Read tyap Nta̱m A̱yaata̱m 27 Bible Online

Nta̱m A̱yaata̱m 27 - tyap bible

Nta̱m A̱yaata̱m 27

¹Nang jen nnyia̱[91], nang zi̱ na nnwuo kukwon a̱wak, zi̱ wak nat Italiya a̱ni, á̱ si̱ tyia̱ Bulut ma̱ng á̱khwo á̱ghyang mbwak a̱kwak a̱son á̱niet nzwang chyi A̱romawa, nang á̱ ngyei Juliyot a̱ni. A̱ ku yet a̱tyo nyiung mami a̱yaakwak a̱son sot á̱niet nzwang Kaisar a̱gwam shan ba.

²Ari̱sta̱kut, a̱ ku neet ma̱ a̱keang Ta̱solonika mi̱ fam a̱byin Ma̱kidoniya a̱ni, ku shya̱ dundung ma̱ng a̱nzi̱t. Zi̱ si̱ nwuo kukwon a̱wak ghyang ku neet A̱da̱ra̱mitiya a̱ni. Ku na doot, ku nat a̱ka̱keang da̱ a̱beam kyai a̱sa̱khwot na̱ hyia̱k fam a̱byin A̱siya. A̱wot zi̱ si̱ wak nat, zi̱ si̱ ya a̱son ma̱ng a̱chyet.

³Da̱ a̱tsotson tat ka, zi̱ si̱ chyok zi̱ si̱ nwuo a̱keang Sidon. Juliyot si̱ fa̱k shok Bulut ba̱t. A̱ si̱ ghwon Bulut a̱ nat a̱ byiat á̱kpa̱ndang gu ba, da̱nian ba̱ ka beang nggu ma̱ng kyang nang gu chat a̱ni.

⁴Nang zi̱ ndoot ma̱ a̱keang Sidon ka mi̱ kukwon a̱wak hu a̱ni, zi̱ si̱ wak swak di̱ fam a̱za, da̱ a̱beam ma̱ a̱byin a̱ka̱wa̱tyia̱ a̱sa̱khwot Kuburut. Mat wun hu ku hyap kukwon a̱wak nzi̱t hu mi̱ chet a̱ bwuot ndyo lilyim.

⁵Zi̱ si̱ wak hyia̱k kyai a̱sa̱khwot ku shya̱ kpa̱mkpaan ma̱ng nfam bibyin Kilikiya mbeang Ba̱mfiliya a̱ni. Zi̱ si̱si̱ chyok ma̱ a̱keang Mira, mi̱ fam a̱byin Likiya.

⁶A̱ja wa nang Juliyot, a̱kwak a̱son á̱niet nzwang A̱romawa wu, si̱ shya̱ kukwon a̱wak ku neet Ali̱ksa̱nda̱riya ma̱ a̱byin Ma̱sa̱r, a̱ naat ma̱ a̱byin Italiya a̱ni. A̱wot a̱ si̱ ntyia̱ nzi̱t.

⁷Zi̱ si̱ bwuo mam ma̱ a̱di̱di̱t nang zi̱ wak ma̱ shonshyon. Zi̱ tyuu tutyuu. Zi̱ si̱ tat kpa̱mkpaan ma̱ng a̱keang Kinidut. A̱wot nang wun hu nvwong nzi̱t a̱chyet ka a̱ni, ku si̱ hyap zi̱t a̱ bwuot ndyo lilyim. Zi̱ si̱ wak á̱ byia̱k a̱byin a̱ka̱wa̱tyia̱ a̱sa̱khwot Ka̱rita. Zi̱ si̱ swak ghwon a̱fi̱fap a̱byin wu nang á̱ ngyei Sa̱lmoni a̱ni. Zi̱ si̱ bwuak a̱ma̱nta Ka̱rita, da̱ a̱beam khwong nang wun hu bu ni̱ nhyap mi̱ chet a̱ni bah.

⁸Zi̱ si̱ wak da̱ a̱beam khwong a̱sa̱khwot tyuu tutyuu. Di̱ ngaan hu, zi̱ si̱ tat a̱vwuo yong ma̱ng ta̱kup a̱kukwon a̱wak ghyang nang á̱ ngyei “A̱vwuo Chok A̱kukwon A̱wak”, kpa̱mkpaan ma̱ng a̱keang Lisiya.

⁹Nang zi̱ mbyian jen ba̱t a̱ja a̱ni, a̱wot a̱vwuo ka si̱ yet kyang a̱wun á̱ nyia̱ a̱chyet mi̱ kyai a̱sa̱khwot, mat nang jen A̱yet Chi A̱ka̱tuk Nyia̱ A̱yahudawa wu[92] swak; a̱jawa Bulut si̱ gba á̱niet luk kukwon a̱wak ba nyia̱,

¹⁰“Á̱kpa̱ndang a̱chyet, n nwuak a̱chuchuk zi̱ na swuo a̱bung ka̱ zi̱ ya a̱son ma̱ a̱chyet nzi̱t ka. Kukwon a̱wak hu, nkpa̱t nzi̱t na, mbeang swuan nzi̱t ji; zi̱ na lyin na!”

¹¹A̱mgba̱m ma̱ng a̱nia, a̱tyu a̱ chok á̱khwo ba a̱ni, si̱ shim á̱lyiat Bulut na bah. A̱ si̱ khwi á̱lyiat a̱tyu luk kukwon a̱wak ma̱ng a̱tyu byia̱ kukwon a̱wak wu.

¹²A̱wot nang A̱vwuo Chok A̱kukwon A̱wak ka ngyet a̱vwuo yong a̱ka̱kwon ka̱ shya̱ nta nang za ma̱ng wun hyap ba̱t a̱ni, a̱wot nang á̱ si̱ mi̱n gya seam a̱ja a̱ni bah; huhwa si̱ mbyia̱ a̱lyiak a̱niet ma̱ á̱kpa̱ndang chyet Bulut ba, si̱ li̱n a̱ma á̱ ya a̱son á̱ nat ma̱ a̱keang Fi̱ni̱kiya, ba̱ swak á̱ nat Ka̱rita, ba̱ ya seam hu a̱ja. Fi̱ni̱kiya ku yet a̱tan a̱chya̱ yong a̱kukwon a̱wak a̱ swan a̱ nwuan fam a̱tak jenshyung, ma̱ng fam a̱za jenshyung.

¹³Jen nang wun a̱tak hu nnwuo hyap ma̱ shonshyon a̱ni, á̱niet luk kukwon a̱wak ba si̱ fa, ba̱ na wak á̱ byia̱k. Huhwa ba̱ si̱ khwat a̱kpa̱p ntswam wu a̱ na ba̱ng kukwon a̱wak hu di̱n tyan jhyung a̱ni, ba̱ si̱ luk kukwon a̱wak hu á̱ nat ndyo kpa̱mkpaan ma̱ng khwong a̱byin ma̱ ka̱wa̱tyia̱ a̱sa̱khwot Ka̱rita hu.

¹⁴A̱wot á̱ si̱ labeang bah, a̱gba̱ndang wun za nang á̱ ngyei Horikin a̱ni, si̱ hyap a̱ neet a̱za hyia̱k a̱tyin. Ku si̱ ta̱gak Ka̱rita, ku si̱ hyap zi̱t a̱ nat ndyo ma̱ ka̱wa̱tyia̱ kyai a̱sa̱khwot hu.

¹⁵Nang kukwon a̱wak hu nkaat a̱niet luk ba ba̱ bwuak hu ku khwi wun hu a̱ni, ba̱ si̱ nti̱n fwuo. Ba̱ si̱ kai hu á̱ ghwon, ku si̱ khwi wun za hu.

¹⁶Nang zi̱ nkai a̱beam a̱bada̱dei a̱byin a̱ka̱wa̱tyia̱ a̱sa̱khwot a̱ghyang nang á̱ ngyei Ka̱uda a̱ni. A̱ja wa zi̱ si̱ bu tyuu zi̱ khwat a̱bada̱dei kukwon a̱wak ka bai ndyo tazwa, zi̱ ka nda̱p tazwa a̱gba̱ndang kukwon a̱wak ka.

¹⁷A̱jawa á̱niet luk kukwon a̱wak ba si̱ vwuoi ywan á̱ kaat a̱gba̱ndang kukwon a̱wak wu mi̱ chet. Ba̱ ku fa̱k a̱wun, ke ba̱ si̱ kwa tazwa a̱kuu a̱ji̱jak ka̱ shya̱ ti̱taa ma̱ a̱keang Satis kpa̱mkpaan ma̱ng a̱byin Li̱biya a̱ni. Huhwa ba̱ si̱ laai chyok ma̱ng a̱kpa̱p ntswam wu. Ba̱ si̱ ghyuai chung kukwon a̱wak ji. A̱wot ba̱ si̱ wak á̱ khwi wun za hu.

¹⁸Da̱ a̱tsotson tat ka, nang a̱ka̱tuk ngwun za byia̱ chet wu ngya a̱son mi̱ hyap kukwon a̱wak hu a̱ni, á̱niet luk kukwon a̱wak ba si̱ nwuo kwok nkpa̱t mba na á̱ weam ma̱ a̱sa̱khwot.

¹⁹A̱wot a̱tuk mam tat ka, ba̱ si̱ bwuo nkyang nta̱m kukwon a̱wak jhyang nang ba̱ byia̱ a̱ni, ba̱ si̱ weam ma̱ á̱pyia̱ mba.

²⁰Zi̱ si̱ bwuo mam ma̱ a̱di̱di̱t; da̱ nzi̱t, zi̱ li a̱nu mam ma̱ng á̱ta̱ngwat bah. A̱wot a̱ka̱tuk ngwun za wu si̱ ya a̱son mi̱ hyap mi̱ chet ba̱t! Zi̱ si̱ kin but mi̱ fwuo nyia̱ zi̱ na yet a̱chet.

²¹Nang á̱niet mi̱ kukwon a̱wak ba mbwuo mam ba̱t da̱ mi̱n ya kyayak a̱ni, a̱jawa Bulut si̱ doot a̱ yong a̱ka̱wa̱tyia̱ mba. A̱ si̱ nyia̱ ma̱ mba a̱ni, “Nyin á̱kpa̱ndang chyet nung ba, ka̱ nyi wa ku myiai a̱fufwuo nyi si̱ fa̱k kyang hu nang n dyiat a̱ni, si̱ zi̱ ku doot a̱chyet kani neet Ka̱rita bah. Huhwa mbyia̱ nang nkyang ma̱ a̱di̱di̱t mbyian a̱wot zi̱ si̱ nwai njhyang.

²²A̱wot ma̱ninika, nyi gbang a̱lyia̱! A̱yin na lyin swuan gu ma̱ nyin bah. Mi̱ kukwon a̱wak huhwa ma̱nyin hu zi̱ na nwai.

²³Mat a̱tyetuk shunshyung, A̱gwaza nang n kwok nggu tong a̱ni ku ta̱m a̱ta̱m tswa nggu wu si̱ bai da̱ a̱vwuo nung.

²⁴“A̱ si̱ nyia̱, ‘Bulut, yok fa̱k a̱wun bah! Ku yet ta hwa a yong a̱zaghyi Kaisar a̱gwam shan, a̱ nyia̱ ang shi̱ri̱ya! A̱wot A̱gwaza, mat shok nggu ji, wa ka̱n tyia̱ a̱mgba̱m swuán a̱niet nang nyi wak dundung ma̱ng a̱mba a̱ni, si̱ shot.’

²⁵“Mat a̱nia, nyin á̱kpa̱ndang a̱chyet nung ba, nyi gbang a̱lyia̱! Mat n nwuak fwuo da̱ A̱gwaza. A̱lyiat na nang gu tak nung a̱ni, na bai da̱ a̱nu ka!

²⁶A̱mgba̱m ma̱ng a̱nia, kukwon a̱wak nzi̱t hu na fwuoi. A̱wot á̱ na wak ma̱ng a̱nzi̱t, á̱ si̱ koot di̱ nfang ma̱ a̱byin a̱ka̱wa̱tyia̱ a̱sa̱khwot a̱ghyang.”

²⁷Ma̱ a̱tyia̱ka̱u a̱tyetuk ka̱ ku yet swak ma̱ naai, nang wun za hu ndoot hyap a̱ni, nang zi̱ shya̱ da̱ wak zi̱ byia̱k kyai a̱sa̱khwot A̱dariya hu. Á̱niet luk kukwon a̱wak ba si̱ fi̱k nang zi̱ tat kpa̱mkpaan ma̱ng a̱byin.

²⁸A̱jawa ba̱ si̱ mak shi tsuung a̱sa̱khwot hu. Ba̱ si̱ shya̱ nang shi tsuung hu yet a̱ka̱tyong rula chyi ma̱ng swak nfeang. Zi̱ si̱ bu ya a̱son ma̱ng a̱wak ma̱ chunchwiit. Á̱niet luk kukwon a̱wak ba si̱ bu mak shi tsuung a̱sa̱khwot hu. Ba̱ si̱ shya̱ nang na̱ yet a̱ka̱tyong rula nswak a̱kubunyiung.

²⁹Ba̱ ku fa̱k a̱wun ke ba̱ na ma di̱ nfang na̱ shya̱ di̱ khwong a̱ni. Huhwa si̱ mbyia̱ ba̱ si̱ koot a̱yaakpa̱p ntswam a̱naai a̱ma̱lyim kukwon a̱wak hu. Ba̱ si̱ naai A̱gwaza a̱tsotson ka ka̱ tat!

³⁰A̱jawa á̱niet luk kukwon a̱wak ba si̱ kwan ba̱ tyong á̱ ghwut ma̱ a̱gba̱ndang kukwon a̱wak wu. Ba̱ si̱ chyok ma̱ng a̱bada̱dei kukwon a̱wak ka á̱ mat ma̱ a̱sa̱khwot na. Ba̱ si̱ ta̱bat nyia̱ mumwang á ngyei ba̱ chat chyok ma̱ng a̱yaakpa̱p ntswam bya a̱zanson a̱gba̱ndang kukwon a̱wak ka.

³¹A̱jawa Bulut si̱ hyia̱ ma̱ng a̱kwak a̱son á̱niet nzwang wu ma̱ng á̱kum á̱niet nzwang ka nyia̱, “Ka̱ a̱niet luk kukwon a̱wak bani ghwut, ba̱ si̱ ghwon kukwon a̱wak huni, a̱mgba̱m nyin na shot bah. Nyi na kwi!”

³²A̱jawa á̱niet nzwang ba si̱ kin faat ywan hu ku ba̱ng a̱bada̱dei kukwon a̱wak ka a̱ni a̱ tyat! A̱sa̱khwot na si̱ nkat ma̱ng a̱bada̱dei kukwon a̱wak ka.

³³Nang a̱tsotson nshim tat a̱ni, Bulut si̱ naai a̱mgba̱m á̱niet ba, ba̱ ya kyayak. A̱ si̱ nyia̱, “Nyi bwuo mam swak ma̱ naai nia na nang nyi nyia̱ a̱fi̱fa, da̱ nyin nyi niaat kyayak bah.

³⁴Ma̱ninika, n naai nyin, ma̱sa̱kut, nyi ya kyayak, nyi ka tyia̱ chet. Mat á̱ mbyia̱ a̱yin ma̱ nyin a̱ na lyin a̱chat a̱pyia̱ nggu a̱ni bah!”

³⁵Nang Bulut n hyia̱ a̱nia a̱ni, a̱ si̱ kyiak burodi, a̱ si̱ gwai A̱gwaza a̱zaghyi mba. A̱ si̱ bwuo burodi wu, a̱ si̱ ya.

³⁶A̱jawa konyan ma̱ mba si̱ gbang a̱lyia̱. A̱wot ba̱ si̱ ya kyayak hu.

³⁷A̱mgba̱m nzi̱t, zi̱ ku yet á̱niet chyi sweang ma̱ng swak a̱natat ma̱ a̱taa bya (276) mi̱ kukwon a̱wak hu!

³⁸Nang konyan ngya kyayak hu a̱ si̱ swa a̱ni, a̱jawa a̱niet luk kukwon a̱wak ba si̱ ghyuai nkpa̱t na mi̱ kukwon a̱wak hu, da̱nian ku ka tyia̱ hyohyoot. Huhwa ba̱ si̱ kwok a̱yaashasha a̱lka̱ma nang ba̱ pyia̱t mi̱ kukwon a̱wak hu a̱ni, ba̱ si̱ weam ma̱ a̱sa̱khwot na.

³⁹Nang a̱tsotson ntat a̱ni, á̱niet luk kukwon a̱wak ba si̱ fi̱k a̱byin ka ba̱ nshya̱ a̱ni bah. A̱wot ba̱ si̱ li a̱ghwop a̱ghyang ka̱ byia̱ a̱ji̱jak. Ba̱ si̱ kwan ba̱ li nang ba̱ luk kukwon a̱wak hu, á̱ nat ndyo ma̱ a̱ji̱jak ba.

⁴⁰Nang ku ndi a̱nia a̱ni, ba̱ si̱ chak ywan hu ku ba̱ng a̱yaakpa̱p ntswam ba a̱ni, ba̱ si̱ ghwon mba mami kyai a̱sa̱khwot hu. Ma a̱nia wa, ba̱ si̱ byii̱k ywan hu nang ba̱ nvwoi a̱kpa̱kpai nkwon luk kukwon a̱wak hu a̱ni. A̱wot ba̱ si̱ ta̱ngam a̱gba̱ndang tyiang a̱toot a̱ shya̱ a̱zanson kukwon a̱wak hu a̱ni. Da̱nian wun ku ka hyap kukwon a̱wak hu a̱ tyia̱ ndyo a̱zanson, ku ka si̱ yong mi̱ gak a̱sa̱khwot hu.

⁴¹A̱mgba̱m ma̱ng a̱nia, kukwon a̱wak hu si̱si̱ ma ma̱ng a̱gba̱ndang a̱kuu a̱ji̱jak mami a̱sa̱khwot ka ma a̱nggang! A̱fa kukwon a̱wak ka si̱ khwat a̱byin! Kukwon a̱wak hu si̱ kin feap ma̱ a̱ji̱jak ba! Ku si̱ bwuok a̱ yong chi̱k, nang a̱gbi̱gba̱k ma̱ng ywan a̱sa̱khwot hu ya a̱son á̱ chong á̱ si̱ mang a̱ma̱nta kukwon a̱wak hu mi̱ chet, mat wun hu ku hyap a̱ni! Kukwon a̱wak hu si̱ nwuo sam di̱ tityak!

⁴²Á̱niet nzwang ba ku chat na̱ hyaai a̱mgba̱m á̱khwo ba, kalak ba̱ du wak á̱ byia̱k, a̱wot ba̱ tyong á̱ shot.

⁴³A̱mgba̱m ma̱ng a̱nia, a̱kwak a̱son á̱niet nzwang wu, si̱ chat a̱ san swuan Bulut ji. Huhwa si̱ mbyia̱, a̱ si̱ vwuong á̱niet nzwang ba hyaai á̱khwo ba. A̱jawa a̱kwak a̱son á̱niet nzwang wu si̱ tyia̱ a̱mgba̱m á̱niet ba̱ lyen a̱wak a̱ni, ba̱ tsa fi̱ri̱p á̱ kwa̱i ma̱ a̱sa̱khwot na. Ba̱ wak á̱ byia̱k á̱ nat mi̱ khwong hu.

⁴⁴A̱wot á̱kum á̱niet ka si̱ ya̱baat á̱ka̱tako na, ku a̱ya̱yaat nkyang kukwon a̱wak wu. Mat a̱nia, konyan si̱ shot, ba̱ si̱ byia̱k kyai a̱sa̱khwot hu ka̱nka̱ra̱ng!