Read tyap Nta̱m A̱yaata̱m 12 Bible Online

Nta̱m A̱yaata̱m 12 - tyap bible

Nta̱m A̱yaata̱m 12

¹Di̱n jen a̱ja, a̱gwam Hiridut A̱ga̱riba[43] si̱ nwuo ya̱shuk sot á̱niet khwi Yesu jhyang.

²A̱ si̱ tyia̱ á̱ si̱ hyat a̱ta̱m Yesu a̱ghyang ma̱ng tswat, nang á̱ ngyei Yakubu a̱ni, a̱ ku yet a̱na̱nyiuk Yoona wa.

³Nang a̱gwam Hiridut A̱ga̱riba ku ndi si̱sak nang A̱yahudawa ba ngwai ma̱ng kyang hu nang gu nyia̱ a̱ni, a̱ si̱ tyia̱ á̱ si̱ ta̱bat Bitut mameang. (Á̱ ku nyia̱ si̱ huni di̱n jen nang song A̱yet Ya Burodi Sang Yit nnyia̱ a̱ni.)

⁴A̱wot nang á̱ nta̱bat Bitut a̱ni, á̱ si̱ tyia̱ nggu mi̱ jaru, susot á̱niet nzwang nyaai ja (kuzang sot ku byia̱ á̱niet nzwang a̱naai) si̱ chok gu. A̱gwam Hiridut ku la̱p a̱ sak a̱ ghwut ma̱ng Bitut, a̱ nyia̱ nggu shi̱ri̱ya kpa̱sai, ka̱ song A̱yet ji swak.

⁵A̱wot jen nang Bitut nshya̱ mi̱ jaru ji a̱ni, sot á̱niet khwi ji si̱ nkup á̱ghyi di̱ naai A̱gwaza da̱nian ngguu.

⁶A̱tyetuk ka nang á̱ wu nshyip á̱ bai ma̱ng Bitut á̱ nyia̱ nggu shi̱ri̱ya ji a̱ni; a̱ ku shya̱ di̱ myian a̱ khat nda nang á̱ la̱p gu ma̱ng a̱nyanyang ma̱ a̱ka̱wa̱tyia̱ á̱niet nzwang a̱feang, nang á̱niet nzwang á̱ghyang yong á̱ chok a̱zanunyuo jaru ka.

⁷Ma̱nang but á̱ghyi a̱ni, sai si̱ kan tyia̱ ma̱ mya̱ra̱m mi̱ jaru ji! A̱wot a̱ta̱m tswa A̱gwaza si̱ kin neet a̱ ba̱ yong a̱zanson Bitut! A̱ta̱m tswa A̱gwaza wu si̱ lwi Bitut a̱zanghwan a̱ ka shyip guu. A̱ si̱ nyia̱ ma̱ng a̱nggu, “Nyia̱ a̱nggang, doot yong!” A̱wot ywan a̱nyanyang hu si̱ kin byii̱k di̱ sunsun mbwak nggu ji á̱ kwa̱i a̱byin!

⁸A̱jawa nang a̱ta̱m tswa A̱gwaza wu si̱ nyia̱ ma̱ng Bitut, “Kup a̱toot ang wu, a̱wot a tyia̱ á̱kwatak ang ba!” Bitut si̱ nyia̱ kyang hu nang a̱ta̱m tswa wu tak ma̱ng a̱nggu gu nyia̱ a̱ni. “Ma̱ninika, gaat a̱gwodo ang wu, a khwi nung!”

⁹Huhwa, Bitut si̱ ghwut mi̱ jaru ji. A̱ si̱ khwi a̱ta̱m tswa A̱gwaza wu. A̱wot di̱n jen a̱ja Bitut ku ngyei a̱ shya̱ ma̱ a̱ma̱bwoi wa! A̱ ku fi̱k nang ku ngyet a̱tsatsak a̱lyiat wa bah!

¹⁰Bitut si̱ chong dundung ma̱ng a̱ta̱m tswa wu. Ba̱ si̱si̱ swak a̱ka̱vwuo yong cham sot á̱niet nzwang jhyung ma̱ng sweang ji. A̱wot ba̱ si̱ swak á̱ nat da̱ a̱na̱nwuai ka̱ byia̱ nyinyiit ntswam hu nang á̱ na nghwut á̱ nat ma̱ a̱keang ka a̱ni. Nyinyiit ntswam hu si̱ nyiip ma̱ a̱pyia̱ nhu! Ba̱ si̱ ghwut á̱ kai vak á̱ naat. A̱wot a̱ta̱m tswa A̱gwaza wu si̱ ta̱yuut, a̱ si̱ ghwon Bitut.

¹¹A̱jawa nang Bitut nta̱dyuut, a̱ si̱ fi̱k kyang hu nang gu nshya̱ a̱ni! A̱ si̱ nyia̱, “Di̱ yong huni, a̱tsak a̱lyiat, A̱gwaza ta̱m ma̱ng a̱ta̱m tswa nggu wu, a̱ si̱ san nung mbwak a̱gwam Hiridut, ma̱ng a̱ka̱tuk kyang nang a̱yaakwak a̱son A̱yahudawa ba la̱p á̱ sak ba̱ chat ba̱ nyia̱ nung ndyo a̱ni!”

¹²Nang Bitut nfi̱k kyang hu ku bai nggu a̱ni, a̱ si̱ ta̱bat vak a̱ naat a̱mali á̱niet Ma̱ryamu, a̱yang byin Yoona Ma̱rkut wu, nang á̱niet khwi tung a̱mali ka á̱ naai A̱gwaza.

¹³Bitut si̱ lwi nyinyiit a̱zanunyuo hu. A̱wot a̱banggwon neam a̱ghyang ka̱ yet a̱khwo, nang á̱ ngyei Ruda a̱ni, ka̱ si̱ bai ka̱ nyiip nyinyiit hu.

¹⁴Nang Ruda nfi̱k a̱nwuat Bitut kya a̱ni, a̱ si̱ gwai ba̱t! A̱ si̱ bwuok lilyim di̱n chung a̱ nwuo mami. A̱ si̱si̱ tak ma̱ng á̱niet khwi ba nyia̱, “Di, Bitut wa yong a̱na̱nyuo ka!”

¹⁵A̱jawa ba̱ nyia̱ ma̱ng Ruda, “A tai bwuak a̱pyia̱ kya!” A̱mgba̱m ma̱ng a̱nia, Ruda si̱ yong mi̱ chet a̱ shei mbaa nang a̱nia wa ku ndi. A̱jawa ba̱ si̱ bu nyia̱ ma̱ng Ruda, “Shimba, a̱ta̱m ntswa Bitut wu wa za̱m!”

¹⁶Di̱ jen a̱ja nang Bitut ya a̱son ma̱ng tsot nyinyiit hu! Di̱ ngaan hu, nang ba̱ nkhwuk nyinyiit hu ba̱ si̱ li nang Bitut wa a̱ni, ba̱ si̱ fa̱k a̱ga̱de!

¹⁷Bitut si̱ lyiat ma̱ng a̱mba ma̱ng bwak, nyia̱ ba̱ tyia̱ nywang. A̱wot a̱ si̱ ya a̱son ma̱ng shei mba si̱sak nang A̱gwaza nti̱n nggu a̱ ghwut ndyo mi̱ jaru ji a̱ni. A̱ si̱ nyia̱, “Nyi tak ma̱ng Yakubu ma̱ng á̱kum á̱niet khwi ka kyang ku bai a̱ni.” A̱wot Bitut si̱ swak a̱ nat a̱vwuo a̱ghyang.

¹⁸Da̱ a̱tsotson tat ka, a̱lyiat ghwut Bitut na mi̱ jaru ji, si̱ chat bai ma̱ng á̱niet nzwang ba a̱yaat; mat nang ba̱ nwai li Bitut mi̱ jaru ji a̱ni!

¹⁹A̱jawa a̱gwam Hiridut A̱ga̱riba si̱ kam; nyia̱ á̱ kup á̱ghyi di̱ chat Bitut a̱ shya̱. Jen nang á̱ nshya̱ nggu a̱ni bah, a̱gwam Hiridut si̱ lyi̱ri̱m á̱niet chok jaru ba. A̱wot a̱ si̱ tyia̱ á̱ hyaai mbaa. Nang si̱ a̱hwa nswak a̱ni, a̱gwam Hiridut si̱ ghwon fam a̱byin Yahudiya hu. A̱ si̱ nat, a̱ si̱si̱ labeang nang gu swan Kaisa̱riya.

²⁰Di̱n jen a̱ja, a̱gwam Hiridut ku mwai lyen ba̱t ma̱ng á̱niet Taya ma̱ng Sidon. Mat a̱nia, ba̱ si̱ khai á̱niet ba̱ si̱ ta̱m mba ba̱ nat ba̱ chat swat nyinyang ma̱ng a̱nggu. Mat a̱ka̱keang mba na ku ta̱yuk da̱ a̱byin a̱gwam Hiridut ka, da̱nian ba̱ ka shya̱ kyayak. Bilasitut, a̱ ku yet byia̱k a̱gwam Hiridut ji a̱ni, a̱ si̱ li̱n a̱ma a̱yaata̱m ba nang á̱ ku ta̱m a̱ni.

²¹A̱wot Bilasitut si̱ shim ba̱ li a̱gwam Hiridut. Nang mam hu mbai a̱ni, Hiridut si̱ kup a̱yaatoot tyok nggu ba. A̱ si̱ swan di̱n chuk tyok gu ji. A̱wot a̱ si̱ lyiat ma̱ng a̱yaata̱m ba.

²²Jen ji nang gu nshya̱ da̱ a̱lyiat na ma̱ng a̱yaata̱m ba a̱ni, ba̱ si̱ koot a̱gugwong nyia̱, “A̱nwuat kani yet a̱si̱ a̱gwaza kya! Ka̱ yet a̱si̱ a̱tyubishyi kya bah!”

²³Mi̱ di̱ yong a̱hwa, a̱ta̱m tswa A̱gwaza si̱ kin dwi a̱gwam Hiridut ma̱ng zwan a̱ mat! Mat a̱ shim á̱nietbishyi si̱ kyuak ntong a̱zaghyi nggu da̱ a̱kwonu ka nang gu na nnwuak A̱gwaza shi a̱ni. Mat a̱nia, á̱ma̱njhyiit si̱ ya nggu, a̱ si̱ khwu!

²⁴Di̱n jen a̱ja, a̱lyiat A̱gwaza na si̱ teak a̱ kai kuzang a̱vwuo. A̱wot á̱niet khwi Yesu á̱fai ma̱ a̱di̱di̱t si̱ mbeang á̱kpa ka.

²⁵Jen nang Ba̱nabat ma̱ng Sha̱wulu si̱ nnwuak á̱niet khwi ba za̱nang ji mi̱ Urusha̱lima a̱ni, ba̱ si̱ kyiak Yoona Ma̱rkut, ba̱ si̱ bwuok á̱ nat Antakiya dundung ma̱ng a̱nggu.