Read tyap Nta̱m A̱yaata̱m 6 Bible Online

Nta̱m A̱yaata̱m 6 - tyap bible

Nta̱m A̱yaata̱m 6

¹A̱wot nang sot á̱niet khwi ji mban á̱kpa ka ma a̱nggang mat nang á̱niet a̱fai nnwuai khwi A̱tyoli Yesu a̱ni; a̱jawa nang A̱yahudawa ba ba̱ ku fwuong a̱lyem A̱helenawa ka a̱ni, si̱ nwuo kwop a̱dyii̱ng di̱ si̱sak nang A̱yahudawa ba ba̱ fwuong a̱lyem A̱ra̱mik ka, ndak ka̱u á̱nyiuk mba ba nang á̱tyok ba ka̱n kwi a̱ni nkyayak kuzang a̱tuk.

²Huhwa a̱yaata̱m swak ma̱ a̱feang Yesu ba si̱ nyia̱ a̱tung ma̱ng a̱mgba̱m á̱niet khwi ba. Ba̱ si̱ nyia̱ ma̱ng a̱mba, “Ku myim zi̱ kai ta̱m tyiet A̱lyiat A̱gwaza hu ghwon zi̱ nwuo ka̱u nkyayak bah.

³Mat a̱nia, á̱na̱nyiuk nzi̱t ba, ku myim nyi khai á̱niet a̱natat mami nyin, nang á̱ chyin, ba̱ si̱ bu byia̱ A̱za̱za̱rak Ntswa ma̱ng mumwang a̱ni. Bibya zi̱ na jong mba ta̱m huni.

⁴A̱wot nzi̱t, a̱yaata̱m Yesu ba, zi̱ na nwuak á̱pyia̱ nzi̱t zi̱ ya a̱son ma̱ng nta̱m naai A̱gwaza, ma̱ng tyiet a̱lyiat A̱gwaza na.”

⁵A̱mgba̱m mba ma̱ tung ka, konyan si̱ shim a̱lyiat a̱yaata̱m Yesu na. A̱wot ba̱ si̱ khai á̱niet bani: Itifanut (a̱tyu a̱ yong mi̱ chet ba̱t di̱ nwuak fwuo di̱ Yesu, a̱wot A̱za̱za̱rak Ntswa wu si̱ nyia̱ nta̱m da̱ nggu mi̱ chet a̱ni), mbeang Filibut, Burokorat, Nikanar, Timon, Ba̱rminat, ma̱ng Nikolat a̱tyu Antakiya (a̱ ku ya ntsa nwuo khwi A̱gwaza A̱yahudawa a̱ni).

⁶Á̱niet a̱natat bani bya nang á̱ ku neap a̱yaata̱m Yesu ba. Ba̱ si̱ naai A̱gwaza da̱nian mbaa. Ba̱ si̱ saai mba mbwak.

⁷Huhwa a̱lyiat A̱gwaza na si̱ mbeang ya a̱son hu. Á̱kpa á̱niet khwi A̱gwaza ka si̱ mbeang ba̱t mi̱ Urusha̱lima. A̱wot a̱yaapris A̱yahudawa ma̱ a̱di̱di̱t meang si̱ bwuak, ba̱ si̱ nwuo khwi A̱tyoli Yesu.

⁸A̱wot Itifanut, a̱ ku shya̱ shok A̱gwaza ma̱ng chet nyia̱ a̱cha̱chet nkyang a̱ga̱de ma̱ng a̱ri̱bi̱di ma̱ á̱niet ba a̱ni.

⁹A̱wot a̱ghyang a̱tuk, á̱ghyang á̱niet si̱ neet mi̱ tutu a̱tung A̱yahudawa a̱ghyang nang á̱ ngyei “Tutu A̱tung Á̱niet ba̱ Ghwut mi̱ Khwo a̱ni.” Ba̱ si̱ nwuo ya fwuang ma̱ng Itifanut. Ba̱ ku yet A̱yahudawa bya; ba̱ neet Si̱ri̱n, Ali̱ksa̱nda̱riya, Kilikiya ma̱ng fam a̱byin A̱siya.

¹⁰A̱mgba̱m mba á̱ mbyia̱ a̱tyu a̱ maai a̱ ya fwuang ma̱ng mumwang, ma̱ng si̱sak nang Itifanut ndyiat ma̱ng chet A̱za̱za̱rak Ntswa hu a̱ni bah.

¹¹Huhwa ba̱ si̱ fuut á̱ghyang á̱niet ba̱ bat Itifanut a̱hyiak nyia̱, “Zi̱ fa̱k nang Itifanut gu nyia̱ Musa ma̱ng A̱gwaza lihyat!”

¹²A̱ni wa ba̱ ku ndyiat. Ba̱ si̱ nfuut á̱niet ba, á̱khwukhwop á̱niet, ma̱ng a̱yaagwak tyiet doka A̱gwaza. Mat a̱nia, ba̱ si̱ ta̱bat Itifanut. A̱wot ba̱ si̱ bai ma̱ng a̱nggu a̱zaghyi a̱gba̱ndang a̱tung sot a̱cha̱chet A̱yahudawa ji.

¹³Á̱niet ba̱ bat Itifanut a̱hyiak na di̱ bwoi a̱ka̱laa a̱ni, si̱ nyia̱, “Kuzang jen a̱tyu wuni lyiat lihyat tazwa A̱za̱za̱rak A̱li Nwuat Za̱nang A̱gwaza wu, ma̱ng doka Musa ji.

¹⁴Zi̱ ka̱n fa̱k nang gu nyia̱ Yesu a̱tyu Na̱za̱ra̱t wuni na bi̱ri̱m A̱li Nwuat Za̱nang A̱gwaza ka, a̱wot a̱ shyak a̱mgba̱m taada nang Musa ghwon nzi̱t ndyo a̱ni!”

¹⁵Mi̱ di̱ yong a̱wa, konyan ma̱ a̱gba̱ndang a̱tung sot a̱cha̱chet A̱yahudawa ji, si̱ sak Itifanut á̱ghyi. Mat a̱ghyi nggu ba ku ya á̱ghyi mya̱myat nang a̱ta̱m ntswa A̱gwaza a̱ni!