Read tyap A̱romawa 11 Bible Online

A̱romawa 11 - tyap bible

A̱romawa 11

¹N nyia̱ a̱ni oo! A̱gwaza ka̱n dak á̱niet nggu ba ba̱ yet nwap Isi̱rela hu a̱ni a? Kaai, ku ma̱ chunchwiit! Nung ma̱ a̱pyia̱ nung n gyet a̱tyu Isi̱rela wa. N si̱ ngyet a̱ka̱mbwon Ibrahim. N neet mi̱ kwai Benyamin ja.[118]

²Kaai, A̱gwaza ka̱n dak á̱niet nggu ba nang gu khai neet gbangbang a̱ni bah. Nyi fi̱k kyang hu nang á̱ lyuut ma̱ A̱lyiat A̱gwaza na tazwa si̱ huni a̱ni a? Iliya a̱ta̱m a̱kwonu A̱gwaza si̱ kwop a̱dyii̱ng da̱ a̱vwuo A̱gwaza tazwa á̱niet Isi̱rela. A̱wot a̱ si̱ nyia̱,

³“A̱gwaza, á̱niet Isi̱rela ba hyaai a̱yaata̱m a̱kwonu ang ba! Ba̱ si̱ bi̱ri̱m a̱yaatyii nwuat za̱nang ang ba! Ma̱ nung gwa ma̱nyin nung bwat! A̱wot ma̱ninika, nung gwa meang, nang ba̱ kwan ba̱ hyat!”[119]

⁴A̱wot A̱gwaza si̱ nwuak Iliya shim nyia̱, “Kaai, n byia̱ sot á̱niet chyikwop a̱natat, da̱ ba̱ ka̱n mak kpaat a̱khwukhwut ba̱ si̱ kyuak ntong a̱zaghyi nghwughwu Baal a̱ni bah.”[120]

⁵Ma a̱nia wa ku ndi a̱fwun. A̱gwaza ku khai a̱bada̱dei sot á̱niet Isi̱rela, ba̱ ni̱ yet á̱tsotswat á̱niet, mat nang A̱gwaza nfa̱k shok mba gba̱mgbam a̱ni. A̱gwaza khai mba a̱nia, ku nang ba̱ mmaai a̱ni bah.[121]

⁶A̱wot mat shok A̱gwaza ja nang gu nkhai mbaa. Si̱ a̱hwa yet si̱ a̱tan nta̱m wa nang ba̱ nyia̱ a̱ni bah. Ka̱ A̱gwaza khai á̱niet mat a̱tan nta̱m mba wu wa, si̱ a̱hwa na yet a̱tsatsak fa̱k shok wa bah.

⁷A̱ni wa nang a̱lyiat na ndi; á̱niet Isi̱rela ma̱ a̱di̱di̱t ba̱ shya̱ shok A̱gwaza ji nang ba̱ tyia̱ a̱lyia̱ á̱ chat a̱ni bah. A̱wot a̱bada̱dei sot á̱niet kya ma̱ mba si̱ shya̱, á̱si̱ ba nang A̱gwaza khai a̱ni. A̱wot á̱kum á̱niet Isi̱rela ka, A̱gwaza si̱ tyia̱ mba gba̱p a̱pyia̱.

⁸Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱gwaza tyia̱ ba̱ si̱ kai nda bubwut. Ba̱ng ba̱ tat a̱fwun, a̱ si̱ nyim mba á̱ghyi ba, da̱nian ba̱ ka nwai nwuan á̱vwuo. A̱wot a̱ si̱ nyim mba a̱fufwuo ba, da̱nian ba̱ ka nwai fwuong á̱vwuo.”[122]

⁹Ma a̱nia wa, a̱gwam Da̱wuda ku nhyia̱ nyia̱, “Yok a̱di̱di̱t nkyayak mba wu a̱ yet mba a̱tsi̱ntsat, ma̱ng a̱kwi ntswam na̱ laai mba ba̱ dam nyia̱ kuzang kyang yet. Yok a̱li̱ba̱rka mba wu a̱ tyia̱ mba ba̱ ga̱u. A̱wot yok ba̱ swuo a̱bung cha̱chaat ma̱ng a̱bun mba wu.

¹⁰Yok á̱ghyi mba ba ba̱ kwa a̱fi̱fan, ki̱ di̱ ba̱ du nwuan á̱vwuo. A̱wot yok mi̱ma mba hu ku ghwap di̱ nyia̱ khwo si̱ nat sang sangba̱p.”[123]

¹¹N bu na ndyip, nang á̱niet Isi̱rela ba ntuk tak ba̱ si̱ kwa a̱ni, ba̱ bu na doot wa ba kee? A̱tsak a̱lyiat, ba̱ bu na doot. Mat a̱kwa mba ka di̱ lak khwi Yesu,[124] kikya mbyia̱ A̱gwaza si̱ nwuak Nnwap na̱ nwai yet A̱yahudawa a̱ni a̱wat ba̱ shya̱ san hu; da̱nian á̱niet Isi̱rela ba̱ ka kwi swam san Nnwap na̱ nwai yet A̱yahudawa a̱ni, a̱wot mba á̱niet Isi̱rela ba meang, ba̱ ka shya̱ san hu.

¹²Ka̱nang á̱niet Isi̱rela ba lak A̱gwaza a̱ san mbaa, ku tyia̱ A̱gwaza si̱ nang Nnwap na̱ nwai yet A̱yahudawa a̱ni a̱li̱ba̱rka gba̱mgbam mi̱ swanta hu. Si̱ huni fa, jen ji nang a̱mgba̱m á̱niet Isi̱rela na nsan A̱sham Nkhang di̱ ngaan a̱ni, swanta hu na shya̱ a̱li̱ba̱rka a̱ swak.[125]

¹³Ma̱ninika n dyiat ma̱ng a̱nyin Nnwap na̱ nwai yet A̱yahudawa a̱ni, mat nang A̱gwaza nkhai nung n gyet a̱ta̱m Yesu da̱ a̱vwuo nyin a̱ni. Huhwa n tam di̱ ta̱m nung hu.

¹⁴Mat n tyia̱ fwuo n na fuut nfwuo á̱niet nung na Isi̱rela ba̱ kwi swam san Nnwap na̱ nwai yet A̱yahudawa a̱ni, da̱nian á̱ghyang mba ba̱ ka shya̱ san.

¹⁵Jen nang A̱gwaza ku ndak á̱niet ma̱ a̱di̱di̱t mami á̱niet Isi̱rela ba a̱ni, ku fa nang A̱gwaza jhyi swat nggu hu di̱ yet á̱kpa̱ndang ma̱ng a̱mgba̱m Nnwap na̱ nwai yet A̱yahudawa a̱ni mi̱ swanta hu. Ka̱ a̱nia wa, jen ji A̱gwaza bu nsan á̱niet Isi̱rela ba a̱ni, ku na li ni wa? Ku na yet a̱sham a̱ swak za̱m! Ku na li á ngyei A̱gwaza ta̱ngam ba ma̱ng swuan ma̱ á̱niet ba̱ ka̱n kwi a̱ni!

¹⁶Kidee, ka̱ á̱kum a̱sunsun ka yet a̱za̱za̱rak, mat nang á̱ nneap ka ka̱ yet a̱za̱za̱rak za̱nang a̱ni;[126] ku tak nang a̱jhyem a̱kwang a̱sunsun wu meang mun a̱ yet a̱za̱za̱rak. A̱wot ma a̱nia wa, ka̱ á̱ni̱nan a̱kwon ba yet a̱za̱za̱rak, mbwak a̱kwon na mun a̱ yet a̱za̱za̱rak.[127]

¹⁷Á̱ ku tyap bwak ghyang da̱ a̱tsatsak a̱kwon za̱itun[128] nang á̱ chyui a̱ni. A̱wot nyin Nnwap na̱ nwai yet A̱yahudawa a̱ni, nyin bya yet kidee mbwak a̱kwon za̱itun a̱yit na, nang á̱ fwuop di̱ mbwak nkwon a̱tsatsak a̱kwon za̱itun wu a̱ni. Mat a̱nia, ma̱ninika, nyi na shya̱ a̱li̱ba̱rka Ibrahim wu ma̱nang mbwak a̱kwon nang á̱ fwuop da̱ a̱tsatsak za̱itun a̱ni, ni̱ nshya̱ a̱nwai neet da̱ á̱ni̱nan a̱tsatsak a̱kwon ba a̱ni.[129]

¹⁸A̱wot nyi yok tam bah. Nyi jhyung nang nyi ngyet mi̱ mbwak a̱kwon nia nang á̱ fwuop a̱ni. A̱wot nyin bya yet á̱tsatsak a̱ni̱nan wu bah.

¹⁹A̱wot shimba nyi na nyia̱, “Ii, á̱ ku tyap mbwak a̱tsatsak a̱kwon za̱itun na, da̱nian á̱ ka fwuop zi̱t da̱ a̱kwon kikya.”

²⁰A̱wot, a̱nia wa za̱m. A̱mgba̱m ma̱ng a̱nia, nyi jhyung nang á̱ ku ntyap mbwak a̱tsatsak a̱kwon na mat nang ba̱ ndak nwuak fwuo di̱ Kristi a̱ni. A̱wot á̱ si̱ nfwuop nyin, mat nang nyi nnwuak fwuo da̱ nggu a̱ni. Mat a̱nia, nyi yok tam bah. Da̱ a̱kwonu a̱kya, nyi ta̱bam ma̱ng kyang huni:

²¹Da̱nang A̱gwaza nghwon a̱tsatsak mbwak a̱kwon na a̱ni bah, nyi fa a̱ na ghwon nyin mbwak a̱kwon nang á̱ nfwuop a̱ni a?

²²A̱ji, zi̱ li si̱sak ji nang A̱gwaza wu ngyet a̱tyu fwuong kunak, a̱ si̱ bu yet a̱tyu a̱ ni̱ ba̱ng á̱niet mi̱ chet a̱ni[130]: A̱ ni̱ ba̱ng á̱niet ba̱ lak khwi nggu a̱ni[131] mi̱ chet. A̱wot a̱ ni̱ fwuong kunak nyin ka̱nang nyi ya a̱son di̱ nwuak fwuo di̱n shok nggu ji. Ka̱ nyi ma ngya a̱son bah, nyin mameang á̱ na tyam nyin á̱ weam.

²³A̱wot mba á̱niet Isi̱rela ba, ka̱ ba̱ ghwon a̱ka̱tuk mba wu ba̱ si̱ nwuak fwuo di̱ Yesu, á̱ na bwuok ma̱ng a̱mba, á̱ fwuop baa da̱ a̱tyin a̱tsatsak a̱kwon nang ba̱ za nshya̱ a̱ni. Mat A̱gwaza byia̱ chet nang gu bu na nfwuop ba da̱ a̱tyin a̱tsatsak a̱kwon ka a̱ni.

²⁴Nyin Nnwap na̱ nwai yet A̱yahudawa a̱ni, nyi li nang mbwak a̱kwon za̱itun a̱yit na a̱ni, nang á̱ fwuop nyin da̱ a̱tyin a̱tsatsak a̱kwon za̱itun nang á̱ chyui a̱ni. A̱wot fwuop a̱hwa vwuon ma̱ng za̱kwa swanta ji. Ka̱ A̱gwaza shim a̱ si̱ nyia̱ si̱ a̱hwa, ku fa nang gu mbyia̱ fwuo za̱m a̱ bu bwuok ma̱ng á̱niet Isi̱rela ba, a̱ nfwuop da̱ a̱tyin a̱tsatsak a̱kwon za̱itun ka.

²⁵Á̱na̱nyiuk nung ba ba̱ yet á̱niet khwi Yesu ba nang n chat a̱ni, n chat nyi chyi kyang huni ku shya̱ di̱ niat a̱ni bah, kalak nyi na kyiak á̱pyia̱ nyin nang á̱niet mumwang a̱ni. Á̱niet Isi̱rela ma̱ a̱di̱di̱t na ya a̱son ma̱ng gba̱p á̱pyia̱ mba, si̱ nang á̱ shya̱ a̱jhyem sot Nnwap na̱ nwai yet A̱yahudawa nang A̱gwaza khai ba̱ nwuak fwuo di̱ Kristi a̱ni.

²⁶A̱nia wa nang á̱ na nsan a̱mgba̱m á̱niet Isi̱rela ba[132]. Ma̱nang á̱ ndyuut a̱ni nyia̱, “A̱tyusan wu na ghwut mi̱ Si̱hiyona[133], a̱ ba̱ ti̱n gba̱p a̱pyia̱ hu di̱n kwai Yakubu ji.[134]

²⁷Si̱ huni hwa yet a̱li̱ka̱uli nung wu nang n da̱p ma̱ng a̱mba a̱ni; n na chi a̱ka̱tuk nyia̱ mba wu.”[135]

²⁸Nang á̱niet Isi̱rela ba ma̱ a̱di̱di̱t ndak san A̱sham Nkhang ka a̱ni, ba̱ si̱ tyia̱ á̱niet lak li A̱gwaza. A̱wot si̱ a̱hwa si̱ yet kpangti̱n da̱ a̱vwuo Nnwap na̱ nwai yet A̱yahudawa a̱ni. A̱mgba̱m ma̱ng a̱nia, mat nang A̱gwaza ku nkhai mba neet gbangbang a̱ni, a̱ ni̱ chat baa, mat a̱yaatyia̱ a̱khwop mba ba[136].

²⁹Mat A̱gwaza ni̱ shai fwuo nggu hu da̱ á̱niet[137] nang gu nang mba a̱ka̱wat ma̱ng si̱sak ji nang gu nkhai mba ba̱ yet á̱niet nggu a̱ni bah.

³⁰Gbangbang, nyin Nnwap na̱ nwai yet A̱yahudawa a̱ni, nyi ku yet á̱niet lak khwi A̱gwaza bya. A̱wot ma̱ninika, A̱gwaza fa̱k kunak nyin da̱ a̱kwonu á̱niet Isi̱rela ka, mat nang ba̱ ndak khwi nggu a̱ni.

³¹Ma a̱nia wa, mat nang á̱niet Isi̱rela ba ndak khwi A̱gwaza a̱ni, huhwa si̱ mbyia̱ gu si̱ nfa̱k kunak nyin, nyi yet Nwap na̱ nwai yet A̱yahudawa a̱ni; da̱nian A̱gwaza a̱ ka fa̱k kunak á̱niet Isi̱rela ba meang.

³²A̱gwaza tyia̱ konyan mi̱ khwo, mat si̱sak ji nang ba̱ ndak khwi nggu a̱ni. A̱ ni̱ nyia̱ a̱nia da̱nian gu ka tak nang gu nfwuong kunak konyan.

³³A̱tsak a̱lyiat! A̱kyenkyai shi A̱gwaza wu, mumwang nggu hu, ma̱ng lyen nggu hu swak zop ma̱ng fi̱k! A̱nyan wa si̱ mi̱n fi̱k a̱di̱dam nggu wu? Nvak nggu na swak lyen konyan!

³⁴Ma̱nang á̱ nhyia̱ ma̱ A̱lyiat A̱gwaza na a̱ni nyia̱, “A̱nyan wa lyen a̱di̱dam A̱gwaza wu? A̱nyan wa si̱ mi̱n tak gu kyang hu ku myim a̱ni?[138]

³⁵A̱nyan wa ka̱n mak nwuak A̱gwaza kyang gba̱mgbam, nang ku ngyet ta hwa A̱gwaza a̱ tan gu?”[139]

³⁶A̱tsak a̱lyiat, nggu wa nyia̱ kuzang kyang, a̱wot a̱mgba̱m nkyang nani nshya̱ mat chet nggu hu, da̱nian konyan a̱ ka nwuak gu shi. Yok dyep ku yet si̱ A̱gwaza si̱ nat sang sangba̱p! Samba̱rka!