Read tyap Nta̱m A̱yaata̱m 19 Bible Online

Nta̱m A̱yaata̱m 19 - tyap bible

Nta̱m A̱yaata̱m 19

¹Jen nang A̱folot nshya̱ ma̱ a̱keang Korinti a̱ni, Bulut si̱ ya a̱son ma̱ng a̱chyet ka a̱ kat a̱ka̱keang na. A̱ si̱si̱ tat a̱keang A̱fisut ka̱ shya̱ a̱beam kyai a̱sa̱khwot a̱ni. A̱ja wa gu si̱ nshya̱ á̱niet khwi Yesu ma̱ a̱di̱di̱t.

²A̱ si̱ lyip ba nyia̱, “Nyi ku san A̱za̱za̱rak Ntswa wu di̱n jen nang nyi ku nnwuak fwuo di̱ Yesu a̱ni a?” Ba̱ si̱ nwuak gu shim nyia̱, “Kaai, zi̱ ka̱n fa̱k nkhang nyia̱ A̱za̱za̱rak Ntswa nshya̱ bah.”

³Bulut si̱ bu lyip ba, nyia̱, “Ka̱ a̱nia wa, zang tangka̱i ba̱ptisman hwa á̱ ku nyia̱ nyin dyo?” Ba̱ si̱ bu nwuak gu shim nyia̱, “Ba̱ptisman Yoona ja nang á̱ ku nyia̱ nzi̱t ndyo.”

⁴Bulut si̱ nyia̱ ma̱ng a̱mba, “Ba̱ptisman Yoona ji yet si̱ ghwon a̱ka̱tuk nyia̱ ja. A̱wot Yoona ma̱ a̱pyia̱ nggu ku tak ma̱ng á̱niet ba ba̱ nwuak fwuo di̱ Yesu; nggu wa yet a̱tyu a̱ chobai a̱ni.”

⁵Nang ba̱ nfa̱k a̱nia a̱ni, mi̱ di̱ yong a̱hwa, á̱ si̱ nyia̱ mba ba̱ptisman ji mami a̱lyoot A̱tyoli Yesu.

⁶Jen nang Bulut nsak mba mbwak a̱ni, chet A̱za̱za̱rak Ntswa hu si̱ kin chyok da̱ mba! Ba̱ si̱ nwuo lyiat di̱ lilyem A̱za̱za̱rak Ntswa ghyang nang ba̱ mi̱ ndyen a̱ni bah. A̱wot ba̱ si̱ shei nkyang na̱ na bai á̱zanson a̱ni.

⁷A̱mgba̱m ba, ba̱ ku yet kidee á̱niet swak ma̱ a̱feang bya.

⁸Bulut si̱ nwuo mi̱ tutu a̱tung A̱yahudawa hu. A̱ si̱ nyia̱ zwát tsat nang gu shei mba á̱lyiat A̱gwaza na ma̱ng gbang a̱lyia̱, a̱ tsa a̱ bu mwang mba tazwa Tyok A̱gwaza hu.

⁹A̱mgba̱m ma̱ng a̱nia, á̱ghyang á̱niet ma̱ a̱mba ku yet á̱niet lak fwuong bya. Ba̱ si̱ lak nwuak a̱chuchuk da̱ á̱lyiat A̱gwaza nang gu shei a̱ni. Ba̱ si̱ bu shei a̱ka̱tuk a̱lyiat kpa̱sai tazwa susot á̱niet khwi Yesu (nang á̱ bu ngyei “Vak hu” a̱ni[64].) Huhwa, Bulut si̱ ghwon tutu a̱tung A̱yahudawa hu dundung ma̱ng á̱niet khwi ba. A̱wot kuzang a̱tuk a̱ ni̱ ya fwuang ma̱ng A̱yahudawa. A̱ si̱ bu tyiet á̱niet khwi ba ma̱ng á̱kpa á̱niet a̱keang ma̱ a̱gba̱ndang gaat nang á̱ ni̱ ntyiet á̱niet a̱keang ba, nang á̱ ngyei Tiranut a̱ni.

¹⁰Bulut si̱ bu nyia̱ a̱lyia̱ a̱feang a̱ja. Mat a̱nia, a̱mgba̱m á̱niet ba ba̱ shya̱ mi̱ fam a̱byin A̱siya hu a̱ni, A̱yahudawa mbeang A̱helenawa; ba̱ si̱ fa̱k á̱lyiat A̱gwaza na.

¹¹A̱gwaza si̱ nwuak Bulut chet nyia̱ nta̱m a̱ri̱bi̱di nang á̱ nwai meang mi̱ nwuan a̱ni.

¹²Ka̱ á̱ kyiak tyiang a̱toot lyang a̱ghyi Bulut, ku a̱toot á̱ byam vam gu hu a̱ni, á̱ si̱ mbyam á̱niet nzwán ba, zwán mba ji ni̱ choot. A̱wot á̱ka̱tuk ntswá ba ni̱ ghwut ma̱ á̱niet ba.

¹³Sot A̱yahudawa jhyang ku nwuai a̱ka̱keang á̱ khai á̱ka̱tuk ntswá ba̱ ghwut ma̱ á̱niet. Ba̱ si̱ kwan ba̱ nyia̱ ta̱m ma̱ng a̱lyoot A̱tyoli Yesu tazwa á̱niet ba̱ byia̱ á̱ka̱tuk ntswá ba a̱ni. Ba̱ si̱ nyia̱, “N kam nyin, mami a̱lyoot Yesu nang Bulut shei á̱lyiat nggu na a̱ni; nyi ghwut!”

¹⁴Á̱niet ba̱ ku nyia̱ a̱nia a̱ni, ba̱ ku yet mman a̱sam a̱natat. Á̱ si̱ ngyei a̱tyia̱ mba wu Siba. A̱ si̱ yet a̱gba̱ndang pris A̱yahudawa wa.

¹⁵A̱wot jen jhyang ba̱ si̱ kwan ba̱ kam a̱ka̱tuk ntswa a̱ ghwut ma̱ a̱yin. A̱ka̱tuk ntswa wu si̱ nwuak ba shim nyia̱, “N dyen Yesu, n si̱ ndyen Bulut. A̱wot nyin, nyi yet a̱nyanyan bya?!”

¹⁶A̱tyu a̱ byia̱ a̱ka̱tuk ntswa wu a̱ni, si̱ kin fi̱p a̱kwa da̱ mba! A̱ si̱ ta̱bat ba ma̱ng tsot. A̱ si̱ swuo chet ba. A̱ si̱ bwoi mba a̱fi̱fa̱t. A̱ si̱ sam mba a̱yaatoot ba. Ba̱ si̱ tyong á̱ ghwut a̱mali ka ka̱gbang!

¹⁷Nkhang kyang nang á̱ nyia̱ a̱ni, si̱ nwuo ma̱ a̱fufwuo A̱yahudawa ma̱ng A̱helenawa ba̱ shya̱ A̱fisut a̱ni. A̱wot a̱wun si̱ ta̱bat a̱mgba̱m á̱niet ba̱ shya̱ ma̱ a̱keang ka a̱ni ba̱t. Ba̱ si̱ dyep a̱lyoot A̱tyoli Yesu ka.

¹⁸Á̱niet ma̱ a̱di̱di̱t ba̱ ku nwuak fwuo di̱ Yesu a̱ni, si̱ ghwut á̱ bai kpa̱sai, ba̱ si̱ tyai á̱ka̱tuk nyia̱ mba wu.

¹⁹A̱niet ma̱ a̱di̱di̱t ba̱ ku yet a̱yaala̱tong a̱ni, ba̱ si̱ tung nta̱ka̱da nyia̱ la̱tong mba na, ba̱ si̱ fwui na mi̱ ndong kpa̱sai, konyan si̱ li na ma̱ng á̱ghyi. Zang ta̱ka̱da nang ba̱ ku fwui a̱ni; á̱ si̱ tyan ji ma̱ng kurum mam nta̱m chyikwop swak nfwuon hwa[65]!

²⁰A̱wot á̱lyiat A̱gwaza na si̱ teak á̱ kai kuzang a̱vwuo. A̱wot na̱ si̱ bu shyak swat á̱niet hu ba̱t.

²¹Nang si̱ a̱hwa nswak a̱ni, Bulut si̱ kyiak mi̱ fwuo[66] ku yet ta hwa gu wak a̱ nat mi̱ nfam bibyin Ma̱kidoniya ma̱ng A̱ka̱ya, a̱ sii swak a̱ wak a̱ nat Urusha̱lima. Bulut si̱ nyia̱, “Ki̱ n si̱ ntat Urusha̱lima, ku na yet nung ta hwa, n swak nat Rom!”

²²A̱jawa Bulut si̱ ta̱m Timoti ma̱ng A̱rastut, ba̱ ku yet byiá̱k nggu ji sweang a̱ni, ba̱ ya a̱son ba̱ nat Ma̱kidoniya. A̱wot nggu, a̱ si̱ ya nswan a̱ labeang mi̱ fam a̱byin A̱siya hu.

²³Di̱n jen a̱ja, a̱gba̱ndang jhya̱ si̱ doot ma̱ a̱keang A̱fisut ka mat susot á̱niet khwi Yesu (nang á̱ bu ngyei “Vak hu” a̱ni[67].)

²⁴A̱tyu a̱ ku tsa jhya̱ ji a̱ni, á̱ ku ngyei nggu Di̱mi̱ti̱ri̱yut. A̱ ku yet a̱fwu a̱zurfa wa. A̱ si̱ byia̱ a̱gba̱ndang tutu fwu nghwughwu A̱li Nwuat Za̱nang a̱gwaza sang swuan, nang á̱ ku ngyei A̱timat[68] a̱ni.

²⁵Di̱mi̱ti̱ri̱yut ku yorong á̱niet nta̱m gu ba dundung mbeang á̱ghyang á̱niet ba̱ ku nyia̱ ntangka̱i nta̱m a̱bwuang a̱ni. A̱ si̱ nyia̱ ma̱ng a̱mba, “Á̱kpa̱ndang ta̱m nung ba, nyi lyen nang zwá nzi̱t ji neet mi̱ nta̱m fwu nani nia.

²⁶A̱wot nang nyi ndi, nyi si̱ fa̱k a̱ni, a̱tyu wuni nang á̱ ngyei Bulut a̱ni, a̱ ka̱n mwang a̱ shyak nfwuo á̱niet ma̱ a̱di̱di̱t a̱ji ma̱ a̱keang A̱fisut ka. A̱ si̱ nyia̱, nghwughwu a̱yaagwaza nang zi̱ fwu ma̱ng bwak a̱ni, yet a̱tsatsak a̱yaagwaza bya bah, ku ma̱ chunchwiit! A̱wot a̱ nyia̱ si̱ huni ma̱ a̱keang A̱fisut kya ma̱nyin ka bah; a̱mgba̱m mi̱ fam a̱byin A̱siya hu hwa!

²⁷A̱tsak a̱lyiat, n dyiat tazwa nang á̱niet na njhyuai ta̱m zi̱t huhwa a̱ni bah. A̱wot nung, n bu ndam si̱sak ji nang á̱ na njhyuai a̱li dyep a̱gba̱ndang a̱gwaza nzi̱t wu A̱timat a̱ni. A̱wot A̱timat a̱gwaza nzi̱t wu, nang á̱ kwok nggu ntong mi̱ fam a̱byin A̱siya, ma̱ng a̱mgba̱m swanta hu a̱ni; a̱ na nwai tyok gu hu!”

²⁸Jen ji nang á̱niet fwu nghwughwu ba nfa̱k a̱lyiat nani a̱ni, ba̱ si̱ fa̱k a̱lyia̱ ya. Ba̱ si̱ ta̱bat koot a̱gugwong nyia̱, “A̱timat A̱fisawa wu, nggu wa yet a̱gba̱ndang wu!”

²⁹Á̱ si̱ labeang bah, a̱mgba̱m á̱niet ma̱ a̱keang A̱fisut ba si̱ doot jhya̱! Ba̱ si̱ kwak Gayut ma̱ng Ari̱sta̱kut, ba̱ ku yet á̱kpa̱ndang a̱chyet Bulut neet Ma̱kidoniya a̱ni. Ba̱ si̱ nat ma̱ng a̱mba mi̱ a̱gba̱ndang gaat wu a̱ shya̱ nta nang á̱niet a̱keang A̱fisut ba ni̱ ntung a̱ni.

³⁰Bulut ku chat a̱ nwuo mi̱ gaat a̱tung ji ma̱ a̱pyia̱ nggu meang. A̱wot á̱niet khwi ba si̱ shim gu nwuo bah.

³¹A̱yaakwak a̱son á̱ghyang mi̱ fam a̱byin a̱hwa, ba̱ ku yet á̱kpa̱ndang Bulut a̱ni; mba meang ba̱ si̱ ta̱m á̱ naai Bulut nyia̱, di̱ gu yok mak a̱ nwuo mi̱ a̱gba̱ndang gaat a̱tung á̱niet a̱keang a̱wa bah!

³²Mami a̱gba̱ndang gaat a̱tung wu, á̱niet ba si̱ koot a̱gugwong; á̱si̱ bani shei si̱ huni, nang á̱si̱ bani shei si̱ hunia̱u! Kuzang kyang si̱ tyia̱ ma̱ a̱tai! A̱tsak a̱lyiat, á̱ghyang á̱niet ma̱ a̱di̱di̱t ku lyen kyang hu ku mbyia̱ nang ba̱ nnat mi̱ gaat a̱tung ji a̱ni bah.

³³A̱yahudawa á̱ghyang mami á̱kpa á̱niet ka, si̱ yuut A̱liza̱nda á̱ ta a̱zanson. Ba̱ si̱ nyia̱ ma̱ng a̱nggu; gu wa̱i á̱niet ba á̱lyiat tazwa kyang ku bai a̱ni. A̱liza̱nda si̱ neap bwak tazwa, a̱ si̱ chat á̱niet ba ba̱ tyia̱ nywang, gu ka hyiang.

³⁴A̱wot nang á̱kpa á̱niet ka nfi̱k nang A̱liza̱nda ngyet a̱tyu A̱yahudawa wa a̱ni, ba̱ si̱ bu ta̱bat khwot a̱gugwong! Ba̱ si̱ nyia̱ awa a̱feang nang ba̱ khwot a̱gugwong wu nyia̱, “A̱timat A̱fisawa wu, nggu wa yet a̱gba̱ndang wu! A̱timat A̱fisawa wu, nggu wa yet a̱gba̱ndang wu!”

³⁵Di̱ ngaan hu, a̱tyu lyuut a̱lyiat a̱keang wu, si̱ kam á̱kpa á̱niet ka ba̱ si̱ tyia̱ nywang. A̱jawa nang gu nyia̱ ma̱ng a̱mba, “Nyin á̱niet A̱fisut, konyan lyen nang a̱keang A̱fisut kikya byia̱ ta̱m chok a̱li dyep A̱timat hu. A̱wot kikya nang ghwughwu A̱timat a̱gwaza nzi̱t hu, ku neet tswazwa ka a̱ni, ba̱ nkwa.

³⁶Mat a̱nia, da̱ nang á̱ si̱ mi̱n fwuo a̱tsak a̱lyiat wuni a̱ni bah, ku myim nyi nyap nfwuo nyin na. Nyi yok nyia̱ kuzang kyang gi̱gi̱k bah.

³⁷Nyi bai ma̱ng á̱niet Gayut ma̱ng Ari̱sta̱kut a̱ji, da̱ mba ba̱ nyiin kyang mali dyep A̱timat ka bah. A̱wot da̱ mba, ba̱ nyia̱ A̱timat lihyat bah.

³⁸“Ka̱ Di̱mi̱ti̱ri̱yut ma̱ng á̱kpa̱ndang ta̱m nggu ba, li nang Gayut ma̱ng Ari̱sta̱kut bwuo mba a̱bun, á̱tutu shi̱ri̱ya ba ma̱ng a̱cha̱chet á̱niet nyia̱ shi̱ri̱ya ba nshya̱, á̱ na nyia̱ mba shi̱ri̱ya di̱ mi̱ byian jen. Yok ba̱ nat ma̱ng a̱lyiat na da̱ a̱vwuo á̱niet shi̱ri̱ya ba.

³⁹A̱wot ki̱ nyi ma mbyia̱ a̱dyii̱ng á̱ghyang wa ma̱ zan, ku myim nyi nat da̱ a̱vwuo á̱niet nyia̱ shi̱ri̱ya a̱keang ba, ba̱ ka zop nyin guu.

⁴⁰“Nang ku ndi a̱nia a̱ni, n fwuong a̱wun a̱gwomna̱ti A̱romawa ba na sak nzi̱t da̱ kyekyet a̱fang, da̱nian zi̱ tyia̱ jhya̱ ma̱ a̱keang ka. Mat zi̱ byia̱ ta̱fwat nang zi̱ na nwuak tazwa a̱gugwong nang zi̱ khwot a̱ni bah. A̱wot ka̱ a̱gwomna̱ti A̱romawa ba lyip zi̱t kyang ku bai a̱ni, zi̱ na shya̱ kyang zi̱ na hyia̱ ma̱ng a̱mba a̱ni bah.”

⁴¹Nang a̱tyu lyuut a̱lyiat a̱keang wu ndyiat ma̱ng a̱mba a̱ni, a̱ si̱ tyia̱ á̱niet ba si̱ kam ma̱ a̱tung ka.