Read tyap Yoona 8 Bible Online

Yoona 8 - tyap bible

Yoona 8

²Da̱ a̱tsotson tat ka, Yesu si̱ bu bwuok a̱ nat mi̱ didyaat A̱li Nwuat Za̱nang A̱gwaza hu. A̱mgba̱m á̱kpa á̱niet ka si̱ bai da̱ a̱vwuo nggu. A̱ si̱ bwuok a̱ swan a̱byin, a̱ si̱ tyiet mbaa.

³A̱jawa a̱cha̱chet a̱yaagwak tyiet doka A̱gwaza ma̱ng A̱fa̱risawa ba, ba̱ si̱ bai ma̱ng a̱byii̱k nang á̱ ta̱bat gu di̱ katnaan. Ba̱ si̱ tyia̱ a̱byii̱k wu si̱ yong a̱ka̱wa̱tyia̱ á̱niet ka.

⁴Ba̱ si̱ nyia̱ ma̱ng Yesu a̱ni, “A̱tyu tyiet, di a̱byii̱k wuni á̱ ta̱bat nggu wa ba̱t, nang gu nshya̱ mami katnaan!

⁵A̱wot mami doka A̱gwaza nang gu nwuak Musa a̱ni, á̱ tak zi̱t nyia̱; zi̱ mang tangka̱i á̱niet huni ma̱ng fang hyaai. Nwan mameang, yihwa nang a hyia̱?”

⁶Ba̱ ku lyip gu a̱lyiat nani, da̱nian ba̱ tya̱ra̱m nggu, ba̱ ka shya̱ kyang hu nang ba̱ na ntyap guu, ba̱ tyia̱ nggu a̱bun a̱ni. A̱mgba̱m ma̱ng a̱nia, Yesu si̱ beak, a̱ si̱ lyuut a̱byin ma̱ng ga̱swuong.

⁷Nang ba̱ ngyong a̱ja, ba̱ ya a̱son ma̱ng lyi̱ri̱m nggu a̱lyiat a̱ni. A̱ si̱ doot a̱ yong, a̱ si̱ nyia̱ ma̱ng a̱mba a̱ni, “Mami nyin, a̱tyu da̱ á̱ ka̱n mak nyia̱ a̱ka̱tuk nyia̱ ma̱nyin a̱ni bah; gu yet a̱son kyiak a̱fang gu nta a̱byii̱k wuni, zi̱ li.”

⁸Yesu si̱ bu beak a̱byin, a̱ si̱ ya a̱son ma̱ng lyuut hu.

⁹Nang ba̱ nfa̱k a̱nia a̱ni, ba̱ si̱ ya̱bam á̱ vwuot a̱nyanyin kyiak neet da̱ a̱niet khwop si̱ nat da̱ a̱shushyuo. Ba̱ si̱ ghwon Yesu a̱ja ma̱nyin nggu ma̱ng a̱byii̱k wu.

¹⁰Yesu si̱ doot a̱ yong a̱ka̱tsak, a̱ si̱ nyia̱ ma̱ng a̱byii̱k wu a̱ni, “A̱yang a̱li, á̱niet ba ba̱ ta̱bat ang a̱ni, ba̱ shya̱ a̱ji? Á̱ mbyia̱ a̱tyo nyiung mami mba a̱ yong a̱ nyia̱ ang shi̱ri̱ya a̱ni baa?”

¹¹A̱byii̱k wu si̱ nyia̱, “Kaai, A̱tyoli.” A̱jawa Yesu si̱ nyia̱ ma̱ng a̱nggu a̱ni, “Nung mameang, n tyia̱ ang a̱bun bah. Nkat kyang ang. A̱wot, bu yok nyia̱ a̱ka̱tuk nyia̱ bah.”]][41]

¹²Yesu si̱ bu nyia̱ ma̱ng a̱mba a̱ni, “Nung gwa ngyet sai hu mi̱ swanta hu. Konyan wa khwi nung a̱ni, a̱ na chong mi̱ ndyin bah. A̱ na shya̱ swuan, a̱wot a̱ si̱ mi̱n mak chong mi̱ ndyin bah.”

¹³Mat a̱nia, A̱fa̱risawa ba si̱ nyia̱ ma̱ng Yesu a̱ni, “A yong shei a̱chuchuk a̱lyiat tazwa a̱pyia̱ ang. Kyang hu nang a lyiat a̱ni, a̱tsatsak a̱lyiat wa bah!”

¹⁴Yesu si̱ nyia̱, “Ka̱ n tak a̱chuchuk kpa̱sai tazwa a̱pyia̱ nung, kyang hu nang n tak a̱ni, a̱tsatsak a̱lyiat wa. Mat, n dyen a̱vwuo ka nang n neet a̱ni, ma̱ng a̱vwuo ka nang n na mbwuok n nat a̱ni. A̱wot nyin, nyi lyen a̱vwuo ka nang n neet a̱ni bah. Da̱ nyin, nyi lyen a̱vwuo ka nang n na mbwuok n nat a̱ni bah.

¹⁵Nyin, nyi nyia̱ shi̱ri̱ya nang á̱niet mi̱ swanta a̱ni. Nung, n nyia̱ shi̱ri̱ya tazwa a̱yin bah.

¹⁶A̱mgba̱m ma̱ng a̱nia, ka̱ n si̱ mi̱n nyia̱ shi̱ri̱ya, shi̱ri̱ya nung ji yet a̱tsotswat wa. Mat nung gwa ma̱nyin nung bah; nung gwa mbeang A̱tyia̱ nung wu a̱ ta̱m nung a̱ni, a̱ shya̱ dundung ma̱ng a̱nung.

¹⁷“Mami doka nyin ji á̱ lyuut nyia̱ ka̱ á̱niet a̱feang nwuak sheda tazwa kyang, kyang hu ba̱ nwuak sheda hu a̱ni ku yet a̱tsatsak a̱lyiat wa.

¹⁸Nung, n nwuak sheda tazwa a̱pyia̱ nung. A̱wot A̱tyia̱ wu a̱ ta̱m nung a̱ni; nggu wa mameang, a̱ nwuak sheda tazwa nung.”

¹⁹Ba̱ si̱ lyip Yesu, nyia̱ “A̱tyia̱ ang wu shya̱ a̱ji wa?” Yesu si̱ nwuak ba shim nyia̱, “Mat nang nyi ndyen nung a̱ni bah, huhwa mbyia̱ nang nyi ndyen A̱tyia̱ nung wu bah. Ka̱ nyi wa lyen nung, si̱ nyi lyen A̱tyia̱ nung wu mameang.”

²⁰Yesu ku lyiat a̱lyiat nani di̱n jen tyiet nggu ji mi̱ didyaat A̱li Nwuat Za̱nang A̱gwaza, nang gu shya̱ kpa̱mkpaan ma̱ng a̱vwuo khwot kurum ka. A̱mgba̱m ma̱ng a̱nia, á̱ ku mbyia̱ a̱tyu a̱ na ta̱bat gu a̱ni bah; mat nang jen nta̱bat gu ji ka̱n nyia̱ bah.

²¹Yesu si̱ bu nyia̱ ma̱ng a̱mba a̱ni, “N na nkat, a̱wot nyi na chat nung. Ma̱ng a̱nia, nyi na kwi ma̱ a̱ka̱tuk nyia̱ nyin wu. A̱vwuo ka nang n na nat a̱ni, nyi si̱ mi̱n nat bah.”

²²Huhwa a̱cha̱chet A̱yahudawa ba si̱ lyip, nyia̱ “A̱ na hyat a̱pyia̱ nggu kya kee? Nang gu nnyia̱, ‘A̱vwuo ka nang n naat a̱ni, nyi si̱ mi̱n mak nat bah.’ ”

²³Huhwa Yesu si̱ nyia̱ ma̱ng a̱mba a̱ni, “Nyin, nyi shya̱ a̱byin kya a̱ji. A̱wot nung, n neet Ma A̱gwaza tswazwa kya. Nyin, nyi yet á̱niet mi̱ swanta bya. A̱wot nung, n gyet a̱tyu mi̱ swanta wuni wa bah.

²⁴Huhwa mbyia̱ n hyia̱ ma̱ng a̱nyin, nang nyi na nkwi ma̱ a̱ka̱tuk nyia̱ nyin wu. Mat ka̱ nyi nwuak a̱chuchuk nyia̱ nung gwa ngyet a̱tyu nang n tak n gyet a̱ni[42] bah; nyi na kwi ma̱ng a̱ka̱tuk nyia̱ nyin wu mut!”

²⁵Huhwa ba̱ nyia̱ mi̱ Yesu a̱ni, “Nwan wa yet a̱nyan?” Yesu si̱ nyia̱ ma̱ng a̱mba a̱ni, “N mi̱ nhyia̱ ma̱ng a̱nyin neet di̱ tsa hu.

²⁶Nkyang nshya̱ ma̱ a̱di̱di̱t nang n na nhyia̱ n bu nnyia̱ nyin shi̱ri̱ya a̱ni. A̱mgba̱m ma̱ng a̱nia, a̱tyu a̱ ta̱m ma̱ng a̱nung a̱ni, a̱ byia̱ a̱chuchuk. A̱wot kyang hu nang n fa̱k da̱ a̱vwuo nggu a̱ni; huhwa nang n na ntak ma̱ng á̱niet mi̱ swanta ba.”

²⁷Ba̱ ku fi̱k nang Yesu ndyiat ma̱ng a̱mba tazwa A̱tyia̱ nggu wu wa a̱ni bah.

²⁸Yesu si̱ nyia̱ ma̱ng a̱mba a̱ni, “Jen nang nyi bye nta̱ngam Nggwon A̱tyubishyi tswazwa a̱ni; jen a̱ja ja nang nyi bye ndyen nang nung gwa ngyet a̱tyu nang n tak ngyet a̱ni.[43] N nyia̱ kyang ma̱nyin nung bah. N nyia̱ di̱ si̱sak ji nang A̱tyia̱ nung wu ntyiet nung a̱ni; a̱nia wa nang n dyiat.

²⁹A̱wot a̱tyu a̱ ta̱m nung a̱ni, a̱ shya̱ dundung ma̱ng a̱nung. Mat kuzang jen n ni̱ nyia̱ kyang hu nang gu chat a̱ni.”

³⁰Á̱niet ma̱ a̱di̱di̱t ba̱ si̱ fa̱k nkyang Yesu lyiat a̱ni, ba̱ si̱ nwuak a̱chuchuk da̱ nggu.

³¹A̱jawa Yesu si̱ lyiat ma̱ng A̱yahudawa ba, ba̱ ku nwuak fwuo da̱ nggu a̱ni, a̱ si̱ nyia̱, “Ka̱ nyi wa khwi a̱lyiat nang n tyiet nyin a̱ni, si̱ nyin bya chi̱k yet mman nung na.

³²Nyi na lyen a̱chuchuk wu, a̱wot a̱chuchuk wu na tyia̱ nyi yet á̱sa̱t á̱niet.”

³³Ba̱ si̱ nyia̱, “Nzi̱t, zi̱ yet kwai Ibrahim ja. Zi̱ ka̱n mak yet a̱khwo a̱yin bah. Yihwa nang a fa a na tyia̱ zi̱ nshot?”

³⁴Yesu si̱ nwuak ba shim nyia̱, “A̱tsatsak a̱lyiat, n hyia̱ ma̱ng a̱nyin; konyan wa nyia̱ a̱ka̱tuk nyia̱ a̱ni, a̱ yet a̱khwo a̱ka̱tuk nyia̱ wa za̱m!

³⁵A̱khwo yet nggwon a̱li kuzang jen bah. A̱tyu a̱ yet nggwon a̱li ka a̱ni; nggu wa na swan a̱mali ka si̱ nat sang sangba̱p.

³⁶Ka̱ Nggwon A̱gwaza ka kya ti̱n nyin mi̱ khwo hu, a̱tsatsak a̱lyiat wa; nyi na yet á̱sa̱t á̱niet bya za̱m!

³⁷“N dyen nang nyi ngyet kwai Ibrahim ja. A̱mgba̱m ma̱ng a̱nia, nyi kwan nyi hyat nung. Mat a̱lyiat nung na shya̱ mi̱ fwuo nyin na bah.

³⁸Nung, n dyiat kyang hu nang n di da̱ a̱vwuo A̱tyia̱ nung ka a̱ni. A̱wot nyin mameang, nyi ni̱ nyia̱ kyang hu nang a̱tyia̱ nyin wu hyia̱ ma̱ng a̱nyin, nyi si̱ fa̱k a̱ni.”

³⁹A̱cha̱chet A̱yahudawa ba si̱ nyia̱, “A̱tyia̱ nzi̱t wu wa yet Ibrahim!” Yesu mameang si̱ nyia̱ ma̱ng a̱mba a̱ni, “Kaai, ka̱ a̱tsatsak a̱lyiat wa nang nyi nyia̱ nyi yet mman Ibrahim nia; nyi na nyia̱ tangka̱i nta̱m hu nang Ibrahim ku nyia̱ a̱ni.

⁴⁰Nyin bya ba di̱ yong huni, nyi chat nyi hyat nung; nung a̱tyu n tak ma̱ng a̱nyin a̱chuchuk nang n fa̱k da̱ a̱vwuo A̱gwaza a̱ni. A̱nia wa nang Ibrahim ku nnyia̱ bah.

⁴¹Nyi nyian kyang nang a̱tyia̱ nyin wu nyia̱ wa a̱ni.” Ba̱ si̱ nyia̱, “A̱gwaza wa ma̱ a̱pyia̱ nggu yet A̱tyia̱ nzi̱t wu! Á̱ tyei nzi̱t di̱n vak katnaan bah. A̱gwaza wa ma̱ a̱pyia̱ nggu tyei nzi̱t, zi̱ yet mman gu nia za̱m!”

⁴²Yesu si̱ nyia̱ ma̱ng a̱mba a̱ni, “Ka̱ a̱tsatsak a̱lyiat wa nang A̱gwaza wa yet A̱tyia̱ nyin wu; si̱ nyi fa̱k da̱ nung. Mat, n ghwut neet da̱ a̱vwuo A̱gwaza kya; n shya̱ a̱ji ma̱ninika. N bai a̱ji da̱nian a̱pyia̱ nung bah, A̱gwaza wa ta̱m nung.

⁴³Yihwa mbyia̱ nang nyi nnwai fi̱k kyang hu nang n dyiat a̱ni? Mat, nyi chat nyi myiai a̱fufwuo, nyi fa̱k á̱lyiat nung na bah.

⁴⁴“Nyin, nyi yet mman A̱ta̱nyeang nia; kikya yet a̱tyia̱ nyin wu. A̱wot nyi fa nyi khwi kyang hu nang A̱ta̱nyeang ka chat a̱ni. Neet gbangbang, A̱ta̱nyeang ka ka̱ yet a̱gwam á̱ka̱tuk ntswá wu a̱ni, ka̱ yet a̱tyu hyaai á̱niet wa. Da̱ nka, ka̱ lyiat a̱tsatsak a̱lyiat bah. A̱mgba̱m jen nang ka̱ mbwoi a̱ka̱laa na a̱ni, ka̱ ni̱ nyia̱ kyang hu myim nka wa a̱ni. Mat, ka̱ yet a̱tyu bwoi a̱ka̱laa wa, ma̱ng a̱tyia̱ á̱niet bwoi a̱ka̱laa.

⁴⁵Nung, n dyiat a̱tsatsak a̱lyiat wa. Huhwa mbyia̱ nang nyi ndak nwuak fwuo da̱ nung.

⁴⁶“Mami nyin, a̱nyan wa doot a̱ tak nang gu ka̱n di nang n nyia̱ a̱ka̱tuk nyia̱? Ka̱ a̱tsatsak a̱lyiat wa nang n dyiat, yihwa mbyia̱ nang nyi ndak nwuak fwuo hu da̱ nung?

⁴⁷A̱tyu a̱ yet a̱si̱ A̱gwaza a̱ni, a̱ ni̱ myiai a̱fufwuo a̱ fa̱k a̱lyiat A̱gwaza na. Nyin, nyi yet á̱niet A̱gwaza bah. Huhwa mbyia̱ nyi si̱ mi̱n myiai a̱fufwuo nyi fa̱k a̱lyiat A̱gwaza na bah.”

⁴⁸A̱cha̱chet A̱yahudawa ba[44] si̱ nyia̱. “Zi̱ ku bwuo la nang zi̱ ku nhyia̱ ma̱ng a̱nwan nyia̱ a yet a̱tyu Sa̱mariya, a̱wot a si̱ byia̱ a̱ka̱tuk ntswa a̱ni a?”

⁴⁹Yesu si̱ nyia̱, “Nung, n byia̱ a̱ka̱tuk ntswa bah! N nwuat A̱tyia̱ nung wu shi. A̱wot nyin, nyi jhyuai nung.

⁵⁰N chat shi a̱pyia̱ nung bah. A̱yin nshya̱ a̱ chat nung ndyo a̱ni. A̱wot nggu wa yet a̱tyu nyia̱ shi̱ri̱ya wu da̱ a̱kwonu nung.

⁵¹N na tak ma̱ng a̱nyin a̱chuchuk za̱m; konyan a̱ khwi a̱lyiat nung na a̱ni, a̱ si̱ mi̱n khwu bah, ba̱ng si̱ nat sang sangba̱p!”

⁵²Huhwa a̱cha̱chet A̱yahudawa ba si̱ nyia̱ ma̱ng Yesu a̱ni, “Di̱ yong huni, zi̱ lyen chi̱k nang a mbyia̱ a̱ka̱tuk ntswa! Mat Ibrahim ku khwu, ma a̱nia wa a̱yaata̱m a̱kwonu A̱gwaza á̱ghyang. A̱mgba̱m ma̱ng a̱nia, a nyia̱, ‘Konyan wa khwi a̱lyiat nung na, a̱ si̱ mi̱n khwu bah. A̱ na shya̱ swuan sang sangba̱p.’

⁵³Nwan, a lan a̱tyia̱ a̱khwop nzi̱t wu Ibrahim mbeang a̱yaata̱m a̱kwonu A̱gwaza á̱ghyang ba̱ ku kwi a̱ni a? A̱nyan wa nang a fa nyia̱ a yet?”

⁵⁴Yesu si̱ nwuak mba shim nyia̱, “Ki̱ n nwuak a̱pyia̱ nung shi, shi nung hu na tyak kyang bah. A̱tyia̱ nung wu, nggu wa nwuat nung shi hu; a̱tyu nang nyi nyia̱ nggu wa yet A̱gwaza nyin wu a̱ni.

⁵⁵“Nyin, nyi lyen gu bah. A̱wot nung, n dyen nggu. Ki̱ n nyia̱ di̱ n dyen gu bah, n na ngyet a̱tyu bwoi a̱ka̱laa cha̱chaat ma̱ng a̱nyin. A̱wot n dyen nggu za̱m, a̱wot n si̱ khwi a̱lyiat nggu na.

⁵⁶Ibrahim, a̱ ku yet a̱tyia̱ nyin wu a̱ni, a̱ ku shya̱ ma̱ng a̱sai a̱lyia̱ mat chat li jen nang n ku nshya̱ mi̱ swanta hu a̱ni. A̱ ku li njii, a̱ si̱ gwai!”

⁵⁷Huhwa a̱cha̱chet A̱yahudawa ba[45] si̱ nyia̱, “Di̱ yong huni, a ka̱n tat a̱lyia̱ nswak nfwuon bah! Huhwa nang a nyia̱ a ku li Ibrahim wu a?”

⁵⁸Yesu mameang si̱ nwuak ba shim nyia̱, “N na ntak ma̱ng a̱nyin a̱tsatsak a̱lyiat; kyiak neet nang á̱ ka̱n byin Ibrahim bah, nung gwa ngyet A̱gwaza[46] wu!”

⁵⁹Nang ba̱ nfa̱k a̱nia a̱ni, ba̱ si̱ kyiak nfang, ba̱ na mmang guu. Yesu si̱ tyia̱ ghyuai a̱ ghwut mi̱ didyaat A̱li Nwuat Za̱nang A̱gwaza hu.