Read tyap Nta̱m A̱yaata̱m 18 Bible Online

Nta̱m A̱yaata̱m 18 - tyap bible

Nta̱m A̱yaata̱m 18

¹Jen nang Bulut nghwon Atina a̱ni, a̱ si̱ nat ma̱ a̱keang Korinti.

²A̱ja wa gu si̱ myim ma̱ng a̱tyu A̱yahudawa a̱ghyang nang á̱ ku ngyei A̱kila a̱ni. A̱ ku yet a̱tyu a̱ neet mi̱ fam a̱byin Funtut wa a̱ni, nang nggu sii neet ma̱ a̱byin Italiya kya dundung ma̱ng Biriskila, a̱byii̱k nggu wu. Jen a̱ja nang a̱gwam shan Ka̱la̱udiyat kpaat doka, ji̱ kam nyia̱; ku yet ta hwa a̱mgba̱m A̱yahudawa ba ba̱ ghwon a̱gba̱ndang a̱keang Rom wu!

³Bulut si̱ swan a̱ si̱ nyia̱ ta̱m ndung ma̱ng a̱mba. Mat mba ba̱ ku yet á̱niet luk á̱kukwa tat á̱suswak bya ma̱nang Bulut a̱ni.

⁴Kuzang a̱tuk Mam Fwung, Bulut ni̱ nat mi̱ tutu a̱tung A̱yahudawa hu. A̱ ni̱ si̱ kwan a̱ tyia̱ A̱yahudawa ma̱ng A̱helenawa ba ba̱ nwuak a̱chuchuk di̱ kyang nang gu lyiat a̱ni.

⁵Jen ji nang Sila ma̱ng Timoti ku mbwuok á̱ neet Ma̱kidoniya a̱ni, Bulut si̱ ntyia̱ a̱lyia̱ kuzang jen di̱ shei a̱lyiat A̱gwaza na. A̱ si̱ tak A̱yahudawa ba kpa̱sai nang Yesu wa ngyet Kristi wu.

⁶A̱wot nang A̱yahudawa ba ndak li Bulut á̱ tsa á̱ bu nyia̱ nggu lihyat a̱ni, Bulut si̱ gbaat mbwuk a̱yaatoot nggu na, nyia̱, “A̱sok nyin na shya̱ á̱pyia̱ nyin! N mbyia̱ a̱bun bah. Di̱ yong huni si̱ nat á̱zanson, n na mbwuok nat da̱ a̱vwuo Nnwap na̱ nwai yet A̱yahudawa a̱ni; n shei mba a̱lyiat A̱gwaza na!”

⁷A̱jawa Bulut si̱ ghwon mbaa. A̱ si̱ nat a̱mali a̱tyu Nnwap na̱ nwai yet A̱yahudawa a̱ni, nang á̱ ngyei Titut Yustut, a̱ yet a̱tyu kwok ntong a̱zaghyi A̱gwaza a̱ni. A̱wot a̱li Titut ka ku shya̱ kpa̱mkpaan ma̱ng tutu a̱tung A̱yahudawa hu.

⁸Ki̱ri̱but, a̱kwak a̱son tutu a̱tung A̱yahudawa wu, mbeang kyang bwak gu hu, si̱ nwuak nfwuo mba na da̱ A̱tyoli Yesu. Á̱niet ma̱ a̱di̱di̱t ba̱ ku shya̱ ma̱ a̱keang Korinti a̱ni, si̱ fa̱k a̱lyiat Bulut na. Ba̱ si̱ nwuak nfwuo da̱ Yesu, a̱wot á̱ si̱ nyia̱ mba ba̱ptisman.

⁹A̱tyetuk a̱ghyang a̱tuk, A̱tyoli Yesu si̱ lyiat ma̱ng Bulut ma̱ a̱ma̱bwoi, nyia̱, “Bulut, yok fa̱k a̱wun bah! Shei á̱lyiat nung na kpa̱sai! Yok tyia̱ nywang bah!

¹⁰Mat n shya̱ dundung ma̱ng a̱nwan. Á̱ mbyia̱ a̱tyu a̱ na kwa da̱ nwan a̱ bwuo ang kun a̱ni bah. Mat, á̱niet ma̱ a̱di̱di̱t ma̱ a̱keang kani, ba̱ yet á̱si̱ nung bya.”

¹¹Mat a̱nia, Bulut si̱ ya a̱son ma̱ng swat hu ma̱ a̱keang Korinti ka. A̱ si̱ nyia̱ a̱lyia̱ a̱nyiung ma̱ng zwát a̱taa, nang gu tyiet á̱niet ba á̱lyiat A̱gwaza na.

¹²A̱wot jen nang Ga̱liyo nkyiak tyok gwomna a̱byin A̱ka̱ya hu a̱ni, A̱yahudawa á̱ghyang si̱ kin nwuo lak li Bulut. Ba̱ si̱ nat ma̱ng a̱nggu a̱zaghyi gwomna, da̱nian a̱ ka nyia̱ nggu shi̱ri̱ya.

¹³Ba̱ si̱ bat Bulut a̱hyiak nyia̱, “A̱tyu wuni kwan a̱ mwang á̱niet ba̱ kwok ntong a̱zaghyi A̱gwaza, di̱ nvak na̱ vwuon ma̱ng doka nzi̱t ji a̱ni!”

¹⁴Jen ji nang Bulut ntyia̱ a̱ na nwuak ta̱fwat nggu ji a̱ni, gwomna Ga̱liyo si̱ nyia̱ ma̱ng A̱yahudawa ba ba̱ bat Bulut a̱hyiak na a̱ni, “Nyi myiai a̱fufwuo nyi fa̱a̱k! Ka̱ a̱tyu wuni wa bwuo a̱bun, ku a̱ tat doka ja, si̱ n na shya̱ ta̱fwat nang n na nfa̱k a̱lyiat nyin na a̱ni.

¹⁵A̱wot, nang ku ngyet ya fwuang ja tazwa swáng a̱lyiat ma̱ng lyulyoot, mbeang doka A̱yahudawa nyin ji a̱ni; nyin bya ma̱nyin nyin na jhya̱ a̱lyiat nani! N dak shi̱ri̱ya tangka̱i á̱lyiat a̱hwa.”

¹⁶A̱wot Ga̱liyo si̱ fi̱n mba a̱ ghwut ndyo mi̱ tutu shi̱ri̱ya hu.

¹⁷Á̱kpa á̱niet ka si̱ kwa di̱ Sa̱stanit a̱tyu a̱ yet a̱kwak a̱son tutu a̱tung A̱yahudawa hu a̱ni. Ba̱ si̱ tsot gu a̱ja mi̱ tutu shi̱ri̱ya hu. A̱mgba̱m ma̱ng a̱nia, gwomna Ga̱liyo si̱ nwuan mba ma̱ gbi̱t!

¹⁸Nang si̱ a̱hwa nswak a̱ni, Bulut si̱ ya ndabeang ma̱ a̱keang Korinti ka. A̱ sii byiat a̱mgba̱m á̱niet khwi ba saak. A̱ si̱ byia̱k a̱ nat a̱keang Ka̱nkiriya, ka̱ shya̱ kpa̱mkpaan a̱ja a̱ni. A̱ja wa gu si̱ nkwat pyia̱ nggu hu, ma̱nang á̱ nyia̱ taada A̱yahudawa ji a̱ni. Huhwa si̱ tak nang gu ntyat shyishyi nggu ji. A̱wot a̱ si̱ doot ma̱ng Biriskila mbeang A̱kila, ba̱ si̱ nwuo kukwon a̱wak. Ba̱ si̱ wak á̱ byia̱k á̱ naat ma̱ a̱byin Suriya.

¹⁹A̱wot ba̱ ku ya ngyong ma̱ a̱keang A̱fisut ka̱ shya̱ a̱beam kyai a̱sa̱khwot a̱ni. A̱ja wa Bulut si̱ ghwon Biriskila ma̱ng A̱kila. Nang gu nshya̱ a̱ja a̱ni, a̱ si̱ nat mi̱ tutu a̱tung A̱yahudawa hu. A̱ si̱ bu nwuo zop A̱lyiat A̱gwaza na ma̱ng A̱yahudawa ba.

²⁰Ba̱ si̱ naai nggu gu ya mbwuo mam ma̱ng a̱mba. A̱wot Bulut si̱ shim bah.

²¹Nang gu nghwon mba a̱ni, a̱ si̱ nyia̱, “Á̱ na labeang bah, n bu na mbwuok mbai da̱ a̱vwuo nyin, ka̱ A̱gwaza shim.” A̱ si̱ nwuo kukwon a̱wak hu, a̱ si̱ ghwon a̱keang A̱fisut. A̱ si̱ wak a̱ byia̱k a̱ nat ma̱ a̱keang Kaisa̱riya.

²²Nang nggu nnwuo Kaisa̱riya a̱ni, a̱ si̱ swak a̱ nat a̱ si̱ byiat á̱niet khwi ba ba̱ shya̱ Urusha̱lima a̱ni, a̱ sii bwuok a̱ nat a̱keang Antakiya.

²³Nang Bulut ndabeang Antakiya a̱ni, a̱ si̱ bwuok a̱ nat mi̱ nfam bibyin Ga̱la̱tiya ma̱ng Fi̱ri̱jiya. A̱ si̱ nwuai a̱ka̱keang na a̱ byiat a̱mgba̱m á̱niet khwi ba a̱ tsa a̱ tyei mba gba̱gbak.

²⁴Di̱n jen a̱ja, a̱tyu A̱yahudawa a̱ghyang ku nshya̱, á̱ si̱ ngyei nggu A̱folot. A̱ ku neet Ali̱ksa̱nda̱riya ma̱ a̱byin Ma̱sa̱r, a̱ si̱ bai A̱fisut. A̱ yet a̱gwak lyen a̱lyiat wa. A̱ si̱ bu lyen A̱lyiat A̱gwaza nang á̱ lyuut a̱ni ba̱t.

²⁵Á̱ ku mi̱ ntyiet gu vak khwi A̱gwaza hu. A̱wot nggu meang, a̱ si̱ tyiet á̱ghyang á̱niet á̱lyiat Yesu na ma̱ cha̱chaat ma̱ng fwuo nyiung. A̱mgba̱m ma̱ng a̱nia, ba̱ptisman Yoona ja nang gu ku lyen ma̱nyin ji.

²⁶Jen nang Biriskila ma̱ng A̱kila nfa̱k nang A̱folot ngbang a̱lyia̱ a̱ shei a̱lyiat A̱gwaza na mi̱ tutu a̱tung A̱yahudawa hu a̱ni; ba̱ si̱ yorong gu da̱ gbang a̱nyiung. Ba̱ si̱ tyiet guu. Ba̱ si̱ bu tat gu á̱ghyi á̱ mbeang shansham di̱n vak khwi A̱gwaza hu.

²⁷Jen nang A̱folot ku ndam a̱ chat nat fam a̱byin A̱ka̱ya ka a̱ni, á̱niet khwi ma̱ A̱fisut ba si̱ li̱n a̱ma ngguu, gu naat. Ba̱ si̱ lyuut wusika a̱ nwuak á̱niet khwi ba̱ shya̱ mi̱ fam a̱byin A̱ka̱ya a̱ni, nyia̱ ba̱ san nggu mbwak nfeang. Nang gu si̱ nnwuo A̱ka̱ya a̱ni, a̱ si̱ beang á̱niet khwi ba ba̱t ba̱ nwuak fwuo di̱ Yesu, mat shok A̱gwaza ji.

²⁸A̱folot ku ya fwuang ji̱ byia̱ chet a̱ni ma̱ng A̱yahudawa ba. A̱ si̱ mat ba kpa̱sai a̱zaghyi á̱niet ma̱ a̱di̱di̱t! A̱ si̱ tak ma̱ng a̱mba ma̱ A̱lyiat A̱gwaza na nang Yesu wa ngyet Kristi[63] wu.