Read tyap Yoona 5 Bible Online

Yoona 5 - tyap bible

Yoona 5

¹Nang si̱ a̱hwa nswak a̱ni, Yesu si̱ nat Urusha̱lima a̱tuk A̱yet A̱yahudawa a̱ghyang.

²A̱ja mi̱ Urusha̱lima hu, kpa̱mkpaan ma̱ng a̱zanunwuai ka nang á̱ ngyei “A̱zanunwuai Zón Seap” a̱ni. Á̱ ku byia̱ jok a̱sa̱khwot, á̱ si̱ ngyei ji “Ba̱ta̱si̱da” da̱ a̱lyem Ibriniyawa. A̱wot á̱ si̱ bu tyong ji á̱ kaat ma̱ng ndidyaat nfwuon.

³Mami ndidyaat a̱nia nia nang á̱niet nzwán ma̱ a̱di̱di̱t ni̱ mmyian a̱ni; á̱ si̱ byia̱ á̱niet a̱fi̱fan, á̱niet kwang a̱byin, ma̱ng á̱niet ta̱luk nkap ba.[23]

⁴

⁵A̱tyok a̱ghyang ku shya̱ a̱ja nang gu nyia̱ ma̱ng zwan a̱lyia̱ nswak ntat ma̱ a̱ni̱nai.

⁶Nang Yesu ndi gu nang gu myian a̱ja a̱ni, Yesu si̱ lyen nang nggu ka̱n dabeang ma̱ng zwan ji. A̱jawa Yesu nyia̱ ma̱ng a̱nggu a̱ni, “A chat á̱ choot ang a?”

⁷A̱tyu nzwan wu si̱ nwuak Yesu shim nyia̱, “A̱tyoli, n byia̱ a̱tyu a̱ na tyia̱ nung ma̱ a̱sa̱khwot na di̱n jen nang á̱ ni̱ nkyiai na a̱ni bah. Ka̱ n doot na nwuo ma̱ a̱sa̱khwot na, a̱ghyang a̱niet ni̱ shya̱ a̱son nung di̱ nwuo hu!”

⁸Yesu si̱ nyia̱ ma̱ng a̱nggu a̱ni, “Doot, yong! A kyiak a̱kpang ang wu, a nkat.”

⁹Mi̱ di̱ yong a̱hwa, a̱tyu nzwan wu si̱ kin choot! A̱ si̱ kyiak a̱kpang nggu wu, a̱ si̱ nkat. A̱wot a̱tuk a̱kya ku yet Mam Fwung A̱yahudawa hwa.

¹⁰Huhwa ku mbyia̱ a̱cha̱chet A̱yahudawa ba, si̱ nyia̱ ma̱ng a̱tyu nzwan wu nang á̱ choot a̱ni, “Mam huni yet a̱tuk Mam Fwung kya; hu myim di̱ khwi doka nzi̱t ji a kyiak a̱kpang ang wu a̱fwun bah!”

¹¹A̱tyu nang á̱ choot a̱ni, a̱ si̱ nwuak ba shim nyia̱, “A̱tyu a̱ choot nung a̱ni; nggu wa ba̱ nyia̱ ma̱ng a̱nung, ‘Kyiak a̱kpang ang wu a nkat!’ ”

¹²A̱yahudawa ba si̱ lyip a̱tyu nang á̱ choot a̱ni nyia̱, “Nggu a̱tyu wuni wa yet a̱nyan, gu nyia̱ ma̱ng a̱nwan a kyiak a̱kpang ang wu a nkat a̱ni?”

¹³Nggu a̱tyu nang á̱ ku choot a̱ni, a̱ ku lyen a̱tyu a̱ choot gu a̱ni bah; mat nang Yesu wa ka̱n tyia̱ ghyuai a̱ doot a̱ja mat á̱kpa á̱niet ka.

¹⁴Á̱ si̱ labeang bah, Yesu si̱ myim ma̱ng a̱tyu nang gu ku choot mami didyaat A̱li Nwuat Za̱nang A̱gwaza hu. A̱ si̱ nyia̱ ma̱ng a̱nggu a̱ni, “Di, a choot ma̱ninika! Mat a̱nia, ghwon a̱ka̱tuk nyia̱ ang wu. Kalak a̱bombwuon kyang a̱ swak zwan jini ma̱ng shi a̱ni, na shya̱ ang!”

¹⁵A̱jawa a̱tyu nang á̱ choot a̱ni, si̱ kan doot, a̱ si̱ hyia̱ ma̱ng a̱cha̱chet a̱yaakwak a̱son A̱yahudawa ba nang Yesu wa nchoot guu.

¹⁶Huhwa si̱ mbyia̱ A̱yahudawa ba si̱ ka̱n ta̱bat nyia̱ Yesu a̱ka̱kpa̱t, mat nang a̱ nchoot a̱tyu nzwan a̱tuk Mam Fwung.

¹⁷A̱wot Yesu si̱ nyia̱, “A̱tyia̱ nung nyia̱ nta̱m kuzang jen. A̱wot nung mameang, ku yet ta hwa n nyia̱ ta̱m.”

¹⁸Mat kyang nang gu hyia̱ hyia̱ huni a̱ni, A̱yahudawa ba, si̱ mbeang chat vak nang ba̱ na nhyat gu a̱ni; nyia̱ da̱ziya nang gu mbyian mba a̱tuk Mam Fwung, a̱wot a̱ si̱ bu nyia̱ A̱gwaza wa yet A̱tyia̱ nggu, nyia̱ a̱ kyiak a̱pyia̱ nggu cha̱chaat ma̱ng A̱gwaza.

¹⁹A̱jawa Yesu si̱ wa̱i a̱lyiat nyia̱, “N na hyia̱ ma̱ng a̱nyin a̱chuchuk; Nggwon A̱gwaza ka nyian kuzang kyang ma̱nyin ka bah; a̱ ni̱ nyia̱ kuzang nkyang nang gu li nang A̱tyia̱ wu nyia̱ wa a̱ni. Mat kuzang kyang nang A̱tyia̱ wu nyia̱ a̱ni; huhwa nang Nggwon ka nyia̱ mameang.

²⁰Mat A̱tyia̱ wu fa̱k di̱ nggwon ka ba̱t. Huhwa mbyia̱ gu si̱ nshei ma̱ng Nggwon ka a̱mgba̱m nkyang nang gu nyia̱ a̱ni. A̱tyia̱ wu na hyia̱ ma̱ng Nggwon ka a̱cha̱chet nkyang na̱ lan á̱si̱ nani a̱ni, ka̱ nyia̱. A̱wot nyi na fa̱k a̱ga̱de.

²¹“Ma̱nang A̱tyia̱ wu ni̱ nta̱ngam á̱niet ba̱ ka̱n kwi, a̱wot a̱ bu nwuat ba swuan a̱ni; ma a̱nia wa nang Nggwon ka nnwuat swuan da̱ a̱tyu nang ka̱ shim nwuak a̱ni.

²²A̱tyia̱ wu ma̱ a̱pyia̱ nggu na nyia̱ a̱yin shi̱ri̱ya bah. A̱ wa ka̱n nwuak Nggwon nggu ka tyok ka̱ nyia̱ konyan shi̱ri̱ya.

²³Da̱nian a̱mgba̱m á̱niet ba ba̱ ka nwuak Nggwon ka shi, ma̱ cha̱chaat nang ba̱ nnwuat A̱tyia̱ wu a̱ ta̱m ma̱ng a̱nka a̱ni.

²⁴“N tak nyin a̱tsatsak a̱lyiat; kuzang a̱yin wa fwuong a̱lyiat nung na, a̱wot a̱ si̱ nwuak fwuo da̱ a̱tyu a̱ ta̱m nung a̱ni; a̱ byia̱ swuan sang sangba̱p. Á̱ na nyia̱ gu shi̱ri̱ya bah. A̱wot a̱ wa ka̱n shot a̱khwu, a̱ si̱ shya̱ swuan.

²⁵“N tak nyin a̱tsatsak a̱lyiat; jen na bai, a̱wot ma̱ninika ji̱ wa ka̱n nyia̱, nang á̱niet ba̱ ka̱n kwi a̱ni na nfa̱k a̱nwuat Nggwon A̱gwaza. A̱wot á̱niet ba̱ fa̱k a̱ni, ba̱ na shya̱ swuan.

²⁶Ma̱nang A̱tyia̱ wu ma̱ a̱pyia̱ nggu ngyet a̱tyin swuan a̱ni; ma a̱nia wa nang nggu nwuak Nggwon nggu ka, ka̱ nwuat swuan ji ma̱ cha̱chaat.

²⁷Ma a̱nia wa, a̱tyia̱ wu si̱ bu nwuak Nggwon ka tyok ka̱ nyia̱ shi̱ri̱ya, mat ka̱ yet Nggwon A̱tyubishyi kya.

²⁸“Nyi yok ghwon si̱ huni ku tyia̱ nyi fa̱k a̱ga̱de bah! Jen chobai nang a̱mgba̱m á̱niet ba̱ ka̱n kwi, a̱wot ba̱ shya̱ ma̱ a̱ka̱bi a̱ni; ba̱ bye fa̱k a̱nwuat Nggwon A̱gwaza ka.

²⁹A̱wot ba̱ na ghwut ma̱ a̱ka̱bi na. Á̱niet ba ba̱ ku nyia̱ a̱tan kyang nang ba̱ shya̱ a̱chet a̱ni, ba̱ na doot ba̱ shya̱ swuan. A̱wot á̱niet ba ba̱ ku nyia̱ a̱ka̱tuk nang ba̱ shya̱ a̱chet a̱ni, ba̱ na doot a̱ faat mba shi̱ri̱ya a̱khwu.

³⁰N si̱ mi̱n nyia̱ kyang ma̱nyin nung bah. N nyia̱ shi̱ri̱ya di̱ si̱sak nang A̱gwaza ntak ma̱ng a̱nung a̱ni. Huhwa mbyia̱, nyia̱ shi̱ri̱ya nung hu naat cha̱chaat. Mat, n kwan n nyia̱ kyang hu nang n chat wa a̱ni bah. Kyang hu nang a̱tyu a̱ ta̱m nung chat a̱ni; huhwa n nyia̱.

³¹“Ki̱ n tak kyang kpa̱sai tazwa a̱pyia̱ nung, kyang hu nang n tak kpa̱sai a̱ni, á̱ si̱ mi̱n san hu nang a̱tsatsak a̱lyiat wa a̱ni bah.

³²A̱wot, a̱tyu a̱ shei kpa̱sai a̱lyiat a̱kwonu nung a̱ni, nshya̱. A̱wot n dyen kyang nang gu tak kpa̱sai tazwa nung a̱ni, a̱tsatsak a̱lyiat wa za̱m.

³³“Nyi ku ta̱m a̱yaata̱m da̱ a̱vwuo Yoona. A̱wot a̱ si̱ tak nyin kpa̱sai tazwa nung mami a̱chuchuk.

³⁴A̱mgba̱m ma̱ng a̱nia, n chat n ba̱ng fwuo di̱ kyang nang a̱tyubishyi tak kpa̱sai tazwa nung a̱ni bah. N tak a̱nia da̱nian nyi ka shya̱ swuan ja.

³⁵Yoona ku li nang long fi̱tila hu sai a̱vwuo a̱ni. A̱wot nyi si̱ khai da̱ a̱banjen ma̱ a̱da̱dei, nyi ka gwai mami sai nggu hu.

³⁶“A̱mgba̱m ma̱ng a̱nia, n byia̱ nkyang na̱ shei a̱chuchuk wu kpa̱sai tazwa nung, na̱ lan si̱ Yoona hu ma̱ng shi a̱ni. Huhwa yet nta̱m na nang n nyia̱ a̱ni; nta̱m na nang A̱tyia̱ nung wu ku nwuak nung n nyia̱ a̱ni. Nta̱m ni̱nia lyiat da̱ a̱kwonu nung. A̱wot na̱ si̱ tak nyin nang A̱tyia̱ nung wu wa ku nta̱m nung.

³⁷“A̱wot A̱tyia̱ ma̱ a̱pyia̱ nggu a̱ ta̱m nung a̱ni; nggu wa shei kpa̱sai kyang gu lyen tazwa nung a̱ni. Nyin, nyi ka̱n fa̱k a̱nwuat nggu ka bah. Da̱ nyin, nyi ka̱n di a̱ghyi nggu ba bah.

³⁸A̱wot a̱lyiat nggu na, nyi san naa, nyi si̱ sak mi̱ nfwuo nyin na bah. Mat nyi nwuak fwuo da̱ a̱tyu nang gu ta̱m ndyo a̱ni bah.

³⁹“Nyi zop A̱lyiat A̱gwaza na, mat nyi fa nyi na shya̱ swuan sang sangba̱p ja. A̱wot A̱lyiat A̱gwaza na; ni̱nia tyai nyin a̱tyu nang ngyet a̱ni!

⁴⁰A̱mgba̱m ma̱ng a̱nia, nyi lak bai da̱ a̱vwuo nung, nyi ka shya̱ swuan ji.

⁴¹“N chat á̱niet bya ba̱ chyin nung bah.

⁴²A̱mgba̱m ma̱ng a̱nia, n dyen nang nyi nfa̱k da̱ A̱gwaza mi̱ fwuo nyin na bah.

⁴³Nung, n bai da̱ a̱lyoot A̱tyia̱ nung kya. Da̱ nyin, nyi san nung bah. A̱wot ka̱ a̱ghyang a̱niet bai da̱ a̱lyoot a̱pyia̱ nggu, nyi na san gu mbwak nfeang.

⁴⁴“Nyi na nyia̱ ni wa nyi nwuak a̱chuchuk, ka̱nang nyi chat dyep da̱ a̱vwuo á̱ghyang nyin; a̱wot da̱ nyin nyi chat chyin ku neet da̱ a̱vwuo A̱gwaza ma̱nyin nggu a̱ni bah?

⁴⁵“Nyi yok nyia̱ a̱di̱dam nyia̱ n na mbat nyin a̱hyiak da̱ a̱vwuo A̱tyia̱ nung ka bah. A̱tyu a̱ na bat nyin a̱hyiak na a̱ni; nggu wa yet Musa. Nggu wa nang nyi mba̱ng fwuo hu.

⁴⁶Ka̱ nyi wa nwuak a̱chuchuk di̱ Musa za̱m, si̱ nyi nwuak a̱chuchuk da̱ nung. Mat Musa ku lyuut nkhang nung nia!

⁴⁷A̱wot ka̱ nyi nwuak a̱chuchuk di̱ kyang nang Musa ku lyuut a̱ni bah; nyi na nyia̱ ni wa nyi nwuak a̱chuchuk da̱ lyiat nung na?”