Read tyap Yoona 2 Bible Online

Yoona 2 - tyap bible

Yoona 2

¹A̱tuk mam tat si̱ kaat a̱ bai, á̱ si̱ nyia̱ nyeang ma̱ a̱keang Kana ka̱ shya̱ mi̱ fam a̱byin Ga̱lili a̱ni. A̱yang byin Yesu si̱ nat nyeang hu,

²á̱ ku mun á̱ hyia̱ ma̱ng Yesu nyeang hu. A̱ si̱ nat dundung ma̱ng mman ta̱m nggu na.

³Jen nang á̱ nswuo a̱nya̱nyiat a̱sa̱khwot a̱na̱p wu á̱ tyak a̱ni, a̱jawa a̱yang byin Yesu wu si̱ nyia̱ ma̱ng a̱nggu a̱ni, “Ba̱ swuo a̱nya̱nyiat a̱sa̱khwot a̱na̱p wu á̱ tyak.”

⁴Yesu si̱ nyia̱ ma̱ng a̱yang byin nggu wu a̱ni, “A̱yang, a̱lyiat nani yet a̱si̱ nwan nia bah. Jen nung ji ka̱n nyia̱ bah, ya ngyok.”

⁵A̱yang byin Yesu wu si̱ nyia̱ ma̱ng mman ta̱m na a̱ni, “Nyi nyia̱ kuzang kyang nang gu tak ma̱ng a̱nyin a̱ni.”

⁶Da̱ a̱vwuo nyeang ka, á̱ ku byia̱ a̱khwot dudong nfang a̱sa̱khwot a̱taa, nang á̱ sak a̱ja; ma̱nang A̱yahudawa ba ka̱n meang ma̱ng ntyei a̱sa̱khwot mi̱ dudong hu á̱ saai da̱nian kwi a̱ti̱tak ma̱ng bwak a̱ni. Huhwa ku mbyia̱ ba̱ si̱ nsak hu a̱ja. Kuzang a̱dong ku kwok li̱la̱n nswak nfeang si̱ nat nswak ntat.

⁷A̱jawa Yesu si̱ nyia̱ ma̱ng á̱khwo nyeang ba, “Nyi fwuoi a̱sa̱khwot, nyi tyia̱ mi̱ dudong huni.” Ba̱ si̱ fwuoi a̱sa̱khwot na á̱ hyaai dudong hu tyentyang a̱ntyang.

⁸A̱jawa Yesu si̱ nyia̱ ma̱ng á̱khwo nyeang ba, “Ma̱ninika, nyi bwuo na nyi nat ndyo. Nyi si̱ nwuak a̱tyu a̱ saai á̱nietchen ba mi̱ nyeang hu a̱ni.” Ba̱ si̱ bwuo a̱sa̱khwot na, ba̱ si̱si̱ nwuak guu.

⁹Nang a̱tyu saai á̱nietchen wu nfwup a̱sa̱khwot nang á̱ si̱ bwuak na̱ si̱ tyia̱ a̱nya̱nyiat a̱sa̱khwot a̱na̱p wu a̱ni; a̱ si̱ lyen a̱vwuo ka nang á̱ nshya̱ na a̱ni bah. Mi̱ mman ta̱m ni̱nia ku lyen a̱vwuo ka nang á̱ mbwuo a̱sa̱khwot a̱na̱p na a̱ni. A̱tyu saai á̱nietchen wu si̱ yorong a̱tyu a̱ byia̱ nyeang hu a̱ni, da̱ gbang a̱nyiung.

¹⁰A̱ si̱ nyia̱, “Kuzang a̱tyu a̱ byia̱ nyeang a̱ni, a̱tsatsak a̱nya̱nyiat a̱sa̱khwot a̱na̱p wu wa ni̱ yet a̱son ka, nang á̱niet ba na swuo a̱ni. Ka̱ á̱nietchen ba ba̱ swuo ba̱ si̱ swa̱i, gu sii nang mba a̱sa̱khwot a̱na̱p na̱ nwai swan nya̱nyiat hu a̱ni. A̱wot nwan, a ba̱ sak a̱tsatsak a̱nya̱nyiat a̱sa̱khwot a̱na̱p wu, a sii ghwut ndyo wa ma̱ninika!”

¹¹Si̱ huni hwa yet a̱son kyang a̱ga̱de nang Yesu ku nyia̱ a̱ni. A̱ ku nyia̱ hu ma̱ a̱keang Kana ka̱ shya̱ ma̱ a̱byin Ga̱lili a̱ni. A̱ja wa nang gu nnyia̱ a̱lama wuni a̱ tyai a̱kyenkyai shi nggu wu. Mman ta̱m nggu na mameang, ba̱ si̱ nwuak a̱chuchuk da̱ nggu ba̱t.

¹²Nang á̱ ku ntyak nyeang hu a̱ni, Yesu mbeang a̱yang byin nggu wu, ma̱ng á̱na̱nyiuk nggu ba, ma̱ng mman ta̱m nggu na, ba̱ si̱ nat a̱keang Ka̱fanahum. Ba̱ si̱ ya mbwuo mmam a̱ja.

¹³Nang jen song A̱yet Ghwut Mman Isi̱rela mi̱ Khwo ji nshim bai kpa̱mkpaan a̱ni, a̱jawa Yesu si̱ doot a̱ nat Urusha̱lima.

¹⁴Mami didyaat[9] A̱li Nwuat Za̱nang A̱gwaza hu, a̱ si̱ shya̱ á̱niet a̱bwuang nang ba̱ lyiai nyák, ma̱ng á̱niet lyiai zón seap, ma̱ng á̱niet lyiai a̱yaabwa a̱mali, ma̱ng á̱niet shai a̱ka̱kurum nang ba̱ swan da̱ a̱vwuo nta̱m mba na.

¹⁵A̱jawa Yesu si̱ bat a̱ya̱u. A̱ si̱ nvwuong mbaa a̱ ghwut ndyo mi̱ didyaat A̱li Nwuat Za̱nang A̱gwaza hu, ma̱ng zón seap ji, mbeang nyák ji. A̱ si̱ seang á̱niet shai a̱ka̱kurum ba ma̱ng kurum mba hu. A̱ si̱ bwan a̱yaatyii mba ba a̱ ya̱gurup a̱byin.

¹⁶Yesu si̱ kam á̱niet ba̱ lyiai a̱yaabwa a̱mali ba a̱ni nyia̱, “Nyi kwok nkyang nyin na a̱ji, nyi doot! Nyi yok bwuak A̱li A̱tyia̱ nung ka ntyia̱ a̱vwuo a̱bwuang bah!”

¹⁷A̱jawa mman ta̱m nggu na si̱ kin jhyung nang á̱lyiat nani mbai cha̱chaat ma̱ng kyang nang á̱ lyuut ma̱ A̱lyiat A̱gwaza na a̱ni nyia̱, “N kwi swam za̱m tazwa A̱li Nwuat Za̱nang A̱gwaza[10] mi̱ fwuo nung hu.”[11]

¹⁸A̱cha̱chet A̱yahudawa ba si̱ bwuok á̱ bai da̱ a̱vwuo nggu. Ba̱ si̱ lyip gu nyia̱, “Zang kyang a̱ga̱de hwa nang a na nyia̱ nzi̱t ndyo ku yet a̱lama a̱ tak a byia̱ tyok a nyia̱ tangka̱i kyang huni?”

¹⁹Yesu si̱ nwuak ba shim nyia̱, “Nyi bi̱ri̱m A̱li Nwuat Za̱nang A̱gwaza kani. Nung mameang, mami mam ntat, n bu na nok ka.”

²⁰Ba̱ si̱ lyip Yesu nyia̱, “A bu na nok ka mami mam ntat a? Á̱ ku nyia̱ a̱lyia̱ swak naai ma̱ a̱taa kya, nang á̱ nok A̱li Nwuat Za̱nang A̱gwaza kani. Nwan, a nyia̱ a na nok mami mam ntat a?”

²¹A̱li Nwuat Za̱nang A̱gwaza ka nang Yesu ku lyiat a̱ni; vam nggu hu hwa.

²²A̱wot nang[12] á̱ ku nta̱ngam gu ma̱ng swuan ma̱ á̱niet ba̱ ka̱n kwi a̱ni, mman ta̱m nggu na si̱ jhyung nang gu ku nhyia̱ a̱nia. A̱wot ba̱ si̱ nwuak a̱chuchuk da̱ A̱lyiat A̱gwaza nang á̱ lyuut a̱ni, ma̱ng kyang hu nang Yesu ku hyia̱ a̱ni.

²³Nang Yesu ku nshya̱ ma̱ a̱keang Urusha̱lima di̱n jen A̱yet Ghwut Mman Isi̱rela mi̱ Khwo hu a̱ni, á̱niet ma̱ a̱di̱di̱t ku nwuak fwuo da̱ nggu, mat nkyang a̱ga̱de nang gu nyia̱ a̱ni.

²⁴A̱mgba̱m ma̱ng a̱nia, Yesu ku byii̱k ma̱ng a̱mba bah. Mat a̱ ku lyen za̱kwa á̱nietbishyi ji shansham ba̱t!

²⁵Da̱ mba, ba̱ byia̱ a̱yin a̱ na hyia̱ ma̱ng a̱nggu kyang tazwa a̱tyubishyi a̱ni bah. Mat, a̱ ku lyen kyang hu ku shya̱ mi̱ nfwuo mba na a̱ni.