Read tyap Nta̱m A̱yaata̱m 21 Bible Online

Nta̱m A̱yaata̱m 21 - tyap bible

Nta̱m A̱yaata̱m 21

¹Nang Bulut mbyiat a̱yaakwak a̱son sot á̱niet khwi A̱fisut ji sak a̱ni, zi̱ si̱ nwuo kukwon a̱wak. Zi̱ si̱ wak nat. Zi̱ si̱ ti̱p di̱di̱r nat a̱byin a̱ka̱wa̱tyia̱ a̱sa̱khwot nang á̱ ngyei Kot a̱ni. Da̱ a̱tsotson tat ka, zi̱ si̱ ntat Rodusa. A̱wot zi̱ si̱ doot a̱ja. Zi̱ si̱ wak si̱ tat Ba̱tara.

²A̱ja, zi̱ si̱ nwuo kukwon a̱wak a̱ghyang ku naat fam a̱byin Fi̱ni̱siya a̱ni.

³Jen nang zi̱ nshya̱ ma̱ a̱chyet a̱ni, zi̱ si̱ neap á̱ghyi, zi̱ si̱ li a̱byin a̱ka̱wa̱tyia̱ a̱sa̱khwot Kuburut. Zi̱ si̱ wak, zi̱ si̱ swak ghwon a̱byin ka a̱zamyian. Zi̱ si̱ wak nat, zi̱ si̱ chyok da̱ a̱vwuo yong a̱kukwon a̱wak ma̱ a̱keang Taya, ma̱ a̱byin Suriya. Mat a̱ja wa nang á̱ na nchyok nkpa̱t na mi̱ kukwon a̱wak hu.

⁴Nang zi̱ nchyok ma̱ a̱keang Taya a̱ni, zi̱ si̱ shya̱ sot á̱niet khwi a̱ja. Zi̱ si̱ bwuo mam a̱natat ma̱ng a̱mba. Á̱niet khwi bani si̱ shei á̱zanson mami chet A̱za̱za̱rak Ntswa, nyia̱ da̱ Bulut gu yok nat Urusha̱lima bah!

⁵Jen nang mam a̱natat na nswak a̱ni, zi̱ si̱ bwuok nat mi̱ kukwon a̱wak hu. A̱mgba̱m sot á̱niet khwi ji, á̱nyiuk ma̱ng mman, si̱ ghwut ma̱ a̱keang ka. Ba̱ si̱ bai da̱ a̱vwuo yong a̱kukwon a̱wak ba dundung ma̱ng a̱nzi̱t. A̱ja wa a̱mgba̱m nzi̱t, zi̱ si̱ kpaat a̱khwukhwut, zi̱ si̱ naai A̱gwaza.

⁶A̱wot zi̱ si̱ byiat á̱ghyang saak. A̱jawa zi̱ si̱ nwuo kukwon a̱wak hu. A̱wot mba, ba̱ si̱ bwuok á̱ nkat a̱mali.

⁷Nang zi̱ nghwon a̱keang Taya ka a̱ni, zi̱ si̱si̱ yong ma̱ a̱keang Ta̱la̱mayat. Zi̱ si̱ byiat á̱na̱nyiuk ba̱ yet á̱niet khwi Yesu a̱ni. A̱wot zi̱ si̱ kwa mam a̱ja.

⁸A̱tuk mam feang ka, zi̱ si̱ doot zi̱ si̱ nat Kaisa̱riya. Zi̱ si̱ chyok a̱mali Filibut, a̱tyu shei A̱sham Nkhang Yesu. A̱ ku yet a̱tyo nyiung ma̱ á̱niet beang ta̱m ka̱u nkyayak a̱natat nang á̱ ku khai mi̱ Urusha̱lima a̱ni.[74]

⁹Nggu Filibut ku byia̱ mman á̱nap a̱naai ba̱ ka̱n nwai nyeang a̱ni. Ba̱ si̱ byia̱ za̱nang chet shei a̱lyiat A̱gwaza á̱zanson nang A̱za̱za̱rak Ntswa ntyai ba ndyo kpa̱sai a̱ni.

¹⁰Mmam ma̱ a̱di̱di̱t si̱ swak, a̱ghyang a̱niet nang á̱ ngyei A̱gabut a̱ni, a̱ si̱ bai a̱ neet mi̱ fam a̱byin Yahudiya. Nggu meang, a̱ ku byia̱ za̱nang chet A̱za̱za̱rak Ntswa shei á̱zanson.

¹¹Nang gu mbai da̱ a̱vwuo nzi̱t a̱ni, a̱ si̱ kyiak a̱zwuan Bulut ka, a̱ si̱ nda̱p a̱ti̱tak ma̱ng mbwak gu na. A̱jawa gu nyia̱, “A̱za̱za̱rak Ntswa A̱gwaza wu tak á̱zanson nyia̱, ‘A̱tyu a̱ byia̱ a̱zwuan kani a̱ni, a̱ni wa nang a̱yaakwak a̱son A̱yahudawa ba na nda̱p gu ma̱ a̱keang Urusha̱lima ka, a̱wot ba̱ tyia̱ nggu mbwak Nnwap na̱ nwai yet A̱yahudawa a̱ni.’ ”

¹²Nang zi̱ nfa̱k á̱lyiat nani a̱ni, nzi̱t ma̱ng sot á̱niet khwi ma̱ a̱keang ji, a̱mgba̱m zi̱t; zi̱ si̱ naai Bulut gu yok nat Urusha̱lima bah!

¹³A̱mgba̱m ma̱ng a̱nia, Bulut si̱ nyia̱ ma̱ng a̱mba, “Yihwa mbyia̱ nyi ntwei? Nyi tyei nung byian fwuo! N fwuong á̱ nyim nung mi̱ jaru ja ma̱nyin ji ma̱ a̱keang Urusha̱lima ka bah. A̱wot ku a̱khwu kya, n shim n khwu da̱nian A̱tyoli Yesu!”

¹⁴Nang zi̱ ntyuu ma̱ng Bulut gu yok nat Urusha̱lima hu a̱ si̱ lak a̱ni, zi̱ si̱ tyia̱ nywang. A̱wot zi̱ si̱ nyia̱, “A̱gwaza gu nyia̱ kyang hu ku myim gu a̱ni.”

¹⁵Nang si̱ huni nswak a̱ni, zi̱ si̱ tung nkpa̱t nzi̱t na. Zi̱ si̱ ta̱bat vak naat Urusha̱lima.

¹⁶Á̱niet khwi á̱ghyang ku neet ma̱ a̱keang Kaisa̱riya, ba̱ si̱ chong dundung ma̱ng a̱nzi̱t. Ba̱ si̱ kyiak zi̱t á̱ nat ndyo a̱mali Ma̱nason, a̱ ku yet a̱tyu Kuburut. A̱ si̱ yet a̱tyo nyiung ma̱ á̱niet ba̱ ku tsa nwuak fwuo di̱ Yesu a̱ni.

¹⁷Jen nang zi̱ si̱ nnwuo a̱keang Urusha̱lima ka a̱ni, sot á̱niet khwi ji̱ shya̱ a̱ja a̱ni, si̱ san zi̱t mbwak nfeang.

¹⁸A̱tuk mam feang ka, Bulut si̱ doot ndung ma̱ng a̱nzi̱t a̱ nat byiat Yakubu, nang a̱mgba̱m a̱yaakwak a̱son sot á̱niet khwi Urusha̱lima ba shya̱ a̱ja.

¹⁹Nang Bulut mbyiat ba a̱ni, a̱ si̱ ya mbwuo mba nkhang a̱mgba̱m nkyang nang A̱gwaza nyia̱ Nnwap na̱ nwai yet A̱yahudawa ndyo mat ta̱m gu hu a̱ni.

²⁰Nang ba̱ nfa̱k nkhang nta̱m Bulut na a̱ni, a̱mgba̱m ba ba̱ si̱ dyep A̱gwaza! A̱jawa ba̱ si̱ nyia̱ ma̱ng Bulut, “A̱na̱nyiuk, a lyen nang A̱yahudawa chyikwop ma̱ a̱di̱di̱t meang ka̱n nwuak a̱chuchuk di̱ Yesu. A̱wot a̱mgba̱m ba, ba̱ ni̱ ba̱ng tyiet Musa hu mi̱ chet!

²¹“A̱wot á̱ ka̱n tak ma̱ng A̱yahudawa ba̱ yet á̱niet khwi ba a̱ji mi̱ Urusha̱lima a̱ni, nyia̱ a tyiet a̱mgba̱m mba ba̱ swan dundung ma̱ng Nnwap na̱ nwai yet A̱yahudawa a̱ni, ba̱ yok khwi doka Musa ji bah. A̱wot ba̱ fa̱k nyia̱ a tyiet ba da̱ ba̱ yok tyei mman mba na mi̱ chen, ku ba̱ khwi taada A̱yahudawa jhyáng bah.

²²A̱tsak a̱lyiat, ba̱ na fa̱k nang a mbai a̱ji. Yihwa myim zi̱ nyia̱?

²³“Kyang hu nang zi̱ na nyia̱ a̱ni, huhwa yet; zi̱ byia̱ á̱niet a̱naai a̱ji ba̱ ka̱n tyak kyiak shyishyi a̱zaghyi A̱gwaza a̱ni.

²⁴Nat ndung ma̱ng a̱mba mami A̱li Nwuat Za̱nang A̱gwaza ka, nyi si̱ kwi a̱na̱ndyung á̱pyia̱ nyin wu a̱zaghyi A̱gwaza. A̱wot a bu tan mba zang nang ba̱ na nkwat á̱pyia̱[75] mba di̱ taada jini a̱ni. A̱jawa nang konyan na ndyen nang a̱mgba̱m nkhang nang á̱ bwoi tazwa ang a̱ni, na̱ yet a̱ka̱laa nia. A̱wot nwan ma̱ a̱pyia̱ ang, a khwi doká A̱yahudawa ji.

²⁵“A̱wot, Nnwap na̱ nwai yet A̱yahudawa ba̱ yet á̱niet khwi Yesu ba a̱ni; ku myim ba̱ khwi á̱lyiat nang zi̱ ka̱n dyuut mba ndyo mi̱ wusika ji a̱ni: Nyia̱, da̱ ba̱ yok ya nkyayak nang á̱ ka̱n neap nghwughwu a̱yaagwaza sang swuan a̱ni bah. Ba̱ yok ya a̱sok bah. Ba̱ yok ya nam nyam nang á̱ chyip fwuo hu, á̱ sii hyat a̱ni bah. A̱wot ba̱ yok katnaan ma̱ng a̱shi̱shi̱k nyia̱.”

²⁶Huhwa, da̱ a̱tsotson tat ka, Bulut si̱ nat ma̱ng á̱niet a̱naai a̱bya A̱mali Nwuat Za̱nang A̱gwaza ka. Ba̱ si̱si̱ kwi á̱pyia̱ mba a̱na̱ndyung wu ndung. Mat a̱nia, Bulut si̱ tak kpa̱sai mami á̱niet ka, a̱tuk nang shyishyi mba ji na ntyak, a̱wot á̱ neap za̱nang a̱zaghyi A̱gwaza da̱nian konyan ma̱ a̱mba a̱ni.

²⁷Nang mam a̱natat na nshim tyak a̱ni, a̱jawa A̱yahudawa á̱ghyang ba̱ ku neet mi̱ fam a̱byin A̱siya a̱ni, si̱ li Bulut mami A̱li Nwuat Za̱nang A̱gwaza ka. A̱wot ba̱ si̱ kin fuut sot á̱niet ba̱ doot jhya̱ tazwa nggu! Ba̱ si̱ ta̱bat Bulut.

²⁸Ba̱ si̱ khwot a̱gugwong nyia̱, “Á̱niet Isi̱rela, nyi beang nzi̱t! Di a̱tyu wuni wa chong a̱ kat kuzang a̱keang, a̱ tyiet konyan nyia̱ gu lak li á̱niet nzi̱t ba! A̱wot a̱ bu lak khwi doká A̱yahudawa ji. A̱ bu lyiat lihyat tazwa A̱li Nwuat Za̱nang A̱gwaza. A̱wot a̱ si̱ tyia̱ nka a̱na̱ndyung, mat nang gu nnwuo ma̱ng Nnwap na̱ nwai yet A̱yahudawa a̱ni ma̱ a̱za̱za̱rak a̱vwuo wuni!”

²⁹(Mat da̱ a̱tsotson a̱tuk a̱kya, A̱yahudawa ba ku li Bulut ma̱ a̱keang ka ndung ma̱ng Ta̱rofimut, a̱tyu Nnwap a̱ nwai yet A̱yahudawa a̱ ku neet a̱keang A̱fisut a̱ni. A̱wot ba̱ si̱ kyiak á̱ ngyei Bulut nwuo ma̱ng a̱nggu mi̱ didyaat A̱yahudawa A̱li Nwuat Za̱nang A̱gwaza ka.[76])

³⁰A̱mgba̱m a̱keang ka ku nurung mat a̱hyiak nang á̱ mbat Bulut a̱ni! A̱wot a̱gba̱ndang jhya̱ si̱ doot. Á̱niet ba si̱ kwa di̱ Bulut! Ba̱ si̱ kwak gu á̱ ghwut ndyo Mali Nwuat Za̱nang A̱gwaza ka. A̱wot mi̱ di̱ yong a̱hwa, á̱ si̱ kin nyim á̱na̱nwuai na.

³¹Nang á̱niet ba nkwan ba̱ hyat Bulut a̱ni, á̱ si̱ kin ta̱m á̱ hyia̱ ma̱ng a̱gba̱ndang a̱kwak a̱son sot á̱niet nzwang A̱romawa wu[77]; nyia̱ a̱mgba̱m a̱keang Urusha̱lima ka shya̱ mi̱ jhya̱!

³²Mi̱ di̱ yong a̱hwa, a̱gba̱ndang a̱kwak a̱son á̱niet nzwang A̱romawa wu si̱ kin ntung á̱niet nzwang, mbeang a̱cha̱chet a̱yaakwak a̱son gu ba[78]. Ba̱ si̱ doot á̱ jhyung á̱kpa á̱niet ka mi̱ Urusha̱lima. Jen nang á̱niet njhya̱ ba ndi a̱gba̱ndang a̱kwak a̱son á̱niet nzwang A̱romawa wu, mbeang á̱kum á̱niet nzwang ka nchobai a̱ni, ba̱ si̱ yok tsot Bulut hu.

³³A̱jawa a̱gba̱ndang a̱kwak a̱son á̱niet nzwang A̱romawa wu si̱ ta̱bat Bulut. A̱ si̱ tyia̱ á̱ la̱p gu ma̱ng a̱nyanyang a̱feang. A̱ si̱ lyip á̱niet ba nyia̱, “A̱nyan wa lili huni, a̱wot yihwa nang gu nyia̱?”

³⁴Á̱niet bani shei si̱ huni, nang á̱si̱ bani shei si̱ hunia̱u! Nang gu nfa̱k a̱tsatsak a̱lyiat a̱ni bah, si̱ ma̱ a̱gugwong ma̱ng a̱tai a̱lyiat a̱ni, a̱ si̱ kam á̱niet nzwang ba ba̱ nat ma̱ng Bulut mi̱ nok á̱niet nzwang ba chok a̱ni.

³⁵Nang Bulut si̱ ntat a̱vwuo saai a̱ti̱tak nang á̱ mban á̱ chorop mi̱ nok hu a̱ni, sot á̱niet njhya̱ ji si̱ mbeang nyia̱ nggu a̱ka̱kpa̱t na ba̱t! A̱jawa ku si̱ yet á̱niet nzwang ba ta hwa ba̱ kyiak Bulut a̱ faat a̱zanghwan, ba̱ ka san guu!

³⁶Á̱kpa á̱niet ka si̱ tyong chung á̱ nkhwi, á̱ khwot a̱gugwong, nyia̱, “Nyi hyat gu! Nyi hyat gu!”

³⁷Nang á̱niet nzwang ba nshim nwuo ma̱ng Bulut mi̱ nok nang á̱ keang a̱ni, Bulut si̱ nyia̱ ma̱ng a̱gba̱ndang a̱kwak a̱son á̱niet nzwang A̱romawa wu, “Ke a na shim, n kaat swáng a̱lyiat ma̱ng a̱nwan?” A̱gba̱ndang a̱kwak a̱son á̱niet nzwang A̱romawa wu si̱ fa̱k a̱ga̱de. A̱ si̱ lyip gu nyia̱, “A wa lyen a̱lyem A̱helenawa ka a?

³⁸N nyia̱ a̱ni oo, nwan wa yet a̱tyu Ma̱sa̱r wu a̱ ku kwak a̱son á̱niet ba̱ ku tyia̱ zat mi̱ njen swak ji, a̱wot a si̱ nat ma̱ng á̱niet hyaai á̱niet chyikwop nyaai (4,000) mi̱ ntswa a̱yit ji a̱ni a?”

³⁹A̱jawa Bulut si̱ nwuak gu shim nyia̱, “Kaai, n gyet a̱tyu A̱yahudawa wa. Á̱ byin nung mi̱ fam a̱byin Kilikiya ma̱ a̱keang Tasut. A̱wot a̱keang kani, á̱ lyen nka koji. N naai ang, ma̱sa̱kut, yok n dyiat ma̱ng á̱kpa á̱niet kani.”

⁴⁰Nang a̱gba̱ndang a̱kwak a̱son á̱niet nzwang A̱romawa wu nshim Bulut a̱ lyiat a̱ni; a̱ si̱ doot á̱ yong da̱ a̱vwuo saai a̱ti̱tak nang á̱ mban á̱ chorop mi̱ nok hu a̱ni. A̱ si̱ ta̱ngam bwak tazwa. A̱ si̱ kam á̱niet ba, ba̱ tyia̱ nywang. Nang ba̱ ntyia̱ nywang a̱ni, Bulut si̱ lyiat ma̱ng a̱mba da̱ a̱lyem A̱yahudawa ka[79].