Read tyap Nta̱m A̱yaata̱m 11 Bible Online

Nta̱m A̱yaata̱m 11 - tyap bible

Nta̱m A̱yaata̱m 11

¹Á̱ si̱ labeang bah, á̱ si̱ tak ma̱ng a̱yaata̱m Yesu ba, mbeang á̱niet khwi á̱ghyang ba̱ shya̱ mi̱ fam a̱byin Yahudiya a̱ni, nang Nnwap na̱ nwai yet A̱yahudawa a̱ni nsan a̱lyiat A̱gwaza na.

²A̱wot jen nang Bitut mbwuok a̱ nat Urusha̱lima a̱ni, á̱niet khwi ba̱ yet A̱yahudawa a̱ni, ba̱ si̱ bat gu a̱bun tazwa kyang nang gu nyia̱ a̱ni, nyia̱,

³“A nat a̱chi̱chen a̱mali a̱tyu Nnwap a̱ nwai yet A̱yahudawa a̱ni! A̱wot a si̱si̱ ya nkyayak dundung ma̱ng a̱mba!”

⁴A̱jawa Bitut si̱ tak ma̱ng a̱mba kuzang kyang cha̱chaat nang gu nyia̱ a̱ni.

⁵A̱ si̱ nyia̱, “N ku nshya̱ di̱ naai A̱gwaza ma̱ a̱keang Yafa. N si̱ nwuo a̱ma̱bwoi. N si̱ ndi kyang ku chorop á̱ chobai a̱byin. Ku li kpa̱kpai nang a̱toot khwi wun, nang á̱ ba̱ng di̱ pyipyia̱ naai a̱ni. A̱wot ku si̱ chyok, a̱ bai a̱zaghyi nung.

⁶N si̱ nwuan mami ka. N si̱ ndi kuzang tangka̱i nyam; si̱ ji̱ byia̱ a̱ti̱tak a̱naai a̱ni, ma̱ng nkyang kwang a̱byin, mbeang a̱ka̱man a̱yit.

⁷A̱jawa n si̱ nfa̱k a̱nwuat ka̱ nyia̱ ma̱ng a̱nung, ‘Bitut, doot a ya̱baat, a fak, a yaa.’

⁸“N si̱ nyia̱, ‘Kaai, A̱tyoli! N ka̱n mak ya kyang nang doká A̱yahudawa nzi̱t ji kyiak ku yet a̱shi̱shi̱k, ku si̱ tyei a̱yin a̱na̱ndyung a̱ni bah.’

⁹“A̱wot a̱nwuat ka si̱ bu lyiat ma̱ng a̱nung nyia̱, ‘Kyang hu nang A̱gwaza nyia̱ ku yet a̱za̱za̱rak a̱ni, yok kyiak hu nang a̱shi̱shi̱k a̱ni bah.’

¹⁰Á̱ nyia̱ si̱ a̱hwa á̱ bwuo a̱ka̱tat, á̱ sii du khwat a̱kpa̱kpai a̱toot wu ma̱ng a̱mgba̱m nyám ji̱ shya̱ ma̱ nggu a̱ni, á̱ nat ndyo tswazwa.

¹¹“Ma̱ a̱cha̱chaat njen a̱wa, á̱niet a̱tat nang á̱ ta̱m mba neet ma̱ a̱keang Kaisa̱riya a̱ni, si̱ bai mali ka nang zi̱ nshya̱ a̱ni.

¹²A̱za̱za̱rak Ntswa wu si̱ nyia̱ ma̱ng a̱nung; n nat ma̱ng mba, di̱ n gyok khai da̱ á̱ghyi nyia̱ ba̱ yet Nnwap na̱ nwai yet A̱yahudawa a̱ni bah. Á̱niet khwi a̱taa bani, ba̱ neet ma̱ a̱keang Yafa a̱ni si̱ chong ndung ma̱ng a̱nung. Zi̱ si̱ nat a̱mali a̱tyu a̱ ta̱m a̱ chat zi̱t a̱ni.

¹³“A̱jawa Ka̱rna̱liyut si̱ tak ma̱ng a̱nzi̱t si̱sak nang a̱ta̱m tswa A̱gwaza wu ntyai a̱pyia̱ nggu da̱ a̱vwuo nggu. A̱wot a̱ si̱ tak ma̱ng a̱nggu nyia̱, ‘Ta̱m a̱yaata̱m ba̱ nat Yafa, ba̱ si̱ yei a̱tyu nang á̱ ngyei Siman Bitut wu a̱ni.

¹⁴Nggu wa na tak ma̱ng a̱nwan á̱lyiat A̱gwaza na, na̱ na tyia̱ ang ma̱ng a̱mgba̱m kyang bwak ang hu, nyi shya̱ swuan sang sangba̱p ji a̱ni!’

¹⁵Jen nang n ku nwuo shei mba á̱lyiat A̱gwaza na a̱ni, A̱za̱za̱rak Ntswa wu si̱ nwuo da̱ mba a̱ si̱ tyia̱ mba chet; ma̱nang gu ku nnwuo ma̱ nzi̱t, a̱ si̱ nyia̱ ta̱m ma̱ng a̱nzi̱t mi̱ chet di̱n tsa hu a̱ni.

¹⁶A̱jawa n si̱ kin jhyung á̱lyiat A̱tyoli Yesu na nang gu ku nnyia̱, ‘Yoona ku nyia̱ ba̱ptisman ji ma̱ng a̱sa̱khwot. A̱wot nyin, á̱ na nyia̱ nyin ndyo ma̱ng A̱za̱za̱rak Ntswa wa.’[42]

¹⁷“A̱wot mat nang A̱gwaza nnang á̱kum Nnwap na̱ nwai yet A̱yahudawa za̱nang chet ma̱ cha̱chaat ma̱ng si̱ nang gu ku nang zi̱t di̱n jen nang zi̱ ku nnwuak fwuo da̱ A̱tyoli Yesu Kristi a̱ni; ka̱ a̱nia wa, n shya̱ chet a̱ji n gyong gya fwuang ma̱ng A̱gwaza?!”

¹⁸Nang á̱kum a̱yaata̱m ba nfa̱k a̱lyiat Bitut na a̱ni, ba̱ si̱ shim kyang nang gu lyiat a̱ni. Ba̱ si̱ nwuo dyep A̱gwaza. Ba̱ si̱ nyia̱, “Ka̱ doot zi̱ li nang A̱gwaza nnyia̱ Nnwap na̱ nwai yet A̱yahudawa a̱ni shok; ba̱ ghwon a̱ka̱tuk nyia̱ mba wu, a̱wot ba̱ shya̱ swuan sang sangba̱p ji mameang!”

¹⁹Di̱n jen a̱ja, á̱niet khwi ba ba̱ ku seang di̱n jen ya̱shuk nang á̱ ku nhyat Itifanut a̱ni. Ba̱ ku tyong á̱ nat Fi̱ni̱siya, Kuburut, ma̱ng Antakiya mi̱ fam a̱byin Suriya. Ba̱ si̱ chong á̱ shei A̱sham Nkhang Yesu ka, mi̱ da̱ a̱vwuo A̱yahudawa kya ma̱nyin ba.

²⁰A̱mgba̱m ma̱ng a̱nia, á̱niet khwi á̱ghyang ba̱ ku neet Kuburut ma̱ng Si̱ri̱n á̱ nat Antakiya a̱ni, si̱ nwuo shei A̱sham Nkhang Yesu ka da̱ a̱vwuo Nnwap na̱ nwai yet A̱yahudawa a̱ni mameang.

²¹Chet A̱gwaza hu si̱ shya̱ dundung ma̱ng mba. A̱wot á̱kpa á̱niet ma̱ a̱di̱di̱t ba̱ yet Nnwap na̱ nwai yet A̱yahudawa a̱ni, si̱ nwuak fwuo ba̱ si̱ nwuo khwi A̱tyoli Yesu!

²²Jen nang á̱niet khwi ba ba̱ shya̱ Urusha̱lima nfa̱k nkhang nang á̱kpa á̱niet ma̱ a̱di̱di̱t nnwuo khwi A̱tyoli Yesu ma̱ a̱keang Antakiya a̱ni; ba̱ si̱ ta̱m ma̱ng Ba̱nabat a̱ja.

²³Jen nang Ba̱nabat si̱ nnwuo, a̱ si̱ li si̱sak nang A̱gwaza nnyia̱ mba shok a̱ni. A̱ si̱ fa̱k fwuo sai ba̱t! A̱wot a̱ si̱ tyia̱ mba gba̱gbak, ba̱ ka yong da̱ a̱chuchuk ba̱ khwi A̱tyoli Yesu ma̱ng fwuo nyiung.

²⁴Ba̱nabat ku yet a̱tan a̱yin. Chet A̱za̱za̱rak Ntswa hu si̱ shya̱ dundung ma̱ng a̱nggu. A̱ si̱ bu yong mi̱ chet di̱ nwuak a̱chuchuk nggu hu. A̱wot a̱ si̱ khwat á̱niet ma̱ a̱di̱di̱t ba̱ si̱ nwuo khwi A̱tyoli Yesu.

²⁵Di̱n jen a̱ja, Ba̱nabat si̱ doot a̱ nat Tasut, a̱ si̱si̱ yei Sha̱wulu.

²⁶Nang Ba̱nabat nshya̱ Sha̱wulu a̱ni, a̱ si̱ bai ma̱ng a̱nggu Antakiya. A̱mgba̱m ba, ba̱ si̱ swan a̱ja dundung ma̱ng sot á̱niet khwi ji. Ba̱ si̱ nyia̱ a̱lyia̱ a̱nyiung nang ba̱ tyiet á̱kpa á̱niet khwi ma̱ a̱di̱di̱t. (Ma̱ a̱keang Antakiya kya nang á̱ ku ntsa yei á̱niet khwi ba a̱lyoot, “Á̱niet khwi Kristi.”)

²⁷Di̱n jen a̱jaja nang a̱yaata̱m a̱kwonu A̱gwaza á̱ghyang ku nneet Urusha̱lima á̱ nat Antakiya.

²⁸A̱tyo nyiung ma̱ mba, á̱ ku ngyei nggu A̱gabut, a̱ si̱ doot a̱ yong nang ba̱ shya̱ ma̱ a̱tung. A̱wot a̱ si̱ tak á̱zanson mat A̱za̱za̱rak Ntswa wu, nang á̱ na nnyia̱ a̱gba̱ndang zong mi̱ swanta nang A̱romawa ba nnyia̱ tyok a̱ni. (Zong jini ku kwa nang a̱gwam shan Ka̱la̱udiyat wa nyia̱ tyok hu.)

²⁹Mat a̱nia, a̱mgba̱m á̱niet khwi ba ba̱ shya̱ Antakiya a̱ni, ba̱ si̱ la̱p á̱ sak; ba̱ si̱ tung nkyayak, ba̱ nat ba̱ si̱ mbeang á̱niet khwi ba ba̱ shya̱ Urusha̱lima mi̱ fam a̱byin Yahudiya hu a̱ni. Konyan ku nwuak cha̱chaat ma̱ng kyang nang gu byia̱ a̱ni.

³⁰Nang ba̱ ku ntung nkyayak na a̱ni, ba̱ si̱ tyia̱ na bwak Ba̱nabat ma̱ng Sha̱wulu. Ba̱ si̱ nwuak a̱yaakwak a̱son sot á̱niet khwi ba̱ shya̱ Urusha̱lima a̱ni.