Read tyap Nta̱m A̱yaata̱m 13 Bible Online

Nta̱m A̱yaata̱m 13 - tyap bible

Nta̱m A̱yaata̱m 13

¹Mami á̱niet khwi Yesu ba ba̱ ku shya̱ Antakiya mi̱ fam a̱byin Suriya a̱ni, á̱ ku mbyia̱ a̱yaata̱m a̱kwonu A̱gwaza ma̱ng á̱niet tyiet. Bibya ku yet: Ba̱nabat, Simiyon nang á̱ bu ngyei “Nija” a̱ni, (a̱lyoot kani fa, “A̱ shya̱ a̱shyi”), Lukiyat (a̱tyu Si̱ri̱n), Manayen, (a̱ ku yet che nyiung ma̱ng a̱gwam Hiridut Antibat a̱ni), mbeang Sha̱wulu.

²A̱ghyang a̱tuk, nang á̱niet khwi bani shya̱ di̱ dyep á̱ tsa á̱ naai A̱gwaza a̱fa a̱khwot; a̱jawa A̱za̱za̱rak Ntswa wu si̱ nyia̱ ma̱ng a̱mba, “Nyi khap Ba̱nabat ma̱ng Sha̱wulu sak nung ndyo zan. Da̱nian ntangka̱i a̱tsatsak nta̱m nang n khai mba ba̱ nyia̱ nung ndyo a̱ni!”

³Huhwa, nang ba̱ ngya a̱son ma̱ng swan a̱fa a̱khwot ma̱ng naai A̱gwaza da̱nian Ba̱nabat mang Sha̱wulu a̱ni. Ba̱ si̱ saai mba mbwak. A̱wot ba̱ si̱ tyia̱ mba a̱ta̱lyen.

⁴Mat a̱nia, A̱za̱za̱rak Ntswa wu si̱ ta̱m Ba̱nabat ma̱ng Sha̱wulu, ba̱ nat ta̱m shei A̱sham Nkhang. Ba̱ si̱ kpa̱k á̱ chyok á̱ nat a̱tak Sa̱lukiya a̱keang a̱beam kyai a̱sa̱khwot. Ba̱ si̱si̱ nwuo kukwon a̱wak. Ba̱ si̱ wak á̱ nat a̱byin a̱ka̱wa̱tyia̱ a̱sa̱khwot, nang á̱ ngyei Kuburut a̱ni.

⁵Ma̱ a̱keang Sa̱lamit ka a̱ja, ba̱ si̱ shei á̱lyiat A̱gwaza na mi̱ á̱tutu a̱tung A̱yahudawa hu. Yoona Ma̱rkut ku shya̱ ndung ma̱ng a̱mba. A̱ si̱ yet a̱tyu beang mbaa.

⁶Ba̱nabat ma̱ng Sha̱wulu si̱ ya a̱son ma̱ng shei á̱lyiat A̱gwaza na; á̱ kaat á̱ swak si̱ nat a̱keang Ba̱fusa, mi̱ gak a̱byin fam jenshyung ma̱ a̱byin a̱ka̱wa̱tyia̱ a̱sa̱khwot ka. A̱jawa ba̱ si̱si̱ shya̱ a̱tyu A̱yahudawa a̱ghyang nang á̱ ngyei nggu Bar-Joshuwa a̱ni. A̱ ku yet a̱la̱tong. A̱wot a̱ si̱ kyiak a̱pyia̱ nggu nang a̱tsak a̱ta̱m a̱kwonu A̱gwaza a̱ni.

⁷A̱ si̱ bu yet nggwon nta̱m Sajiyat Bulut, a̱ ku yet gwomna a̱byin a̱ka̱wa̱tyia̱ a̱sa̱khwot wu a̱ni. Gwomna Sajiyat Bulut ku byia̱ mumwang ba̱t, a̱ si̱ ta̱m á̱ yorong Ba̱nabat ma̱ng Sha̱wulu ba̱ bai ba̱ tak gu á̱lyiat A̱gwaza na, gu ka fa̱k na shansham.

⁸A̱wot Bar-Joshuwa, á̱ bu ngyei gu A̱limat, a̱ ku yet “a̱la̱tong a̱yin” (cha̱chaat nang a̱lyoot nggu ka fa a̱ni); a̱ si̱ ya fwuang ma̱ng Ba̱nabat ma̱ng Sha̱wulu. A̱ si̱ kwan a̱ vwuong gwomna wu a̱ nwuak fwuo di̱ Yesu.

⁹A̱wot Sha̱wulu, nang á̱ bu ku ngyei Bulut a̱ni; A̱za̱za̱rak Ntswa wu si̱ tyia̱ nggu chet, a̱ si̱ sak A̱limat á̱ghyi di̱di̱r!

¹⁰A̱jawa Sha̱wulu si̱ nyia̱ ma̱ng A̱limat, “Nwan nggwon A̱ta̱nyeang, a yet a̱tyu bwoi a̱ka̱laa ma̱ng shyuo a̱niet! A̱wot a si̱ yet a̱tyu lak li a̱mgba̱m a̱tan nkyang! A na yok tyei teap da̱ a̱tsatsak nvak A̱gwaza na baa?

¹¹Ma̱ninika cham a lii! Mat A̱gwaza ka̱n neap bwak nang gu na ntyia̱ ang swuo a̱bung a̱ni. A̱wot a na kwa a̱fi̱fan! A na bwuo jen nang a li sai mam bah!” Mi̱ di̱ yong a̱hwa, tangka̱i zwu ma̱ng lyin si̱ kin kup tswá á̱ghyi nggu ji. A̱wot a̱ si̱ ta̱bat bam a̱ kat, a̱ naai a̱tyu a̱ na kwak gu di̱n shan a̱ni!

¹²Nang gwomna wu ndi kyang hu ku bai a̱ni, a̱ si̱ nwuak fwuo da̱ A̱tyoli Yesu. Mat a̱ ku fa̱k a̱ga̱de di̱ tyiet nang gu ku fa̱k tazwa A̱tyoli Yesu a̱ni!

¹³Bulut ma̱ng á̱kpa̱ndang a̱chyet nggu ba si̱ nwuo kukwon a̱wak neet Ba̱fusa. Ba̱ si̱ wak á̱ byia̱k a̱keang Ba̱rga, ka̱ hyia̱k kyai a̱sa̱khwot ka̱ shya̱ mi̱ fam a̱byin Ba̱mfiliya a̱ni. A̱ja wa Yoona Ma̱rkut ku nghwon mbaa. A̱ si̱ bwuok a̱ nat Urusha̱lima.

¹⁴A̱wot Bulut ma̱ng Ba̱nabat si̱ ya a̱son ma̱ng a̱chyet neet Ba̱rga. Ba̱ si̱ chong a̱byin nat Antakiya mi̱ fam a̱byin Bisidiya. A̱tuk Mam Fwung A̱yahudawa ka, ba̱ si̱ nat mi̱ tutu a̱tung A̱yahudawa hu, da̱nian ba̱ ka dyep A̱gwaza a̱ja.

¹⁵Jen ji nang á̱ ntyak fang A̱lyiat A̱gwaza na mi̱ nta̱ka̱da doka Musa na ma̱ng á̱si̱ a̱yaata̱m a̱kwonu A̱gwaza ba a̱ni; a̱jawa a̱tyu a̱ yet a̱kwak a̱son wu mi̱ tutu a̱tung A̱yahudawa hu a̱ni, a̱ si̱ ta̱m a̱yin da̱ a̱vwuo Bulut ma̱ng Ba̱nabat nyia̱, “Á̱na̱nyiuk, ma̱sa̱kut, ka̱ nyi byia̱ swáng á̱lyiat ji̱ na tyia̱ á̱niet ba gba̱gbak a̱ni, nyi kaat!”

¹⁶A̱jawa Bulut si̱ doot a̱ yong. A̱ si̱ neap bwak tazwa nyia̱ ba̱ tyia̱ nywang. A̱ si̱ nwuo a̱lyiat nyia̱, “Nyin mman Isi̱rela ma̱ng a̱mgba̱m nyin á̱kum Nnwap na̱ nwai yet A̱yahudawa, nyi fwuong a̱wun A̱gwaza a̱ni, nyi myiai a̱fufwuo nyi fa̱a̱k!

¹⁷“A̱gwaza á̱niet Isi̱rela wuni, nggu wa ku khai a̱yaatyia̱ a̱khwop nzi̱t ba. A̱ si̱ tyia̱ mba ba̱ si̱ saat ba̱ laai, ba̱ si̱ tyia̱ chet, di̱n jen nang ba̱ ku nshya̱ Ma̱sa̱r a̱ni. A̱wot A̱gwaza si̱ ti̱n mba, a̱ ghwut ndyo mi̱ khwo hu Ma̱sa̱r ma̱ng chet bwak nggu hu.

¹⁸A̱wot A̱gwaza si̱ nyia̱ a̱lyia̱ nswak naai nang gu neap fwuo, a̱ tsa a̱ chok ba nang ba̱ chong á̱ kat mi̱ tswa a̱yit.

¹⁹A̱gwaza si̱ hyaai nnwap a̱natat ma̱ a̱byin Ka̱nana. A̱ si̱ nwuak á̱niet Isi̱relawa a̱byin ka, ka̱ yet a̱si̱ mba.

²⁰A̱mgba̱m nkyang nani ku kyiak ndyia̱ chyi nyaai ma̱ng swak nfwuon. “Nang si̱ a̱nia nswak a̱ni, A̱gwaza si̱ khai mba á̱niet shi̱ri̱ya. Ba̱ si̱ kwak a̱son á̱niet Isi̱rela ba, ba̱ng si̱ nat jen nang á̱ mbyin Sa̱mwila, a̱ta̱m a̱kwonu A̱gwaza wu a̱ni.

²¹Di̱n jen a̱ja ja nang á̱niet Isi̱rela ba ku naai á̱ kup mba a̱gwam wu. A̱wot A̱gwaza si̱ nwuak ba Sha̱wulu, a̱fai Kish, a̱ ku neet mi̱ kwai Benyamin; a̱ si̱ nyia̱ ndyia̱ nswak naai nang gu ba̱ng tyok hu.

²²“A̱wot jen nang A̱gwaza ku nchyok Sha̱wulu mi̱ tyok Isi̱rela hu a̱ni, a̱ si̱ kup Da̱wuda tyok hu. Kyang hu nang A̱gwaza ku hyia̱ tazwa Da̱wuda a̱ni, huhwa yet, ‘N shya̱ Da̱wuda a̱fai Yesi, a̱tyu nang n sak a̱lyia̱ da̱ nggu a̱ni. A̱ na nyia̱ kuzang kyang nang n chat gu nyia̱ a̱ni.’

²³“A̱wot mami kwai A̱gwam Da̱wuda ja, nang Yesu na nghwut. Nggu wa nang A̱gwaza nyia̱ a̱li̱ka̱uli wu, a̱ yet A̱tyusan á̱niet Isi̱rela wu!

²⁴Neet nang Yesu ka̱n bai bah, Yoona a̱tyu nyia̱ ba̱ptisman ku shei a̱lyiat A̱gwaza na. A̱ si̱ nyia̱ a̱mgba̱m á̱niet Isi̱rela ba, ba̱ ghwon a̱ka̱tuk nyia̱ mba wu, ba̱ bwuok ba̱ khwi A̱gwaza, a̱ sii nyia̱ mba ba̱ptisman.

²⁵Nang Yoona ku ntyiai ta̱m nggu hu a̱ni, a̱ si̱ lyip á̱niet ba, nyia̱, ‘Nyi dam nung gwa ngyet Kristi wu, a̱tyu A̱gwaza kup gu tyok a̱ni a? Kaai, nung gwa gyet Kristi wu bah! A̱wot á̱ na labeang bah, Kristi wu na bai. A̱wot nung n maai mi̱ maai n gyet a̱khwo nggu ku n byii̱k ywan á̱kwatak nggu hu bah!’

²⁶“Á̱na̱nyiuk nung ba, nyin nyi yet á̱ka̱mbwon Ibrahim na a̱ni, ma̱ng a̱nyin Nwap na̱ nwai yet A̱yahudawa nyi fwuong a̱wun A̱gwaza a̱ni; nzi̱t bya nang á̱ ta̱m ma̱ng a̱nzi̱t á̱lyiat nswuan sang sangba̱p nani!

²⁷Á̱niet Urusha̱lima ba, mbeang a̱yaakwak a̱son mba ba, ku fi̱k nang Yesu wa ngyet a̱tyu nang a̱yaata̱m a̱kwonu A̱gwaza ba ku lyiat tazwa nggu a̱ni bah. Da̱ a̱kwonu a̱kya, ba̱ si̱ faat gu shi̱ri̱ya a̱khwu. A̱wot ku si̱ bai cha̱chaat da̱ a̱nu ka, ma̱nang A̱lyiat A̱gwaza na nang a̱yaata̱m a̱kwonu nggu ba ku tak á̱zanson ba̱ si̱ lyuut a̱ni. A̱wot á̱ fang Á̱lyiat nani á̱ nchi̱ri̱ng kuzang a̱tuk Mam Fwung A̱yahudawa ka.

²⁸Á̱niet bani si̱ zop Yesu. Da̱ mba ba̱ shya̱ ta̱fwat ji̱ maai, á̱ nfaat gu shi̱ri̱ya a̱khwu a̱ni bah. Ma̱ng a̱nia, ba̱ si̱ yong mi̱ chet, ba̱ si̱ tyia̱ gwomna Bilatut a̱ tyia̱ á̱ hyat gu.

²⁹“Jen nang ba̱ ntyak kuzang kyang nang a̱yaata̱m a̱kwonu A̱gwaza ba ku hyia̱ tazwa Yesu a̱ni; ba̱ si̱ chyok ma̱ng kwom nggu hu da̱ a̱kwon[44] ka á̱ bai ndyo a̱byin. Ba̱ si̱ niat gu mi̱ lyak.

³⁰A̱mgba̱m ma̱ng a̱nia, A̱gwaza si̱ ta̱ngam gu ma̱ng swuan ma̱ á̱niet ba̱ ka̱n kwi a̱ni!

³¹“A̱wot á̱ si̱ bwuo mam ma̱ a̱di̱di̱t nang Yesu tyai a̱pyia̱ nggu da̱ a̱vwuo á̱niet ba̱ ku chong dundung ma̱ng a̱nggu neet mi̱ fam a̱byin Ga̱lili si̱ nat Urusha̱lima a̱ni. Ma̱ninika, á̱niet bani bya yet á̱niet ba̱ shei kyang da̱ a̱vwuo á̱niet Isi̱rela nang ba̱ li ma̱ á̱ghyi mba ba tazwa Yesu a̱ni.

³²“A̱wot nzi̱t mameang, zi̱ bai a̱ji ma̱ninika zi̱ shei ma̱ng a̱nyin A̱sham Nkhang kani ka̱ yet a̱li̱ka̱uli wu nang A̱gwaza ku nyia̱ a̱yaatyia̱ khwop nzi̱t ba ndyo a̱ni.

³³A̱wot ma̱ninika, A̱gwaza tyia̱ a̱li̱ka̱uli wu si̱ bai da̱ a̱nu ka da̱ a̱vwuo nzi̱t; nzi̱t zi̱ yet á̱ka̱mbwon mba na a̱ni, mat si̱sak nang á̱ ku nta̱ngam Yesu ma̱ á̱niet ba̱ ka̱n kwi a̱ni. Ma̱nang á̱ ndyuut mami a̱gba̱ndang zwunzwuo a̱feang Za̱bura wu tazwa Yesu a̱ni: ‘A yet Nggwon nung kya. A̱fwun, n gyet A̱tyia̱ ang wa.[45]’

³⁴“Mat A̱gwaza ka̱n nyia̱ a̱li̱ka̱uli a̱ na ta̱ngam Yesu ma̱ á̱niet ba̱ ka̱n kwi a̱ni; a̱ na ghwon guu a̱ bwui mi̱ lyak hu bah. A̱gwaza si̱ nyia̱, ‘N na nang ang á̱za̱za̱rak a̱li̱ba̱rka wu, nang n ku nyia̱ a̱li̱ka̱uli n na nang Da̱wuda a̱ni.’[46]

³⁵Mi̱ Za̱bura a̱ghyang á̱ bu tyai á̱lyiat doot Yesu na ma̱ng swuan ma̱ á̱niet ba̱ ka̱n kwi a̱ni kpa̱sai: ‘A na ghwon A̱za̱za̱rak a̱khwo ang wu, a̱ bwui mi̱ lyak hu bah.’[47]

³⁶“Mat, jen nang Da̱wuda ku ntyak ta̱m nang A̱gwaza ku chat Da̱wuda a̱ nyia̱ mi̱ che gu hu a̱ni, a̱ si̱ khwu, á̱ si̱ niat gu ma̱ng a̱yaatyia̱ a̱khwop nggu ba. A̱wot vam nggu hu si̱ bwui.

³⁷A̱wot Yesu mameang, a̱ si̱ khwu. Á̱ si̱ niat gu mi̱ lyak. Da̱ nggu a̱ bwui bah. A̱gwaza si̱ ta̱ngam gu ma̱ á̱niet ba̱ ka̱n kwi a̱ni.

³⁸“Mat a̱nia, á̱na̱nyiuk nung ba, nyi myiai a̱fufwuo nyi fa̱a̱k! Zi̱ shya̱ a̱ji da̱nian zi̱ tak ma̱ng a̱nyin nang mami a̱lyoot Yesu kya nang á̱ na nchi a̱ka̱tuk nyia̱ nyin wu.

³⁹Konyan wa nwuak fwuo di̱ Yesu, A̱gwaza na tak kpa̱sai nang gu nkyiak gu a̱tsotswat a̱tyu sang a̱bun a̱zaghyi gu. Kyang hu nang doka Musa ji si̱ mi̱n mak nyia̱ a̱ni bah; huhwa hwa.[48]

⁴⁰“Mat a̱nia, si̱ nyi ta̱bam! Nyi yok ghwon á̱lyiat nang a̱yaata̱m a̱kwonu A̱gwaza ba ku lyiat a̱ni, na̱ bai da̱ a̱nu ka da̱ a̱nyin bah. Mat ba̱ ku nyia̱,

⁴¹‘Di, nyin á̱niet ba̱ lyiat lihyat a̱ni! Nyi fa̱k a̱ga̱de, nyi kwi! Mat n nyia̱ kyang mi̱ jen nyin, kyang nang nyi si̱ mi̱n nwuak a̱chuchuk a̱ni bah! Ku nang a̱yin wa tak ma̱ng a̱nyin huu!’[49] ”

⁴²Nang Bulut ma̱ng Ba̱nabat nghwut mi̱ tutu a̱tung A̱yahudawa hu a̱tuk a̱kya a̱ni, á̱niet ba si̱ naai mba ba̱ bwuok á̱ bai a̱tuk Mam Fwung chobai ka, ba̱ bu shei mba á̱lyiat nani.

⁴³A̱yahudawa ma̱ a̱di̱di̱t ma̱ng á̱kum á̱niet ba̱ ku nwai yet A̱yahudawa ba̱ fwuong a̱wun A̱gwaza ku nwuo khwi A̱gwaza di̱n vak A̱yahudawa hu a̱ni; ba̱ si̱ khwi Bulut ma̱ng Ba̱nabat. A̱wot mba á̱niet Bulut, si̱ tyia̱ mba gba̱gbak ba̱ ya a̱son ba̱ ta̱yuk di̱n shok A̱gwaza ji.

⁴⁴A̱tuk Mam Fwung ka̱ ntung a̱ni si̱ kaat a̱ bai. A̱mgba̱m á̱niet ba̱ shya̱ ma̱ a̱keang ka a̱ni, si̱ tung ba̱ ka fa̱k á̱lyiat A̱gwaza na nang á̱niet Bulut shei a̱ni.

⁴⁵A̱wot jen nang A̱yahudawa á̱ghyang ndi á̱kpa á̱niet ka a̱ni, ba̱ si̱ nwuo kwi swam. Ba̱ si̱ ta̱bat tyam Bulut. Ba̱ si̱ nwuo ya fwuang di̱ kuzang á̱lyiat nang gu hyia̱ a̱ni.

⁴⁶A̱mgba̱m ma̱ng a̱nia, Bulut ma̱ng Ba̱nabat si̱ gbang a̱lyia̱. Ba̱ si̱ tak ma̱ng a̱mba nyia̱, “Nyin A̱yahudawa bya myim, zi̱ tsa shei nyin á̱lyiat A̱gwaza na. A̱mgba̱m ma̱ng a̱nia, nang nyi ndak fa̱k na hu a̱ni, nyi kyiak á̱pyia̱ nyin nyi maai nyi shya̱ swuan sang sangba̱p ji bah! Mat a̱nia, zi̱ na nat zi̱ shei Nnwap na̱ nwai yet A̱yahudawa a̱ni á̱lyiat A̱gwaza na.

⁴⁷Mat A̱gwaza ku nwuak zi̱t doka nyia̱, ‘N tyia̱ nyin nyi yet long sang da̱ a̱vwuo Nnwap na̱ nwai yet A̱yahudawa a̱ni. Da̱nian nyin bya nyi ka yet vak hu nang a̱mgba̱m á̱niet swanta ba mi̱ kuzang a̱vwuo na nshya̱ swuan sang sangba̱p ji a̱ni.’ ”

⁴⁸Jen ji nang Nnwap na̱ nwai yet A̱yahudawa ba nfa̱k á̱lyiat nani a̱ni, ba̱ si̱ fa̱k a̱lyia̱ a̱sai! Ba̱ si̱ gwai A̱gwaza mat á̱lyiat nggu na. A̱wot a̱mgba̱m á̱niet ba nang á̱ khai ba̱ shya̱ swuan sang sangba̱p ji a̱ni; ba̱ si̱ nwuak fwuo di̱ Yesu a̱tuk a̱kya.

⁴⁹Huhwa, a̱lyiat A̱gwaza na si̱ teak á̱ kai kuzang a̱vwuo mi̱ fam a̱byin a̱hwa.

⁵⁰A̱jawa A̱yahudawa ba si̱ fuut á̱nyiuk ba̱ byia̱ a̱vwuo yong mi̱ khwi A̱gwaza á̱niet Isi̱rela a̱ni, mbeang a̱yaakwak a̱son a̱keang ba. A̱wot ba̱ si̱ fuut á̱niet ba ba̱ ka lak li Bulut ma̱ng Ba̱nabat. A̱wot ba̱ vwuong mba á̱ ghwut ndyo ma̱ a̱keang ka.

⁵¹Huhwa, Bulut mang Ba̱nabat si̱ gbaat mbwuk a̱ti̱tak mba na. Ku tak nang á̱niet a̱keang a̱bya ku ndak li mbaa ma̱ng á̱lyiat A̱gwaza na. A̱wot Bulut ma̱ng Ba̱nabat si̱ swak á̱ nat a̱keang Ikoniya.

⁵²A̱wot á̱niet khwi Yesu ba[50] si̱ gwai ba̱t! A̱wot A̱za̱za̱rak Ntswa wu si̱ tyei mba chet.