Read tyap A̱romawa 5 Bible Online

A̱romawa 5 - tyap bible

A̱romawa 5

¹Mat a̱nia, nang á̱ ntak kpa̱sai nang zi̱ ngyet á̱tsotswat ma̱ng sang a̱bun a̱zaghyi A̱gwaza mat nwuak fwuo nzi̱t hu da̱ nggu a̱ni, zi̱ byia̱ swat nyinyang ma̱ng A̱gwaza, mat kyang hu nang Yesu Kristi A̱tyoli nzi̱t wu nyia̱ nzi̱t ndyo a̱ni.

²Mat nang zi̱ nnwuak fwuo da̱ A̱gwaza a̱ni, Kristi si̱ nyia̱ nzi̱t shok. A̱ si̱ nang nzi̱t a̱wat zi̱ shya̱ a̱vwuo yong a̱zaghyi nggu. A̱ja wa nang zi̱ nshya̱ ma̱nini. A̱wot zi̱ ntyia̱ fwuo ma̱ng a̱gwai. Zi̱ nwuan á̱zanson nang zi̱ na nshya̱ shi A̱gwaza hu a̱ni[35].

³Ka̱ zi̱ doot zi̱ bu gwai meang, ku nang zi̱ ni̱ nswuo a̱bung ma̱ng mai a̱ni. A̱mgba̱m ma̱ng a̱nia, zi̱ lyen nang nkyang nani mbeang nzi̱t, a̱wot na̱ tyei nzi̱t, zi̱ gbang a̱lyia̱.

⁴A̱wot nang zi̱ mgbang a̱lyia̱ a̱ni, zi̱ mban ma̱ng a̱tan za̱kwa; ma a̱nia wa a̱tan za̱kwa wu na mban nzi̱t chet nang zi̱ na ntyia̱ fwuo nang A̱gwaza na nsan nzi̱t a̱ni.

⁵A̱wot ki̱ zi̱ ntyia̱ fwuo hu a̱ni, zi̱ si̱ mi̱n swuo nsum bah, ku ma̱ chunchwiit.[36] Zi̱ fi̱k si̱sak nang A̱gwaza nchat zi̱t a̱ni ba̱t[37], mat a̱ ka̱n nang nzi̱t A̱za̱za̱rak Ntswa wu, da̱nian gu ka swan mi̱ nfwuo nzi̱t na gba̱mgbam.

⁶Di̱n jen nang zi̱ ntyak chet, zi̱ lyen si̱sak nang zi̱ na mbeang á̱pyia̱ nzi̱t a̱ni bah, Kristi si̱ bai da̱ a̱cha̱chaat jen a̱wa, a̱ si̱ khwu da̱nian nzi̱t, á̱niet a̱ka̱tuk nyia̱.

⁷Ku vwuo a̱khwu a̱yin a̱ khwu da̱nian a̱tsotswat a̱yin. A̱wot shimba a̱ghyang a̱niet a̱ gbang a̱lyia̱, a̱ khwu da̱nian a̱tyu a̱ yet a̱tsatsak a̱tan a̱yin a̱ni.

⁸A̱wot A̱gwaza tak zi̱t kpa̱sai nang gu nchat zi̱t ba̱t, di̱ si̱sak nang gu nta̱m Kristi gu khwu da̱nian nzi̱t, neet nang zi̱ ni̱ yet á̱niet a̱ka̱tuk nyia̱ a̱ni.

⁹A̱wot nang A̱gwaza wa ntak kpa̱sai nang gu nkyiak zi̱t á̱tsotswat á̱niet ma̱ng sang a̱bun a̱zaghyi nggu, mat a̱sok Kristi na a̱ni, a̱tsak a̱lyiat, ku fa za̱m á̱ na ti̱n nzi̱t di̱ shi̱ri̱ya nang gu na nyia̱ ma̱ng mwai lyen nggu hu a̱ni.

¹⁰Ma a̱nia wa, ma̱nang zi̱ wa ni̱ ngyet á̱niet lak li A̱gwaza bya a̱ni, a̱wot Yesu Kristi si̱ jhyi swat kpa̱ndang nzi̱t hu ma̱ng A̱gwaza di̱n vak a̱khwu nggu hu, a̱tsak a̱lyiat, ku fa nang A̱gwaza na nsan nzi̱t za̱m di̱n vak nwuak swuan Nggwon nggu ji ja.

¹¹Mat a̱nia, ma̱ninika, ka̱ zi̱ doot zi̱ gwai A̱gwaza, mat A̱tyoli nzi̱t wu Yesu Kristi jhyi swat kpa̱ndang nzi̱t hu ma̱ng A̱gwaza.

¹²Jen nang A̱da̱mu nnyia̱ a̱ka̱tuk nyia̱ a̱ni, a̱ka̱tuk nyia̱ wu si̱ tyia̱ a̱mgba̱m á̱nietbishyi a̱khwu[38]. Mat a̱nia, a̱khwu ka yet swuo a̱bung hwa nang a̱mgba̱m á̱nietbishyi ba swuo a̱ni, mat ku li á ngyei a̱mgba̱m á̱nietbishyi bibya nyia̱ a̱ka̱tuk nyia̱ wu nang A̱da̱mu ku nyia̱ a̱ni. A̱ka̱tuk nyia̱ A̱da̱mu wu si̱ tyia̱ a̱khwu, a̱nia wa a̱khwu ka si̱ mbai tazwa konyan, mat konyan nyia̱ a̱ka̱tuk nyia̱.[39]

¹³A̱tsak a̱lyiat, á̱nietbishyi mi̱ swanta ku nyia̱ a̱ka̱tuk neet nang á̱ ka̱n nwuak doka ji bah. A̱wot A̱gwaza si̱ kyiak á̱nietbishyi á ngyei ba̱ sang a̱bun, di̱n jen nang ba̱ nnyia̱ a̱ka̱tuk nyia̱ a̱ni, Mat á̱ mbyia̱ doká nang á̱nietbishyi na tyat a̱ni bah[40].

¹⁴A̱mgba̱m ma̱ng a̱nia, a̱khwu ka si̱ nyia̱ tyok tazwa a̱mgba̱m á̱niet ba, neet di̱n jen A̱da̱mu si̱ nat jen Musa ji, ku nang á̱niet ba ku nwai khwi kam ku neet da̱ a̱vwuo A̱gwaza, ma̱nang A̱da̱mu a̱ni. Ma̱ninika, ka̱ doot A̱da̱mu a̱ yet kidee Kristi ja, a̱tyu a̱ ku nwai bai di̱n jen a̱ja a̱ni.[41]

¹⁵A̱wot za̱nang A̱gwaza ji̱ yet Kristi a̱ni, si̱ vwuon ma̱ zan ma̱ng a̱ka̱tuk nyia̱ A̱da̱mu wu. A̱ka̱tuk nyia̱ a̱tyo a̱nyiung, a̱ yet A̱da̱mu a̱ni, si̱ tyia̱ á̱niet ma̱ a̱di̱di̱t a̱khwu. A̱wot a̱mgba̱m ma̱ng a̱nia, ku yet a̱tsatsak a̱lyiat wa a̱ swak nang a̱tyo a̱nyiung wu a̱ yet Yesu Kristi, ntyia̱ á̱niet ma̱ a̱di̱di̱t si̱ shya̱ a̱gba̱ndang za̱nang shok A̱gwaza gba̱mgbam ma̱ng za̱nang chi a̱ka̱tuk nyia̱, ji̱ si̱ kai á̱niet ma̱ a̱di̱di̱t.

¹⁶A̱wot zang za̱nang shok A̱gwaza ji vwuon ma̱ zan ma̱ng zang a̱ka̱tuk nyia̱ A̱da̱mu ji. Jen nang A̱da̱mu ku nnyia̱ a̱ka̱tuk nyia̱ a̱ni, a̱ka̱tuk nyia̱ wu si̱ tyia̱ A̱gwaza si̱ nyia̱ a̱mgba̱m á̱nietbishyi ba mi̱ swanta hu shi̱ri̱ya. A̱wot za̱nang shok A̱gwaza ji si̱ tyia̱ nang A̱gwaza ntak kpa̱sai nang gu nkyiak zi̱t zi̱ yet á̱tsotswat á̱niet ma̱ng sang a̱bun a̱zaghyi nggu, ku nang á̱ nshya̱ nzi̱t ma̱ng a̱bun ma̱ a̱di̱di̱t di̱ nyia̱ a̱ka̱tuk nyia̱ a̱ni.

¹⁷Ma a̱nia wa, jen nang a̱tyo nyiung nang á̱ ngyei A̱da̱mu nnyia̱ a̱ka̱tuk nyia̱ a̱ni, a̱ si̱ tyia̱ a̱khwu si̱ nyia̱ tyok tazwa konyan. A̱mgba̱m ma̱ng a̱nia, ku yet a̱tsatsak a̱lyiat wa á̱ swak, nyia̱ á̱niet ba ba̱ san a̱gba̱ndang shok ma̱ng za̱nang yet á̱tsotswat a̱zaghyi nggu a̱ni, ba̱ na shya̱ swuan swai. Ba̱ nyia̱ tyok tazwa a̱ka̱tuk nyia̱ ma̱ng a̱khwu, mat a̱tyo nyiung wuni, nggu wa yet Yesu Kristi.

¹⁸A̱tsak a̱lyiat,[42] jen nang A̱da̱mu ndak khwi a̱lyiat A̱gwaza na a̱ni, ku si̱ tyia̱ A̱gwaza na nyia̱ a̱mgba̱m á̱niet ba shi̱ri̱ya. A̱wot ma a̱nia wa, nang Kristi nnyia̱ tsotswat a̱ si̱ khwi a̱lyiat A̱gwaza, a̱wot a̱ si̱ khwu a̱ni, ku si̱ tyia̱ A̱gwaza si̱ tak kpa̱sai nang gu nkyiak a̱mgba̱m á̱niet ba yet á̱tsotswat bya ma̱ng sang a̱bun a̱zaghyi nggu. A̱wot a̱ si̱ tyia̱ a̱mgba̱m á̱niet ba ba̱ shya̱ swuan swai.

¹⁹A̱wot ma̱nang A̱da̱mu ndak khwi gba A̱gwaza hu a̱ni, ku si̱ tyia̱ á̱niet ma̱ a̱di̱di̱t si̱ nyia̱ a̱ka̱tuk nyia̱. Ma a̱nia wa, si̱sak nang Yesu Kristi nkhwi a̱lyiat A̱gwaza na a̱ni, ku si̱ tyia̱ á̱niet ma̱ a̱di̱di̱t si̱ yet á̱tsotswat á̱niet.

²⁰Kyang ku mbyia̱ á̱ nwuak doka ji a̱ni, huhwa yet; da̱nian a̱mgba̱m á̱niet ba ba̱ ka fi̱k za̱kwa a̱ka̱tuk nyia̱ mba ji. A̱wot ku nang á̱niet ba mban a̱ka̱tuk nyia̱ wu a̱ni, ma a̱nia wa A̱gwaza si̱ mban nyia̱ mba shok ji̱ swak a̱nia a̱ni gba̱mgbam.

²¹Ma a̱nia wa, ma̱ninika, ma̱nang a̱ka̱tuk nyia̱ wu nnyia̱ tyok tazwa a̱mgba̱m á̱niet ba a̱ni, a̱wot a̱ si̱ tyia̱ mba a̱khwu ka a̱ni; ma a̱nia wa, a̱gba̱ndang shok A̱gwaza wu nnyia̱ tyok tazwa nzi̱t da̱ a̱kwonu a̱ka̱tuk nyia̱. A̱wot shok A̱gwaza ji si̱ tyia̱ nang A̱gwaza ntak kpa̱sai nang gu nkyiak zi̱t zi̱ yet á̱tsotswat á̱niet ma̱ng sang a̱bun bya a̱zaghyi nggu. Shok jini bu tyia̱ nang zi̱ nshya̱ swuan sang sangba̱p di̱ mun á̱pyia̱ ma̱ng Yesu Kristi a̱ yet A̱tyoli nzi̱t wu a̱ni.