Read tyap A̱romawa 13 Bible Online

A̱romawa 13 - tyap bible

A̱romawa 13

¹Ku yet ta hwa, konyan ma̱ nyin gu nwuak á̱niet ba̱ nyia̱ tyok tazwa nggu a̱ni shi. Mat kuzang tyok, A̱gwaza wa nwuat huu. A̱wot á̱niet ba̱ ba̱ng ntyok na a̱ni, A̱gwaza wa nsak ba.

²Mat a̱nia, konyan wa lak khwi a̱tyu a̱ nyia̱ tyok a̱ni, a̱ si̱ tyia̱ zat, a̱ tyia̱ zat ji di̱ kyang nang A̱gwaza wa kpaat a̱ni. A̱wot á̱ na nyia̱ tangka̱i a̱yin a̱hwa shi̱ri̱ya.

³A̱wot á̱niet ba̱ nyia̱ a̱tan nta̱m a̱ni, ba̱ si̱ mi̱n fa̱k a̱wun á̱niet ba̱ nyia̱ tyok a̱ni bah. Á̱niet ba̱ nyia̱ a̱ka̱tuk a̱ni, bibya na fa̱k a̱wun na. A chat a swan di̱ mi̱ fwuong a̱wun tyok a? Ka̱ a̱nia wa, nyia̱ a̱tan nta̱m, mat á̱niet ba̱ nyia̱ tyok a̱ni na chyin ang.

⁴A̱wot á̱niet ba̱ nyia̱ tyok a̱ni yet á̱khwo A̱gwaza bya. Ba̱ ni̱ nyia̱ a̱tan nta̱m da̱nian nyin. A̱wot ka̱ nyi nyia̱ a̱ka̱tuk, a̱tsak a̱lyiat, ku myim nyi fa̱k a̱wun. Mat á̱niet ba̱ nyia̱ tyok a̱ni, ba̱ byia̱ a̱wat nang ba̱ na nnyia̱ nyin shi̱ri̱ya a̱ni[146]. Ba̱ yet á̱niet nta̱m A̱gwaza bya nang á̱ ta̱m mba, da̱nian ba̱ ka nyia̱ á̱niet shi̱ri̱ya ji cha̱chaat tazwa a̱ka̱tuk nyia̱ mba wu.

⁵Mat a̱nia, ku yet ta hwa, nyi tyia̱ á̱pyia̱ nyin mbwak tyok mba hu, da̱nian nyi ka tyong swuo a̱bung hwa ma̱nyin hu bah, a̱wot mat nyi bu lyen á̱tsotswat nkyang nang nyi na nyia̱ a̱ni.

⁶Ku yet ta hwa nyi teang kurum ga̱ndu hu meang, da̱nian ntangka̱i nta̱m ntyok a̱gwomna̱ti nang ba̱ nyia̱ a̱ni. Mat ku myim á̱ teang á̱niet nta̱m a̱gwomna̱ti ba, da̱nian ba̱ nyia̱ A̱gwaza wa nta̱m na.

⁷Nyi tan konyan ta hu nang gu khwi nyin a̱ni. Nyi tan kurum ga̱ndu ma̱ng a̱ka̱kurum á̱ghyang nang á̱gwam ba tyei nyin a̱ni. A̱wot nyi fa̱k a̱wun, nyi bu nwuak a̱mgba̱m á̱gwam ba shi.

⁸Nyi yok ba̱ng ta a̱yin bah. Mi̱ ta ku myim á̱ khwi nyin a̱ni, huhwa yet nyi chat á̱ghyang nyin. Ki̱ nyi chat á̱kpa̱ndang swat nyin ba, nyi na nyia̱ kyang nang doka A̱gwaza ji chat a̱ni.

⁹Mat doká ji nyia̱, “Ku yet ta hwa, nyi yok katnaan, nyi yok hyat a̱yin bah, nyi yok nyiin bah, a̱wot nyi yok kwi swam di̱ kyang a̱yin bah.”[147] Doká jini ma̱ng a̱mgba̱m á̱kum doká A̱gwaza ka, á̱ tung ji mi̱ doka jhyung ja, jija yet, “Chat a̱kpa̱ndang swat ang wu, ma̱nang a nchat a̱pyia̱ ang a̱ni.”[148]

¹⁰A̱tyu a̱ chat a̱kpa̱ndang swat gu a̱ni, a̱ si̱ mi̱n nyia̱ nggu a̱ka̱tuk bah. Mat a̱nia, chat á̱ghyang hu yet khwi kyang nang doka A̱gwaza ji chat wa a̱ni.

¹¹Ku myim nyi nyia̱ nkyang nani ma a̱nggang, mat nyi lyen nang jen ji ntyiai. Nyi shyip, mat jen nang á̱ na nsan nzi̱t a̱ni bai kpa̱mkpaan; a̱ lan jen nang zi̱ ku ntsa nwuo khwi Yesu hu a̱ni.

¹²A̱tyetuk ka shim tyak. A̱tsotson nang zi̱ na nshya̱ san da̱ a̱vwuo A̱gwaza a̱ni si̱ shim tat. Mat a̱nia, si̱ nyi ghwon a̱ka̱tuk nta̱m nyin wu, na̱ li nang a̱yaatoot ba̱ byia̱ a̱lyuk a̱ni. Da̱ a̱kwonu a̱kya, si̱ nyi swan a̱tan swat a̱ na chok nyin nang nyi ni̱ nkup nkyang nzwang na̱ ya á̱ghyi ma̱ mya̱myat a̱myat a̱ta̱mam a̱ni.

¹³Mat nang zi̱ ngyet á̱niet zi̱ swan mi̱ sai hwa ba̱ nwai swan mi̱n dyin a̱ni, ku yet ta hwa zi̱ swan a̱tan swat, da̱nian a̱mgba̱m á̱niet ba ba̱ ka li tangka̱i swat nzi̱t hu. Nyi yok mun á̱pyia̱ ma̱ng á̱niet ba̱ swan mi̱ ndyin a̱ni bah. Ntangka̱i á̱niet nani nia yet; á̱niet tsot wun, á̱niet hyeng a̱kan, ku á̱niet katnaan ma̱ng á̱niet a̱shi̱shi̱k nyia̱ nang a̱ka̱la̱m a̱ni, ku á̱niet fwuon zok ma̱ng kwi swam ma̱ng á̱ghyang.

¹⁴Da̱ a̱kwonu a̱kya, nyi kwan nyi swan a̱tan swat, da̱nian nyi ka tai za̱kwa Yesu Kristi a̱ yet A̱tyoli nyin wu[149], nang á̱niet swanta ba na li a̱ni. A̱wot nyi yok shim nyi nyia̱ a̱di̱dam tazwa nvak nang nyi na nyia̱ a̱ka̱tuk nshyuo nang nvam nyin na chat a̱ni bah.