Read tyap Nta̱m A̱yaata̱m 1 Bible Online

Nta̱m A̱yaata̱m 1 - tyap bible

Nta̱m A̱yaata̱m 1

¹Tiyofulut, mami ta̱ka̱da nang n ku ntsa lyuut ang ndyo[1] a̱ni, n ku ndyuut hu tazwa a̱mgba̱m nkyang nang Yesu ku tsa nyia̱ ma̱ng tyiet a̱ni;

²ba̱ng si̱ nat a̱tuk ka nang á̱ ku nkyiak gu á̱ nat ndyo Ma A̱gwaza tswazwa a̱ni. Mat chet A̱za̱za̱rak Ntswa, Yesu ku mi̱ ngba a̱yaata̱m nggu ba nang gu khai a̱ni, á̱ sii du kyiak gu, á̱ nat ndyo Ma A̱gwaza tswazwa ka.

³Nang Yesu ku nghwut mi̱ swuo a̱bung da̱ a̱team a̱khwu wu a̱ni, a̱ si̱ tyai a̱pyia̱ nggu kpa̱sai mami mam swak naai di̱n jen di̱n jen, da̱ a̱vwuo a̱yaata̱m nggu ba! A̱wot a̱ si̱ tyai a̱pyia̱ nggu kpa̱sai di̱ nvak na̱ tak chi̱k nang nggu wa ndoot ma̱ng swuan ma̱ á̱niet ba̱ ka̱n kwi a̱ni. A̱ si̱ wa̱i mba a̱lyiat tazwa Tyok A̱gwaza hu.

⁴Di̱n jen jhyang, nang gu ku nshya̱ di̱ ya kyayak dundung ma̱ng a̱mba a̱ni, a̱ si̱ gba mba mi̱ chet nyia̱, “Nyi yok doot, nyi ghwon Urusha̱lima hu a̱nfaan bah. Da̱ a̱kwonu a̱kya, nyi swan fwuong za̱nang nang A̱tyia̱ nung wu nyia̱ a̱li̱ka̱uli a̱ na ta̱m ma̱ng a̱nyin dyo a̱ni; ma̱nang n ku nhyia̱ ma̱ng a̱nyin a̱ni.

⁵A̱tsak a̱lyiat, Yoona ku nyia̱ nyin ba̱ptisman ji ma̱ng a̱sa̱khwot nia. A̱wot á̱ na bwuo mam ma̱ chunchwiit, á̱ na nyia̱ nyin ba̱ptisman ji ma̱ng A̱za̱za̱rak Ntswa wa!”

⁶Mat a̱nia, á̱ si̱ labeang bah, nang a̱yaata̱m Yesu ba shya̱ ndung ma̱ng a̱nggu, ba̱ si̱ nwuo lyi̱ri̱m guu a̱nyanyin nyia̱, “A̱tyoli, ma̱nini kya nang a na mbwuok ma̱ng tyok á̱niet Isi̱rela hu, a nwuak baa?”

⁷A̱jawa Yesu si̱ nyia̱ ma̱ng a̱mba, “Ku yet ta hwa nyi lyen jen ku a̱tyong bwuok ma̱ng tyok Isi̱rela hu bah. Ma̱ A̱gwaza a̱ yet A̱tyia̱ wu a̱ni; nggu wa ma̱nyin nggu byia̱ tyok gu sak jen ji.

⁸A̱wot nyi na shya̱ chet di̱n jen nang A̱za̱za̱rak Ntswa wu na ntyei nyin chet a̱ni. A̱wot nyi na yet á̱niet shei nkhang nung bya mi̱ Urusha̱lima, ma̱ng a̱mgba̱m á̱kum fam a̱byin Yahudiya ka, ma̱ng fam a̱byin Sa̱mariya, ba̱ng si̱ nat kuzang a̱byin mi̱ swanta hu!”

⁹Jen nang Yesu ntyak a̱lyiat nani a̱ni, á̱ si̱ kin kyiak gu mi̱ ni̱nian á̱ nkat dyo mi̱ kyai tswazwa, nang ba̱ jwaat á̱ghyi á̱ nwuan. A̱wot ba̱ si̱ bu li nggu bah.

¹⁰Nang ba̱ njwaat á̱ghyi á̱ nwuan naat Yesu hu mi̱ kyai tswazwa hu a̱ni, á̱niet a̱feang ba̱ kup a̱sai a̱jhya̱jhyat a̱yaatoot a̱ni, si̱ kin gyong ndung ma̱ng a̱mba!

¹¹Á̱niet a̱feang a̱bya si̱ nyia̱ ma̱ng a̱mba, “Nyin á̱tyok Ga̱lili, yihwa mbyia̱ nang nyi ngyong jwaat á̱ghyi nwuan kyai tswazwa hu? Yesu wuni nang á̱ kyiak da̱ a̱vwuo nyin á̱ nkat ndyo Ma A̱gwaza tswazwa ka a̱ni; ma a̱nia wa, nang gu na mbwuok a̱ bai ma̱ cha̱chaat, nang nyi ndi gu nnaat mi̱ kyai tswazwa hu a̱ni!”

¹²A̱wot a̱yaata̱m Yesu ba si̱ bwuot á̱ chorop á̱ neet tazwa Tsok Za̱itun, ji̱ shya̱ kpa̱mkpaan ma̱ng Urusha̱lima a̱ni, ba̱ si̱ chong a̱chyet ka̱ tat a̱swap á̱kum met a̱nyiung a̱ni[2].

¹³Nang ba̱ ku si̱ nnwuo a̱keang Urusha̱lima ka a̱ni, ba̱ si̱ nyeak á̱ nat ma̱ a̱gba̱ndang nyuo a̱mali tazwa ka nang ba̱ ku nswan a̱ni. A̱yaata̱m bani bya ku yet: Bitut, Yoona, Yakubu ma̱ng Anda̱rawut, Filibut ma̱ng Toma, Ba̱tolomi ma̱ng Matyu, Yakubu a̱fai A̱lfayat ma̱ng Siman (nang á̱ ngyei Za̱loti[3] a̱ni,) mbeang Yahuda a̱fai Yakubu wu.

¹⁴A̱mgba̱m mba, ba̱ ku mun á̱pyia̱ di̱ naai A̱gwaza, mbeang Ma̱ryamu a̱yang byin Yesu wu, ma̱ng á̱nyiuk á̱ghyang, mbeang á̱na̱nyiuk Yesu ba[4].

¹⁵Di̱n jen a̱ja, Bitut si̱ doot a̱ yong ma̱ a̱ka̱wa̱tyia̱ á̱niet khwi ba. (Á̱niet ba̱ ku shya̱ a̱ja a̱ni, ku tat chyi ma̱ng nswak nfeang.)

¹⁶Bitut si̱ nyia̱, “Nyin á̱na̱nyiuk nung mba, ku yet ta hwa A̱lyiat A̱gwaza na na̱ bai da̱ a̱nu ka, nang A̱za̱za̱rak Ntswa A̱gwaza wu gbangbang ku ntak á̱zanson a̱bwonu A̱gwam Da̱wuda a̱ni. A̱za̱za̱rak Ntswa wu si̱ lyiat tazwa Yahuda Iska̱riyoti, a̱tyu a̱ ku kwak á̱ka̱tuk á̱niet ba vak, a̱ si̱ la̱p a̱nu ma̱ng a̱mba, ba̱ si̱ nta̱bat Yesu a̱ni.

¹⁷A̱mgba̱m ma̱ng a̱nia, Yahuda ku yet a̱tyo nyiung ma̱ nzi̱t. A̱wot a̱ si̱ nyia̱ ta̱m hu ndung ma̱ng a̱nzi̱t.”

¹⁸(A̱wot Yahuda si̱ ghwut a̱ nat ma̱ a̱byin a̱ghyang, a̱ si̱si̱ kwa a̱ ta̱gurup a̱ghyi ba a̱byin.[5] A̱fa nggu ka si̱ tat, na nggu hu si̱ ghwut nta. Á̱ ku san a̱byin a̱kya ma̱ng zang kurum[6] nang Yahuda Iska̱riyoti ku ndyap Yesu a̱ni.

¹⁹Nkhang a̱khwu Yahuda Iska̱riyoti na si̱ nwuo ma̱ a̱fufwuo a̱mgba̱m á̱niet Urusha̱lima ba. Huhwa si̱ mbyia̱, á̱ si̱ ntyia̱ a̱vwuo ka a̱lyoot da̱ a̱lyem mba ka nyia̱, A̱ka̱ldama. Si̱ huni fa, “A̱byin A̱sok.”)

²⁰Bitut si̱ bu nyia̱, “Ma̱nang á̱ ndyuut mami Za̱bura a̱ni, nyia̱, ‘Yok a̱li nggu ka ka̱ tyia̱ a̱ta̱bat, a̱wot a̱yin gu yok swan ma̱ nka bah.’ “Ma a̱nia wa, á̱ si̱ bu ndyuut, nyia̱, ‘Yok a̱ghyang a̱niet a̱ kyiak ta̱m nggu hu.’[7]

²¹“Mat a̱nia, ku myim zi̱ khai a̱tyu a̱ na kyiak ta̱m da̱ a̱kwonu Yahuda Iska̱riyoti a̱ni, ma̱ á̱niet ba̱ ku shya̱ dundung ma̱ng a̱nzi̱t di̱n jen zi̱ ku nnaat mbwuot ma̱ng A̱tyoli Yesu a̱ni.

²²“Ku bu yet ta hwa, a̱tyu wuni a̱ shya̱ dundung ma̱ng Yesu neet di̱n jen nang Yoona ku nnyia̱ Yesu ba̱ptisman ji, si̱ nat jen nang á̱ ku nkyiak Yesu da̱ a̱vwuo nzi̱t, á̱ nat ndyo Ma A̱gwaza tswazwa ka a̱ni. Kuzang a̱yin nang á̱ na khai ma̱ á̱niet bani, a̱ na mun a̱pyia̱ dundung ma̱ng a̱nzi̱t, a̱ tak ma̱ng á̱ghyang á̱niet nang gu ndi Yesu ma̱ng á̱ghyi di̱n jen nang Yesu ndoot ma̱ á̱niet ba̱ ka̱n kwi a̱ni.”[8]

²³A̱jawa ba̱ si̱ khai á̱niet a̱feang; Isuu, a̱tyu nang á̱ ku ngyei “Ba̱rsa̱bat,” (a̱ si̱ bu byia̱ a̱lyoot a̱ghyang, á̱ ngyei “Yustut,”) nggu ma̱ng Matiyat.

²⁴A̱mgba̱m a̱yaata̱m ba si̱ naai A̱gwaza nyia̱, “Zi̱ naai ang A̱gwaza a yet A̱tyoli a̱ni, a lyen fwuo konyan. Zi̱ chat a tak ma̱ng a̱nzi̱t mami á̱niet a̱feang bani; a̱tyu nang a ka̱n khai a̱ni.

²⁵Nggu wa na kyiak a̱vwuo nta̱m Yahuda nang gu kai a̱ ghwon a̱ni, a̱tyu a̱wa a̱ yet a̱ta̱m shei a̱lyiat ang wu. Mat Yahuda ku kai nzi̱t a̱ ghwon a̱ si̱ kai vak a̱pyia̱ nggu, a̱ si̱ khwu.”

²⁶A̱jawa ba̱ si̱ koot tswák tazwa á̱niet a̱feang a̱bya, ba̱ ka li a̱tyu nang A̱gwaza khai a̱ni. Tswák ji si̱ tak nang Matiyat wa nang A̱gwaza nkhai, gu ka yet a̱ta̱m Yesu dundung ma̱ng a̱yaata̱m swak ma̱ a̱nyiung ba.