[89] wu!” (Yahuda a̱bang a̱byin wu a̱ na bwuk ma̱ng Yesu a̱ni, nang gu yong dundung ma̱ng a̱mba a̱ja.)

⁶Nang Yesu nnyia̱ ma̱ng a̱mba “Di, nung gwa[90] wu” a̱ni, a̱mgba̱m mba ba̱ si̱ kin tuk lilyim, ba̱ si̱ shyot á̱ kwa̱i a̱byin!

⁷Yesu si̱ bu lyip ba a̱ka̱feang nyia̱, “A̱nyan wa nang nyi chat la?” Ba̱ si̱ bu nwuak gu shim nyia̱, “Yesu A̱tyu Na̱za̱ra̱t!”

⁸Yesu si̱ bu nyia̱ ma̱ng a̱mba a̱ni, “N wa ka̱n tak ma̱ng a̱nyin; nung gwa ngyet gu[91]. Ka̱nang nung gwa nang nyi chat, yok á̱niet bani ba̱ nkat.”

⁹Yesu ku hyia̱ a̱lyiat nani, da̱nian na̱ ka nat cha̱chaat ma̱ng a̱lyiat na nang gu ku mi̱ nhyia̱ ma̱ng a̱mba nyia̱, “A̱tyia̱, mami á̱niet ba nang a nwuak nung a̱ni; a̱tyo nyiung ma̱ng a̱mba, na bwuk bah.”

¹⁰Nang Siman Bitut shya̱ ma̱ng tswat, a̱ si̱ tyap a̱khwo a̱gba̱ndang pris wu fufwuo mbwak yak hu a̱ ti̱n. A̱khwo wu, á̱ ku ngyei nggu Ma̱lkut.

¹¹Huhwa Yesu si̱ nyia̱ ma̱ng Bitut a̱ni, “Bwuok ma̱ng tswat ang ji, a tyia̱ mi̱n kwa nji hu! A fa n na swuo ma̱ a̱kashyi swuo a̱bung wu nang A̱tyia̱ wu nang nung a̱ni baa?”

¹²Sot á̱niet nzwang, mbeang a̱kwak a̱son mba wu, ma̱ng á̱niet chok a̱cha̱chet A̱yahudawa si̱ kin bai. Ba̱ si̱ ba̱ ta̱bat Yesu, ba̱ si̱ la̱p gu.

¹³Mi̱ di̱ tsa hu ba̱ si̱ ya nnat ma̱ng a̱nggu da̱ a̱vwuo Hanana, a̱ ku yet a̱kwang Ka̱yafat wa. Ka̱yafat mameang, nggu wa ku yet a̱gba̱ndang pris wu ma̱ a̱lyia̱ a̱kya.

¹⁴Nggu, Ka̱yafat wa ku tyiet A̱yahudawa ba nyia̱; ku yet a̱sham ba̱t a̱tyo nyiung wa a̱ khwu a̱kwonu á̱kum á̱niet ka.[92]

¹⁵Siman Bitut ma̱ng á̱ghyang á̱niet mami mman ta̱m Yesu á̱ghyang si̱ khwi nggu lilyim. Nggwon ta̱m Yesu a̱kya, a̱gba̱ndang pris wu ku lyen ka shansham. Nka mameang, ka̱ ku nwuo mi̱n didyaat gaat a̱gba̱ndang pris ji dundung ma̱ng Yesu.

¹⁶A̱wot Bitut si̱ yong a̱ta̱usa a̱zanunyuo. Nggwon ta̱m a̱nyiung ka nang a̱gba̱ndang pris wu lyen shansham a̱ni, ka̱ si̱ ghwut a̱ nat ta̱usa. Ka̱ si̱ lyiat ma̱ng nggwon neam ka̱ chok a̱zanunyuo ka a̱ni, ka̱ nwuo ma̱ng Bitut mami gaat ji.

¹⁷Nggwon neam ka ka̱ yong a̱ cham a̱na̱nyuo ka a̱ni, si̱ nyia̱ ma̱ng Bitut a̱ni, “Nwan, a yet a̱tyo nyiung mi̱ mman ta̱m a̱tyu nani baa?” Bitut si̱ nwuak ka shim nyia̱, “Kaai! Nung gwa bah!”

¹⁸Di̱n jen a̱ja a̱vwuo ka ku shi̱ri̱m. Mat a̱nia á̱niet nta̱m ma̱ng á̱niet chok A̱li Nwuat Za̱nang A̱gwaza ba si̱ kai long ma̱ng chan. Ba̱ si̱ yong á̱ keang long hu á̱ wa̱i. Bitut mameang, si̱ nat a̱ si̱ yong dundung ma̱ng a̱mba, a̱ wa̱i long hu.

¹⁹A̱gba̱ndang pris si̱ lyi̱ri̱m Yesu a̱lyiat tazwa mman ta̱m nggu na ma̱ng nkyang nang gu tyiet a̱ni.

²⁰Yesu si̱ nyia̱, “N ku ndyiat kpa̱sai a̱zaghyi konyan. N si̱ bu ngyong mi̱ di̱ tyiet á̱niet ba ma̱ á̱tutu a̱tung, ma̱ng A̱li Nwuat Za̱nang A̱gwaza, nang a̱mgba̱m A̱yahudawa ba ni̱ ntung a̱ni. N ka̱n mak lyiat kyang da̱ bang bah.

²¹Yihwa mbyia̱ nang nyi ndyi̱ri̱m nung? Nyi lyi̱ri̱m á̱niet ba ba̱ fwuong á̱lyiat nung na a̱ni, mat ba̱ lyen kyang hu nang n ndyiat a̱ni.”

²²Nang Yesu nhyia̱ a̱nia a̱ni, huhwa a̱tyo nyiung ma̱ á̱niet chok a̱vwuo ba si̱ lwi nggu. A̱ si̱ nyia̱ “Yihwa a ndyiat a̱nia ma̱ng a̱gba̱ndang pris wu?!”

²³Yesu si̱ nwuak gu shim nyia̱, “Ka̱ n hyia̱ kyang da̱ ku yet a̱ni bah, tak ma̱ng konyan a̱ji kyang hu n hyia̱ a̱ni. A̱wot ka̱ n hyia̱ a̱chuchuk mami kyang nang n dyiat a̱ni; yihwa mbyia̱ a ndwi nung?”

²⁴Huhwa Hanana si̱ tyia̱, á̱ si̱ ta̱m ma̱ng Yesu ma̱ng la̱p hu da̱ a̱vwuo Ka̱yafat.

²⁵Ba̱ng ba̱ tat di̱ yong huni, Bitut ni̱ wa̱i long hu. Huhwa á̱ghyang á̱niet si̱ nyia̱ ma̱ng a̱nggu a̱ni, “N gyei a yet a̱tyo nyiung mami mman ta̱m a̱tyu nani a?” A̱jawa Bitut si̱ bu fwuo nyia̱, “Kaai, n shya̱ ma̱ng a̱mba bah!”

²⁶A̱tyo nyiung mami á̱khwo a̱gba̱ndang pris wu ku shya̱ a̱ja. A̱ ku kwon byin ma̱ng a̱tyu nang Bitut ku tyap gu fufwuo hu a̱ni, si̱ nyia̱, “N gyei n ku ndi ang dundung ma̱ng a̱tyu wuni ma̱ a̱byin kaa?”

²⁷Huhwa Bitut si̱ bu fwuo nyia̱, “Kaai!” Mi̱ di̱ yong a̱hwa, a̱gbak si̱ kin tyiap!

²⁸Ma̱ a̱tsotson a̱tson, ba̱ si̱ ghwut ma̱ng Yesu neet a̱mali Ka̱yafat. Ba̱ si̱ nat ma̱ng a̱nggu ma gwomna A̱romawa. Nang ba̱ si̱ ntat kpa̱mkpaan ma̱ng ma gwomna ka a̱ni, ba̱ si̱ lak nwuo hu nyia̱; kalak ba̱ kyiak á̱pyia̱ mba a̱na̱ndyung á̱ na vwuong ba nat kpa̱mkpaan ma̱ng A̱gwaza a̱ni; a̱wot á̱ bu vwuong ba ya nkyayak A̱yet Ghwut Mman Isi̱rela mi̱ Khwo.

²⁹Huhwa ku mbyia̱ gwomna Bilatut si̱ ghwut a̱ nat a̱ta̱usa, a̱ si̱si̱ shya̱ mba. A̱ si̱ lyip ba nyia̱, “Zang a̱hyiak nia nang nyi mbat a̱tyu wuni?”

³⁰Huhwa ba̱ si̱ nwuak gu shim nyia̱, “Ka̱ a̱tyu wuni wa yok bwuo a̱bun bah, si̱ zi̱ bai ma̱ng a̱nggu da̱ a̱vwuo ang ka bah!”

³¹Gwomna Bilatut si̱ nyia̱ ma̱ng a̱mba, “Nyi nat ma̱ng a̱nggu ma̱ á̱pyia̱ nyin! Nyi nyia̱ gu shi̱ri̱ya ji cha̱chaat ma̱ng doka nyin ji!” Huhwa A̱yahudawa ba si̱ nyia̱ ma̱ng a̱nggu a̱ni, “Á̱ nwuak zi̱t chet zi̱ faat a̱yin shi̱ri̱ya a̱khwu bah!”

³²(A̱lyiat nani ku bai da̱nian na̱ ka nat ma̱ cha̱chaat ma̱ng kyang nang Yesu ku tak á̱zanson di̱n jen nang gu ku ntyai tangka̱i a̱khwu nang gu na khwu a̱ni.)[93]

³³Huhwa gwomna Bilatut si̱ kin bwuok a̱ nwuo mi̱ gaat tyok ji. A̱ si̱ yorong Yesu, a̱ si̱ lyip gu nyia̱, “Nwan wa yet a̱gwam A̱yahudawa wu a?”

³⁴Yesu si̱ nwuak gu shim nyia̱, “Lyip huni yet si̱ a̱pyia̱ ang hwa; ke á̱ghyang á̱niet bya lyiat ma̱ng a̱nwan tazwa nung?”

³⁵Bilatut si̱ nwuak Yesu shim nyia̱, “A lyen nung n gyet a̱tyu A̱yahudawa bah. Á̱niet ang bibya ma̱ng a̱cha̱chet a̱yaapris ba; bibya bai ma̱ng a̱nwan da̱ a̱vwuo nung ka! Yihwa nang a nyia̱?”

³⁶Yesu si̱ ma nwuak Bilatut shim hu nyia̱, “Tyok nung hu yet si̱ mi̱ swanta huni hwa bah. Ka̱ tyok nung hu wa yet si̱ mi̱ swanta huni hwa, si̱ á̱niet ba̱ nyia̱ nung nta̱m a̱ni, na nyia̱ zwang da̱nian nung, ba̱ nvwuong á̱ tyia̱ nung bwak a̱cha̱chet A̱yahudawa ba.”

³⁷Huhwa gwomna Bilatut si̱ nyia̱, “A yet a̱gwam wa a?” Yesu si̱ ma nwuak gu shim nyia̱, “A hyia̱ cha̱chaat nang ngyet a̱gwam wa. Á̱ ku byin nung, á̱ si̱ ta̱m ma̱ng a̱nung mi̱ swanta hu, mat kyang nyiung hwa, huhwa yet; n tak ma̱ng á̱niet ba a̱chuchuk wu kpa̱sai. A̱wot konyan wa khwi a̱chuchuk wu, a̱ ni̱ myiai a̱fufwuo a̱ fa̱k nung.”

³⁸Gwomna Bilatut si̱ lyip Yesu nyia̱, “Yihwa yet a̱chuchuk wu?” Nang Bilatut ndyip lyip huni a̱ni, a̱ si̱ bu ghwut a̱ nat a̱ta̱usa da̱ a̱vwuo a̱cha̱chet A̱yahudawa ba.

³⁹A̱ si̱ nyia̱ ma̱ng a̱mba a̱ni, “Nung, n shya̱ a̱tyu wuni ma̱ng a̱bun bah. A̱wot, nyi byia̱ taada jhyang nang nyi ni̱ nyia̱ a̱ni; ka̱ A̱yet Ghwut Mman Isi̱rela mi̱ Khwo bai, nyi ni̱ naai nung n ti̱n nyin a̱tyo nyiung mi̱ khwo ba nang á̱ la̱p a̱ni ghwon. Ka̱ a̱nia wa, nyi chat n byii̱k nyin a̱gwam A̱yahudawa wu a?”

⁴⁰Ba̱ si̱ koot a̱gugwong, nyia̱, “Kaai, a̱tyo wuni wa a na byii̱k kai ghwon bah! Zi̱ chat a byii̱k zi̱t Ba̱ra̱bat wa!” Ba̱ra̱bat wa ku yet a̱tyu a̱ chat ta̱gurup tyok A̱romawa hu a̱ni.