Read tyap Yoona 21 Bible Online

Yoona 21 - tyap bible

Yoona 21

¹Nang si̱ huni nswak a̱ni, Yesu si̱ bu tyai a̱pyia̱ nggu da̱ a̱vwuo mman ta̱m nggu na a̱beam a̱gba̱ndang jok Ga̱lili[102] ka. Di si̱sak gu ntyai a̱pyia̱ gu a̱ni:

²Siman Bitut, ma̱ng Toma (a̱ ku byia̱ a̱lyoot nggan nang á̱ bu ngyei “A̱hyaai ka” a̱ni); ma̱ng Nataniyel a̱ ku neet mi̱ Kana mi̱ a̱keang Ga̱lili a̱ni; ma̱ng á̱fai Za̱ba̱di, ma̱ng mman ta̱m a̱feang á̱ghyang Yesu na; ku mun á̱ shya̱ a̱ja dundung.

³Siman Bitut si̱ nyia̱ ma̱ng a̱mba, “N naat bwoi fa̱n!” Ba̱ si̱ nyia̱ ma̱ng a̱nggu, “Zi̱ na khwi ang!” A̱wot ba̱ si̱ nat, ba̱ si̱ nwuo kukwon a̱wak hu. Ba̱ si̱ tyak a̱mgba̱m a̱tyetuk a̱kya nang ba̱ bwoi fa̱n bah.

⁴Ma̱ a̱tsotson a̱tson, Yesu si̱ yong di̱ khwong a̱sa̱khwot hu. A̱wot ba̱ ku fi̱k Yesu bah.

⁵A̱wot a̱ si̱ nyia̱ ma̱ng a̱mba, “Zám jini, nyi bwuo a̱fa̱n baa?” Ba̱ si̱ nyia̱, “Kaai, zi̱ ka̱n bwuo kyang bah.”

⁶Yesu si̱ nyia̱ ma̱ng a̱mba, “Nyi koot a̱ka̱li nyin ka a̱zayak; nyi mbwoi fa̱n hu.” Nang ba̱ koot a̱ni, ba̱ si̱ bwoi fa̱n ba̱t! A̱ka̱li ka̱ si̱ khat ba kwak hu!

⁷Nggwon ta̱m ka nang Yesu ku chat a̱ swak a̱ni, si̱ nyia̱ ma̱ng Bitut, “A̱tyoli Yesu wa!” Mi̱ di̱ yong a̱hwa nang Bitut nfa̱k nang Yesu wa a̱ni, a̱ si̱ kup a̱yaatoot nggu ba, (nang gu khwuk a̱yaatoot gu ba, a̱ koot); a̱wot a̱ si̱ fi̱p a̱ kwa ma̱ a̱sa̱khwot na!

⁸Á̱kum mman ta̱m ka si̱ bai[103] ba̱ si̱ kwak a̱ka̱li ka tyentyang ma̱ng fa̱n hu; mat nang ba̱ shya̱ gbang ma̱ng khwong hu bah, ku ku yet nang a̱ka̱tyong nchyi a̱ni.

⁹Mi̱ di̱ ghwut mba hu ma̱ a̱sa̱khwot na, ba̱ si̱ li a̱chi̱chan ndong ma̱ng fa̱n tazwa ndong ka, mbeang burodi.

¹⁰Yesu si̱ nyia̱ ma̱ng a̱mba, “Nyi bai ma̱ng fa̱n ghyáng a̱ji nang nyi ka̱n bwoi a̱ni.”

¹¹Huhwa Siman Bitut si̱ nyeak kukwon a̱wak hu, a̱ si̱ khwat a̱ka̱li ka bai ndyo di̱ khwong hu, nang ka̱ nhyat ma̱ng fa̱n. Fa̱n hu ku yet chyi ma̱ng nswak nfwuon ma̱ a̱tat (153). Bi̱ri̱ng ma̱ng a̱di̱di̱t fa̱n a̱wa, a̱ka̱li ka du tyat bah!

¹²Yesu si̱ nyia̱ ma̱ng a̱mba, “Nyi bai nyi tyat a̱ta̱mpyia̱!” Á̱ mbyia̱ nggwon ta̱m ka̱ du gbang a̱lyia̱ ka̱ lyip gu, “Nwan wa a̱nyan?” bah, mat ba̱ ku lyen nang A̱tyoli Yesu wa!

¹³A̱wot Yesu si̱ nat a̱ si̱ kyiak burodi wu, a̱ si̱ ka̱u mbaa. Ma a̱nia wa, gu si̱ bu nnyia̱ ma̱ng fa̱n hu.

¹⁴Si̱ huni hwa ku yet a̱ka̱tat ka nang Yesu ntyai a̱pyia̱ nggu da̱ a̱vwuo mman ta̱m nggu ka, nang gu ku ndoot ma̱ng swuan ma̱ á̱niet ba̱ ka̱n kwi a̱ni.

¹⁵Nang ba̱ ntyak ya kyayak hu a̱ni, Yesu si̱ nyia̱ ma̱ng Siman Bitut, “Siman a̱fai Yoona, a̱tsak a̱lyiat, a chat nung swak á̱si̱ bani a?” A̱ si̱ shim, nyia̱ “Ii, A̱tyoli a lyen nang n chat ang!” Yesu si̱ nyia̱ ma̱ng a̱nggu, “Ka̱u mman zón seap nung na kyayak.”

¹⁶A̱ka̱feang ka Yesu si̱ nyia̱ ma̱ng a̱nggu, “Siman, a̱fai Yoona, a̱tsak a̱lyiat a chat nung a?” A̱ si̱ shim, nyia̱ “Ii, A̱tyoli, a lyen nang n chat ang!” Yesu si̱ nyia̱ ma̱ng a̱nggu, “Chok zón seap nung ji.”

¹⁷Yesu si̱ bu lyip gu da̱ a̱ka̱tat ka, nyia̱, “Siman, a̱fai Yoona, a chat nung a?” Bitut si̱ fa̱k a̱lyia̱ ya di̱ si̱sak nang Yesu bu ndyip gu da̱ a̱ka̱tat ka, nyia̱, “A chat nung a?” A̱ si̱ nyia̱ “A̱tyoli, a lyen kuzang kyang, a lyen nang n chat ang!” Yesu si̱ nyia̱ ma̱ng a̱nggu, “Ka̱u zón seap nung ji kyayak.

¹⁸“N hyia̱ ma̱ng a̱nwan a̱tsak a̱lyiat; jen nang a ku ngyet fi̱ng nggwon seam a̱ni, a ni̱ kup a̱toot nang a chat a̱ni. A nat koji wa nang a chat nat a̱ni. A̱wot ka̱ a ba̱ kwop, a na neap mbwak ang na, a̱yin a̱ kup ang a̱yaatoot ang ba, a̱ nat ma̱ng a̱nwan da̱ a̱vwuo nang a chat a̱ni bah.”

¹⁹(Yesu ku hyia̱ si̱ huni da̱nian gu ka tak tangka̱i a̱khwu nang Bitut na̱ khwu, ka̱ ka nwuak A̱gwaza shi a̱ni). A̱wot Yesu si̱ nyia̱ ma̱ng Bitut, “Khwi nung!”

²⁰Bitut si̱ ta̱ghak, a̱ si̱ li nggwon ta̱m nang Yesu chat ba̱t a̱ni ka̱ khwi mbaa. Nggu wa ku shya̱ a̱ hyia̱k Yesu gi̱ngi̱ng, di̱n jen ya nkyayak A̱yet Ghwut Mman Isi̱rela mi̱ Khwo wu; a̱ si̱ lyip Yesu nyia̱, “A̱tyoli, a̱nyan wa chat bwuk ma̱ng a̱nwan hu?”

²¹Nang Bitut nta̱ghak a̱ si̱ li ngguu a̱ni, a̱ si̱ nyia̱ ma̱ng Yesu, “A̱tyoli, a̱tyu wuni fa?”

²²Yesu si̱ nwuak gu shim, nyia̱, “Ka̱ n shim gu ndyo nyia̱ a̱ na swuan si̱ nat jen n na mbwuok a̱ni; yihwa ngyet si̱ nwan hu? Nwan, khwi ma̱ nung!”

²³Mat a̱nia, nkhang na si̱ kai a̱ kaat á̱niet khwi Yesu ba, nang á̱ nyia̱ nggwon ta̱m kani na khwu bah. A̱wot Yesu ku hyia̱ nang gu na nwai khwu hwa bah. A̱ ku nyia̱, “Ki̱ n nyia̱ n na nghwon guu gu swuan si̱ nang n bwuok; yihwa ngyet a̱ka̱ta ang ka?”

²⁴A̱tyu wuni wa yet nggwon ta̱m ka ka̱ shei kpa̱sai a̱chuchuk tazwa a̱mgba̱m nkyang nani a̱ni; a̱ si̱ lyuut naa. Zi̱ lyen nang kyang gu hyia̱ a̱ni, yet a̱tsak a̱lyiat wa za̱m!

²⁵Nkyang njhyang ma̱ a̱di̱di̱t nang Yesu ku nyia̱ a̱ni. Ka̱ á̱ wa lyuut na a̱mgba̱m, n fa a̱mgba̱m swanta hu si̱ mi̱n kyiak nta̱ka̱da na nang á̱ ndyuut a̱ni bah!