Read tyap Yoona 7 Bible Online

Yoona 7 - tyap bible

Yoona 7

¹Nang si̱ huni nswak a̱ni, Yesu si̱ ya a̱son ma̱ng a̱chyet a̱ kat fam a̱byin Ga̱lili hu. A̱ ku shim a̱ nwuai a̱ chong a̱ kat fam a̱byin Yahudiya hu bah. Mat a̱cha̱chet A̱yahudawa ba ku chat hyat gu.

²A̱wot nang A̱yet Á̱suswak A̱yahudawa wu bwat kpa̱mkpaan,

³huhwa á̱na̱nyiuk Yesu ba si̱ nyia̱ ma̱ng a̱nggu a̱ni, “Ku myim a ghwon a̱vwuo kani a nat fam a̱byin Yahudiya. Da̱nian mman ta̱m ang na ba̱ ka li ntangka̱i a̱cha̱chet nta̱m nang a nyia̱ a̱ni.

⁴Ka̱ a̱yin chat a̱ lyen nggu shansham, a̱ si̱ mi̱n niat nkyang nang gu nyia̱ a̱ni bah. Nang a nnyian nkyang nani a̱ni, ku myim a tyia̱ a̱mgba̱m swanta hu ku lyen ang!”

⁵Mat á̱na̱nyiuk Yesu ba byi̱ri̱ng ba̱ ku nwuak a̱chuchuk da̱ nggu bah.

⁶Yesu si̱ nyia̱ ma̱ng á̱na̱nyiuk nggu ba a̱ni, “Jen nung ji ka̱n nyia̱ bah. A̱wot nyin, kuzang jen yet si̱ nyin ja.

⁷Swanta hu si̱ mi̱n dak nyin bah. A̱wot nung gwa nang á̱niet mi̱ swanta ba lak li hu. Mat n tak ma̱ng a̱mba nang ba̱ nyian a̱ka̱tuk nkyang.

⁸Nyin, nyi nat a̱yet wu. Nung, n na nat a̱yet wu bah,[38] mat jen nung ji ka̱n nyia̱ bah.”

⁹Yesu ku hyia̱ a̱lyiat nani, a̱wot a̱ si̱ ya ndabeang mi̱ swat hu mi̱ fam a̱byin Ga̱lili hu.

¹⁰Nang á̱na̱nyiuk Yesu ba ndoot ba̱ si̱ nat a̱yet wu a̱ni, Yesu mameang, a̱ si̱ doot a̱ si̱ nat a̱yet wu. A̱ ku chong kpa̱sai bah. A̱ ku nat da̱ bang.

¹¹A̱wot a̱cha̱chet A̱yahudawa ba ku chat ba̱ shya̱ nggu da̱ a̱vwuo a̱yet ka. Ba̱ si̱ nyia̱, “A̱tyu a̱wa shya̱ a̱ji wa?”

¹²A̱wot mami á̱kpa á̱niet ba̱ ku shya̱ ma̱ a̱yet wu a̱ni, ba̱ si̱ chyuang tazwa Yesu nyia̱, “A̱tyu a̱wa yet a̱tan a̱yin!” A̱wot á̱ghyang á̱niet si̱ nyia̱, “Kaai, a̱tyu a̱wa laai á̱niet bibya!”

¹³A̱mgba̱m ma̱ng a̱nia, á̱ byia̱ a̱tyu á̱ ku lyiat tazwa Yesu kpa̱sai a̱ni bah, mat ba̱ ku fwuong a̱wun a̱cha̱chet A̱yahudawa ba ba̱t.

¹⁴A̱wot ma̱ a̱ka̱wa̱tyia̱ song a̱yet wu, Yesu si̱ nwuo mami didyaat A̱li Nwuat Za̱nang A̱gwaza ka, a̱ si̱ ta̱bat tyiet á̱niet ba a̱ja.

¹⁵A̱cha̱chet A̱yahudawa ba si̱ fa̱k a̱ga̱de di̱ tyiet gu hu ba̱t. Huhwa ba̱ si̱ nyia̱, “Ku lili huni wa, nang a̱tyu wuni ndyen fang ta̱ka̱da hu a̱nia? Da̱ nggu, a̱ ka̱n mak nat a̱ si̱ tyiet gu fang ma̱ng lyuut baa?”

¹⁶Yesu si̱ nwuak ba shim, “Ta̱m ji nang n tyiet a̱ni, ji̱ yet si̱ nung ja bah; ji̱ neet da̱ a̱vwuo A̱gwaza kya. Nggu wa ta̱m nung.

¹⁷Konyan wa chat nyia̱ kyang nang A̱gwaza chat a̱ni, a̱ na fi̱k tyiet huni; ka̱ ku yet si̱ A̱gwaza hwa, kee n ma ndyiat a̱kwonu a̱pyia̱ nung kya.

¹⁸Ka̱ a̱yin lyiat di̱ nkyang na̱ yet si̱ a̱pyia̱ nggu a̱ni, a̱ ni̱ chat a̱ nwuak a̱pyia̱ nggu shi hwa. A̱wot a̱tyu a̱ lyiat da̱ a̱kwonu a̱tyu a̱ ta̱m gu a̱ni, da̱nian a̱ chat a̱ ka nwuak a̱tyu a̱ ta̱m gu a̱ni wa shi hu; nggu wa byia̱ a̱chuchuk wu. A̱ yet a̱tyu bwoi a̱ka̱laa wa bah.

¹⁹“Musa wa ku nwuak nyin doka A̱gwaza ji baa? A̱mgba̱m ma̱ng a̱nia, á̱ mbyia̱ a̱tyo nyiung ma̱ nyin a̱ khwi doka A̱gwaza ji a̱ni bah. Yihwa mbyia̱ nyi nchat nyi hyat nung?”

²⁰Á̱kpa á̱niet ka si̱ nwuak gu shim nyia̱, “A byia̱ a̱ka̱tuk ntswa! A̱nyan wa chat hyat ang hu?”

²¹Yesu si̱ nyia̱, “N nyia̱ kyang a̱ga̱de nyiung hwa ma̱nyin hu. A̱wot a̱mgba̱m nyin, nyi ku fa̱k a̱ga̱de.

²²Musa ku nwuak nyin doka nyi saai mman a̱sam nyin na mi̱ chen. (A̱wot Musa wa ma̱ a̱pyia̱ gu ku tsa si̱ a̱hwa bah; a̱yaatyia̱ a̱khwop nyin bibya ku tsa hu.) Nyi ni̱ sak nggwon a̱sam ka mi̱ nchen hu a̱tuk Mam Fwung kya.

²³Ka̱ á̱ ni̱ sak nggwon a̱sam mi̱ chen a̱tuk Mam Fwung ka kalak á̱ du tyat doka Musa ji; ka̱ doot nyi mwai lyen ma̱ng a̱nung da̱ziya nang n choot a̱yin a̱tuk Mam Fwung ka a?

²⁴Nyi yok nyia̱ shi̱ri̱ya nyin ji tazwa kyang nang nyi li ma̱ng á̱ghyi bya a̱ni bah. Nyi nyia̱ shi̱ri̱ya ji mami a̱chuchuk ma̱ng kyang nang nyi lyen wa a̱ni.”

²⁵Á̱ghyang á̱niet ba̱ neet mi̱ Urusha̱lima a̱ni, ba̱ si̱ nyia̱, “A̱tyu wuni wa nang ba̱ chat hyat hu baa?

²⁶Di, nggu wa yong a̱ji! A̱ yong kpa̱sai a̱ lyiat. Da̱ mba, ba̱ nyia̱ nggu kyang bah. Ke a̱cha̱chet A̱yahudawa ba shim nang nggu wa ngyet Kristi wu la?

²⁷“Ka̱ a̱tyu wuni wa, zi̱ lyen a̱vwuo nang gu nneet a̱ni. A̱wot ka̱ Kristi wu ba̱ bai, á̱ byia̱ a̱tyu a̱ bye lyen a̱vwuo ka nang gu nneet a̱ni bah!”

²⁸Nang Yesu ku ntyiet mi̱ didyaat A̱li Nwuat Za̱nang A̱gwaza hu a̱ni, a̱ si̱ lyiat ma̱ng a̱gba̱ndang a̱nwuat nyia̱, “Nyin, nyi lyen nung shansham ma̱ng a̱vwuo ka nang n neet a̱ni a? Nung, n bai da̱nian a̱pyia̱ nung bah. A̱tyu a̱ ta̱m nung a̱ni; nggu wa byia̱ a̱chuchuk wu. Da̱ nyin, nyi lyen gu bah.

²⁹A̱wot nung, n dyen gu, mat n neet da̱ a̱vwuo nggu kya. Nggu wa ta̱m nung.”

³⁰Huhwa, ba̱ si̱ chat ba̱ ta̱bat gu. A̱wot a̱yin si̱ sak gu bwak bah. Mat jen a̱khwu nggu ji ka̱n nyia̱ bah.

³¹Ma̱ng a̱nia, á̱niet ma̱ a̱di̱di̱t mami á̱kpa á̱niet ka si̱ nwuak fwuo da̱ nggu. Ba̱ si̱ nyia̱, “Jen ji nang Kristi bye mbai a̱ni, a̱ si̱ ba̱ nyia̱ a̱cha̱chet nkyang a̱ga̱de na̱ lan si̱ nang a̱tyu wuni ka̱n nyia̱ a̱ni a?”

³²Nang A̱fa̱risawa ba ku nfa̱k nang á̱kpa á̱niet ka chyuang tazwa Yesu a̱ni; a̱jawa mba ma̱ng a̱cha̱chet a̱yaapris ba, ba̱ si̱ ta̱m á̱niet chok A̱li Nwuat Za̱nang A̱gwaza ba, ba̱ ka ta̱bat guu.

³³Yesu si̱ nyia̱, “N na nswan ma̱ng a̱nyin da̱ a̱banjen ma̱ a̱da̱dei. A̱wot n na mbwuok nat da̱ a̱vwuo a̱tyu a̱ ta̱m nung a̱ni.

³⁴Nyi bye chat nung. Da̱ nyin, nyi na li nung bah. Mat, a̱vwuo ka nang n shya̱ a̱ni, nyi si̱ mi̱n nat bah.”

³⁵A̱jawa a̱cha̱chet A̱yahudawa ba si̱ nyia̱ ma̱ng á̱ghyang mba a̱ni, “A̱ji wa nang gu nnaat da̱nang zi̱ si̱ mi̱n shya̱ nggu bah? Ke a̱ naat da̱ a̱vwuo A̱yahudawa ba̱ seang á̱ kai nnwap na̱ nwai yet A̱yahudawa ba a̱ni; gu ka tyiet mba wa kee? Shimba a̱ na tyiet A̱helenawa mameang!

³⁶A̱ nyia̱, ‘Nyi na chat nung da̱ nyin nyi na li nung bah. A̱wot a̱vwuo ka nang n naat a̱ni, nyi si̱ mi̱n nat bah.’ Yihwa nang gu fa?”

³⁷A̱tuk ngaan A̱yet Á̱suswak ka, mam a̱hwa hwa yet a̱gba̱ndang mam a̱yet wu. Yesu si̱ doot a̱ yong. A̱ si̱ ta̱ngam a̱nwuat ka mi̱ chet nyia̱, “Konyan wa fwuong mashyi a̱sa̱khwot a̱ni, gu bai da̱ a̱vwuo nung, gu swuo!

³⁸Konyan wa nwuak fwuo da̱ nung a̱ni, ma̱nang A̱lyiat A̱gwaza na nhyia̱ a̱ni; ‘Mami nfwuo gu kikya nang a̱chi̱chen a̱sa̱khwot nwuat swuan ba ntyong.’ ”

³⁹(Yesu lyiat á̱lyiat nani tazwa A̱za̱za̱rak Ntswa wu nang á̱niet ba̱ nwuak fwuo da̱ nggu na san a̱ni. Mat ba̱ng ba̱ tat jen jini á̱ ka̱n ta̱m ma̱ng A̱za̱za̱rak Ntswa wu bah. Mat á̱ ka̱n ta̱ngam Yesu ma̱ng swuan ma̱ á̱niet ba̱ ka̱n kwi a̱ni, a̱ si̱ shya̱ a̱kyenkyai shi tyok nggu wu bah.)

⁴⁰Nang á̱kpa á̱niet ka nfa̱k á̱lyiat Yesu na a̱ni, ba̱ si̱ nyia̱, “A̱tsatsak a̱lyiat wa za̱m; a̱tyu wuni yet a̱ta̱m a̱kwonu A̱gwaza wa nang zi̱ fwuong a̱ni!”

⁴¹Á̱ghyang á̱niet mami mba si̱ nyia̱, “A̱tyu wuni wa yet A̱tyusan nang zi̱ fwuong a̱ni!” A̱wot á̱ghyang á̱niet si̱ nyia̱, “Yihwa a? Kristi, a̱tyu nang A̱gwaza na kup gu tyok a̱ni, na ghwut ma̱ a̱byin Ga̱lili kyaa?

⁴²Wá ngyei A̱lyiat A̱gwaza na nyia̱ Kristi[39] wu na ghwut mi̱ kwai Da̱wuda ja. A̱wot á̱ byin nggu ma̱ a̱keang Ba̱italami, a̱da̱dei a̱keang nang a̱gwam Da̱wuda ku nswan a̱ni a?”

⁴³A̱nia wa á̱kpa á̱niet ka ku ngya fwuang ji. Ba̱ si̱ ghai kankang da̱nian guu.

⁴⁴Á̱ghyang á̱niet si̱ chat ta̱bat guu. A̱wot á̱ byia̱ a̱tyu a̱ sak gu bwak a̱ni bah.

⁴⁵A̱jawa á̱niet chok A̱li Nwuat Za̱nang A̱gwaza ba si̱ bwuok mbwak nkhwot, á̱ nat da̱ a̱vwuo a̱cha̱chet a̱yaapris ma̱ng A̱fa̱risawa ba. Mba mameang, ba̱ si̱ lyip ba nyia̱, “Yihwa mbyia̱ nang nyi nwai mbai ma̱ng a̱nggu hu?”

⁴⁶A̱jawa á̱niet chok a̱vwuo ba si̱ nyia̱ ma̱ng a̱mba a̱ni, “Kaai, á̱ mbyia̱ a̱tyu a̱ ka̱n mak lyiat nang a̱tyu wuni a̱ni bah!”

⁴⁷Huhwa A̱fa̱risawa ba si̱ lyip á̱niet chok a̱vwuo ba nyia̱, “Nyin mameang, a̱ laai nyin a?

⁴⁸Á̱ mbyia̱ a̱yin mami a̱cha̱chet a̱yaapris mbeang A̱fa̱risawa ba á̱ ka̱n nwuak fwuo da̱ nggu a̱ni a?

⁴⁹Á̱kpa á̱niet kani lyen doka nang A̱gwaza ku nwuak Musa a̱ni bah! Mat a̱nia, shyishyi A̱gwaza si̱ ta̱bat mba!”

⁵⁰Nikodimut a̱wa a̱ ku nat da̱ a̱vwuo Yesu a̱tyetuk ka di̱n jen jhyang a̱ni, a̱ ku yet a̱tyo nyiung mami mba; huhwa gu nyia̱ ma̱ng a̱mba a̱ni,

⁵¹“Mami doka nzi̱t ji, á̱ ni̱ faat a̱lyiat na tazwa a̱yin neet nang á̱ ka̱n fa̱k a̱lyiat a̱bwonu guu, a̱wot á̱ zop kyang hu nang gu nyia̱ a̱ni baa?”

⁵²Ba̱ si̱ nyia̱, “Nwan meang, a yet a̱tyu Ga̱lili wa a? Zop A̱lyiat A̱gwaza na shansham a lii; á̱ byia̱ a̱ta̱m a̱kwonu A̱gwaza a̱ na ghwut ma̱ a̱byin Ga̱lili a̱ni bah!”

⁵³[40][[A̱jawa konyan ma̱ a̱mba si̱ ndoot, a̱ si̱ nkat a̱mali nggu.]]