Read tyap Nta̱m A̱yaata̱m 20 Bible Online

Nta̱m A̱yaata̱m 20 - tyap bible

Nta̱m A̱yaata̱m 20

¹Nang jhya̱ ji ntyak ma̱ a̱keang A̱fisut ka a̱ni, Bulut si̱ ta̱m á̱ yorong á̱niet khwi Yesu ba, mat gu ka tyia̱ mba gba̱gbak. A̱wot a̱ si̱ byiat ba saak. A̱ si̱si̱ nkat fam a̱byin Ma̱kidoniya.

²Jen gu nshya̱ mi̱ Ma̱kidoniya wu a̱ni, a̱ si̱ tyia̱ á̱niet khwi ba gba̱gbak ma̱ a̱ka̱keang nang gu ka̱n nwuai a̱ni, a̱ sii du swak a̱ nat fam a̱byin A̱ka̱ya hu.

³A̱wot a̱ si̱ swan a̱ja a̱ nyia̱ zwát tsat. A̱ ku sak; a̱ na doot a̱ nwuo kukwon a̱wak a̱ bwuok a̱ nat fam a̱byin Suriya. A̱wot a̱ si̱ fa̱k nang A̱yahudawa á̱ghyang ka̱n da̱p a̱nu, ba̱ na fwun gu di̱n vak ba̱ hyat gu. Huhwa, a̱ si̱ bwuok lilyim. A̱ si̱ kaat a̱ ghwut mi̱ fam a̱byin Ma̱kidoniya.

⁴Á̱niet ma̱ a̱di̱di̱t ku shya̱ ma̱ a̱chyet ka dundung ma̱ng Bulut. Bibya ku yet: Suba̱ta̱rat a̱fai Burut a̱ ku neet Bi̱riya a̱ni, ma̱ng Ari̱sta̱kut mbeang Sa̱kundut ba̱ ku yet á̱niet Ta̱solonika bya, ma̱ng Gayut a̱tyu Da̱rba, ma̱ng Timoti, Tikikut, ma̱ng Ta̱rofimut; a̱mgba̱m mba ba̱ ku yet á̱niet fam a̱byin A̱siya bya.

⁵Ba̱ ku khwat a̱son nzi̱t. Ba̱ si̱si̱ fwuong nzi̱t ma̱ a̱keang Ta̱rowasa.

⁶Nang A̱yet Ya Burodi Sang Yit wu nswak a̱ni, zi̱ si̱ nwuo kukwon a̱wak ma̱ a̱keang Filibi ma̱ a̱byin Ma̱kidoniya. Zi̱ si̱ wak nat. Nang mam fwuon nswak a̱ni, zi̱ si̱si̱ myim ma̱ng a̱mba ma̱ a̱keang Ta̱rowasa ka. Zi̱ si̱ swan a̱ja nyia̱ mam a̱natat.

⁷A̱tuk á̱ ni̱ ntsa fang mam a̱natat a̱ni, zi̱ si̱ tung ndung ma̱ng á̱niet khwi Yesu, ba̱ shya̱ ma̱ a̱keang Ta̱rowasa ka a̱ni. Zi̱ si̱ ya Kyayak A̱di̱dam A̱khwu[69] Yesu hu ndung. Bulut si̱ shei á̱niet khwi ba a̱lyiat A̱gwaza na. A̱wot mat nang gu wu nshyip da̱ a̱tsotson tat ka gu doot a̱ ghwon mba a̱ni, a̱ si̱ lyiat, a̱ si̱ tat a̱ka̱wa̱tyia̱ a̱tyetuk!

⁸Á̱ ku ba̱ng a̱ka̱ndong fí̱tila ma̱ a̱di̱di̱t mi̱ nyuo mali tazwa ka nang zi̱ ku ntung a̱ni.

⁹Nang Bulut ngya a̱son ma̱ng shei a̱lyiat A̱gwaza na a̱ni, fi̱ng nggwon seam ghyang nang á̱ ngyei Yutikut a̱ni, ku swan di̱ taga, a̱ nyiin nda. Á̱ si̱ labeang bah, nda na si̱ kyiak gu ba̱t. A̱wot a̱ si̱ ghwut a̱ neet mi̱ taga a̱mali tazwa a̱tat ka, a̱ ba̱ kwa a̱byin, a̱ si̱ khwu!

¹⁰Bulut si̱ chyok a̱ nat a̱byin, a̱ si̱si̱ beak, a̱ si̱ vwuk ka a̱ ba̱ng nyia̱, “Nyi yok fa̱k kyang bah, nggwon seam ka shya̱ ma̱ng swuan!”

¹¹A̱jawa a̱mgba̱m ba si̱ bwuok á̱ nyeak á̱ nat mi̱ nyuo mali tazwa ka. Ba̱ si̱si̱ ya Kyayak A̱di̱dam A̱khwu hu[70] ndung. Bulut si̱ kyiak a̱junjung jen ba̱t, ba̱ng si̱ nat a̱tsotson tat nang gu lyiat ma̱ng a̱mba. A̱ sii doot a̱ nkat.

¹²Á̱ si̱ nat ma̱ng nggwon seam ka a̱mali ma̱ng swuan di̱ mi̱ kun. A̱wot konyan ma̱ mba si̱ gwai ba̱t!

¹³Bulut ku chong a̱byin a̱ nat a̱keang A̱sot. A̱ja wa gu ku nda̱p a̱ sak zi̱ na myim ma̱ng a̱nggu. A̱wot nzi̱t, zi̱ na nwuo kukwon a̱wak hwa.

¹⁴Nang Bulut nshya̱ nzi̱t mi̱ A̱sot wu a̱ni, zi̱ si̱ nwuo kukwon a̱wak hu ndung. Zi̱ si̱ wak nat a̱keang Mi̱ti̱lini.

¹⁵Zi̱ si̱ doot Mi̱ti̱lini da̱ a̱tsotson tat ka mi̱ kukwon a̱wak. Zi̱ si̱ wak swak a̱keang a̱ka̱wa̱tyia̱ a̱sa̱khwot nang á̱ ku ngyei Kiyot a̱ni. A̱tuk mam feang ka, zi̱ si̱ wak á̱ swak a̱byin a̱ka̱wa̱tyia̱ a̱sa̱khwot nang á̱ ngyei Sa̱mot a̱ni. A̱wot zi̱ si̱ kwa mam.[71] Zi̱ si̱ wu shyip. Zi̱ si̱ wak nat, zi̱ si̱ tat a̱keang Mi̱li̱tut.

¹⁶Bulut ku kyiak mi̱ fwuo gu wak a̱ swak a̱keang A̱fisut mi̱ kukwon a̱wak hu, mat a̱ ku chat a̱ bu byian jen mi̱ fam a̱byin A̱siya hu bah. A̱ ku ghan a̱ tat Urusha̱lima a̱nggang, neet nang mam Pentikot hu ka̱n bai bah.

¹⁷Nang zi̱ ntat Mi̱li̱tut a̱ni, Bulut si̱ ta̱m á̱ yei nggu a̱yaakwak a̱son sot á̱niet khwi ma̱ a̱keang A̱fisut, nyia̱ ba̱ myim ma̱ng a̱nggu a̱ja.

¹⁸Nang a̱yaakwak a̱son á̱niet khwi ba mbai a̱ni, a̱ si̱ nyia̱ ma̱ng a̱mba, “Nyin ma̱ á̱pyia̱ nyin, nyi lyen tangka̱i swat nang n ku nswan ma̱ng a̱nyin neet a̱tuk nang n ku nsak tak mi̱ fam a̱byin A̱siya hu, ba̱ng ba̱ tat a̱fwun a̱ni.

¹⁹N ku ghyuai a̱pyia̱ nung, n si̱ nyia̱ ta̱m A̱gwaza hu. A̱wot n si̱ nswuo a̱bung ba̱t ma̱ng ndang a̱ghyi. A̱yahudawa ba si̱ mai nung, ba̱ si̱ vwuoi a̱ka̱shuk ma̱ a̱di̱di̱t. A̱mgba̱m ma̱ng a̱nia, n si̱ ngbang a̱lyia̱.

²⁰Nyi bu lyen da̱nang n ku nkwak vam di̱ shei nyin a̱lyiat A̱gwaza na bah. A̱wot n si̱ ntyiet nyin na kpa̱sai mami á̱niet. N si̱ bu nkhwi nyin ma̱ a̱ka̱sa nyin na.

²¹Ta̱m jhyung ja n ku nshei A̱yahudawa ba mbeang Nnwap na̱ nwai yet A̱yahudawa a̱ni, jija yet; ku myim ba̱ ghwon a̱ka̱tuk nyia̱ mba wu, ba̱ khwi A̱gwaza, a̱wot ba̱ nwuak fwuo da̱ A̱tyoli Yesu.

²²“A̱wot di̱ yong huni, A̱za̱za̱rak Ntswa wu[72] fuut nung n nat Urusha̱lima. Da̱ nung, n dyen kyang hu ku na shya̱ nung a̱ja a̱ni bah.

²³Mi̱ kyang nyiung hwa nang n dyen. A̱za̱za̱rak Ntswa wu shei ma̱ng a̱nung nyia̱; mi̱ kuzang a̱keang nang n nwuo a̱ni, á̱ na tyia̱ nung mi̱ jaru, a̱wot n bu nswuo a̱bung ba̱t.

²⁴A̱mgba̱m ma̱ng a̱nia, n kyiak swuan nung ji ji̱ yet kyang bah. Ta̱m nang A̱tyoli Yesu nwuak nung n nyia̱ a̱ni, huhwa nang n chat n tyak; n shei A̱sham Nkhang tazwa a̱gba̱ndang shok A̱gwaza.

²⁵“A̱wot ma̱ninika, a̱mgba̱m nyin nang n shei nyin a̱lyiat tazwa Tyok A̱gwaza hu a̱ni, nyi bu na li nung bah.

²⁶Mat a̱nia, a̱fwun, n chat n tak ma̱ng nyin nang n nyia̱ ta̱m nung hu ma̱ng fwuo nyiung mami a̱chuchuk. Ka̱ a̱yin ma̱ nyin bwuk, a̱ si̱ swuo a̱bung mi̱ ndong sang sangba̱p, n mbyia̱ a̱ka̱ta bah.[73]

²⁷Mat n ku mbut mi̱ fwuo di̱ tak ma̱ng a̱nyin a̱mgba̱m a̱lyiat, nang A̱gwaza chat nyi lyen a̱ni bah.

²⁸“Nyi cham pyipyia̱ nyin, ma̱ng a̱mgba̱m á̱niet khwi A̱gwaza ba. Nyi chok sot á̱niet khwi A̱gwaza ji, nang gu san ma̱ng a̱za̱za̱rak a̱sok Yesu a̱ yet Nggwon nggu ka a̱ni. Á̱niet khwi bibya nang A̱za̱za̱rak Ntswa wu tyia̱ nyin ndyo mbwak. Nyi yet ba a̱yaakwak a̱son.

²⁹“N dyen ka̱ n doot á̱niet tyiet a̱ka̱laa ba̱ nyia̱ nang a̱ka̱bwu a̱yit a̱ni, ba̱ na nwuo mami nyin. Ba̱ na tyia̱ á̱niet khwi ba swuo a̱bung.

³⁰Jen na bai nang á̱ghyang á̱niet mi̱ sot nyin ji na ntyat á̱ ghwut a̱ni, ba̱ ka tyiet a̱ka̱laa. A̱wot ba̱ laai á̱niet khwi ba, ba̱ teap ba̱ khwi mbaa.

³¹Nyi cham á̱pyia̱ nyin! Nyi yok bwung a̱lyia̱ a̱tat nang n nyia̱ ma̱ng a̱nyin a̱ni bah; di̱ si̱sak ji nang n ku nchok nyin, n si̱ mbeang nyin a̱ta̱mam ma̱ng a̱tyetuk, a̱wot n si̱ ntwei khwot ndang a̱ghyi da̱nian nyin.

³²“A̱wot ma̱ninika, n neap nyin mbwak A̱gwaza. Yok A̱sham Nkhang shok nggu ka, ka̱ byia̱ chet nok nyin a̱ni, ka̱ bu nwuak nyin gado dundung ma̱ng a̱mgba̱m á̱za̱za̱rak á̱niet nang gu khap a̱ sak a̱pyia̱ nggu ndyo a̱ni.

³³N ka̱n mak kwi swam zi̱nariya, ku a̱zurfa, ku a̱sham a̱yaatoot a̱yin ma̱ nyin bah.

³⁴Nyin ma̱ á̱pyia̱ nyin, nyi lyen nang n ku nnyia̱ nta̱m ba̱t ma̱ng mbwak nung nani. Da̱nian n ka mbeang a̱pyia̱ nung ma̱ng á̱niet ba̱ ku shya̱ ndung ma̱ng a̱nung a̱ni.

³⁵A̱wot mami kuzang kyang, n si̱ ngyet kidee di̱ si̱sak ji nyi na nnyia̱ ta̱m ma̱ng chet, da̱nian nyi ka mbeang á̱niet ba̱ sang kyang a̱ni. Nyi bu jhyung a̱lyiat A̱tyoli Yesu na nyia̱, ‘Nang a̱yin kyang byia̱ kpangti̱n a̱ lan si̱sak nang a na nsan kyang ma̱ng a̱yin a̱ni.’ ”

³⁶Jen nang Bulut ntyak á̱lyiat na a̱ni, a̱ si̱ kpaat a̱khwukhwut a̱byin. Ba̱ si̱ naai A̱gwaza dundung.

³⁷A̱mgba̱m a̱yaakwak a̱son sot á̱niet khwi A̱fisut ba si̱ twei! Ba̱ si̱ vwuk Bulut. Ba̱ si̱ byiat gu saak.

³⁸Kyang hu ku ku nwuak ba byian nfwuo ji a̱ni; huhwa yet a̱lyiat na nang Bulut ku hyia̱ ma̱ng a̱mba nyia̱ da̱ ba̱ bu na li nggu a̱ni bah. A̱wot ba̱ si̱ tyei nggu a̱ta̱lyen, á̱ nat ndyo di̱ tyan nwuai kukwon a̱wak ji.