Read tyap Nta̱m A̱yaata̱m 23 Bible Online

Nta̱m A̱yaata̱m 23 - tyap bible

Nta̱m A̱yaata̱m 23

¹Nang Bulut nsak á̱ghyi di̱di̱r da̱ á̱niet ba ba̱ ku shya̱ ma̱ a̱gba̱ndang a̱tung sot a̱cha̱chet A̱yahudawa wu a̱ni, a̱ si̱ nyia̱ ma̱ng a̱mba, “Á̱na̱nyiuk, kuzang jen ba̱ng ba̱ tat a̱fwun, n ni̱ nwai nyia̱ a̱ka̱tuk nang fwuo nung hu na nkpaat nung a̱ni!”

²A̱jawa a̱gba̱ndang pris nang á̱ ngyei Ananiya a̱ni, si̱ tyia̱ á̱niet nzwang ba̱ yong kpa̱mkpaan ma̱ng Bulut a̱ni, si̱ lwi nggu a̱bwonu!

³Huhwa Bulut si̱ nyia̱ ma̱ a̱gba̱ndang pris wu, “A̱gwaza na lwi ang mut, nwan a̱bubuk a̱tyu shyuo a̱niet! Zang tangka̱i a̱tyu shi̱ri̱ya hwa nang a yet, a̱wot nwan ma̱ a̱pyia̱ ang a but doka nang a ntyia̱ á̱ si̱ lwi nung a̱nia a̱ni!”

⁴Á̱niet ba ba̱ yong kpa̱mkpaan ma̱ng Bulut a̱ni, si̱ nyia̱ ma̱ a̱nggu, “A̱gba̱ndang pris A̱gwaza wu wa nang a lyiat gu lihyat hu a?”

⁵A̱jawa Bulut si̱ nyia̱, “A̱ya, á̱na̱nyiuk, n dyen ka̱ a̱ yet a̱gba̱ndang pris wa bah! Mat á̱ lyuut mami A̱lyiat A̱gwaza na nyia̱, ‘Yok lyiat a̱ka̱tuk tazwa a̱tyu a̱ yet a̱gwam ang a̱ni bah.’[82] ”

⁶Nang Bulut nfi̱k nang sot jhyang ma̱ mba ngyet A̱sa̱ndukiyawa bya, a̱wot á̱ghyang si̱ yet A̱fa̱risawa bya a̱ni, a̱ si̱ yorong mba mi̱ chet nyia̱, “Á̱na̱nyiuk nung, nung n gyet a̱tyu A̱fa̱risawa wa. A̱wot ma a̱nia wa a̱yaatyia̱ khwop nung ba! Á̱ shya̱ di̱ zop nung mat nang n ntyia̱ fwuo, nyia̱ A̱gwaza na tyia̱ á̱niet ba ba̱ ka̱n kwi a̱ni, ba̱ doot mi̱ swuan!”

⁷Nang Bulut nhyia̱ a̱lyiat nani a̱ni, A̱fa̱risawa ba ma̱ng A̱sa̱ndukiyawa ba si̱ ta̱bat ya fwuang ma̱ng á̱ghyang mba. A̱tung ka si̱ ka̱n ghai a̱ nyia̱ susot sweang.

⁸Mat A̱sa̱ndukiyawa ba ni̱ tyiet nyia̱, da̱ á̱niet ba̱ ka̱n kwi a̱ni na doot ma̱ng swuan bah; da̱ a̱yaata̱m tswá A̱gwaza ku tswá nshya̱ bah. A̱wot A̱fa̱risawa ba, ba̱ nwuak a̱chuchuk di̱ nkyang nani a̱mgba̱m na ntat.

⁹Mat a̱nia, á̱kpa á̱niet ka si̱ mbeang khwot a̱gugwong hu mi̱ chet! A̱wot a̱yaagwak tyiet doká, ba̱ ku yet A̱fa̱risawa a̱ni, si̱ doot á̱ yong ba̱ si̱ ya fwuang mi̱ chet nyia̱, “Zi̱ shya̱ a̱tyu wuni ma̱ng a̱bun bah! Shimba tswa ja, ku a̱ta̱m tswa wa lyiat ma̱ng a̱nggu!”

¹⁰Nang á̱kpa á̱niet ka ngya a̱son ma̱ng fwuang ji a̱ni, jhya̱ si̱ shim doot! A̱gba̱ndang a̱kwak a̱son á̱niet nzwang wu si̱ fa̱k a̱wun ke á̱ na sam Bulut di̱ nkap! Huhwa a̱gba̱ndang a̱kwak a̱son á̱niet nzwang wu si̱ tyia̱ á̱niet nzwang ba ba̱ nat ba̱ san Bulut mbwak á̱kpa á̱niet ka, ba̱ bwuok ma̱ng a̱nggu á̱ nat ndyo mi̱ jaru ji̱ shya̱ mi̱ nok á̱niet nzwang hu a̱ni.

¹¹A̱tyetuk a̱tuk a̱kya, A̱tyoli Yesu si̱ tyai a̱pyia̱ nggu da̱ a̱vwuo Bulut. A̱ si̱ tak ma̱ng a̱nggu nyia̱, “Bulut, gbang a̱lyia̱! Ma̱nang a nshei á̱lyiat nung na mi̱ Urusha̱lima a̱ni; ma̱ a̱nia wa, ku yet ang ta hwa a shei A̱sham Nkhang nung ka ma̱ a̱keang Rom ka!”

¹²Da̱ a̱tsotson tat ka, sot A̱yahudawa jhyang si̱ tung. Ba̱ si̱ nyia̱ a̱li̱ka̱uli ma̱ng shyishyi nyia̱, da̱ ba̱ na ya kyayak ku ba̱ swuo kyang bah, si̱ nang ba̱ hyat Bulut!

¹³Á̱niet ba ba̱ ku la̱p a̱nu ka di̱ chat hyat Bulut hu a̱ni, ba̱ ku swak swak naai.

¹⁴A̱jawa ba̱ si̱ nat da̱ a̱vwuo a̱yaakwak a̱son pris ma̱ng a̱cha̱chet A̱yahudawa ba, ba̱ si̱ nyia̱ ma̱ mba a̱ni, “Zi̱ wa ka̱n nyia̱ a̱li̱ka̱uli ma̱ng shyishyi nyia̱, da̱ zi̱ na ya kyayak bah, si̱ nang zi̱ hyat Bulut.

¹⁵Mat a̱nia, zi̱ chat nyin ma̱ng sot a̱cha̱chet A̱yahudawa ji, nyi lyip a̱gba̱ndang a̱kwak a̱son á̱niet nzwang A̱romawa wu a̱ bwuok ma̱ng Bulut a̱ bai ndyo a̱ji. Nyi but nang nyi wa chat nyi bu zop a̱lyiat nggu na ma̱ a̱gba̱ndang a̱tung wu shansham a̱ni. A̱wot zi̱ wa ka̱n nyia̱ a̱li̱ka̱uli, zi̱ hyat gu di̱n vak!”

¹⁶A̱wot nggwon seam a̱ghyang ka̱ yet nggwon a̱na̱nyiuk Bulut a̱ yet a̱nap a̱ni, ka̱ si̱ fa̱k nkhang a̱ka̱shuk nang á̱ vwuoi á̱ nchat hyat Bulut a̱ni! Ka̱ si̱ nat mi̱ jaru ji. Ka̱ si̱si̱ hyia̱ ma̱ng Bulut.

¹⁷A̱jawa Bulut si̱ yorong a̱tyo nyiung ma̱ a̱yaakwak a̱son á̱niet nzwang A̱romawa ba. A̱ si̱ nyia̱ ma̱ng a̱nggu, “Kyiak nggwon seam kani, a nat ma̱ a̱nka da̱ a̱vwuo a̱gba̱ndang a̱kwak a̱son á̱niet nzwang wu. Ka̱ byia̱ a̱gba̱ndang a̱lyiat nang ka̱ na tak ma̱ng a̱nggu a̱ni.”

¹⁸A̱kwak a̱son á̱niet nzwang wu si̱ kyiak nggwon seam ka, a̱ nat ndyo da̱ a̱vwuo a̱gba̱ndang a̱kwak a̱son á̱niet nzwang wu. A̱ si̱ nyia̱, “Bulut a̱tyu a̱ shya̱ mi̱ jaru ji a̱ni, yorong nung a̱ si̱ naai nung n bai ma̱ng nggwon seam kani da̱ a̱vwuo ang. Mat ka̱ byia̱ a̱gba̱ndang a̱lyiat nang ka̱ na tak ma̱ng a̱nwan a̱ni.”

¹⁹A̱jawa a̱gba̱ndang a̱kwak a̱son á̱niet nzwang wu si̱ khwat nggwon seam ka mbwak, a̱ nat ndyo da̱ gbang a̱nyiung. A̱ si̱ lyip ka, nyia̱, “Yihwa a byia̱, na tak ma̱ng a̱nung?”

²⁰A̱jawa nggwon seam ka si̱ nyia̱ ma̱ng a̱nggu a̱ni, “A̱yahudawa á̱ghyang ka̱n da̱p á̱ sak, ba̱ naai ang a nat ma̱ng Bulut a̱zaghyi a̱gba̱ndang a̱tung sot a̱cha̱chet A̱yahudawa ba a̱tson, á ngyei ba̱ wa chat ba̱ bu zop á̱lyiat nggu na shansham wa.

²¹A̱wot yok shim ba ndyo bah! Mat, á̱niet shi á̱kpa á̱ swak nswak naai, ba̱ ya̱khwi á̱ fwuong Bulut a̱ni. Ba̱ ka̱n shyi nyia̱, da̱ ba̱ na ya kyayak ku ba̱ swuo kyang bah, si̱ nang ba̱ hyat gu. Di̱ yong huni ba̱ la̱p vam, á̱ swan á̱ fwuong ba̱ fa̱k shim ang hu.”

²²A̱jawa a̱gba̱ndang a̱kwak a̱son á̱niet nzwang wu si̱ gba nggwon seam ka, nyia̱, “Yok ghwon a̱yin a̱ lyen nang a ka̱n tak ma̱ng a̱nung nkhang nani bah.”

²³A̱jawa a̱gba̱ndang a̱kwak a̱son á̱niet nzwang wu si̱ yorong a̱yaakwak a̱son á̱niet nzwang a̱feang nggu ba. A̱ si̱ ta̱m ba, nyia̱, “Nyi tyia̱ á̱niet nzwang chyi sweang ba̱ la̱p vam, ba̱ nat a̱keang Kaisa̱riya tswam a̱kubunyiung a̱tyetuk a̱fwun. Nyi bu kyiak á̱niet nzwang chyi sweang ba̱ ba̱ng zwáng a̱ni, ma̱ng á̱niet nzwang swak a̱natat ba̱ ban tsaaí a̱ni.

²⁴Nyi chat tsaaí nyi nwuak Bulut gu nyeak. Nyi nat ma̱ng a̱nggu ka̱nka̱ra̱ng da̱ a̱vwuo Gwomna Filikut.”

²⁵A̱wot a̱gba̱ndang a̱kwak a̱son á̱niet nzwang wu si̱ lyuut Gwomna Filikut wusika jini, nyia̱,

²⁶“Wusika jini neet da̱ a̱vwuo Ka̱la̱udiyat Lisiyat, naat da̱ a̱vwuo a̱gba̱ndang A̱gwam Filikut: Shyichet ang ku labeang!

²⁷“A̱tyu wuni, A̱yahudawa á̱ghyang ku ta̱bat guu. A̱wot ba̱ si̱ chat hyat gu. Jen a̱jaja n si̱ mbai ma̱ng á̱niet nzwang ba. A̱wot nang n fi̱k nyia̱ a̱ yet nggwon a̱byin A̱romawa kya a̱ni, huhwa si̱ mbyia̱ n si̱ nsan nggu ghwon.

²⁸A̱jawa n si̱ nat ma̱ng a̱nggu da̱ a̱vwuo a̱gba̱ndang a̱tung sot a̱cha̱chet A̱yahudawa ka, da̱nian n ka nkwan n zop a̱hyiak nang ba̱ bat gu a̱ni.

²⁹Á̱ si̱ labeang bah, n si̱ nfi̱k nang a̱hyiak nang ba̱ bat gu a̱ni, na̱ shya̱ tazwa doká khwi A̱gwaza mba jija. A̱wot ku tat kyang nang á̱ na nnyim gu mi̱ jaru, ku á̱ hyat gu a̱ni bah.

³⁰“Jen nang á̱ nhyia̱ ma̱ a̱nung, nyia̱ A̱yahudawa á̱ghyang la̱p a̱shuk ba̱ chat ba̱ hyat Bulut a̱ni. Huhwa, n si̱ ndi ku myim n ta̱m ma̱ng a̱nggu da̱ a̱vwuo ang di̱ mi̱ byian jen. N ka̱n tak ma̱ á̱niet ba̱ bat gu a̱hyiak na a̱ni, ba̱ bai ba̱ tak a̱bun nggu wu a̱zaghyi ang.”

³¹A̱jawa á̱niet nzwang ba, ma̱nang á̱ kam ba a̱ni, ba̱ si̱ kyiak Bulut a̱tyetuk a̱kya, á̱ nat ndyo ma̱ a̱keang A̱nti̱bati̱ri̱t ka.

³²Da̱ a̱tsotson tat ka, á̱niet nzwang ba ba̱ ku chong a̱byin ka ma̱ng Bulut ba̱ si̱ nat ndyo A̱nti̱bati̱ri̱t wu a̱ni; ba̱ si̱ bwuok á̱ bai mi̱ nok á̱niet nzwang hu. Ba̱ si̱ ghwon á̱niet nzwang ba, ba̱ ban tsaaí ji a̱ni. Ba̱ si̱ ya a̱son da̱ a̱chyet ka ma̱ng Bulut.

³³Nang ba̱ si̱ nnwuo a̱keang Kaisa̱riya ka a̱ni, ba̱ si̱ nwuak Gwomna Filikut wusika ji. A̱wot ba̱ si̱ tyia̱ Bulut mbwak gu.

³⁴Nang gwomna Filikut nfang wusika ji a̱ni, a̱ si̱ lyip Bulut nyia̱, “Zang fam a̱byin hwa nang a nghwut?” Bulut si̱ nwuak gu shim nyia̱, “N ghwut mi̱ fam a̱byin Kilikiya hwa.”

³⁵Gwomna Filikut si̱ nyia̱ ma̱ng Bulut, “N na myiai a̱fufwuo n fa̱k kyang hu nang a nyia̱ a̱ni di̱n jen nang a̱niet ba̱ bat ang a̱hyiak na mbai a̱ni.” A̱jawa gwomna wu si̱ tyia̱ á̱ nyim Bulut mi̱ jaru Ma a̱gwam Hiridut ka. A̱wot á̱niet nzwang ba ba̱ cham gu.