Read tyap Nta̱m A̱yaata̱m 24 Bible Online

Nta̱m A̱yaata̱m 24 - tyap bible

Nta̱m A̱yaata̱m 24

¹Nang mam fwuon nswak a̱ni, Ananiya, a̱gba̱ndang pris wu si̱ nat Kaisa̱riya dundung ma̱ng a̱cha̱chet A̱yahudawa á̱ghyang, mbeang a̱gwak a̱tyu lyen doká a̱byin nang á̱ ku ngyei Tartulut a̱ni. Ba̱ si̱ fang nkyang nang ba̱ mbat Bulut a̱hyiak na a̱ni a̱zaghyi gwomna ka.

²Nang á̱ ngyorong Bulut gu nwuo mi̱ tutu zop a̱lyiat hu a̱ni, Tartulut si̱ fang nkyang nang á̱ mbat Bulut a̱hyiak na a̱ni a̱zaghyi gwomna Filikut: “A̱gwam, swuan ang ji labeang! Mumwang ang hwa mbyia̱ nang á̱ nkyiak a̱junjung jen nang nzi̱t A̱yahudawa ba mbyia̱ swat nyinyang. A̱wot lyen nwuan á̱zanson ang hwa bai ma̱ng a̱nzi̱t ya a̱son hu ma̱ a̱byin kani.

³Gwomna, swuan ang ji labeang, mat a̱mgba̱m nkyang nani, zi̱ gwai ang ba̱t.

⁴A̱wot n chat n tyia̱ ang ndyem bah. Ma̱sa̱kut, n naai ang a myiai a̱fufwuo a fa̱k kyang hu n na nta̱gyit ang dyo a̱ni.

⁵“Zi̱ ku zop, zi̱ si̱ shya̱ nang a̱tyu wuni ngyet a̱tyu fuut jhya̱ wa kuzang jen mami a̱mgba̱m A̱yahudawa ba̱ shya̱ mi̱ swanta hu a̱ni! A̱wot nggu wa bu yet a̱kwak a̱son a̱ka̱tuk nsot á̱niet nang á̱ ngyei A̱na̱za̱rawa ba a̱ni.

⁶Kyang ghyang nang gu bu nyia̱ a̱ni, huhwa yet; a̱ ku kwan a̱ tyia̱ A̱li Nwuat Za̱nang A̱gwaza ka a̱na̱ndyung. A̱wot zi̱ si̱ ta̱bat guu.[83]

⁸Nwan gwomna, ka a zop Bulut ma̱ a̱pyia̱ ang, a na shya̱ a̱tsatsak a̱lyiat wu da̱ a̱vwuo nggu, di̱ nkyang nang zi̱ mbat gu a̱hyiak na a̱ni.”

⁹A̱jawa A̱yahudawa á̱ghyang meang si̱ kin di̱n a̱ma di̱ kuzang kyang nang Tartulut mbat Bulut a̱hyiak na a̱ni, nyia̱ na̱ yet a̱tsatsak a̱lyiat wa.

¹⁰Nang gwomna Filikut nwuak Bulut jen gu lyiat a̱ni, Bulut si̱ nyia̱, “Gwomna, swuan ang ji labeang! N dyen nang a ka̱n nyia̱ tyok a̱byin A̱yahudawa hu mi̱ ndyia̱ ma̱ a̱di̱di̱t. Mat a̱nia, n byia̱ a̱lyia̱ sai n kwok ang ta̱fwat nang n byia̱ tazwa á̱lyiat nani a̱ni.

¹¹“Nwan, ma̱ a̱pyia̱ ang, ka̱ a zop a na fi̱k nang n ka̱n swak mam swak ma̱ a̱feang bah, nang n ku nat Urusha̱lima da̱nian n ka nwuo A̱mali Nwuat Za̱nang A̱gwaza ka, n ka kyuak ntong a̱zaghyi A̱gwaza a̱ja.

¹²A̱yahudawa ba ba̱ bat nung a̱hyiak na a̱ni, ba̱ ku shya̱ nung nang n gya fwuang ma̱ng a̱yin A̱mali Nwuat Za̱nang A̱gwaza ka bah. Da̱ mba, ba̱ ku shya̱ nang n tung a̱niet da̱nian n ka fuut jhya̱ mi̱ tutu a̱tung A̱yahudawa hu mbeang nvak njhyang mami a̱keang Urusha̱lima ka bah.

¹³Á̱niet bani ba̱ bat nung a̱hyiak na a̱ni, ba̱ si̱ mi̱n tak ma̱ng a̱nwan chi̱k nang a̱hyiak ba̱ bat nung a̱ni, yet a̱tsatsak a̱lyiat wa bah.

¹⁴“A̱mgba̱m ma̱ng a̱nia, n si̱ shim nang n gyet a̱tyu khwi mi̱ susot á̱niet khwi Yesu nang á̱ bu ngyei ‘Vak hu’ a̱ni[84]. A̱wot nang A̱yahudawa bani ngyei sot á̱niet khwi tyiet teap di̱ khwi taada mba ji. N si̱ kwok ntong a̱zaghyi A̱gwaza a̱yaatyia̱ khwop nzi̱t wu. A̱wot n nwuak a̱chuchuk za̱m di̱ doka A̱yahudawa ji ma̱ng kuzang a̱lyiat nang a̱yaata̱m a̱kwonu A̱gwaza ba lyuut a̱ni.

¹⁵N tyia̱ fwuo da̱ A̱gwaza, ma̱nang á̱niet bani ntyia̱ fwuo a̱ni, nyia̱ A̱gwaza na ta̱ngam á̱tsotswat á̱niet ba ma̱ng a̱si̱ ba̱ nwai yet á̱tsotswat a̱ni, ma̱ng swuan ma̱ á̱niet ba̱ ka̱n kwi a̱ni.

¹⁶Huhwa mbyia̱, kuzang jen n ni̱ nkwan n nwai nyia̱ a̱ka̱tuk nang fwuo nung hu na nkpaat nung a̱ni, a̱zaghyi A̱gwaza ma̱ng a̱mgba̱m á̱niet ba.

¹⁷“Nang ndyia̱ ma̱ a̱di̱di̱t nswak a̱ni, n si̱ mbwuok mbai Urusha̱lima ma̱ng kurum, da̱nian n ka mbeang á̱niet nung ba, a̱wot n neap za̱nang a̱zaghyi A̱gwaza.

¹⁸Jen nang n shya̱ di̱ kwi a̱na̱ndyung A̱mali Nwuat Za̱nang A̱gwaza ka a̱ni; huhwa á̱niet ba̱ bat nung a̱hyiak na a̱ni, si̱ ndi nung. Á̱kpa á̱niet ku shya̱ ndung ma̱ng a̱nung bah. Da̱ nung, n ku ntyia̱ jhya̱ bah.

¹⁹“A̱mgba̱m ma̱ng a̱nia, A̱yahudawa á̱ghyang ba̱ ku neet mi̱ fam a̱byin A̱siya a̱ni ku shya̱ a̱ja. Bibya myim ba̱ shya̱ a̱ji. Ka̱ ba̱ byia̱ kyang nang ba̱ mbat nung a̱hyiak na a̱ni, si̱ ba̱ bai ndyo!

²⁰Kalak a lyip á̱niet bani ba̱ yong a̱ji a̱ni, ba̱ tak ma̱ng a̱nwan a̱bun wu nang a̱gba̱ndang a̱tung sot a̱cha̱chet A̱yahudawa ba ku shya̱ da̱ nung a̱ni.

²¹A̱mgba̱m ma̱ng a̱nia, kyang nyiung hwa nang ndyen nang n ku nhyia̱ mi̱ chet di̱n jen nang n ku ngyong a̱zaghyi mba ka a̱ni: ‘Á̱ zop nung a̱zaghyi ang a̱fwun, mat n nwuak a̱chuchuk nyia̱, A̱gwaza na ta̱ngam á̱niet ba̱ ka̱n kwi a̱ni, ma̱ng swuan!’ ”

²²A̱jawa gwomna Filikut a̱ ku lyen nkhang susot á̱niet khwi Yesu nang á̱ bu ngyei “Vak hu” a̱ni[85] shansham, a̱ si̱ shyei a̱lyiat na a̱tuk a̱kya a̱ nat ndyo á̱zanson. A̱ si̱ nyia̱, “Nyi fwuong, ka̱ Lisiyat a̱gba̱ndang a̱kwak a̱son á̱niet nzwang chyikwop wu bai, n na nfaat shi̱ri̱ya nyin ji.”

²³Gwomna Filikut si̱ tyia̱ a̱tyu a̱ cham Bulut a̱ni, gu bwuok ma̱ng Bulut a̱ nat ndyo mi̱ jaru ji. A̱wot gu nwuak á̱kpa̱ndang Bulut ba a̱wat ba̱ chong á̱ byat gu, ba̱ bu beang guu.

²⁴Á̱ si̱ bwuo mam ma̱ chunchwiit, gwomna Filikut si̱ bwuok a̱ bai mbeang a̱kyuo nggu wu, Durusila. A̱ ku yet a̱nap A̱yahudawa wa. Ba̱ si̱ ta̱m á̱ yorong Bulut gu bai. A̱wot ba̱ si̱ myiai a̱fufwuo á̱ fwuong nang Bulut lyiat tazwa nwuak fwuo di̱ Kristi Yesu.

²⁵Nang Bulut ndyiat tazwa nyia̱ tsotswat, ta̱bat á̱pyia̱ ma̱ng mam shi̱ri̱ya A̱gwaza ku chobai a̱ni, huhwa gwomna Filikut si̱ kin fa̱k a̱wun! A̱ si̱ nyia̱, “Kwot, Bulut, ya ngyok a̱nia! N bu na ngyorong ang a bai, ka̱ n shya̱ jen.”

²⁶Di̱n jen a̱ja, gwomna Filikut si̱ fa Bulut na nwuak gu kurum di̱ chat beang. A̱nia wa si̱ mbyia̱, a̱ si̱ yong mi̱ di̱ yei Bulut kuzang jen a̱ bwoi nkhang ma̱ng a̱nggu.

²⁷Nang a̱lyia̱ a̱feang nswak a̱ni, Borkiyat Festut si̱ shai gwomna Filikut mi̱ tyok hu. A̱wot Filikut si̱ chat A̱yahudawa ba, ba̱ fa̱k shok gu. Mat a̱nia, a̱ si̱ kai Bulut a̱ ghwon mi̱ jaru ji.