Read tyap Nta̱m A̱yaata̱m 17 Bible Online

Nta̱m A̱yaata̱m 17 - tyap bible

Nta̱m A̱yaata̱m 17

¹Bulut ma̱ng Sila si̱ doot, ba̱ si̱ kaat á̱ ghwut ma̱ a̱ka̱keang A̱mifiboli̱t ma̱ng A̱boliniya. Ba̱ si̱ swak á̱ nat a̱keang Ta̱solonika nang tutu a̱tung A̱yahudawa hu nshya̱ a̱ni.

²Ma̱nang Bulut mmeang a̱ni, a̱ si̱si̱ nwuo mi̱ tutu a̱tung A̱yahudawa hu. A̱ si̱ bwuo a̱tuk Mam Fwung a̱tat nang gu zop A̱lyiat A̱gwaza na dundung ma̱ng a̱mba.

³A̱ si̱ wa̱i mba á̱lyiat A̱gwaza na nang a̱yaata̱m a̱kwonu A̱gwaza ba ku lyuut a̱ni. A̱ si̱ tak za̱m nang ku ngyet ta hwa Kristi a̱ swuo a̱bung, a̱wot a̱ bu doot ma̱ng swuan ma̱ á̱niet ba̱ ka̱n kwi a̱ni. Bulut si̱ ya a̱son ma̱ng shei ma̱ng a̱mba, nyia̱, “Yesu wuni, nang n shei nyin a̱ni; nggu wa yet Kristi[60] wu.”

⁴A̱wot A̱yahudawa á̱ghyang ba̱ ku myiai a̱fufwuo á̱ fwuong Bulut ma̱ng Sila a̱ni, ba̱ si̱ shim mwang mba hu. Ba̱ si̱ khwi mbaa. Ma a̱nia wa A̱helenawa ma̱ a̱di̱di̱t ba̱ ku yet á̱niet khwi A̱gwaza a̱ni, ma̱ng a̱cha̱chet á̱nyiuk á̱ghyang, ba̱ si̱ mun á̱ shim á̱lyiat Bulut na ma̱ng Sila.

⁵A̱wot A̱yahudawa á̱ghyang si̱ nwuo kwi swam! Huhwa ba̱ si̱ tung mman ngwun mi̱ tungga, na̱ si̱ doot jhya̱. Ba̱ si̱ tyia̱ gbuu á̱ nat mali Yason á̱ chat Bulut ma̱ng Sila. Mat ka̱ ba̱ shya̱ mba ba̱ kwak ba á̱ bai ndyo ma̱ á̱kpa á̱niet ka.

⁶Nang ba̱ ndyin Bulut ma̱ng Sila ma Yason ka a̱ni, A̱yahudawa ba si̱ kwak nggu Yason mbeang á̱niet khwi á̱ghyang, á̱ ghwut ndyo a̱kwonu á̱niet Bulut. Á̱ si̱ nat ma̱ng a̱mba a̱zaghyi sot a̱cha̱chet á̱niet shi̱ri̱ya a̱keang ba. Mman gwun na si̱ koot a̱gugwong mi̱ chet nyia̱, “Bulut ma̱ng Sila ka̱n tyei jhya̱ mi̱ kuzang a̱vwuo mi̱ swanta hu! A̱wot ma̱ninika, ba̱ bai a̱ji mameang ba̱ ka tyei nzi̱t jhya̱ ma̱ a̱keang nzi̱t ka!

⁷A̱wot Yason si̱ san mba mbwak nfeang a̱gbang nggu ka. A̱mgba̱m ba, ba̱ bwoi a̱bun; mat lak khwi doka Kaisar a̱ yet a̱gwam shan A̱romawa wu a̱ni. Mat ba̱ shei kpa̱sai nang ba̱ khwi a̱gwam a̱ghyang, á̱ ngyei nggu Yesu!”

⁸Nang á̱niet a̱keang ba mbeang sot a̱cha̱chet á̱niet shi̱ri̱ya a̱keang ba, nfa̱k nkhang nani a̱ni, ba̱ si̱ tyia̱ tai.

⁹Huhwa sot a̱cha̱chet á̱niet shi̱ri̱ya ji si̱ tyia̱ Yason ma̱ng á̱kum á̱niet khwi ka si̱ tan kurum, á̱ sii du kai mba á̱ ghwon, ba̱ si̱ nkat.

¹⁰A̱tyetuk a̱tuk a̱kya, á̱niet khwi ba si̱ ta̱m Bulut ma̱ng Sila ma̱ a̱keang Bi̱riya. Nang ba̱ si̱ nnwuo a̱ja a̱ni, ba̱ si̱ swak á̱ nat mi̱ tutu a̱tung A̱yahudawa hu.

¹¹Á̱niet Bi̱riya ba ku lan á̱niet Ta̱solonika ba ma̱ng yet a̱tan á̱niet. A̱wot ba̱ si̱ myiai a̱fufwuo ma̱ng di̱dang á̱ fwuong á̱lyiat A̱gwaza nang Bulut shei mba a̱ni. A̱wot ba̱ si̱ zop A̱lyiat A̱gwaza na kuzang a̱tuk, ba̱ ka li kee a̱lyiat nang Bulut ma̱ng Sila tyiet a̱ni, yet a̱tsak a̱lyiat wa.

¹²Nang ku ndi a̱nia a̱ni, A̱yahudawa ma̱ a̱di̱di̱t si̱ nwuak fwuo da̱ A̱tyoli Yesu. A̱wot a̱cha̱chet á̱nyiuk ma̱ng á̱tyok A̱helenawa á̱ghyang ma̱ a̱di̱di̱t; mba meang, ba̱ si̱ nwuak fwuo da̱ A̱tyoli Yesu.

¹³A̱wot jen nang A̱yahudawa á̱ghyang mi̱ Ta̱solonika nfa̱k nkhang nang Bulut nshei á̱lyiat A̱gwaza na ma̱ a̱keang Bi̱riya ka mameang a̱ni, ba̱ si̱ nat a̱ja ba̱ si̱si̱ fuut á̱niet Bi̱riya ba, ba̱ doot jhya̱!

¹⁴Á̱niet khwi ba si̱ kin ti̱n Bulut ma a̱nggang. Ba̱ si̱ ta̱m ma̱ng a̱nggu a̱zanu a̱byia̱k kyai a̱sa̱khwot. A̱wot á̱ si̱ ghwon Sila ma̱ng Timoti ma̱ a̱keang Bi̱riya ka.

¹⁵Á̱niet khwi ba̱ ku tyei Bulut a̱ta̱lyen ka a̱ni, ba̱ ku wak á̱ byia̱k ma̱ng a̱nggu. Á̱ si̱ sak ma̱ a̱keang Atina. Ba̱ ndoot bwuot hu a̱ni, Bulut si̱ ta̱m mba da̱ a̱vwuo Sila ma̱ng Timoti ma̱ng ta̱m; nyia̱ ba̱ kwan ba̱ bai da̱ a̱vwuo nggu ma̱ Atina ma a̱nggang.

¹⁶Jen nang Bulut nshya̱ Atina a̱ fwuong Sila ma̱ng Timoti a̱ni, a̱ si̱ li nghwughwu a̱yaagwaza sang swuan ma̱ a̱di̱di̱t ma̱ a̱keang ka. Fwuo nggu hu si̱ byian ba̱t!

¹⁷A̱ si̱ nat mi̱ tutu a̱tung A̱yahudawa hu. A̱ si̱ zop á̱lyiat A̱gwaza na ma̱ng A̱yahudawa mbeang A̱helenawa ba, ba̱ fwuong a̱wun A̱gwaza a̱ni. A̱wot kuzang a̱tuk, a̱ ni̱ shei á̱kpa á̱niet á̱lyiat A̱gwaza na mi̱ tungga hu nang ba̱ ntung a̱ni.

¹⁸Bulut bu ku ya fwuang ma̱ng A̱bikuriyawa mbeang Sitokiyawa ba, ba̱ yet a̱cha̱chet a̱yaagwak lyen nkyang a̱ni. Jen nang gu ntak ma̱ng a̱mba nkhang tazwa Yesu ma̱ng doot nggu hu ma̱ á̱niet ba̱ ka̱n kwi a̱ni, ba̱ si̱ lyip gu nyia̱, “Yihwa nang a̱tyu a̱di̱di̱t á̱lyiat wuni kwan a̱ hyia̱ ma̱ng a̱di̱dam a̱fai nang gu bai ndyo a̱ni?” Á̱ghyang á̱niet si̱ nyia̱, “Á ngyei a̱ tai shei á̱lyiat tazwa a̱yaagwaza ba̱ yet á̱niet chen bya a̱ni.” Ba̱ ku hyia̱ a̱nia, mat Bulut shei a̱lyiat A̱gwaza na tazwa Yesu ma̱ng si̱sak nang gu ku ndoot ma̱ng swuan ma̱ á̱niet ba̱ ka̱n kwi a̱ni.

¹⁹A̱jawa ba̱ si̱ kyiak Bulut á̱ nat ndyo ma̱ a̱tung sot a̱cha̱chet á̱niet a̱keang nang á̱ ngyei A̱ropogat a̱ni. Ba̱ si̱ nyia̱ ma̱ng a̱nggu, “Bai, a tak ma̱ng a̱nzi̱t tangka̱i tyiet fai huni nang a tyiet a̱ni.

²⁰A bai ma̱ng a̱nzi̱t á̱lyiat na̱ yet a̱fai a̱ni. A̱wot zi̱ na chat zi̱ lyen kyang hu nang na̱ fa a̱ni.”

²¹(A̱mgba̱m á̱niet Atina ba, mbeang á̱niet ba ba̱ yet a̱nietchen á̱ swan a̱ja a̱ni, ba̱ ni̱ kyiak jen nang ba̱ lyiat tazwa nkyang na̱ yet nfai a̱ni.)

²²Mat a̱nia, Bulut si̱ doot a̱ yong a̱zaghyi a̱tung ka[61], a̱ si̱ nyia̱, “Nyin á̱niet Atina! N cham, n si̱ ndi nang nyi ngyet á̱niet chat khwi A̱gwaza bya ba̱t di̱ kuzang vak.

²³“Mat a̱nia, nang n chong kat a̱keang nyin ka a̱ni, n si̱ ndi nkyang nang nyi nkwok ntong a̱ni. A̱wot n si̱ ndi a̱tyii nang á̱ khap á̱ sak a̱gwaza da̱nang á̱ lyen a̱ni bah[62]. A̱gwaza wuni nang nyi kwok gu ntong na, di̱ mi̱ lyen nggu a̱ni. Nggu wa nang n bai n shei ma̱ng a̱nyin, nyi lyen nggu!

²⁴“Nggu wa yet A̱gwaza wu, a̱ mat swanta hu ma̱ng a̱mgba̱m kuzang kyang ku shya̱ ma nhu a̱ni. Nang gu ngyet A̱gwaza kyai tswazwa ma̱ng a̱byin a̱ni, a̱ swuat A̱mali Nwuat Za̱nang A̱gwaza nang á̱ nok ma̱ng bwak a̱ni bah.

²⁵A̱wot á̱ nyia̱ nggu ta̱m ma̱ng mbwak a̱tyubishyi nia bah, mat a̱ chat beang bah. Nggu wa ma̱ a̱pyia̱ nggu nwuat a̱mgba̱m á̱nietbishyi ba swuan, ma̱ng kuzang kyang ku swuan a̱ni. A̱wot nggu wa jhyet ba kuzang nkyang nang ba̱ chat a̱ni.

²⁶“Kyiak neet da̱ a̱tyo nyiung wa nang A̱gwaza mmat a̱mgba̱m nnwap na̱ shya̱ mi̱ swanta hu a̱ni. A̱wot a̱ si̱ sak jen nang ba̱ na nnyia̱ tyok ma̱ng jen nang ku na ntyak a̱ni. A̱wot a̱ si̱ sak konyan ma̱ mba gak a̱byin nggu.

²⁷A̱gwaza ku la̱p a̱ sak, mat á̱niet swanta ba ba̱ chat gu. A̱wot shimba ba̱ bam ba̱ shya̱ nggu. Ku nang gu nwai shya̱ gbang ma̱ng kuzang a̱yin ma̱ a̱nzi̱t a̱ni.

²⁸Mat A̱gwaza wa mbyia̱ nang zi̱ nswuan, nnyia̱ a̱guguut, zi̱ si̱ bu yet a̱chet. Ma̱nang a̱yaashya̱bwom nyin ba nhyia̱ a̱ni, ‘Nzi̱t bya yet mman nggu na.’

²⁹“A̱wot nang zi̱ ngyet mman A̱gwaza nia a̱ni, zi̱ yok nyia̱ a̱di̱dam A̱gwaza li nang nghwughwu a̱yaagwaza sang swuán na nang a̱tyu sha̱p nkyang ni̱ shap ma̱ng zi̱nariya, a̱zurfa, mbeang nfang a̱ni bah.

³⁰“Gbangbang, A̱gwaza ku nwuan nkyang na nang á̱nietbishyi nyia̱ a̱ni gbi̱t, mat nwai lyen mba hu. A̱wot ma̱ninika, A̱gwaza tyia̱ konyan ma̱ kuzang a̱vwuo gu ghwon a̱ka̱tuk nyia̱, a̱ khwi ngguu.

³¹Mat A̱gwaza ka̱n sak mam nang gu bye nnyia̱ a̱mgba̱m á̱niet mi̱ swanta ba a̱tsotswat shi̱ri̱ya, mat a̱tyu nang gu khai a̱ni. A̱wot a̱ si̱ tak konyan kpa̱sai a̱tyu a̱ na nyia̱ shi̱ri̱ya ji a̱ni. Nggu wa nang gu ta̱ngam ma̱ng swuan ma̱ á̱niet ba̱ ka̱n kwi a̱ni.”

³²Jen nang ba̱ nfa̱k Bulut ndyiat tazwa doot ma̱ng swuan ma̱ á̱niet ba̱ ka̱n kwi a̱ni, á̱ghyang á̱niet si̱ mai nggu di̱ lihyat. A̱wot á̱ghyang á̱niet si̱ nyia̱, “Zi̱ chat zi̱ bu fa̱k á̱lyiat nani da̱ a̱vwuo ang di̱n jen jhyang.”

³³Ni̱nia si̱ yet á̱lyiat ngaan Bulut na ma̱ng a̱mba.

³⁴A̱wot á̱ghyang á̱niet si̱ shim á̱lyiat A̱gwaza nang Bulut shei mba a̱ni, ba̱ si̱ nwuak a̱chuchuk. Mami mba, á̱ ku mbyia̱ a̱tyu nang á̱ ku ngyei Diyonisiyat a̱ni, a̱ ku yet a̱tyo nyiung mami a̱cha̱chet á̱niet shi̱ri̱ya a̱keang ba, ma̱ng a̱byii̱k a̱ghyang, á̱ ku ngyei nggu Da̱marit, mbeang á̱ghyang á̱niet ma̱ a̱di̱di̱t ma̱ a̱mba.