Read tyap Yoona 20 Bible Online

Yoona 20 - tyap bible

Yoona 20

¹Ma̱ a̱tsotson a̱tson a̱tuk Ladi ka, nang a̱vwuo ka ni̱ li duduu, Ma̱ryamu Ma̱ga̱daliya si̱ nat da̱ a̱bi ka. A̱wot a̱ si̱si̱ shya̱ nang á̱ ka̱n gyuut a̱fang ka da̱ a̱nu a̱bi ka á̱ sak zan!

²A̱ si̱ tyong chung a̱ nat da̱ a̱vwuo Siman Bitut, ma̱ng nggwon ta̱m ka nang Yesu chat a̱ swak a̱ni. A̱ si̱ hyia̱ ma̱ng a̱mba nyia̱, “Ba̱ kyiak kwom Yesu ma̱ a̱bi ka! A̱wot zi̱ lyen a̱vwuo ka nang ba̱ si̱ nsak gu a̱ni bah!”

³Huhwa Bitut ma̱ng nggwon ta̱m a̱nyiung ka si̱ doot! A̱wot ba̱ si̱ nat da̱ a̱bi ka.

⁴Ba̱ shya̱ di̱n chung mba a̱feang, a̱wot nggwon ta̱m a̱nyiung nka si̱ tyong Bitut a̱ ghwon. Kikya si̱ yet a̱son di̱n tat da̱ a̱bi ka.

⁵A̱ si̱ beak a̱ nwuan, a̱ si̱ li a̱sai a̱toot wu. A̱wot da̱ nggu, a̱ nwuo bah.

⁶A̱wot Siman Bitut a̱ ku shya̱ lilyim ka a̱ni, a̱ si̱ neet a̱ ba̱ nwuo ma̱ a̱bi ka. A̱ si̱ li a̱sai a̱toot nang á̱ nggat Yesu a̱ni, myian a̱ja;

⁷ma̱ng a̱toot wu nang á̱ nggaat a̱pyia̱ Yesu ka a̱ni, nang gu myian zan; ma a̱nia wa a̱sai a̱toot wu si̱ byuut a̱ swan zan.

⁸A̱wot nggwon ta̱m ka ka̱ ku yet a̱son nat da̱ a̱bi ka a̱ni, si̱ mun a̱ nwuo mami. A̱ si̱ li, a̱ si̱ nwuak a̱chuchuk.

⁹(Bi̱ri̱ng ma̱ng a̱nia, ba̱ ku fi̱k kyang hu nang A̱lyiat A̱gwaza na fa nyia̱ Yesu na doot ma̱ng swuan ma̱ á̱niet ba̱ ka̱n kwi a̱ni bah).

¹⁰A̱wot mman ta̱m na si̱ bwuok á̱ nat a̱mali.

¹¹A̱wot Ma̱ryamu Ma̱ga̱daliya si̱ yong a̱ta̱usa da̱ a̱nu a̱bi ka, a̱ twei. Nang gu ni̱ shya̱ da̱ a̱nak ka, a̱ si̱ beak a̱ nwuan mami a̱bi ka.

¹²A̱jawa gu si̱ li a̱yaata̱m tswá A̱gwaza a̱feang, nang ba̱ swan ma̱ng a̱sai a̱yaatoot da̱ a̱vwuo nang á̱ ku myian Yesu a̱ni; a̱tyo nyiung a̱zapyia̱ ka, a̱tyo nyiung tatak.

¹³Ba̱ si̱ lyip gu nyia̱, “A̱byii̱k, yihwa mbyia̱ nang a ntwei?” A̱ si̱ nyia̱, “Ba̱ kyiak kwom a̱tyoli nung wu á̱ doot ndyo! A̱wot ndyen tyan ji ba̱ si̱ nsak hu a̱ni bah!”

¹⁴Nang gu nhyia̱ a̱nia a̱ni, a̱ si̱ bwuak, a̱ si̱ li Yesu gu yong. Da̱ nggu, a̱ fi̱k gu bah!

¹⁵Yesu si̱ lyip gu nyia̱, “A̱byii̱k, yihwa mbyia̱ nang a ntwei? A̱nyan wa nang a chat?” Ma̱ryamu si̱ fa á̱ ngyei a̱tyu cham a̱vwuo wu wa. A̱wot a̱ si̱ nyia̱ ma̱ng a̱nggu, “Ki̱ nyi kyiak gu doot ndyo, a hyia̱ ma̱ng a̱nung tyan ji a si̱ nsak hu a̱ni, a̱wot n nat n kyiak guu!”

¹⁶Yesu si̱ nyia̱ ma̱ng a̱nggu, “Ma̱ryamu!” A̱ si̱ bwuak a̱ nat ma̱ng Yesu. A̱ si̱ kaat da̱ a̱lyem A̱yahudawa, nyia̱ “Raboni!” Huhwa yet “A̱tyu tyiet.”

¹⁷Yesu si̱ nyia̱ ma̱ng a̱nggu, “Yok vwuk nung bah, mat n ka̱n bwuok nat tswazwa da̱ a̱vwuo A̱tyia̱ ka bah. Ya mbwuok nat da̱ a̱vwuo á̱na̱nyiuk nung ba, a̱ si̱ hyia̱ ma̱ng a̱mba; n na mbwuok nat tswazwa da̱ a̱vwuo A̱tyia̱ nung ma̱ng A̱tyia̱ nyin, A̱gwaza nung ma̱ng A̱gwaza nyin.”

¹⁸Ma̱ryamu Ma̱ga̱daliya si̱ nat a̱ si̱si̱ hyia̱ ma̱ng mman ta̱m Yesu na nang gu ndi ngguu. A̱wot a̱ si̱ tak ma̱ng a̱mba kyang nang gu lyiat ma̱ng a̱nggu a̱ni.

¹⁹Jenshyung a̱tuk Ladi ka, a̱wot mman ta̱m na si̱ tung dundung nang nyinyiit hu shya̱ di̱ nyim, mat ba̱ fwuong a̱wun a̱cha̱chet A̱yahudawa ba. A̱wot Yesu si̱ bai a̱ ba̱ yong ma̱ng a̱mba! A̱ si̱ nyia̱ “Swat nyinyang ku shya̱ dundung ma̱ng a̱nyin!”

²⁰Nang gu nhyia̱ a̱nia a̱ni, a̱ si̱ tak ma̱ng a̱mba mbwak nggu na ma̱ng a̱gbang tsi̱ntsa̱u nggu wu. Mman ta̱m na si̱ gwai ba̱t nang ba̱ ndi A̱tyoli Yesu a̱ni!

²¹A̱wot Yesu si̱ bu nyia̱ ma̱ng a̱mba, “Swat nyinyang ku shya̱ ma̱ng a̱nyin! Ma̱nang A̱tyia̱ wu nta̱m nung a̱ni; ma a̱nia wa, n ma nta̱m nyin!”

²²Nang gu nhyia̱ a̱nia a̱ni, a̱ si̱ hyiap mba swuan. A̱ si̱ nyia̱, “Nyi san A̱za̱za̱rak Ntswa wu!

²³Ka̱ nyi chi a̱yin a̱bun nggu wu, á̱ ma na chi nggu ndyo. A̱tyu nang nyi ba̱ng gu a̱bun nggu wu a̱ni, á̱ na ba̱ng nggu ndyo.”

²⁴A̱tyo nyiung mi̱ mman ta̱m swak ma̱ a̱feang na Toma, a̱ ku byia̱ a̱lyoot nggan nang á̱ bu ngyei “A̱hyaai ka” a̱ni; ku shya̱ ma̱ng a̱mba nang Yesu ku mbai a̱ni bah.

²⁵Nang á̱kum mman ta̱m ka n tak ma̱ng a̱nggu a̱ni, “Zi̱ li A̱tyoli nzi̱t wu a̱ni!” Toma si̱ nyia̱ ma̱ng a̱mba, “Ka̱ n di a̱bubwong nkusa ba di̱ mbwak nggu na; n si̱ bu nsak ga̱swuong nung ji bah; a̱wot n si̱ bu nsak bwak da̱ a̱gbang tsi̱ntsa̱u nggu wu bah; n na nwuak a̱chuchuk bah!”

²⁶Nang mam a̱ni̱nai nswak a̱ni, nang mman ta̱m nggu na bu shya̱ a̱mali ka, ba̱ nyim á̱pyia̱ mba á̱ tyia̱, nang Toma shya̱ dundung ma̱ng a̱mba. A̱wot nang nyinyiit na shya̱ di̱ nyim, Yesu si̱ bai a̱ ba̱ yong ma̱ng a̱mba! A̱ si̱ nyia̱, “Swat nyinyang ku shya̱ dundung ma̱ng a̱nyin!”

²⁷A̱jawa Yesu si̱ nyia̱ ma̱ng Toma, “Tyia̱ ga̱swuong ang ji, a̱wot a nwuan mbwak nung na. Neap bwak ang hu a tyia̱ mi̱ tsi̱ntsa̱u nung ji. Yok, but mi̱ fwuo bah; nwuak a̱chuchuk!”

²⁸Toma si̱ nyia̱ ma̱ng a̱nggu, “A̱tyoli nung ma̱ng A̱gwaza nung!”

²⁹Yesu si̱ bu nyia̱ ma̱ng a̱nggu, “A nwuak fwuo mat nang a ndi nung wa a̱ni a? Á̱niet a̱li̱ba̱rka bya yet á̱si̱ ba̱ nwai li nung; a̱mgba̱m ma̱ng a̱nia ba̱ si̱ nwuak fwuo da̱ nung a̱ni.”

³⁰Yesu ku nyia̱ nkyang a̱ga̱de ma̱ a̱di̱di̱t nang gu nshya̱ ma̱ng mman ta̱m nggu na, á̱ lyuut na mi̱ ta̱ka̱da huni bah.

³¹A̱mgba̱m ma̱ng a̱nia, á̱ lyuut nkyang nani da̱nian nyi ka nwuak a̱chuchuk nang Yesu wa ngyet Kristi, A̱tyu nang A̱gwaza kup gu tyok a̱ni, ma̱ng Nggwon A̱gwaza; a̱wot mami nwuak fwuo nyin hu da̱ nggu, nyi ka shya̱ swuan mami a̱lyoot gu.