Read tyap Yoona 4 Bible Online

Yoona 4 - tyap bible

Yoona 4

¹Nang Yesu ndyen nang A̱fa̱risawa ba nfa̱k nkhang nang gu nshyat á̱niet ba̱ khwi gu a̱ni, a̱wot a̱ si̱ nyia̱ mba ba̱ptisman ba̱ si̱ yet mman ta̱m guu, ba̱ si̱ swak mman ta̱m Yoona na ma̱ng shi á̱kpa hu.

²(Mami a̱chuchuk, Yesu wa ma̱ a̱pyia̱ nggu ku nyia̱ ba ba̱ptisman ji bah. Mman ta̱m gu ni̱nia ku nyia̱.)

³Jen ji Yesu ku nfa̱k kyang hu nang á̱ lyiat a̱ni, a̱ si̱ ghwon fam a̱byin Yahudiya hu, a̱ si̱ bwuok a̱ nat a̱byin Ga̱lili.

⁴Nang gu nshya̱ da̱ a̱chyet ka a̱ni, ku si̱ yet gu ta hwa a̱ kai a̱ ghwut mi̱ fam a̱byin Sa̱mariya.

⁵Yesu si̱ nwuo ma̱ a̱keang a̱ghyang mi̱ fam a̱byin Sa̱mariya hu, nang á̱ ngyei Sa̱ikar a̱ni. (Ka̱ shya̱ kpa̱mkpaan ma̱ng a̱byin nang Yakubu ku nwuak a̱fai nggu wu nang á̱ ku ngyei Isuu a̱ni.)

⁶Ri̱jiya Yakubu hu ku shya̱ a̱ja. A̱wot nang Yesu ka̱n van ma̱ng a̱chyet, a̱ si̱ swan a̱ fwung a̱ja da̱ a̱nu ri̱jiya ka. Jen a̱ja nang mam hu shim bai di̱di̱r.

⁷A̱jawa a̱nap A̱sa̱mariya a̱ghyang si̱ kin bai bwuo a̱sa̱khwot. Yesu si̱ nyia̱ ma̱ng a̱nggu a̱ni, “Nang nung a̱sa̱khwot na, n swuo.”

⁸(Di̱n jen a̱ja nang mman ta̱m nggu na nat san kyayak mami a̱keang).

⁹A̱jawa a̱nap wu si̱ nyia̱ ma̱ng a̱nggu a̱ni, “A yet a̱tyu A̱yahudawa, a̱wot nung n si̱ ngyet a̱nap A̱sa̱mariya. A na nyia̱ a̱ni, a naai a̱sa̱khwot swuo da̱ a̱vwuo nung?” (A̱ hyia̱ a̱nia, mat A̱yahudawa byia̱ a̱meang ma̱ng A̱sa̱mariyawa bah).

¹⁰Yesu si̱ nwuak gu shim nyia̱, “Ka a wa lyen za̱nang A̱gwaza, a̱wot a si̱ bu lyen a̱tyu a̱ nyia̱ a nang gu a̱sa̱khwot na gu swuo a̱ni; si̱ a na lyip gu, a̱wot gu nang ang a̱sa̱khwot nswuan.”

¹¹A̱jawa a̱nap wu nyia̱ ma̱ng a̱nggu a̱ni, “Nwan a̱tyoli, a byia̱ kyang bwuo a̱sa̱khwot hu bah. Ri̱jiya huhwa hu ku yet a̱tsuung. Ka̱ a̱nia wa, a̱ji wa nang a na nshya̱ a̱sa̱khwot nswuan na?

¹²Ke a lan a̱tyia̱ a̱khwop nzi̱t wu Yakubu; nggu wa ku lung ri̱jiya huni a̱ si̱ ghwon nzi̱t ndyo? A̱wot nggu ma̱ a̱pyia̱ nggu ma̱ng mman nggu na mbeang nkyang zwá nggu na ba̱ ku swuo a̱sa̱khwot na mi̱ ri̱jiya huni hwa. Nwan a lan gu ma̱ng shi hu a?”

¹³Yesu si̱ nwuak a̱nap wu shim nyia̱, “Konyan wa swuo a̱sa̱khwot nani, mashyi bu na ta̱bat guu.

¹⁴Da̱ a̱kwonu a̱kya, a̱sa̱khwot nang n na nang nggu a̱ni, a̱ bu si̱ mi̱n mak fa̱k mashyi bah. A̱sa̱khwot na nang n na nnang nggu a̱ni; na̱ na yet nnang a̱sa̱khwot na̱ hyai á̱ ghwut. A̱wot na̱ bu na nwuak gu swuan sang sangba̱p.”

¹⁵A̱nap Sa̱mariya wu si̱ nyia̱ ma̱ng a̱nggu a̱ni, “A̱tyoli, ma̱sa̱kut nang nung tangka̱i a̱sa̱khwot swuo a̱hwa! Mat n chat mashyi hu bu ta̱bat nung bah. A̱wot da̱ nung, n bu na mbai tok a̱sa̱khwot mi̱ ri̱jiya huni bah.”

¹⁶Yesu si̱ nyia̱ ma̱ng a̱nggu a̱ni, “Nat, a yorong a̱tyok ang wu, nyi bai a̱ji dundung ma̱ng a̱nggu.”

¹⁷A̱nap wu si̱ nyia̱ ma̱ng Yesu a̱ni, “N byia̱ a̱tyok bah.” A̱jawa Yesu si̱ ma nyia̱, “A byia̱ a̱chuchuk nang a nhyia̱ nyia̱ da̱ a byia̱ a̱tyok a̱ni bah.

¹⁸A ka̱n nyeang á̱tyok a̱fwuon. A̱wot á̱tyok nang a shya̱ ma̱ng a̱nggu ma̱ninika a̱ni; nggu wa yet a̱tsatsak a̱tyok ang wu bah. A tak nung a̱tsatsak a̱lyiat.”

¹⁹A̱nap wu si̱ nyia̱ ma̱ng Yesu a̱ni, “A̱tyoli, n fi̱k nang a ngyet a̱ta̱m a̱kwonu A̱gwaza wa!

²⁰A̱wot a̱yaatyia̱ a̱khwop nzi̱t ba, ba̱ yet A̱sa̱mariyawa ba a̱ni; ba̱ ku kwok ntong da̱ a̱fan Ga̱rizim kani[20] kya. A̱wot nyin A̱yahudawa, nyi nyia̱ Urusha̱lima hwa yet a̱vwuo ka̱ myim zi̱ nkwok ntong a̱zaghyi A̱gwaza a̱ni.”

²¹A̱wot Yesu si̱ nyia̱ ma̱ng a̱nap wu a̱ni, “A̱yang a̱li, nwuak a̱chuchuk di̱ kyang nang n hyia̱ ma̱ng a̱nwan a̱ni. Jen chobai da̱nang á̱niet bye nkwok ntong a̱zaghyi A̱tyia̱ tswazwa da̱ a̱fang kani a̱ni bah. A̱wot da̱ mba ba̱ bu na kwok ntong mi̱ Urusha̱lima bah.

²²Nyin A̱sa̱mariyawa, nyi lyen a̱tyu nang nyi kwok gu ntong na a̱ni shansham bah. A̱wot nzi̱t A̱yahudawa zi̱ kwok ntong a̱zaghyi a̱tyu nang zi̱ lyen a̱ni. Mat, vak swuan sang sangba̱p hu á̱ nwuak A̱yahudawa bya.

²³“Jen chobai, ku di̱ yong huni ji̱ wa ka̱n nyia̱, nang á̱niet ba̱ kwok ntong mami a̱chuchuk na nkwok ntong a̱zaghyi A̱tyia̱ ma̱ng A̱za̱za̱rak Ntswa ma̱ng a̱chuchuk a̱ni. Bibya yet tangka̱i á̱niet ba̱ kwok ntong nang A̱tyia̱ wu chat a̱ni.

²⁴A̱gwaza yet A̱za̱za̱rak Ntswa wa. A̱wot á̱niet ba ba̱ na kwok gu ntong a̱zaghyi nggu a̱ni; ku yet ta hwa ba̱ kwok gu ntong mami A̱za̱za̱rak Ntswa ma̱ng a̱chuchuk.”

²⁵A̱nap wu si̱ nyia̱ ma̱ng Yesu a̱ni, “N dyen nang a̱ta̱m a̱kwonu A̱gwaza nang á̱ ngyei ‘Kristi’ a̱ni chobai. Ka̱ a̱ ba̱ bai, a̱ na tak ma̱ng a̱nzi̱t kuzang kyang.”

²⁶Yesu si̱ tak ma̱ng a̱nggu nyia̱, “Nung gwa ngyet nggu;[21] nung, n dyiat ma̱ng a̱nwan lyiat huni a̱ni.”

²⁷Da̱ a̱chak a̱kya mman ta̱m Yesu na si̱ kin bwuok á̱ neet ma̱ a̱keang ka. A̱wot ba̱ si̱ fa̱k a̱ga̱de nang ba̱ nshya̱ Yesu nang gu lyiat ma̱ng a̱nap hu a̱ni! A̱mgba̱m ma̱ng a̱nia, á̱ byia̱ a̱yin ma̱ a̱mba a̱ lyip a̱nap wu, “Yihwa nang a chat a̱ji?” Ke a̱ ma ndyip Yesu, “Yihwa mbyia̱ nang a ndyiat ma̱ng a̱nap wuni?” a̱ni bah.

²⁸A̱jawa a̱nap A̱sa̱mariya wu si̱ kin ghwon a̱dong bwoi a̱sa̱khwot ka. A̱ si̱ bwuok a̱ nat ma̱ a̱keang ka. A̱ si̱si̱ tak ma̱ng á̱niet ba, nyia̱

²⁹“Nyi bai nyi li a̱tyu a̱ tyai nung a̱mgba̱m kyang nang n ka̱n nyia̱ a̱ni! Ke nggu wa yet Kristi wu la?!”

³⁰Huhwa á̱niet ba si̱ ghwut ma̱ a̱keang ka. Ba̱ si̱ nat da̱ a̱vwuo Yesu.

³¹A̱ shya̱ di̱ nyia̱ a̱nia, a̱jawa mman ta̱m Yesu si̱ naai nggu nyia̱, “A̱tyu tyiet, ma̱sa̱kut ya kyayak hu.”

³²Huhwa Yesu si̱ nyia̱ ma̱ng a̱mba a̱ni, “N byia̱ tangka̱i kyayak ghyang nang nyi lyen a̱ni bah.”

³³A̱jawa mman ta̱m na si̱ lyi̱ri̱m á̱ghyang mba, nyia̱, “A̱yin ka̱n bai ma̱ng a̱nggu kyayak hwa kee?”

³⁴Yesu si̱ nyia̱ ma̱ng a̱mba a̱ni, “Kyayak nung huhwa yet; n khwi kyang nang a̱tyu a̱ ta̱m nung chat a̱ni, a̱wot n bu nyia̱ ta̱m nang gu nwuak nung a̱ni, n tyak hu.

³⁵N gyei nyi ni̱ nyia̱, ‘Zwát nyaai ja bwat, á̱ sii nwuo chak yak hu’ a? Nyi gba̱t á̱ghyi nyi lii bibyin yak hu. Yak hu byang, a̱wot ku si̱ maai chak!

³⁶A̱tyu a̱ chak yak hu a̱ni, á̱ na tan gu zang. A̱wot a̱ na tung yak hu, a̱ shya̱ zang swuan sang sangba̱p. Da̱nian a̱tyu a̱ chyui yak hu a̱ni, ma̱ng a̱tyu a̱ chak a̱ni; ba̱ ka gwai dundung.

³⁷“Huhwa mbyia̱ á̱ ni̱ nyia̱, ‘A̱ghyang a̱niet chyui yak, a̱wot a̱ghyang a̱niet wa si̱ chak,’ yet a̱tsatsak a̱lyiat wa.

³⁸N ta̱m nyin nyi nat nyi chak yak hu nang nyi chyui a̱ni bah. Á̱ghyang á̱niet bya kwan ba̱ si̱ chyui yak hu. A̱wot ma̱ninika nyi bya na chak yak hu.”

³⁹A̱sa̱mariyawa ma̱ a̱di̱di̱t ma̱ a̱keang a̱kya si̱ nwuak fwuo di̱ Yesu, mat si̱sak ji nang a̱nap wu ku nhyia̱ ma̱ng a̱mba, nyia̱: “A̱ hyia̱ ma̱ng a̱nung kuzang kyang nang n ka̱n nyia̱ a̱ni.”

⁴⁰A̱wot nang A̱sa̱mariyawa ba mbai da̱ a̱vwuo Yesu a̱ni, ba̱ si̱ naai nggu gu swan ma̱ng a̱mba. A̱wot Yesu si̱ shim, a̱ si̱ bwuo mam feang ma̱ng a̱mba.

⁴¹Á̱niet ma̱ a̱di̱di̱t ba̱ ku nwuak fwuo di̱ Yesu a̱ni, ba̱ si̱ mbeang á̱kpa ka, mat a̱sham a̱lyiat nggu ka.

⁴²A̱jawa ba̱ si̱ nyia̱ ma̱ng a̱nap wu a̱ni, “Nzi̱t mameang, zi̱ nwuak fwuo di̱ Yesu ma̱nini, mat kyang nang a hyia̱ wa a̱ni bah. A̱wot nzi̱t ma̱ á̱pyia̱ nzi̱t mameang, zi̱ fa̱k a̱lyiat nggu na. A̱wot zi̱ lyen za̱m nang nggu wa ngyet A̱tyusan á̱niet mi̱ swanta ba!”

⁴³Yesu si̱ bwuo mam feang a̱ja, a̱ si̱ doot, a̱ si̱ swak a̱ nat Ga̱lili.

⁴⁴Yesu ma̱ a̱pyia̱ nggu ka̱n hyia̱ nyia̱, “A̱ta̱m a̱kwonu A̱gwaza shyat shi ma̱ a̱keang nggu bah.”

⁴⁵A̱mgba̱m ma̱ng a̱nia, nang gu si̱ nwuo mi̱ fam a̱byin Ga̱lili hu a̱ni; á̱niet Ga̱lili ba si̱ tyia̱ nggu aba̱n. Ba̱ si̱ san gu mbwak nfeang, mat ba̱ ku nat A̱yet Ghwut mman Isi̱rela mi̱ Khwo wu mi̱ Urusha̱lima, ba̱ si̱ li kuzang kyang nang Yesu ku nyia̱ di̱n jen a̱yet ji a̱ni.

⁴⁶Yesu si̱ bu bwuok a̱ nat a̱keang Kana mi̱ fam a̱byin Ga̱lili, a̱keang ka nang gu ku mbwuak a̱sa̱khwot na, na̱ si̱ tyia̱ a̱sa̱khwot a̱na̱p na a̱ni. Á̱ ku byia̱ a̱tyu ta̱m tyok ma̱ a̱keang Ka̱fanahum. A̱ si̱ byia̱ nggwon seam nang ka̱ fa̱k nyinyang bah.

⁴⁷Nang a̱tyia̱ nggwon wu nfa̱k nyia̱ Yesu neet mi̱ fam a̱byin Yahudiya a̱ bai Ga̱lili a̱ni; a̱ si̱ nat da̱ a̱vwuo nggu. A̱ si̱si̱ naai nggu gu nat Ka̱fanahum, a̱ si̱ choot nggu nggwon ka nang zwan ji nyia̱ nang ka̱ chak a̱ kwi a̱ni.

⁴⁸Yesu si̱ nyia̱ ma̱ng a̱nggu a̱ni, “Ka̱ nyi li kyang a̱ri̱bi̱di ma̱ng a̱ga̱de bah, nyi si̱ mi̱n nwuak fwuo da̱ nung bah.”

⁴⁹A̱tyu nta̱m tyok wu si̱ nyia̱, “A̱tyoli, ma̱sa̱kut khwi nung a̱nggang, a bai; kalak nggwon nung ka na khwu!”

⁵⁰Yesu si̱ nyia̱ ma̱ng a̱nggu a̱ni, “Bwuok nat nkyang ang. Nggwon ang ka na swuan!” A̱tyu nta̱m tyok wu si̱ nwuak a̱chuchuk di̱ kyang nang Yesu hyia̱ a̱ni. A̱ si̱ bwuok a̱ nkat.

⁵¹A̱ shya̱ di̱ chyet a̱ naat a̱mali, mman ta̱m nggu na si̱ kan bai san guu. Ba̱ si̱ nyia̱ ma̱ng a̱nggu a̱ni, “Nggwon ang ka shyip, ka̱ shya̱ a̱chet!”

⁵²A̱tyu nta̱m tyok wu si̱ lyip ba jen ji nang nggwon ka ku nchoot a̱ni. Ba̱ si̱ nyia̱ ma̱ng a̱nggu, “Lyuo hwa nang nggwon ka ku nchoot, nang mam hu ka̱n hyian; zwan ji si̱ kin ghwon kaa!”

⁵³A̱tyia̱ nggwon wu si̱ kin jhyung nang a̱cha̱chaat jen a̱wa wa nang Yesu ku nyia̱ ma̱ng a̱nggu, “Nggwon ang ka na swuan!” Huhwa nggu ma̱ng a̱mgba̱m kyang mbwak nggu hu, ba̱ si̱ nwuak fwuo di̱ Yesu.

⁵⁴Si̱ huni hwa yet kyang a̱ga̱de feang[22] hu nang Yesu ku nyia̱ nang gu ku mbwuok a̱ neet Yahudiya a̱ si̱ bai Ga̱lili a̱ni.