Read tyap Yoona 9 Bible Online

Yoona 9 - tyap bible

Yoona 9

¹Nang Yesu sweap, a̱ si̱ kin di a̱tyok nang á̱ ku byin ma̱ng a̱fi̱fan a̱ni.

²Huhwa mman ta̱m Yesu na si̱ lyip gu nyia̱, “A̱tyu tyiet, a̱nyan wa ku nyia̱ a̱ka̱tuk nyia̱ wu, a̱ ku tyia̱ á̱ si̱ mbyin a̱tyu wuni ma̱ng a̱fi̱fan ba? Nggu wa ku nyia̱ a̱ka̱tuk nyia̱ wu, ke á̱niet mbyin nggu bibya?”

³Huhwa Yesu si̱ nyia̱ ma̱ng a̱mba, “A̱ka̱tuk nyia̱ nggu ma̱ng á̱ka̱tuk á̱niet mbyin nggu wa mbyia̱ nang gu ngyet a̱tyu a̱fi̱fan bah. A̱ yet a̱tyu a̱fi̱fan wu da̱nian á̱ ka tak si̱sak ji nang Tyok A̱gwaza hu nnyia̱ ta̱m da̱ nggu a̱ni.

⁴“Ku yet ta hwa zi̱ nyia̱ ta̱m a̱tyu a̱ ta̱m nung a̱ni, neet nang mam ni̱ sai. A̱tyetuk na khwat, da̱nang a̱yin si̱ mi̱n nyia̱ ta̱m a̱ni bah.

⁵Jen nang n shya̱ mi̱ swanta hu a̱ni, nung gwa ngyet sai hu mi̱ swanta hu.”

⁶Nang Yesu nhyia̱ a̱nia a̱ni, a̱ si̱ ta a̱ta̱mpyia̱ a̱byin, a̱ si̱ ni̱m mbyin na. A̱ si̱ khap, a̱ si̱ kwon ma̱ á̱ghyi a̱tyu a̱fi̱fan ba.

⁷A̱ si̱ nyia̱ ma̱ng a̱nggu, “Nat, a kwi á̱ghyi ang ba mi̱ njok Si̱luwam” (A̱lyoot kani fa “Á̱ Ta̱m”). A̱tyu a̱fi̱fan wu si̱ nat, a̱ si̱si̱ kwi á̱ghyi ba. A̱ si̱ shya̱ nwuan a̱vwuo, a̱ si̱ bwuok a̱ bai.

⁸Á̱kpa̱ndang nswat nggu ba ma̱ng á̱niet ma̱ a̱di̱di̱t ba̱ ku meang ma̱ng nwuan guu nang gu yet a̱tyu a̱shweang gbangbang a̱ni; ba̱ si̱ nyia̱, “A̱tyu wuni wa ku yet a̱tyu a̱ ku swan a̱ shweang di̱n vak hu a̱ni baa?”

⁹Á̱ghyang á̱niet si̱ nyia̱, “Nggu wa za̱m!” A̱wot á̱ghyang si̱ nyia̱, “Kaai, á̱niet tai wa!” Huhwa a̱tyu a̱ ku byia̱ a̱fi̱fan ba a̱ni, si̱ hyia̱ ma̱ a̱pyia̱ nggu, nyia̱, “Nung gwa wu za̱m!”

¹⁰Huhwa ba̱ si̱ nyia̱ ma̱ng a̱nggu a̱ni, “A nyia̱ nini wa, á̱ghyi ang ba si̱ nkhwuk?”

¹¹A̱tyu a̱ ku yet a̱tyu a̱fi̱fan wu a̱ni, si̱ nwuak ba shim nyia̱, “A̱tyu a̱wa nang á̱ ngyei Yesu wu a̱ni; nggu wa ku ni̱m byin, a̱ si̱ kwon nung ndyo ma̱ á̱ghyi ba. A̱wot a̱ si̱ nyia̱ ma̱ng a̱nung a̱ni, ‘Nat mi̱ jok Si̱luwam, a si̱ kwi á̱ghyi ang ba a̱ja.’ Nung mameang, n si̱ nat, n si̱si̱ nkwi á̱ghyi ba a̱ja. Huhwa mbyia̱ nang n nwuan a̱vwuo na.”

¹²Ba̱ si̱ lyip gu, nyia̱, “A̱ shya̱ a̱ji wa?” A̱ si̱ nwuak mba shim, nyia̱, “N dyen a̱vwuo ka nang gu nshya̱ a̱ni bah.”

¹³Huhwa ba̱ si̱ kyiak a̱tyu a̱ ku byia̱ a̱fi̱fan ba a̱ni, ba̱ si̱ nat ma̱ng a̱nggu da̱ a̱vwuo A̱fa̱risawa.

¹⁴A̱tuk Mam Fwung kya nang Yesu ku nnu mbyin na a̱ si̱ nkhwuk a̱tyu a̱fi̱fan wu á̱ghyi ba.

¹⁵Mat a̱nia, A̱fa̱risawa ba si̱ bu lyip a̱tyu a̱ ku byia̱ a̱fi̱fan ba a̱ni, si̱sak ji nang á̱ nkhwuk gu á̱ghyi ba a̱ni. A̱ si̱ nyia̱ ma̱ng a̱mba a̱ni, “A̱ ku nu mbyin, a̱ si̱ nkwon nung ndyo ma̱ á̱ghyi ba. A̱wot n si̱ nkwi á̱ghyi ba. Huhwa mbyia̱ nang n nwuan a̱vwuo na ma̱nini.”

¹⁶Huhwa A̱fa̱risawa á̱ghyang si̱ nyia̱, “A̱tyu wuni neet da̱ a̱vwuo A̱gwaza bah. Mat a̱ nyia̱ ta̱m a̱ si̱ tyat doka a̱tuk Mam Fwung ji!” Á̱ghyang á̱niet mameang, ba̱ si̱ nyia̱, “Á̱ na nyia̱ ni wa a̱tyu a̱ka̱tuk nyia̱ gu nnyia̱ ntangka̱i a̱cha̱chet nkyang a̱ga̱de[47] nani?” Huhwa ba̱ si̱ ta̱bat ya fwuang ma̱ng á̱ghyang mba.

¹⁷Ba̱ si̱ bu nyia̱ ma̱ng a̱tyu a̱ ku byia̱ a̱fi̱fan ba a̱ni, “Nwan a nyia̱ a̱ khwuk ang á̱ghyi; yihwa nang a na hyia̱ da̱ nggu?” Nggu meang, a̱ si̱ nyia̱ ma̱ng a̱mba, “A̱tyu a̱wa yet a̱ta̱m a̱kwonu A̱gwaza wa!”

¹⁸A̱cha̱chet a̱yaakwak a̱son A̱yahudawa ba[48], ba̱ ku lak ba̱ nwuak a̱chuchuk nyia̱ a̱tyu wuni ku yet a̱tyu a̱fi̱fan wa gbangbang, a̱wot di̱ yong huni á̱ khwuk gu á̱ghyi, a̱ si̱ shya̱ nwuan a̱vwuo bah. Mat a̱nia, ba̱ si̱ yorong á̱niet mbyin a̱tyu a̱fi̱fan ba.

¹⁹Ba̱ si̱ lyip ba, nyia̱ “Nggwon a̱sam nyin kya lili huni a? Nyi nyia̱ nyi byin gu ma̱ng a̱fi̱fan. Á̱ nyia̱ ni wa gu nnwuan a̱vwuo na ma̱ninika?”

²⁰Á̱niet mbyin nggu ba si̱ nwuak ba shim, nyia̱, “Zi̱ lyen nang nggwon nzi̱t kya ka, a̱wot zi̱ si̱ bu byin gu ma̱ng a̱fi̱fan.

²¹A̱mgba̱m ma̱ng a̱nia, zi̱ lyen si̱sak nang gu nnyia̱ á̱ghyi gu ba si̱ nkhwuk a̱ni bah. Da̱ nzi̱t, zi̱ lyen a̱tyu a̱ khwuk gu á̱ghyi ba a̱ni bah. Nyi lyip gu, a̱ yet nggwon bah. A̱ maai a̱yin, a̱ na nwuak shim hu ma̱ a̱pyia̱ nggu!”

²²Á̱niet mbyin a̱tyu a̱ ku byia̱ a̱fi̱fan ba a̱ni si̱ hyia̱ a̱lyiat nani, mat ba̱ ku fa̱k a̱wun a̱cha̱chet a̱yaakwak a̱son A̱yahudawa ba[49]. Mat ba̱ ku la̱p á̱ sak nyia̱ ka̱ ba̱ shya̱ a̱yin a̱ si̱ shim nyia̱ Yesu wa yet Kristi, a̱tyu nang A̱gwaza kup gu tyok a̱ni; nang ba̱ fwuong a̱ni, á̱ na ti̱n nggu á̱ ghwut ndyo mami tutu a̱tung A̱yahudawa ka.

²³Huhwa ku mbyia̱ á̱niet mbyin a̱tyu a̱ ku byia̱ a̱fi̱fan ba a̱ni, ba̱ si̱ nyia̱, “A̱ yet nggwon kya bah. A̱ maai a̱yin, nyi lyip gu!”

²⁴A̱cha̱chet a̱yaakwak a̱son A̱yahudawa ba[50] si̱ bu yorong a̱tyu a̱ ku byia̱ a̱fi̱fan ba a̱ni, ba̱ si̱ nyia̱, “Fa̱k a̱wun A̱gwaza, a hyia̱ a̱tsatsak a̱lyiat! Nzi̱t, zi̱ lyen nang a̱tyu wuni a̱ choot ang a̱ni; ngyet a̱tyu a̱ka̱tuk nyia̱ wa.”

²⁵A̱ si̱ nyia̱ ma̱ng a̱mba a̱ni, “Ke a̱ yet a̱tyu a̱ka̱tuk wa wo, nung n dyen bah. Kyang nyiung hwa nang n dyen. N ku ngyet a̱tyu a̱fi̱fan gbangbang. A̱wot di̱ yong huni, n nwuan a̱vwuo!”

²⁶Ba̱ si̱ bu lyip gu, nyia̱ “Yihwa nang gu nyia̱ ang ndyo? A̱ nyia̱ ni wa, a̱ si̱ nkhwuk ang á̱ghyi ba?”

²⁷A̱tyu a̱ ku byia̱ a̱fi̱fan ba a̱ni si̱ nyia̱ ma̱ng a̱mba a̱ni, “N wa ka̱n hyia̱ ma̱ng a̱nyin. A̱wot nyi si̱ lak fa̱k hu. Yihwa mbyia̱ nang nyi nchat nyi bu fa̱k? Ke nyin mameang, nyi chat nyi yet mman ta̱m gu nia?”

²⁸Huhwa a̱cha̱chet A̱yahudawa ba[51] si̱ ta̱bat fwuoi nggu. Ba̱ si̱ nyia̱, “Nwan wa yet nggwon nta̱m nggu ka! Nzi̱t bani, zi̱ yet mman ta̱m Musa nia!

²⁹Zi̱ lyen nang A̱gwaza ku ndyiat ma̱ng Musa! A̱wot a̱tyu wuni, zi̱ lyen a̱vwuo ka nang gu neet a̱ni bah!”

³⁰A̱tyu a̱ ku byia̱ a̱fi̱fan ba a̱ni, si̱ nyia̱, “N fa̱k a̱ga̱de da̱ a̱lyiat nyin na! Nyi lyen a̱vwuo ka nang gu neet a̱ni bah. A̱mgba̱m ma̱ng a̱nia, nggu wa khwuk nung á̱ghyi ba!

³¹Zi̱ lyen á̱niet ba̱ nyia̱ a̱ka̱tuk a̱ni, A̱gwaza fwuong mba bah. A̱ fwuong á̱niet ba̱ nwuat gu shi. A̱wot ba̱ si̱ khwi kyang hu nang gu chat ba̱ nyia̱ a̱ni.

³²“Neet nang á̱ nnyia̱ swanta huni, á̱ ka̱n fa̱k nang a̱yin khwuk á̱ghyi a̱tyu nang á̱ byin ma̱ng a̱fi̱fan a̱ni bah.

³³Ka̱ a̱tyu wuni wa yet a̱tyu a̱ neet da̱ a̱vwuo A̱gwaza a̱ni bah, a̱ si̱ mi̱n nyia̱ kyang bah.”

³⁴A̱cha̱chet A̱yahudawa ba[52] si̱ nyia̱, “Nwan a̱tyu nang á̱ byin mami a̱ka̱tuk nyia̱, a̱wot a si̱ shi mami a̱ka̱tuk a̱ni; nwan wa chat tyiet zi̱t a?!” Huhwa ba̱ si̱ vwuong nggu, á̱ ghwut ndyo mi̱ tutu a̱tung A̱yahudawa hu.

³⁵Nang Yesu ku nfa̱k nkhang nyia̱ á̱ ka̱n vwuong a̱tyu a̱ ku byia̱ a̱fi̱fan ba, á̱ ghwut ndyo mi̱ tutu a̱tung A̱yahudawa hu a̱ni; a̱ si̱ chat gu a̱ shya̱. Huhwa gu nyia̱ ma̱ng a̱nggu a̱ni, “A nwuak fwuo di̱ Nggwon A̱gwaza[53] kaa?”

³⁶A̱tyu a̱ ku byia̱ a̱fi̱fan ba a̱ni si̱ nyia̱, “A̱tyoli, nggu wa yet a̱nyan? Hyia̱ ma̱ng nung, n ka nwuak fwuo da̱ nggu.”

³⁷Yesu si̱ nyia̱ ma̱ng a̱nggu a̱ni, “A wa ka̱n di ngguu; nggu wa yet a̱tyu a̱ lyiat ma̱ng a̱nwan a̱ni!”

³⁸Huhwa a̱tyu a̱ ku byia̱ a̱fi̱fan ba a̱ni nyia̱, “Nwan A̱tyoli nung, n nwuak fwuo da̱ nwan!” A̱wot a̱ si̱ kyuak ntong a̱zaghyi Yesu.

³⁹Yesu si̱ nyia̱, “N bai mi̱ swanta hu, da̱nian n ka nghai á̱niet[54]. M bai da̱nian á̱niet di̱ ba̱ nwuan a̱vwuo a̱ni bah, ba̱ ka shya̱ nwuan hu; a̱wot á̱niet ba̱ dam nyia̱ ba̱ nwuan a̱ni, ba̱ ka tyia̱ á̱niet a̱fi̱fan.”

⁴⁰Nang A̱fa̱risawa ba̱ shya̱ ndung ma̱ng Yesu nfa̱k a̱nia a̱ni, ba̱ si̱ nyia̱ ma̱ng a̱nggu a̱ni, “Nzi̱t mameang, zi̱ yet á̱niet a̱fi̱fan byaa?”

⁴¹Yesu si̱ nyia̱ ma̱ng a̱mba a̱ni, “Ka̱ nyi wa yet á̱niet a̱fi̱fan bya, si̱ nyi byia̱ a̱bun bah. A̱wot nang nyin nyia̱ nyi nwuan a̱ni, a̱ka̱tuk nyia̱ nyin wu yong da̱ nyin.”