Read tyap Yoona 3 Bible Online

Yoona 3 - tyap bible

Yoona 3

¹A̱ghyang a̱niet ku nshya̱, á̱ si̱ ngyei gu Nikodimut. A̱ ku yet a̱kwak a̱son A̱yahudawa. A̱ si̱ bu shya̱ mi̱ sot á̱niet, ba̱ ku yet A̱fa̱risawa ba a̱ni.

²Nggu wa ku bai da̱ a̱vwuo Yesu a̱tyetuk, a̱ si̱ ba̱ nyia̱, “A̱tyu tyiet, zi̱ lyen nang a ngyet a̱tyu tyiet wa nang A̱gwaza ta̱m ndyo a̱ni. Mat á̱ mbyia̱ a̱tyu a̱ na nyia̱ ntangka̱i a̱cha̱chet nkyang a̱ga̱de nani nang a nyia̱ a̱ni; ka̱nang A̱gwaza shya̱ dundung ma̱ng a̱nggu bah.”

³Yesu si̱ nyia̱ ma̱ng a̱nggu, “Yok n tak ma̱ng a̱nwan a̱tsatsak a̱lyiat, ka̱ a byin ang a̱ka̱feang bah[13], a si̱ mi̱n di Tyok A̱gwaza hu lili bah za̱m.”

⁴Nikodimut si̱ lyip Yesu nyia̱, “Ku na li ni wa á̱ mbyin a̱yin nang gu ka̱n kwop? Ka̱ doot gu bu nwuo ma̱ a̱fa a̱yang nggu ka, á̱ bu byin gu a̱ka̱feang a?”

⁵Yesu si̱ nwuak gu shim nyia̱, “Yok, n tak ma̱ng a̱nwan a̱tsatsak a̱lyiat; ka̱ á̱ byin a̱yin ma̱ng a̱sa̱khwot ma̱ng A̱za̱za̱rak Ntswa bah, a̱ si̱ mi̱n nwuo Tyok A̱gwaza hu bah.

⁶Kyang a̱tyubishyi byin a̱ni; ku yet a̱tyubishyi wa. Kyang á̱ byin ma̱ A̱za̱za̱rak Ntswa a̱ni; yet A̱za̱za̱rak Ntswa wa.

⁷Ku yok yet ang kyang a̱ga̱de bah, nang n nyia̱ ma̱ng a̱nwan, ‘Ku yet ta hwa á̱ bu byin a̱yin a̱ka̱feang[14] a̱ni.’

⁸Wun hu ni̱ hyap a̱ tyei da̱ a̱vwuo ka nang ku tyei a̱ni. A ni̱ fa̱k nang ku khwom wa. Da̱ nwan, a lyen a̱vwuo ka ku nneet a̱ni, ke tyan nang ku nnaat a̱ni bah. Ma a̱nia wa ku ndi ma̱ng byin A̱za̱za̱rak Ntswa hu.”

⁹Nikodimut si̱ bu lyip Yesu nyia̱, “Ku na nyia̱ ni ku ndi a̱nia?”

¹⁰Yesu si̱ nwuak gu shim nyia̱, “A̱wot nwan mameang, a yet a̱gba̱ndang a̱tyu tyiet Isi̱rela wu a̱ni; a̱wot a lyen nkyang nani baa?

¹¹Yok, n tak ma̱ng a̱nwan tsatsak a̱lyiat; zi̱[15] lyiat kyang hu nang zi̱ lyen a̱ni. Zi̱ si̱ bu shei kyang hu nang zi̱ ka̱n di a̱ni. Ma̱ng a̱nia, á̱ mbyia̱ a̱yin ma̱ nyin a̱ chat a̱ san shei kpa̱sai nzi̱t hu tazwa nkyang nani a̱ni bah.

¹²“A̱wot ka̱ n shei ma̱ng a̱nyin a̱lyiat tazwa nkyang na̱ shya̱ mi̱ swanta huni a̱ni, a̱wot nyi si̱ nwuak fwuo da̱ nung bah; mi̱ nyi na nyia̱ ni wa nyin nnwuak fwuo da̱ nung ka̱ n nwuo shei ma̱ng a̱nyin a̱lyiat tazwa nkyang na̱ shya̱ Ma A̱gwaza tswazwa ka a̱ni?

¹³A̱wot á̱ mbyia̱ a̱tyu a̱ ka̱n nyeak a̱ nat A̱ma A̱gwaza tswazwa a̱ni bah; mi̱ Nggwon A̱tyubishyi kya ma̱nyin ka, ku chyok a̱ neet a̱ja.

¹⁴“Ma̱nang Musa ku nta̱ngam ghwughwu nzwak hu ku ku yet a̱kpeap ka mi̱ tswa a̱yit ji a̱ni; ma a̱nia wa nang á̱ ba̱ nta̱ngam[16] Nggwon A̱tyubishyi ka ma̱ cha̱chaat.

¹⁵Da̱nian konyan wa nwuak fwuo da̱ nggu a̱ni, a̱ na shya̱ swuan sang sangba̱p ji.

¹⁶“Mat A̱gwaza ku fa̱k da̱ á̱niet mi̱ swanta ba ba̱t. Huhwa si̱ tyia̱ a̱ si̱ neap Nggwon nang gu byia̱ ma̱nyin ka a̱ni; da̱nian konyan wa nwuak fwuo da̱ nka a̱ni, a̱ na khwu bah, a̱wot a̱ na shya̱ swuan sang sangba̱p ja.

¹⁷“A̱gwaza ku ta̱m ma̱ng nggwon nggu ka mi̱ swanta hu, da̱nian ka̱ ka yet a̱tyu nyia̱ shi̱ri̱ya wa bah. A̱ ku ta̱m ma̱ng a̱nka da̱nian ka̱ ka yet A̱tyusan á̱niet mi̱ swanta bya, ba̱ shya̱ swuan da̱ a̱vwuo nka kya.

¹⁸Kuzang a̱yin wa nwuak fwuo di̱ nggwon A̱gwaza ka, á̱ na nyia̱ gu shi̱ri̱ya bah. A̱wot a̱tyu a̱ lak nwuak fwuo da̱ nka a̱ni, á̱ wa ka̱n faat gu shi̱ri̱ya. Mat a̱ lak nwuak fwuo da̱ Nggwon A̱gwaza[17] ka, ma̱nyin ka.

¹⁹“Faat shi̱ri̱ya hu na li a̱ni wa; sai A̱gwaza hu ku bai mi̱ swanta hu. A̱mgba̱m ma̱ng a̱nia, á̱niet mi̱ swanta ba ku chat lyin hu a̱ lan sai A̱gwaza hu. Mat, ba̱ nyia̱ a̱ka̱tuk nyia̱.

²⁰Konyan wa nyia̱ a̱ka̱tuk nyia̱ a̱ni, a̱ ni̱ lak sai huhwa. A̱wot a̱ ni̱ bai da̱ a̱vwuo sai A̱gwaza hu bah, kalak á̱ tyai a̱ka̱tuk nang gu nyia̱ a̱ni kpa̱sai.

²¹A̱wot konyan wa nyia̱ a̱chuchuk nta̱m a̱ni, a̱ ni̱ bai da̱ a̱vwuo sai A̱gwaza hu. Da̱nian á̱ ka li kyang gu nyia̱ a̱ni kpa̱sai, ku nnaat ma̱ cha̱chaat mi̱ si̱sak nang A̱gwaza mbeang nggu a̱ni.”

²²Nang Yesu ntyak a̱lyiat nani a̱ni, a̱ si̱ doot mbeang mman ta̱m nggu na. Ba̱ si̱ nat di̱ fam a̱byin Yahudiya. A̱ si̱si̱ labeang dundung ma̱ng a̱mba, nang gu nyia̱ á̱niet ba̱ptisman ji a̱ja.

²³Yoona mameang, nang gu ni̱ nyia̱ ba̱ptisman ji mi̱ nnang Ainon kpa̱mkpaan ma̱ng a̱keang Sa̱lima; mat a̱sa̱khwot na ku shi a̱ja ba̱t. Á̱niet si̱ ya a̱son á̱ chong da̱ a̱vwuo nggu nang gu nyia̱ mba ba̱ptisman ji.

²⁴(Di̱n jen a̱ja, nang á̱ ka̱n ta̱bat Yoona, á̱ si̱ tyia̱ nggu mi̱ jaru ji bah).

²⁵A̱jawa á̱ghyang á̱niet mami mman ta̱m Yoona na, ba̱ si̱ nwuo ya fwuang ma̱ng a̱tyu A̱yahudawa a̱ghyang tazwa a̱lyiat kwi vam di̱n vak khwi A̱gwaza.

²⁶Huhwa ba̱ si̱ nat, ba̱ si̱si̱ shya̱ Yoona. Ba̱ si̱ nyia̱ ma̱ng a̱nggu a̱ni, “A̱tyu tyiet, a jhyung a̱tyu a̱ ku shya̱ dundung ma̱ng a̱nwan a̱ma̱nyi fam a̱tak a̱ghyui Urdun ka nang a ku lyiat a̱ni a? Di, nggu wa nyia̱ á̱niet ba̱ptisman di̱ yong huni! A̱wot á̱niet ma̱ a̱di̱di̱t chong da̱ a̱vwuo nggu!”

²⁷Huhwa Yoona si̱ ma nyia̱, “A̱yin byia̱ tyok san kyang, da̱nang á̱ nang gu neet Ma A̱gwaza tswazwa a̱ni bah.

²⁸Nyin ma̱ á̱pyia̱ nyin, nyi yet á̱niet ba̱ ku mun á̱ fa̱k kyang hu nang n ku ndyiat a̱ni, nang n ku nnyia̱, ‘Nung gwa ngyet Kristi wu bah. Da̱ a̱kwonu a̱kya, nung gwa nang á̱ ta̱m n khwat a̱son gu.’

²⁹“A̱tyu a̱ nyia̱ nyeang fai hu a̱ni; nggu wa byia̱ a̱byii̱k wu. A̱kpa̱ndang a̱tyu byia̱ nyeang wu yong kpa̱mkpaan a̱ myiai a̱fufwuo, a̱wot a̱ ni̱ fa̱k a̱lyia̱ sai, ka̱ a̱ fa̱k a̱nwuat a̱tyu byia̱ nyeang ka. Ma a̱nia wa, nung n byia̱ a̱jhyem a̱lyia̱ sai ba̱t.

³⁰Nggu, ku yet ta hwa gu yong mi̱ di̱ mban. A̱wot nung mameang, shi nung hu ku ma nghyuai.

³¹[18]“Nggu a̱tyu a̱ bai a̱ neet Ma A̱gwaza tswazwa ka a̱ni, a̱ shi a̱ swak konyan. Nggu a̱tyu a̱ shya̱ a̱byin ka a̱ni, a̱ lyiat a̱lyiat nkyang na̱ shya̱ a̱byin a̱ni. Nggu a̱tyu a̱ bai a̱ neet Ma A̱gwaza tswazwa ka a̱ni, [[a̱ shi a̱ swak konyan.]][19]

³²“A̱ shei kyang hu kpa̱sai nang gu ka̱n di, a̱ si̱ fa̱k a̱ni. A̱mgba̱m ma̱ng a̱nia, á̱ mbyia̱ a̱tyu a̱ san a̱lyiat nggu na a̱ni bah.

³³Konyan wa san a̱lyiat nang gu tak kpa̱sai a̱ni, a̱ si̱ nwuak a̱chuchuk; a̱ tak, nang A̱gwaza ngyet a̱tyu a̱tsatsak a̱lyiat wa.

³⁴Mat a̱tyu nang A̱gwaza ku ta̱m a̱ni, a̱ shei a̱lyiat A̱gwaza nia, mat nang A̱gwaza nnwuak gu A̱za̱za̱rak Ntswa nggu wu ma̱ gba̱mgbam a̱mgbam a̱ni.

³⁵A̱tyia̱ wu fa̱k da̱ Nggwon ka ba̱t. Huhwa mbyia̱ a̱ si̱ tyia̱ kuzang kyang mbwak nka.

³⁶Konyan wa nwuak fwuo di̱ Nggwon A̱gwaza ka, a̱ byia̱ swuan sang sangba̱p. A̱wot konyan wa lak khwi Nggwon A̱gwaza ka, a̱ si̱ mi̱n shya̱ swuan bah. A̱wot mwai lyen A̱gwaza hu ni̱ swan tazwa gu.”